བཀའ་ཟུར་བདེ་སྐྱིད་ཆོས་དབྱངས་མཆོག་གིས་སྲིད་སྐྱོང་ནི་དྲང་པོ་དང་ཆོལ་ཁའི་ཕྱོགས་ཞེན་མེད་མཁན་ཞིག་དགོས་པ་གསུངས་འདུག

བཀའ་ཟུར་བདེ་སྐྱིད་ཆོས་དབྱངས་མཆོག་གིས་ཉེ་ཆར་གསལ་བཏོན་གནང་བའི་སྲིད་སྐྱོང་ལ་ཚང་དགོས་པའི་ཆ་རྐྱེན་དགུར་གཞི་བཞག་ཐོག་རིང་མིན་སྲིད་སྐྱོང་གི་འོས་ཤོག་དེ་སྲིད་སྐྱོང་འོས་མི་སྤེན་པ་ཚེ་རིང་མཆོག་ལ་འོས་འཕང་རྒྱུ་ཡིན་ཅེས་གསུངས་ཡོད་པ་རེད། དེ་ཡང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་ཟུར་བདེ་སྐྱིད་ཆོས་དབྱངས་མཆོག་གིས་ཟླ་བ་སྔོན་མའི་ཕྱི་ཚེས་ ༢༨ དང་ཁ་ཉིན་ཕྱི་ཚེས་ ༧ ཉིན་ཁོང་གིས་བཀའ་བློན་གྱི་ལས་གནས་ནས་དགོངས་ཞུ་གནང་དགོས་པའི་རྒྱུ་མཚན་དང་། ལྷག་དོན་མ་འོངས་པའི་སྲིད་སྐྱོང་གི་འོས་མི་དེ་དྲང་པོ་དང་ ཕྱི་གསལ་ནང་གསལ། དེ་བཞིན་ལས་དོན་མཉམ་རུབ་ཀྱིས་སྒྲུབ་ཐུབ་མཁན་དགོས་པ་སོགས་ཆ་རྐྱེན་ཁག་དགུ་གསལ་བཏོན་གནང་བའི་ཐོག་མང་ཚོགས་ཚོའི་ངོས་ནས་ཀྱང་དགོངས་པ་ཆེ་བཞེས་ཀྱིས་མ་འོངས་པའི་འགོ་ཁྲིད་དེ་མ་ནོར་བ་ཞིག་འདེམས་དགོས་པའི་འབོད་སྐུལ་གནང་ཡོད་པ་རེད། འདི་ག་རླུང་འཕྲིན་ཁང་གིས་ཁ་སང་ཕྱི་ཚེས་ ༨ ཉིན་གྱི་ཕྱི་དྲོར་ཞལ་པར་བརྒྱུད་བཀའ་ཟུར་བདེ་སྐྱིད་ཆོས་དབྱངས་མཆོག་ལ་ཉེ་ཆར་ཁོང་གིས་སྔ་རྗེས་སུ་སྤེལ་བའི་གསལ་བསྒྲགས་དང་འབྲེལ་བའི་བཀའ་འདྲི་ཁག་ཅིག་ཞུས་པར།  ཁོང་གིས་ཉེ་བའི་ལོ་བཞི་དང་ཕྱེད་ཀ་ལྷག་རིང་ད་ལྟའི་སྲིད་སྐྱོང་འོས་མི་བློ་བཟང་སེང་གེ་མཆོག་དང་སྤེན་པ་ཚེ་རིང་མཆོག་རྣམ་གཉིས་དང་ལྷན་དུ་ཁོར་ཡུག་གཅིག་གི་ནང་ཕྱག་ལས་གནང་སྐབས་ཁོང་རྣམ་པ་གཉིས་ཀྱི་དགོངས་པ་བཞེས་སྟངས་དང་།  ཕྱག་ལས་གནང་སྟངས། དེ་བཞིན་ཁོང་རང་ཉིད་ཀྱིས་ཉེ་ཆར་གསལ་བཏོན་གནང་པའི་སྲིད་སྐྱོང་ལ་ཚང་དགོས་པའི་ཆ་རྐྱེན་དགུར་གཞི་བཞག་ཐོག་རིང་མིན་སྲིད་སྐྱོང་གི་འོས་ཤོག་དེ་སྲིད་སྐྱོང་འོས་མི་སྤེན་པ་ཚེ་རིང་མཆོག་ལ་འཕང་རྒྱུ་ཡིན་ཅེས་གསུངས་སོང་།

