བོད་རིགས་གཞོན་སྐྱེས་ཚོར་ནང་ཆོས་ངོ་སྤྲོད་ཀྱི་བཀའ་ཆོས་དབུ་འཛུགས་མཛད་པ།

དེ་རིང་གི་ཉིན་མོ་འདི་ནི་དེ་སྔ་ཕྱི་ལོ་ ༡༩༤༥ ལོར་ཨ་རིས་ཉི་ཧོང་གི་ hiroshima དང་ Nagasaki ཞེས་པའི་ས་ཚིགས་གཉིས་སུ་འབར་རྫས་གཡུགས་ནས་མི་ལོ་ ༧༥ འཁོར་བའི་ཉིན་མོ་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་གཞོན་སྐྱེས་ཚོར་ཆོས་འབྲེལ་དབུ་འཛུགས་མ་བསྐྱང་གོང་ཉིན་མོ་དེ་རྗེས་དྲན་མཛད་པ་དང་འབྲེལ་འཛམ་གླིང་འདིའི་ཐོག་དཀའ་ངལ་གང་འདྲ་ཞིག་འཕྲད་རུང་གྲོས་མོལ་གྱི་ལམ་ནས་སེལ་ཐབས་གནང་དགོས་པ་ལས་དགྲ་བོ་རྩ་མེད་བཟོ་རྒྱུ་ཟེར་བ་ནི་དུས་ཚོད་ཡོལ་བའི་སྐད་ཆ་ཞིག་རེད་ཅེས་ལམ་སྟོན་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་དེ་སྔ་ཕྱི་ལོ་ ༡༩༤༥ ལོའི་དམག་ཆེན་གཉིས་པའི་མཇུག་ཏུ་ཉི་ཧོང་ཁུལ་དུ་ཡོད་པའི་ hiroshima དང་ Nagasaki ཞེས་པའི་ས་ཚིགས་གཉིས་སུ་འབར་རྫས་བཀད་པའི་ཉིན་མོ་དང་ལྷག་པར་དུ་ཁུལ་དེར་མགོན་པོ་༸གང་ཉིད་མཆོག་ཆེད་ཕེབས་མཛད་མྱོང་ཡོད་པ་སོགས་ཀྱི་དེ་བྱུང་ཐུགས་དྲན་གསོས་པ་དང་ཆབས་ཅིག རྡུལ་ཕྲན་ཞེས་པ་དེ་རང་རྒྱལ་གཞན་ཕམ་གྱི་བློ་ངན་པའི་དབང་གིས་དགྲ་བོ་རྩ་མེད་གཏོང་རྒྱུའི་བློ་ཞིག་དང་མིའི་རང་བཞིན་ལྷན་སྐྱེས་སུ་ཡོད་པའི་བཟང་པོའི་སྤྱོད་པའི་དམིགས་ཡུལ་ལས་འདས་པ་ཞིག་ཡིན་པ་རེད། ལྷག་པར་དུ་དེང་སྐབས་ངལ་བ་མི་ཉུང་བ་ཞིག་འཕྲད་བཞིན་པའི་ཐོག་ད་དུང་དམག་ལ་དང་འདོད་བྱ་རྒྱུ་ནི་ཤིན་ཏུ་ནས་མ་འོས་པ་ཞིག་ཡིན་སྟབས་འཛམ་གླིང་གི་ཞི་བདེ་ཞེས་པ་དེ་ཚིག་ཙམ་མིན་པར་ལག་ལེན་ངོ་མའི་ཐོག་ནས་འབད་དགོས་པ་དང་དཀའ་ངལ་གང་འདྲ་ཞིག་འཕྲད་རུང་གྲོས་མོལ་གྱི་ལམ་ནས་སེལ་ཐབས་གནང་དགོས་པ་ལས་དགྲ་བོ་རྩ་མེད་བཟོ་རྒྱུ་ཟེར་བ་ནི་དུས་ཚོད་ཡོལ་བའི་སྐད་ཆ་རེད་ཅེས་ལམ་སྟོན་བཀྲིན་ཆེ་བ་བསྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་དེ་རིང་གིཉིན་མོ་དང་བསྟུན་གསུང་འཕྲིན་ཞིག་བསྩལ་ཏེ་རྒྱལ་སྤྱིའི་གཞུང་དང་ཚོགས་སྒེར་ཡོངས་ནས་འཛམ་གླིང་འདིར་ཞི་བདེ་བསྐྲུན་རྒྱུ་དེ་རང་ཉིད་ཀྱི་ལས་དོན་གཙོ་བོ་ཞིག་ལ་ངོས་འཛིན་རྒྱུའི་དམ་བཅའ་འཇོག་དགོས་པའི་གཞེན་སྐུལ་མཛད་པ་དང་འབྲེལ། ང་ཚོས་རྡུལ་ཕྲན་མཚོན་ཆ་དང་གོ་མཚོན་ཐོན་སྐྱེད་ཀྱི་ལས་དོན་མཐའ་དག་ཕུགས་རྒྱང་རིང་པོའི་དམིགས་ཡུལ་ངེས་ཅན་ཞིག་བཟུང་ནས་གཙང་སེལ་བྱེད་དགོས་པ་མ་ཟད། ཞི་བདེ་ཞེས་པ་དེ་ཆོས་ཉམས་ལེན་གནང་བ་ཁོ་ནས་ཡོང་ཐབས་མེད་སྟབས། ང་ཚོ་དང་ཁོ་ཚོ་ཞེས་རིམ་པ་གཉིས་པའི་བློ་དེ་དོར་ནས་གོ་ལ་གཅིག་གྱུར་གི་འདུ་ཤེས་གོང་སྤེལ་གནང་སྟེ་ཞི་བདེ་བསྐྲུན་དགོས་པར་བཀའ་བསྩལ་ཡོད།གཞི་རྩའི་དེ་རིང་གི་རྟེན་འབྲེལ་བསྟོད་པའི་ཆོས་འབྲེལ་འདི་ནི་༸གོང་ས་༸སྐྱབས་མགོན་ཆེན་པོ་མཆོག་གིས་གཞོན་སྐྱེས་ལ་བསྩལ་བའི་ཆོས་འབྲེལ་གྱི་ཉིན་མཐའ་མ་དེ་ཆགས་ཡོད་པ་དང་། སྐབས་དེར་ཇཱ་བོད་ཁྱིམ་གྱི་སློབ་ཟུར་བདེ་སྐྱིད་སྒྲོལ་མ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོོག་གི་༸སྐུའི་ཐུགས་བསྐྱེད་ཆེན་པོ་བཞི་ལས་སློབ་མས་གང་དང་གང་བསྒྲུབ་ཐུབ་བམ་ཞེས་བཀའ་འདྲི་ཞུས་པར་མགོན་པོ༸གང་ཉིད་མཆོག་གིས་༸སྐུའི་ཐུགས་བསྐྱེད་ཆེན་པོ་བཞི་པོ་རེ་རེ་བཞིན་ངོ་སྤྲོད་བཀའ་དྲིན་བསྩལ་བ་དང་སྦྲགས། ཐུགས་བསྐྱེད་གསུམ་པ་སྟེ་བོད་མི་ཞིག་ཡིན་པའི་ཆ་ནས་བོད་ཀྱི་ཆོས་དང་རིག་གཞུང་། སྐད་ཡིག དེ་བཞིན་ཁོར་ཡུག་བཅས་སྲུང་སྐྱོབ་མཛད་ཐབས་ཞེས་པ་དང་འབྲེལ་བོད་ཀྱི་ནང་པའི་ཆོས་ལས་ཚད་མའི་གཞུང་དང་འབྲེལ་ནས་རིགས་པའི་ལམ་ནས་གསུང་རྒྱུ་ཡོད་པའི་དཔལ་ན་ལེནྡཱའི་ཆོས་བརྒྱུད་དེ་འཛམ་གླིང་འདིའི་ནང་གི་ཡག་ཤོས་སམ་སྤུས་དག་ཤོས་དེ་ཡིན་པ་མ་ཟད།...

དེ་རིང་ཕྱི་ཟླ་ ༨ ཚེས་ ༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་བོད་རིགས་གཞོན་སྐྱེས་རྣམས་ལ་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་ཉིན་གཉིས་པའི་སྐབས་ཆོས་རྒྱུ་མཚན་དུ་མ་བྱས་པར་སེམས་ཁམས་རིག་པའི་གནས་ཚུལ་ཤེས་པའི་སྒོ་ནས་གཞན་ལ་ཕན་བཏགས་པ་དང་། མི་ཚེ་འདིར་རང་སྐྱིད་པོ་ཞིག་ཡོང་རྒྱུའི་རྒྱུ་མཚན་དུ་བྱས་ནས་བཟང་པོ་གནང་རྒྱུ་དེ་ཆོས་དང་མ་འབྲེལ་བའི་བཟང་སྤྱོད་རེད་ཅེས་ལམ་སྟོན་བསྩལ་སོང་།མགོན་པོ་༸གང་ཉིད་ཆོག་གིས་ཁ་སང་གི་བཀའ་ཆོས་འཕྲོ་སྐྱོང་མཛད་མཚམས་སུ་སློབ་ཕྲུག་རྣམས་ལ་བཀའ་འདྲི་དགོངས་སྐོར་ཞུ་རྒྱུའི་གོ་སྐབས་བཀའ་དྲིན་ཆེ་བར་བསྩལ་དོན་ལྟར་ཅོན་ཏ་རཱ་བོད་ཁྱིམ་སློབ་གྲྭའི་སློབ་མ་བསྟན་སྒྲོལ་ལགས་ཀྱིས་ཆོས་ལུགས་དང་འབྲེལ་བའི་བཟང་སྤྱོད། ཆོས་ལུགས་དང་མ་འབྲེལ་བའི་བཟང་སྤྱོད་ཅེས་པ་གཉིས་ཀྱི་དབྱེ་མཚམས་ཇི་ལྟར་འཇོག་དགོས་སམ་ཞེས་བཀའ་འདྲི་ཞུས་པར་མགོན་པོ་མཆོག་གིས་ཆོས་རྒྱུ་མཚན་དུ་བྱས་ནས་སྐྱེ་བ་སྔ་ཕྱི་དང་དགེ་སྡིག་སོགས་ཀྱི་སྒོ་ནས་གཞན་ལ་ཕན་བཏགས་པ་དང་བཟང་པོ་བྱེད་པ་ནི་ཆོས་དང་འབྲེལ་བའི་བཟང་སྤྱོད་ཅིག་ཡིན་པ་དང་། ཆོས་རྒྱུ་མཚན་དུ་མ་བྱས་པར་སེམས་ཁམས་རིག་པའི་གནས་ཚུལ་ཤེས་པའི་ཐོག་ནས་མིའི་ལྷན་སྐྱེས་སུ་ཡོད་པའི་བཟང་པོའི་རང་བཞིན་གྱི་བློ་དེ་སྤྱོད་ནས་མི་ཚེ་འདིར་སྐྱིད་པ་དང་འཛམ་གླིང་སྤྱི་ལ་ཕན་ཐོགས་གནང་རྒྱུ་དེ་ཆོས་དང་མ་འབྲེལ་བའི་བཟང་སྤྱོད་རེད་ཅེས་ལམ་སྟོན་མཛད་སོང་། སྐབས་དེར་སློབ་ཕྲུག་གཞན་ཞིག་གིས་རང་རྒྱལ་གཞན་ཕམ་གྱི་བློ་མེད་པའམ་གཞན་གཅེས་པར་འཛིན་པའི་བློའི་ཐོག་ནས་འགྲན་བསྡུར་གནང་ཐབས་ཡོད་དམ་ཞེས་བཀའ་འདྲི་ཞུས་པར་མགོན་པོ་མཆོག་གིས་སྤྱིར་འགྲན་བསྡུར་ལ་གནོད་སེམས་དང་། རང་རྒྱལ་གཞན་ཕམ་གྱི་འགྲན་བསྡུར་ཞིག་དང་། ཕན་སེམས་ཀྱི་འགྲན་བསྡུར་ཞེས་གཉིས་ཡོད་པ་ལྟར་རང་རྒྱལ་གཞན་ཕམ་མིན་པར་ཕ་རོལ་པོའི་བློ་གྲོས་ཡར་རྒྱས་འགྲོ་རྒྱུར་དམིགས་པའི་འགྲན་བསྡུར་དེ་དགོས་ངེས་ཅན་ཞིག་ཡིན་པར་བཀའ་བསྩལ་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་ཆོས་འབྲེལ་ཐོག་དེང་དུས་ཀྱི་བོད་ཕྲུག་ཡིན་པ་གང་ཞིག་དངོས་པོ་ཡང་རྒྱས་ཁོ་ན་ལ་བསམ་བློ་བཏང་མཁན་ཚོས་འཕྲོད་བསྟེན་ཞེས་བརྗོད་སྐབས་གཟུགས་ཀྱི་འཕྲོད་བསྟེན་ལས་སེམས་ཀྱི་འཕྲོད་བསྟེན་སྐོར་སྐད་ཆ་བཤད་མཁན་ཞིག་མེད་པར་བཀའ་བསྩལ་བ་དང་འབྲེལ། སེམས་ཀྱི་འཕྲོད་བསྟེན་དེ་རྒྱ་གར་གྱི་གནའ་བོའི་རིག་གཞུང་ལས་སྤྱོད་པ་འཚེ་བ་མེད་པ་དང་བྱམས་བརྩེ་སོགས་དང་འབྲེལ་བའི་སེམས་ཁམས་རིག་པའི་ལྟ་བ་ཁོ་ནས་ཁ་གསབ་ཐུབ་པ་ལས་དེང་དུས་ཀྱི་རིག་གཞུང་ལས་ཡོང་ཐབས་མེད་སྟབས་དེར་དོ་སྣང་བྱེད་དགོས་གལ་ཡིན་པར་བཀའ་བསྩལ་ཡོད། མགོན་པོ་༸གང་ཉིད་མཆོག་གིས་སྤྱིར་ཆོས་ལུགས་ཀུན་ལ་ལྟ་སྤྱོད་གཉིས་ཡོད་པ་ལྟར་སངས་རྒྱས་པའི་ཆོས་ཀྱི་སྙིང་པོ་ལའང་ལྟ་བ་དང་སྤྱོད་པ་གཉིས་ཡོད་པ་དང་། ལྟ་བ་དེ་ཚན་རིག་དང་འབྲེལ་བའི་ལྟ་བ་རྟེན་འབྱུང་དང་། སྤྱོད་པ་ཞེས་བརྗོད་སྐབས་འཛམ་གླིང་གི་ཞི་བདེ་དང་འབྲེལ་ནས་སྤྱོད་པ་འཚེ་བ་མེད་པ་ཞེས་གཉིས་ཡོད་པ་སློབ་ཕྲུག་ཚོས་ངེས་པར་དུ་ཤེས་དགོས་གནད་ཡིན་པར་ལམ་སྟོན་བཀྲིན་ཆེ་བ་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ན་ལེནྡཱའི་ཆོས་བརྒྱུད་ནི་རིག་པའི་ལམ་ནས་གཏན་ལ་དབབ་ནས་བཤད་རྒྱུ་ཡོད་པ་མ་ཟད་ཚན་རིག་དང་མཉམ་དུ་འགྲོ་རྒྱུ་ཡོད་པ་ཞིག་ཡིན་པ་བཀའ་བསྩལ་བ་དང་སྦྲགས། དེ་ནི་བོད་པའི་ཐུན་མིན་གྱི་རིག་གཞུང་ཞིག་ཡིན་པ་དང་། དཔལ་ན་ལེནྡཱའི་ཆོས་བརྒྱུད་ཀྱི་གཞུང་ཆེན་དག་ལ་ཆེད་གཉེར་གནང་དགོས་བྱུང་ཚེ་བོད་པའི་སྐད་ཡིག་འདི་མེད་དུ་མི་རུང་བ་ཅིག་ཆགས་ཡོད་སྟབས། ན་ལེནྡཱའི་རིག་གཞུང་ནི་བོད་པའི་རིག་གཞུང་ཞིག་ཡིན་པ་བཀའ་བསྩལ་སོང་བ་དང་ཆབས་ཅིག རིག་གཞུང་འདི་བརྒྱུད་ནས་མ་འོངས་པར་རྒྱ་ནག་དང་མཉམ་དུ་འཆམ་མཐུན་ངང་སྡོད་རྒྱུ་བྱུང་ཚེ་རྒྱ་ནག་གི་ནང་པ་ཚོ་ལའང་ཞབས་འདེགས་ཞུ་ཐུབ་ངེས་ཡིན་པ་བཀའ་བསྩལ་སོང་།

བོད་རིགས་གཞོན་སྐྱེས་རྣམས་ཀྱིས་ཇི་ལྟར་གསོལ་བ་བཏབ་པ་བཞིན་དེ་རིང་སྔ་དྲོ་ཆུ་ཚོད་ ༩ པ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་དབུ་འཛུགས་བཀའ་དྲིན་བསྐྱངས་སོང་།བཀའ་ཆོས་ཀྱི་ཐོག་མ་དེར་མགོན་པོ་༸གང་ཉིད་མཆོག་གིས་འཛམ་གླིང་འདིའི་ཐོག་ཆོས་འདོད་མཁན་དང་མི་འདོད་མཁན། དེ་བཞིན་ཆོས་ལ་དགག་པ་གནང་མཁན་སོགས་མིའི་རིགས་འདྲ་མིན་ཡོད་ཀྱང་དོན་དངོས་ཐོག་ཆོས་ཚང་མའི་གཞི་རྩའི་བསླབ་བྱ་གཙོ་བོ་དེ་ནི་བྱམས་པ་དང་བརྩེ་བ་ཡིན་པས་དེ་ནི་འགྲོ་བ་མིའི་རང་བཞིན་ལྷན་སྐྱེས་སུ་ཡོད་པ་དང་། ལྷག་པར་དུ་འགྲོ་བ་མིའི་རིགས་ཐམས་ཅད་བདེ་བ་འདོད་པ་དང་སྡུག་བསྔག་མི་འདོད་པ། དེ་བཞིན་སྤྱི་ཚོགས་ཁྲོད་གཅིག་ལ་གཅིག་བརྟེན་ཐོག་ནས་འཚོ་དགོས་པ་གཅིག་མཚུངས་ཡིན་སྟབས་ཆོས་ཀྱི་བསླབ་བྱའི་སྙིང་པོ་ནི་སེམས་པ་བཟང་པོ་བྱེད་རྒྱུ་དེ་ཡིན་པ་ལྟར་སྲོག་ཆགས་ཐམས་ཅད་ཀྱིས་དེར་དགའ་མོས་བྱེད་ཀྱི་རེད་ཅེས་ལམ་སྟོན་བཀྲིན་ཆེ་བ་བསྩལ་སོང་།དེ་བཞིན་༸གོང་ས་མཆོག་གིས་རྒྱ་གར་ནས་དར་བའི་ནང་པ་སངས་རྒྱས་པའི་ཆོས་འདི་འཚེ་བ་མེད་པ་དང་སྙིང་རྗེ་གཞི་རྩར་བཞག་པའི་ཆོས་ཤིག་དང་ཆོས་དེའི་ནང་ཡོད་པའི་ལྟ་གྲུབ་དང་སེམས་ཁམས་རིག་པའི་རྣམ་བཞག་དེ་དག་ནི་ཐུན་མོང་མ་ཡིན་པ་ཞིག་ཡིན་པས་དེང་སྐབས་ཚན་རིག་མཁས་པ་ཚོས་ཀྱང་དམིགས་བསལ་དོ་སྣང་གནང་སྐོར་སོགས་བཀའ་བསྩལ་དང་སྦྲགས། ལྷག་པར་དུ་ལམ་བསླབ་པ་གསུམ་གྱི་ཐོག་བཀའ་འགྲེལ་ཞིབ་རྒྱས་མཛད་ནས་དེ་རིང་གི་བཀའ་ཆོས་དངོས་གཞི་རྟེན་འབྲེལ་བསྟོད་པའི་བཀའ་ཆོས་དབུ་འཛུགས་བསྐྱངས་ཡོད།༸གོང་ས་མཆོག་གི་བཀའ་ཆོས་བསྩལ་གྲུབ་མཚམས་སུ་དྲྭ་ལམ་ཐོག་ལྷན་ཞུགས་གནང་བའི་བོད་རིགས་ན་གཞོན་ཁག་ཅིག་ནས་མགོན་པོ་༸གང་ཉིད་མཆོག་ལ་བྱམས་པ་དང་སྙིང་རྗེ། ལྟ་བ་རྟེན་འབྱུང་ཉམས་ལེན་གནང་ཐབས་སོགས་ཀྱི་ཐོག་བཀའ་འདྲི་དགོངས་སྐོར་ཁག་ཅིག་ཞུས་པར་༸གོང་ས་མཆོག་གིས་རང་གཅེས་འཛིན་གྱི་བསམ་བློ་ཤུགས་ཆེ་དྲག་རྐྱེན་རང་གཞན་ཐམས་ཅད་མ་སྐྱིད་པ་ཡོང་གི་ཡོད་པ་དང་། རྟེན་འབྲེལ་དང་བྱང་ཆུབ་སེམས་ཀྱི་སྐོར་ལ་ཇི་ཙམ་ཉམས་ལེན་གནང་བ་དེའི་ཚོད་ཀྱིས་སེམས་ལ་ཞི་བདེ་བག་ཕེབས་ཡོང་ངེས་ཡིན་པར་ལམ་སྟོན་མཛད་ཡོད།མགོན་པོ་༸གང་ཉིད་མཆོག་གིས་དེ་བཞིན་ང་ཚོས་ལུས་པོའི་འཕྲོད་བསྟེན་ལ་དོ་སྣང་གནང་བ་ལྟར་སེམས་ཀྱི་འཕྲོད་བསྟེན་ལ་དོ་སྣང་གནང་གལ་ཡིན་པ་དང་། ལྷག་པར་དུ་དེང་སྐབས་ཚན་རིག་པ་ཚོས་ཀྱང་བློ་རིག་དང་སེམས་ཁམས་རིག་པའི་རྣམ་བཞག་ལ་དོ་སྣང་དང་དཔྱད་ཞིབ་སོགས་གནང་གི་ཡོད་སྐོར་བཀའ་བསྩལ་ཡོད། གཞི་རྩའི་ཐེངས་འདིའི་བཀའ་ཆོས་འདི་དེ་རིང་ནས་དབུ་འཛུགས་ཀྱིས་གནངས་བར་ཉིན་གྲངས་གསུམ་རིང་སྩོལ་གྱི་ཡོད་པ་དང་། བཀའ་ཆོས་འདི་དབྱིན་སྐད་དང་ཧིཾདྷི། རྒྱ་སྐད། དེ་བཞིན་བལ་ཡུལ། ཧྥ་རན་སི། ར་ཤི་ཡ། སི་པེན། ཝི་ཏི་ནམ་དང་ཉི་འོང་སོགས་སྐད་རིགས་མི་འདྲ་བ་ ༡༤ ནང་གསུང་སྒྱུར་གནང་གི་ཡོད་པ་དང་། གསུང་ཆོས་ཞུ་མཁན་རྣམས་ནས་ཕན་ཚུན་བར་ཐག་བཅད་དེ་འགྲོ་འདུག་གི་སྤྱོད་ལམ་བསྟེན་ཕྱོགས་སོགས་ས་གནས་སོ་སོར་བཅད་པའི་བཀའ་རྒྱ་ལས་ནམ་ཡང་མི་འདའ་བར་གསན་གཟིགས་གནང་རོགས་ཞེས་གཞེན་སྐུལ་གནང་འདུག

