བོད་ཀྱི་ལོ་གསར་སྐབས་ཆོས་ཕྱོགས་ཀྱི་གནང་སྒོར་དམ་བསྒྲགས་དང་ཁ་བྲལ་བར་སྔར་ལྷག་གདོང་ལེན་བྱ་དགོས་སྐོར་གཏམ་བཤད་སྤེལ་བ།

འདི་ལོ་རབ་གནས་མེ་བྱའི་བོད་ཀྱི་གནམ་ལོ་གསར་བཞད་སྐབས་རྒྱ་ནག་གཞུང་གིས་བོད་རང་སྐྱོང་ལྗོངས་ཞེས་པའི་ས་ཁུལ་ཁག་གཙོ་བོར་གྱུར་པའི་བོད་ཀྱི་ས་གནས་ཁག་ཏུ་ཆབ་སྲིད་ཀྱི་དམ་བསྒྲགས་དང་བོད་མིའི་ཆོས་ཕྱོགས་ཀྱི་གནང་སྒོར་ཚོད་འཛིན་བྱས་པ་དང་། ས་གནས་རྒྱ་གཞུང་འགོ་ཁྲིད་རྣམས་ཀྱིས་རྒྱལ་ཁབ་ཀྱི་བདེ་འཇགས་དང་བརྟན་ལྷིང་སོགས་ཀྱི་མིང་བྱང་འོག་བོད་མི་ཚོས་ཁ་བྲལ་བའི་ལས་འགུལ་སྤེལ་ཁག་ལ་སྔར་ལྷག་གདོང་ལེན་བྱ་དགོས་པ་སོགས་ཀྱི་གཏམ་བཤད་ཤུགས་ཆེ་བྱས་འདུག ཁ་སང་ཟླ་ ༣ ཚེས་ ༧ ཉིན་ཨ་མི་རིའི་རྒྱལ་ས་ཝ་ཤིང་ཊོན་ཌི་སིར་རྟེན་གཞི་བྱས་པའི་རྒྱལ་སྤྱི་བོད་དོན་ལས་འགུལ་ཁང་གིས་རྒྱ་གཞུང་གིས་འདི་ལོའི་བོད་ཀྱི་ལོ་གསར་སྐབས་བོད་མི་ཚོར་དམ་བསྒྲགས་ཀྱིས་ཚོད་འཛིན་བྱས་པ་དང་འབྲེལ་བའི་བོད་ནང་འམ་ Inside Tibet ཞེས་པའི་དཔྱད་གཏམ་ཞིག་སྤེལ་འདུག དཔྱད་གཏམ་དེའི་ནང་ཟླ་བ་སྔོན་མའི་ཕྱི་ཚེས་ ༢༧ དང་བོད་ཀྱི་གནམ་ལོ་གསར་བཞད་ཀྱི་བོད་ཚེས་ ༡ ཉིན་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཟེར་བའི་མངལ་ཁུལ་གྱི་དམར་ཤོག་ཚོགས་པའི་དྲུང་ཆེ་ Wu Yingjie ཡིས་ལོ་གསར་གྱི་གཏམ་བཤད་སྤེལ་བའི་ཁྲོད། ས་གནས་དགོན་སྡེ་ཁག་གི་གྲྭ་བཙུན་དང་། གཞུང་འབྲེལ་མི་སྣ་རྣམས་ལ་རྒྱལ་ཁབ་ཀྱི་བརྟན་ལྷིང་དང་བདེ་འཇགས་སྲུང་སྐྱོབ་སོགས་ལ་འགན་འཁྲི་ཆེན་པོ་ཡོད་སྐོར་འགྲེལ་བརྗོད་དང་འབྲེལ། གྲྭ་བཙུན་རྣམས་ཀྱིས་གནད་དོན་བཟང་ཉེས་དབྱེ་འབྱེད་བྱས་ནས་རྒྱ་ནག་རྒྱལ་ཁབ་ཀྱི་གཅིག་བསྒྲིལ་དང་བདེ་འཇགས་སོགས་ལ་གཏོར་རྒོལ་དང་ངན་བྱུས་རིགས་སྤེལ་མཁན་རྣམས་ལ་མཐའ་གཅིག་ཏུ་ངོ་རྒོལ་བྱ་དགོས་པ་མ་ཟད། རང་ཉིད་སློབ་མ་དང་མང་ཚོགས་ལ་རྒྱལ་ཁབ་བརྟན་ལྷིང་དང་འབྲེལབའི་སློབ་གསོ་བསྐྲུན་དགོས་གལ་ཡིན་པ་སོགས་ཆབ་སྲིད་ཀྱི་གཏམ་བཤད་ཤུགས་ཆེ་བྱས་འདུག Wu Yingjie ཡིས་ཁུལ་དེར་རྟེན་གཞི་བྱས་པའི་རྒྱ་ནག་སྤྱི་སྡེ་ལས་ཁུངས་ཀྱི་ལས་བྱེད་རྣམས་ལ་ཡང་ལོ་གསར་གྱི་དུས་སྐབས་ཙམ་མ་ཟད།...