བོད་མིའི་སྒྲིག་འཛུགས་ཀྱི་བཀའ་ཟུར་བདེ་སྐྱིད་ཆོས་དབྱངས་མཆོག་གིས་ཁོང་བཀའ་བློན་ནས་དགོངས་ཞུ་བྱ་དགོས་པའི་རྒྱུ་མཚན་གང་ཡིན་གསལ་བསྒྲགས་གནང་བ་དང་སྦྲགས། མང་ཚོགས་ཀྱི་འོས་འདེབས་བྱ་རྒྱུའི་མ་འོངས་པའི་སྲིད་སྐྱོང་དེ་ནི་དྲང་པོ་དང་ཆོལ་ཁའི་ཕྱོགས་ཞེན་མེད་མཁན་ཞིག་དགོས་པ་སོགས་ཀྱི་ཆ་རྐྱེན་དགུ་གསལ་བསྟོན་གནང་འདུག ཕྱི་དྲིལ་བཀའ་ཟུར་བདེ་སྐྱིད་ཆོས་དབྱངས་མཆོག་གིས་ཟླ་བ་སྔོན་མའི་ཕྱི་ཚེས་ ༢༨ ཉིན་བཀའ་བློན་གྱི་ལས་གནས་ནས་དགོངས་ཞུ་གནང་ཡོད་པ་དང།  སྐབས་དེར་ཁོང་གིས་སྒེར་དོན་ལས་སྤྱི་དོན་གཙོ་བ་དང་། མ་འོངས་པར་ང་ཚོའི་མདུན་དུ་ལྷག་པའི་གནད་དོན་གལ་འགངས་ཆེ་ཁག་ལ་གདོང་ལེན་བྱ་ཕྱོགས་བཅས་ལ་ཡུན་རིང་ནས་བསམ་ཞིབ་གཏིང་ཟབ་གནང་ནས་ད་ལན་བཀའ་བློན་གྱི་ལས་གནས་དངོས་སུ་དགོངས་ཞུ་གནང་པ་ཡིན་ཞེས་གསུངས་ཡོད་པ་མ་ཟད། ལྷག་པར་དུ་ཁོང་གིས་ད་ལན་བཀའ་བློན་ནས་དགོངས་ཞུ་དགོས་པའི་རྒྱུ་མཚན་ཞིབ་ཕྲ་རྗེས་སུ་གསལ་བཤད་ཞུ་རྒྱུ་ཡིན་ཅེས་གསུངས་ཡོད་པ་རེད། དེ་རིང་ཟླ་ ༣ ཚེས་ ༧ ཉིན་བཀའ་ཟུར་བདེ་སྐྱིད་ཆོས་དབྱངས་མཆོག་གིས་འདི་གར་བཏང་འབྱོར་བྱུང་བའི་བརྙན་དཔར་ཞིག་གི་ཐོག་ཁོང་བཀའ་བློན་གྱི་ལས་གནས་ནས་དགོངས་ཞུ་བྱ་དགོས་པའི་རྒྱུ་མཚན་གཙོ་བོ་འོས་བསྡུའི་ཆེན་མོའི་བགྲོ་གླེང་གི་ལས་རིམ་ཁག་ཏུ་ཞུགས་བདེ་བའི་ཆེད་ཡིན་པ་ལས། ཕྱིའི་གནོན་ཤུགས་ལས་བྱུང་བ་ཞིག་མིན་ལ། སྐབས་རྗེས་མའི་བཀའ་ཤག་ཏུ་བསྐོ་གཞག་བྱེད་མིན་ལའང་འབྲེལ་བ་མེད་ཅེས་གསུངས་པ་མ་ཟད། ཁོང་སྒེར་གྱི་ངོས་ནས་ཐེངས་འདིའི་འོས་བསྡུ་བརྒྱུད་རིམ་ནང་བསམ་ཚུལ་ཤུགས་ཆེན་པོ་ཞིག་ཡོད་སྐོར་འགྲེལ་བརྗོད་གནང་པ་དང་འབྲེལ། མང་ཚོགས་ཀྱི་འོས་འདེམས་བྱ་རྒྱུའི་མ་འོངས་པའི་སྲིད་སྐྱོང་ལ་ངེས་པར་དུ་ཚང་དགོས་པའི་ཆ་རྐྱེན་ཁག་དགུ་གསལ་བཏོན་གནང་སྟེ་དེའི་ཐོག་དགོངས་པ་ཆེ་བཞེས་ཡོང་བའི་འབོད་སྐུལ་གནང་འདུག བཀའ་ཟུར་མཆོག་གིས་ཡིག་ཆ་དེའི་ནང་ སྲིད་སྐྱོང་ནི་ཐོུང་གི་ཁེ་ཕན་ལ་ནུས་ཤུགས་འདོན་མཁན་། དེའང་གང་ཟག་གང་ཞིག་གི་ཀུན་སློང་དང་འབད་བརྩོན་ཚང་མ་ཐོུང་གི་ཁེ་ཕན་ལ་ནུས་ཤུགས་འདོན་མཁན་ཞིག་དང་། ཕྱོགས་ཡོངས་དང་རྒྱང་རིང་པོར་བསམ་བློ་གཏོང་ཐུབ་མཁན་ཞིག་དགོས་པ་མ་ཟད། དོན་དངོས་བརྗོད་མཁན་དང་། ཕྱི་གསལ་ནང་གསལ་དང་དྲང་པོའི་ཐོག་དྭོགས་འདྲི་ཁག་ལ་ལན་འདེབས་གནང་མཁན་གྱི་ཟོལ་མེད་ལྡན་པ་ཞིག་དགོས་ཀྱི་རེད་ཅེས་གསུངས་ཡོད། དེ་བཞིན་སྲིད་སྐྱོང་དེ་ལས་དོན་མཉམ་རུབ་ཀྱིས་སྒྲུབ་ཐུབ་མཁན་དང་ཕྱིའི་མཐོང་སྣང་ལས་དོན་དངོས་རྩ་ཆེན་དུ་བརྩི་མཁན། རང་ཉིད་ཀྱི་ལས་རོགས་དང་དེ་སྔའི་ལས་ཀྱི་སྣེ་མོ་བ་རྣམས་ཀྱི་མཛད་རྗེས་ལ་ངོས་འཛིན་དང་ཆེ་མཐོང་སྤྲོད་མཁན། རང་ཉིད་ཀྱི་ཡོན་ཏན་གྱི་སྟེང་ལ་རྐང་པ་བཙུགས་ནས་ལངས་པ་མ་གཏོགས་༸རྒྱལ་བ་རིན་པ་ཆེ་དང་ཟམ་གདོང་རིན་པོ་ཆེ་ལྟ་བུའི་མཚན་ཐོག་ནས་མང་ཚོགས་ཁྲོད་ནས་རང་ཉིད་ལ་ཀྱི་ཡིད་ཆེས་དང་གུས་བརྩི་ཐོབ་བྱེད་ལ་བེད་སྤྱོད་མི་བྱེད་མཁན་ཞིག་དགོས་པ། རང་བསྟོད་མི་བྱེད་པར་གཞན་གྱི་ཤེས་ཚད་དང་འཇོན་ཐང་བརྩི་བཀུར་ཞུ་མཁན། ལྷག་པར་དུ་ལུང་ཚན་གྱི་འཐེན་འཁྱེར་སྤངས་ནས་ལུང་ཚན་གྱི་ཕྱོགས་ཞེན་དེ་སྒེར་གྱི་འོས་ཤོག་ཐོབ་ཆེད་དུ་བེད་སྤྱོད་མི་བྱེད་མཁན་ཞིག་དགོས་ཀྱི་ཡོད་ཅེས་འགྲེལ་བརྗོད་གནང་འདུག རྩ་བའི་ཡིག་ཆ་དེའི་ནང་བཀའ་ཟུར་མཆོག་གིས་སྲིད་སྐྱོང་ལ་ཚང་དགོས་པའི་ཆ་རྐྱེན་མ་གཏོགས་གང་ཟག་སྒེར་གྱི་མིང་འདོན་གང་ཡང་གནང་མིན་འདུག...