དེ་རིང་ཕྱི་ཟླ་ ༡ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་བཞུགས་སྒར་དགའ་ལྡན་འཕེལ་རྒྱས་གླིང་དུ་བོད་རིགས་གཙོས་ཕྱི་རྒྱལ་ཡུལ་གྲུ་འདྲ་མིན་ནས་ཕེབས་པའི་དད་ལྡན་མང་ཚོགས་བཅུ་ཕྲག་ཁ་ཤས་ཤིག་ལ་མཇལ་ཁ་བསྩལ་བ་དང་སྦྲགས། བོད་རིགས་གཞོན་སྐྱེས་ཚོས་བོད་ཀྱི་སྐད་ཡིག་ལ་དོ་སྣང་དང་སློབ་སྦྱོང་བྱེད་རྒྱུ་གལ་ཆེ་ཡིན་པར་བཀའ་བསྩལ་འདུག མགོན་པོ་༸གང་ཉིད་མཆོག་གིས་སྐབས་དེར་བོད་ལ་ཡོད་པའི་སརྒྱས་པའི་ཆོས་བརྒྱུད་དེ་དཔལ་ནཱ་ལེནྡཱའི་ཆོས་བརྒྱུད་ལས་ཆས་པའི་དྲི་མ་མེད་པའི་ཆོས་བརྒྱུད་ཅིག་ཡིན་པ་མ་ཟད་ཚད་མ་རིག་པ་དང་འབྲེལ་ནས་ཡོད་སྟབས། དེང་གི་དུས་སུ་ཕྱིའི་མཁས་པ་མང་དག་ཅིག་གིས་བོད་ཀྱི་སརྒྱས་པའི་ཆོས་དེ་ནཱ་ལེནྡཱའི་ཆོས་བརྒྱུད་ངོ་མ་ཞིག་ཡིན་པ་དང་། ནཱ་ལེནྡཱའི་ཆོས་བརྒྱུད་དེ་ཚན་རིག་དང་མཐུན་པ་ཞིག་ཡོད་སྐོར་གསུང་མཁན་དུ་མ་ཞིག་ཡོད་པ་ལྟར་ཚན་རིག་པ་ཚོས་ཀྱང་སརྒྱས་པའི་ཆོས་ལ་བསྔགས་བརྗོད་ཆེན་པོ་གནང་གི་ཡོད་སྐོར་བཀའ་བསྩལ་དང་འབྲེལ་ཏེ་སེམས་ཁམས་རིག་པ་དང་ཚད་མ་རིག་པར་འགྲེལ་བཤད་གནང་སྐབས་བོད་སྐད་དང་བོད་ཡིག་དེ་ཡག་ཤོས་ཡིན་སྟབས་བོད་རིགས་གཞོན་སྐྱེས་ཚོས་བོད་ཀྱི་སྐད་དང་ཡི་གེ་ལ་དོ་སྣང་ཆེན་པོ་བྱེད་དགོས་པ་བཀའ་བསྩལ་འདུག མགོན་པོ་༸གང་ཉིད་མཆོག་གིས་བོད་ཀྱི་མཁན་སློབ་ཆོས་གསུམ་གྱིས་སརྒྱས་ཀྱི་བསྟན་པ་དར་སྤེལ་གནང་བ་དེ་གཏིང་ཟབ་པོ་ཞིག་ཡིན་སྐོར་བཀའ་བསྩལ་དང་འབྲེལ། སྤྱིར་བོད་དང་རྒྱ་ནག་གཉིས་དབར་ལ་ཆོས་རྒྱལ་སྲོང་བཙན་གྱི་སྐུ་དུས་སུ་ཇོ་བོ་གདན་ཞུ་གནང་རྒྱུ་མཚོན་པའི་འབྲེལ་བ་ཆེན་པོ་ཡོད་ཀྱང་། ནང་པའི་ཆོས་དེ་ནཱ་ལེནྡཱའི་ནས་བཞེས་དགོས་པ་གཟིགས་ཏེ་མཁན་ཆེན་ཞི་བ་འཚོ་གདན་ཞུ་གནང་ཡོད་པ་མ་ཟད་དུས་རབས་བདུན་པའི་ནང་ཆོས་རྒྱལ་སྲོང་བཙན་གྱིས་རྒྱ་ནག་གོང་མའི་སྲས་མོ་དང་འཁྲུངས་ས་སྐྱོན་ཡོད་ནའང་རྒྱ་གར་གྱི་ཡི་གེར་དཔེ་བླངས་ནས་བོད་ཡིག་གསར་གཏོད་གནང་བ་ནི་གྱོང་བོ་ཞིག་ཡིན་པར་བཀའ་བསྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་དུས་རབས་བརྒྱད་པའི་ནང་མཁན་ཆེན་ཞི་བ་འཚོས་ནང་ཆོས་སློབ་གཉེར་བྱ་ཕྱིར་སརྒྱས་པའི་ཆོས་བརྒྱུད་དེ་བོད་ཡིག་ནང་བསྒྱུར་དགོས་པ་བཀའ་གནང་བ་ལྟར་བཀའ་འགྱུར་དང་བསྟན་གྱུར་པོ་ཏི་གསུམ་བརྒྱ་བོད་བསྒྱུར་ཞུས་ཡོད་སྐོར་བཀའ་བསྩལ་བ་དང་འབྲེལ། རྒྱ་ནག་གིས་བོད་ཀྱི་ཆོས་དང་རིག་གཞུང་གཏོར་བཤིག་གཏང་རྒྱུའི་ཐབས་ཤེས་རིམ་པར་བྱས་ཀྱང་དེ་ལྟར་བྱེད་ཐུབ་ཀྱི་མེད་པ་དང་། ནང་པའི་ཆོས་ལ་གཞིགས་ཏེ་རྒྱ་ཡིག་ལས་བོད་ཡིག་དེ་ཡག་པ་ཆགས་ཡོད་པར་བརྟེན་དེར་སྤོབས་པ་བྱ་དགོས་པ་ཞིག་ཡིན་པར་བཀའ་བསྩལ་ཡོད་པ་རེད།

