བྷོ་ཙ་ཝ་ན་སྲིད་འཛིན་མཆོག་གིས་ང་ཚོ་རྒྱ་ནག་གི་མངའ་འོག་མིན་ཞེས་གསུངས་འདུག

འདས་པའི་ཟླ་བ་བཞིའི་ནང་ཚུད་དང་ལྷག་པར་ཉེ་བའི་བདུན་ཕྲག་འདིའི་ནང་རྒྱ་ནག་གཞུང་ནས་༸གོང་ས་༸སྐྱབས་མགོན་ཆེན་པོ་མཆོག་བྷོ་ཙ་ཝ་ན་ནང་གི་ཆིབས་སྒྱུར་མཛད་འཆར་ལ་སྐྱོན་བརྗོད་ཀྱིས་འགོག ་རྐྱེན་བཟོ་ཐབས་སྔ་རྗེས་བྱས་ཡོད་ཀྱང་། བྷོ་ཙ་ཝ་ན་རྒྱལ་ཁབ་ཀྱི་སྲིད་འཛིན་སྐུ་ཞབས་ Ian Khama མཆོག་གིས་རྒྱ་གཞུང་གི་གནོན་ཤུགས་དང་ཉེན་བརྡའི་འོག་མ་ཚུད་པར་༸གོང་ས་མཆོག་ཁུལ་དེར་ཆིབས་སྒྱུར་བསྐྱང་ཐུབ་ཕྱིར་ཕྱོགས་གང་ཅིའི་ཐད་ནས་གདོང་ལེན་གནང་སྟེ། ང་ཚོ་རྒྱ་ནག་གི་མངའ་འོག་མིན་ཞེས་བཞེངས་ཕྱོགས་ཁ་གསལ་གསུངས་འདུག དེ་ཡང་ Botswana Guardian གསར་ཤོག་ཐོག་སྲིད་འཛིན་མཆོག་གིས་རྒྱ་ནག་གཞུང་ནས་སྲིད་འཛིན་ Khama མཆོག་ལ་ཁུལ་དེར་ཡོད་པའི་རྒྱ་ནག་གཞུང་ཚབ་པ་མེད་པ་བཟོས་ནས་ཕྱོགས་གཉིས་དབར་གྱི་འབྲེལ་ལམ་དོ་ཕག་འགྲོ་ཉེན་དང་། དེ་བཞིན་རྒྱ་གཞུང་ནས་ཨ་ཕི་རི་ཀའི་རྒྱལ་ཁབ་གཞན་རྣམས་དང་མ་གཏོགས་བྷོ་ཙ་ཝ་ན་དང་འབྲེལ་བ་བཅད་རྒྱུ་ཡིན་པ་སོགས་ཀྱི་ཉེན་བརྡ་བཏང་ཡོད་སྐོར་གསུངས་འདུག རྩ་བའི་༸གོང་ས་མཆོག་འདས་པའི་ཟླ་བ་གཉིས་ནང་མཛད་བྲེལ་ཧ་ཅང་ཆེན་པོ་བྱུང་རྐྱེན་ད་རེས་བྷོ་ཙ་ཝ་ན་རྒྱལ་ས་ Gaborone ནང་ཚོགས་པའི་སེམས་དང་སྲོག་གི་ཚོགས་འདུར་ཆིབས་སྒྱུར་བསྐྱང་ཐུབ་མེད་ནའང། གལ་ཏེ་༸གོང་ས་མཆོག་ཁུལ་དེར་ཆིབས་སྒྱུར་མཛད་ཐུབ་ཡོད་ཚེ་སྲིད་འཛིན་ Khama མཆོག་ནས་༸གང་ཉིད་མཆོག་དང་མཇལ་ཁ་ཡང་ཞུ་འཆར་ཡོད་པ་རེད་འདུག ད་རེས་སྲིད་འཛིན་ Khama མཆོག་གིས་རྒྱ་གཞུང་གི་གནོན་ཤུགས་འོག་མགོ་བོ་མ་སྒུར་བར་བཞེངས་ཕྱོགས་མངོན་གསལ་གནང་པའི་དུས་མཚམས་དེར་བྷོ་ཙ་ཝ་ན་རྒྱལ་ནང་གི་ Gabz FM རླུང་འཕྲིན་ལས་ཁང་ནས་ཀྱང་ད་རེས་ཁུལ་དེར་ཉིན་གསུམ་རིང་འཚོགས་བཞིན་པའི་སེམས་དང་སྲོག་གི་ལྷན་ཚོགས་ཐད་གཏོང་གནང་ནས་དྲིལ་བསྒྲགས་རྒྱ་ཆེ་སྤེལ་འདུག དེ་དེ་བཞིན་སེམས་དང་སྲོག་ཚོགས་པའི་ཚོགས་གཙོ་ལྕམ་ Susan...