རྒྱལ་ས་ལྡི་ལིའི་ནང་རྟེན་གཞི་བྱས་པའི་རྒྱ་གར་གི་སྙན་གྲགས་ཆེ་བའི་ JNU འམ་ནེཧ་རུ་གཙུག་ལག་སློབ་གཉེར་ཁང་དུ་ཁ་སང་དང་དེ་རིང་བཅས་ཉིན་གྲངས་གཉིས་ཀྱི་རིང་བཙན་བྱོལ་ནང་གི་བོད་རིགས་གཞོན་སྐྱེས་ཚོར་འཕྲད་བཞིན་པའི་དཀའ་ངལ་ལ་གདོང་ལེན་གནང་ཕྱོགས་དང་འབྲེལ་བའི་ཟབ་སྦྱོང་ཞིག་ཚོགས་ཀྱི་ཡོད་པ་དང་། ནེཧ་རུ་གཙུག་ལག་སློབ་གཉེར་ཁང་གི་བོད་ཀྱི་གླེང་སྟེགས་དང་དབྱིན་ཇིའི་རྒྱལ་ས་ལོན་ཊོན་གྱི་ Westminister  གཙུག་ལག་སློབ་གྲྭ་ཐུན་མོང་ནས་གོ་སྒྲིག་ཞུས་པའི་ཟབ་སྦྱོང་ཐོག་རྒྱ་གར་ནང་ཡོད་པའི་བོད་རིགས་གཞོན་སྐྱེས་སྤྱི་དང་ལྷག་དོན་བཙན་བྱོལ་བོད་མིར་ཁྲིམས་ཀྱི་དཀའ་ངལ་དང་འགྲོ་བ་མིའི་ཐོབ་ཐང་གི་དཀའ་ངལ།   ཤེས་ཡོན། བོད་པའི་ཚོགས་པ་ཁག་ལ་བཙན་བྱོལ་བ་ཡིན་པའི་ཆ་ནས་འཕྲད་བཞིན་པའི་དཀའ་ངལ་སོགས་ཀྱི་བརྗོད་གཞི་འདྲ་མིན་ཐོག་གྲོས་བསྡུར་གནང་གི་ཡོད་པ་རེད།    ཟབ་སྦྱོང་འདིའི་ཐོག་ཚོགས་བཅར་བ་ཙམ་མ་གཏོགས་གཞན་ཕྱི་མི་སུ་གང་ཡང་ཕེབས་ཆོག་གི་མེད་ནའང་། རྒྱ་གར་གྱི་ས་ཕྱོགས་གང་ས་ནས་ཕེབས་པའི་སློབ་ཕྲུག་དང་མཐོ་རིམ་སློབ་གྲྭའི་སློབ་མ། བོད་མི་ལས་འགུལ་བ། དེ་བཞིན་ལས་བྱེད་དང་ཉམས་ཞིབ་པ་སོགས་ཁྱོན་ཚོགས་བཅར་བ་མི་གྲངས་ ༦༠ ལྷག་ཡོད་པ་དང་། ཚོགས་བཅར་བ་དེ་དག་དབར་བཙན་བྱོལ་བ་ཞིག་ཡིན་པའི་ཆ་ནས་སློབ་ཕྲུག་ཞིག་ལ་མཐོ་རིམ་སློབ་གྲྭ་ཁག་ཏུ་སློབ་འཇུག་སྐབས་འཕྲད་པའི་དཀའ་ངལ་དང་། སློབ་ཡོན་གྱི་དཀའ་ངལ་སོགས་དཀའ་ངལ་མང་དག་ཅིག་ལ་གདོང་ལེན་གནང་དགོས་སྟབས། ད་རེས་ཚོགས་བཅར་ཚོས་ངལ་བ་འདྲ་མིན་འཕྲད་བཞིན་པ་རྣམས་མཉམ་སྤུངས་ཀྱིས་ཐུན་མོང་གི་དཀའ་ངལ་ཞིག་ལ་ངོས་འཛིན་ཐུབ་ཐབས་དང་། དེ་འབྲེལ་དཀའ་ངལ་དེ་དག་ལ་གདོང་ལེན་གནང་ཕྱོགས་ཀྱི་ཐབས་ལམ་སོགས་ཀྱི་སྐོར་བཀའ་བསྡུར་གནང་གི་འདུག གནས་ཚུལ་ཤེས་རྟོགས་བྱུང་བར་གཞིགས་ན། ཉིན་གྲངས་གཉིས་ཀྱི་ཟབ་སྦྱོང་ཐོག་བོད་རིགས་གཞོན་སྐྱེས་རྣམས་ལ་རྒྱ་གར་གྱི་འགྲོ་བ་མིའི་ཐོབ་ཐང་ཚོགས་པ་དང་། ཤེས་ཡོན་དང་འབྲེལ་བའི་བོད་ཕྲུག་ཁྱིམ་སྡེ། སཾ་བྷོ་ཊ་སློབ་སོགས་ཀྱི་སློབ་ཁག་གི་འགན་འཛིན།  སྤྱི་ཚོགས་ཞབས་ཞུ་བ་དང་དེ་བཞིན་ལས་འགུལ་སོགས་ནས་ཟབ་ཁྲིད་གནང་གི་ཡོད་པ་ལྟར་གཞོན་སྐྱེས་ཕན་ཚུན་དབར་དགོངས་ཚུལ་བརྗེ་རེས་གནང་གི་ཡོད་པ་རེད།

ཁ་སང་ཕྱི་ཚེས་ ༢༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་གཟིམ་ཆུང་མཇལ་ཁར་ཕེབས་པའི་བོད་པ་ཚོར་བོད་ཀྱི་ཐུན་མོང་མ་ཡིན་པའི་སྐད་ཡིག་གི་རིན་ཐང་ངོ་སྤྲོད་སྦྲགས། བོད་རིགས་གཞོན་སྐྱེས་ཚོས་བོད་སྐད་དང་བོད་ཡིག་ཐོག་དོ་སྣང་བྱེད་དགོས་གནད་ཡིན་པར་བཀའ་སློབ་བསྩལ་འདུག༸གོང་ས་༸སྐྱབས་མགོན་ཆེན་པོ་མཆོག་ནས་དེང་སང་འཛམ་གླིང་གི་ས་ཕྱོགས་གང་སར་མི་མང་པོ་ཞིག་སེམས་འཁྲུགས་ཏེ་སེམས་པ་མ་སྐྱིད་པའི་ངང་གནས་བཞིན་པའི་དུས་སྐབས་དང་། ལྷག་པར་དུ་འགྲོ་བ་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེ་ཡིན་པ་ཕྱག་དཔེ་ཁག་ཏུ་གསུངས་པ་ཙམ་མ་ཟད། ཚན་རིག་མཁས་པ་ཚོས་ཀྱང་དེ་ལྟར་གསུང་བཞིན་ཡོད་ཀྱང་། མིའི་སྤྱི་ཚོགས་ཁྲོད་དུ་ང་དང་ཁྱོད་ཅེས་ཆགས་སྡང་གི་སྐད་ཆ་ཧ་ཅང་ཤུགས་ཆེན་པོ་ཤོད་པའི་དུས་སྐབས་འདིར་མཁན་ཆེན་ཞི་འཚོས་བོད་མི་ཚོར་རྩིས་སྤྲོད་གནང་བའི་ཐབས་བྱང་ཆུབ་ཀྱི་སེམས་དང་ཤེས་རབ་སྟོང་ཉིད་རྟོགས་པའི་ལྟ་བ་རྩ་བར་བྱས་པའི་དཔལ་ནཱལེནྡཱའི་ཆོས་ཚུལ་དེ་ཧ་ཅང་གི་རིན་ཐང་ཆེན་པོ་ཡིན་པ་དང་། དེ་ལྟ་བུའི་རིན་ཐང་ཅན་གྱི་ཐབས་བྱང་ཆུབ་ཀྱི་སེམས་དང་ཤེས་རབ་སྟོང་ཉིད་རྟོགས་པའི་ལྟ་བའི་སྐོར་འགྲེལ་བཤད་ཞིབ་ཚགས་པོ་དང་སྤུས་དག་པོ་བརྒྱབ་ཐུབ་མཁན་གྱི་སྐད་དེ་བོད་སྐད་ཁོ་ན་ཉིད་ཡིན་པ་སོགས་བཀའ་བསྩལ་དང་འབྲེལ། བོད་པ་ཚོས་ག་ཚོད་ཐུབ་ཐུབ་ཀྱིས་རང་རེའི་ཕྲུ་གུ་ཚོར་བོད་སྐད་དང་བོད་ཡིག་སློབ་རྒྱུར་དོ་སྣང་ཤུགས་ཆེ་ཙམ་བྱེད་དགོས་པ་མ་ཟད། ལྷག་པར་དུ་གཞོན་སྐྱེས་ཚོ་སྡོད་ས་ཕྱིའི་རྒྱལ་ཁབ་ཡིན་ཀྱང་བོད་སྐད་དང་བོད་ཡིག་ཤེས་པ་ཞིག་བྱེད་རྒྱུར་དོ་སྣང་ཆེ་ཙམ་བྱེད་དགོས་ཞེས་ལམ་སྟོན་མཛད་འདུག  གཟིམ་ཆུང་མཇལ་ཁའི་ཐོག་ཕེབས་པའི་མི་རབས་རྒན་པ་ཚོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩེ་བ་ཆེན་པོའི་ངང་ནས་ང་ཚོ་བོད་པ་ཚོས་དུས་རྒྱུན་ནས་ཚེ་རབས་ནས་ཚེ་རབས་བར་དུ་ཞེས་བཤད་སྲོལ་ཡོད་པ་ལྟར། ང་ཚོ་མི་ཚེ་གཅིག་གི་སྐད་ཆ་མིན་པར་ཚེ་རབས་ནས་ཚེ་རབས་བར་དུ་ངོ་ཤེས་སོགས་ཀྱི་འབྲེལ་བ་ཡོད་སྟབས། ཁྱེད་རྣམ་པ་འཆི་ཟིན་པའི་དུས་ཤིག་ཤར་ཤར་ཚེ་མགོན་པོ་༸གང་ཉིད་མཆོག་ནས་ཁ་བཏགས་ཤིག་བསྣམས་ཏེ་བོད་ཀྱི་ཐུན་མོང་མ་ཡིན་པའི་ལྷ་བསྐལ་འཕགས་མཆོག་སྤྱན་རས་གཟིགས་ལ་མི་འདི་དང་འདི་ལ་ཚེ་རབས་ནས་ཚེ་རབས་བར་དུ་སྐྱབས་འཇུག་གནང་རོགས་ཞེས་ཐུགས་སྨོན་མཛད་རྒྱུ་ཡིན་ཞེས་བཀའ་བསྩལ་བ་དང་ཆབས་ཅིག ལོ་ན་རྒས་པོ་རྒས་མོར་ཕེབས་པ་རྣམས་བློ་བདེ་པོ་དང་ང་ཚོ་བོད་པའི་མི་རིགས་ལ་སྐྱེས་ཤིང་སངས་རྒྱས་ཀྱི་བསྟན་པ་དང་མཇལ་རྒྱུ་བྱུང་བ་འདི་ཤིན་ཏུ་སྐལ་བ་བཟང་པོ་ཡིན་སྙམ་ནས་འཆི་བའི་རིང་ལ་འགྱོད་པ་རྩ་བ་ནས་མེད་པ་ཞིག་དང་། ད་ལྟ་གསོན་པའི་རིང་ལ་མི་རབས་གསར་པ་ཚོར་ག་ཚོད་ཐུབ་ཐུབ་ཀྱིས་བོད་ཡིག་སློབ་ཡག་ཐོག་གཞེན་སྐུལ་དང་སློབ་གསོ་གནང་དགོས་ཞེས་བཀའ་བསྩལ་འདུག མགོན་པོ་༸གང་ཉིད་མཆོག་ནས་སྤྱིར་ད་ལྟའི་ཆར་རྒྱ་ནག་སྟོབས་ཆེན་རྒྱལ་ཁབ་ཀྱི་བོད་འདི་གནོན་ནས་བསྡད་ཡོད་ཀྱང་། བོད་མི་རིགས་ཀྱི་ཆོས་དང་རིག་གཞུང་དེ་རྒྱ་མི་རིགས་ཀྱི་ཆོས་དང་རིག་གཞུང་ལས་ལྷག་པ་མ་གཏོགས་སྐྱོ་བ་གཏན་ནས་མེད་པ་མ་ཟད། དེང་སྐབས་རྒྱ་མི་ས་ཡ་མང་པོ་བོད་ཀྱི་ཆོས་དང་རིག་གཞུང་ལ་ཚུར་འཇུག་ཡོང་གི་ཡོད་པ་དང་། ལྷར་པར་དུ་བོད་ཀྱི་སངས་ཀྱི་ལྟ་གྲུབ་ཐོག་རྒྱལ་སྤྱིའི་ཚན་རིག་པ་ཚོས་ཀྱང་ངོ་མཚར་ཆེན་པོ་སྐྱེས་བཞིན་ཡོད་སྟབས། ང་ཚོ་བོད་པ་ཡིན་པའི་ཆ་ནས་སྤོབས་པ་བྱེད་འོས་པ་ཞིག་རེད་ཅེས་བཀའ་བསྩལ་འདུགགཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཕྲོད་བཞེས་དང་དགུང་ནའི་བབས་ལ་གཞིགས་ཏེ་༸སྐུ་སྒེར་ཡིག་ཚང་གི་དྲུང་ཆེ་དང་འབྲེལ་ཡོད་ལས་བྱེད་རྣམས་ནས་ཟླ་བ་སྔོན་མའི་མགོ་སྟོད་ནས་གང་ཟག་སྒེར་པར་གཟིམ་ཆུང་མཇལ་ཁ་གནང་རྒྱུ་མཚམས་འཇོག་གནང་ཡོད་པ་རེད།མཛད་འཆར་ལ་གཞིགས་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་རྨ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་བསྩལ་རྒྱུ་དང་། ཚེས་ ༥  ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྫོང་དཀར་ཆོས་སྡེ་ནས་གསོལ་འདེབས་ཞུས་དོན་ལྟར་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་བསྩལ་གཏན་ཁེལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་གཙོ་འགྱུར་ཕྱི་ནང་གི་དད་ལྡན་སྟོང་ཕྲག་བརྒལ་བར་སྤྱོད་འཇུག་ཆེན་མོའི་གསུང་ཆོས་མུ་མཐུད་འཕྲོ་སྐྱོང་མཛད་པ་མ་ཟད། བཀའ་ཆོས་ཞུ་མཁན་ཁོངས་སུ་ཡོད་པའི་ཏུར་ཏུག་ནས་བཅར་བའི་ཁ་ཆེའི་སློབ་མ་ཞིག་གི་དྲི་བར་བཀའ་ལན་གནང་སྐབས་ཁ་ཆའི་ཆོས་ལུས་ནང་དཀོན་མཆོག་གིས་བཀོད་པ་ཡོངས་ལ་གུས་བརྩི་ཞུ་དགོས་སྐོར་འཁོད་པ་དེར་ཡིད་རང་ཞུས་པ་དང་འབྲེལ། འཇིགས་སྐུལ་བ་དེ་འཇིགས་སྐུལ་བ་རང་མ་གཏོགས་ཁ་ཆེའི་འཇིགས་སྐུལ་བ་དང་ནང་པའི་འཇིགས་སྐུལ་བ་ཟེར་བ་གང་ཡང་ཡོད་མ་རེད་ཅེས་བཀའ་ནན་བསྩལ་ཡོད། རྩ་བའི་༸གོང་ས་མཆོག་གིས་དེ་རིང་གསུང་ཆོས་ཉིན་གཉིས་པར་སྤྱོད་འཇུག་གི་ལེའུ་ལྔ་པའི་འཕྲོ་སྐྱོང་དང་ལེའུ་དྲུག་པ་བཟོད་པའི་ལེའུ་བཀའ་ཁྲིད་མཛད་ཡོད་པ་དང། མགོན་པོ་༸གང་ཉིད་མཆོག་གིས་ངོས་ཀྱི་སེམས་རྒྱུད་དུ་སྟོང་ཉིད་ཀྱི་ལྟ་བ་དང་བྱང་ཆུབ་སེམས་གཉིས་ཀྱི་ལྟ་བ་གདེངས་ཁེལ་བ་ཞིག་ཡོད་ཅེས་བཀའ་བསྩལ་བ་དང་ཆབས་ཅིག བྱང་ཆུབ་ཀྱི་སེམས་བསྟན་པའི་ཕྱག་དཔེ་སྤྱོད་འཇུག་ལས་ལྷག་པ་མེད་སྐོར་བཀའ་བསྩལ་སོང་། སློབ་མའི་ཁྲོད་མགོན་པོ་༸གང་ཉིད་མཆོག་ལ་བཀའ་འདྲི་ཞུ་རྒྱུའི་གོ་སྐབས་གནང་དོན་ལྟར། བོད་རིགས་སློབ་མ་དང་བོད་ཕྲུག་ཁྱིམ་སྡེར་སློབ་གཉེར་བྱེད་མཁན་ཁ་ཆེའི་སློབ་མ་བཅས་ནས་༸གོང་ས་མཆོག་ལ་གཞན་གྱི་ཁོང་ཁྲོ་སོགས་ལ་གཉེན་པོ་བསྟན་ཚུལ་དང་། ཤེས་བཞིན་ཉམས་ལེན་བྱེད་སྟངས་། ཚན་རིག་སོགས་ཀྱི་བརྗོད་གཞི་འདྲ་མིན་ཐོག་བཀའ་འདྲི་དགོངས་སྐོར་ཞུས་པར་མགོན་པོ་མཆོག་ནས་ཐུགས་བརྩེ་བ་ཆེན་པོས་བཀའ་ལན་མཛད་ཡོད་པ་རེད།