རྒྱ་གར་གྱི་སྐད་ཡིག་དུས་སྟོན་ཐེངས་ལྔ་པའི་ཐོག་བོད་མི་སྙན་ངག་མཁན་གསུམ་ལྷན་ཞུགས་གནང་པ།

རྒྱ་གར་གྱི་རྒྱལ་ས་ལྡི་ལིར་རྒྱ་གར་གྱི་སྐད་ཡིག་དུས་སྟོན་ཚོགས་པའི་ཐོག་བོད་མི་སྙན་ངག་མཁན་གསུམ་ལྷན་ཞུགས་གནང་ཡོད་པ་རེད།  ཁ་སང་ཕྱི་ཚེས་ ༢༦ ཉིན་རྒྱ་གར་གྱི་རྒྱལ་ས་ལྡི་ལིར་India Habitat Centre ཡིས་གོ་སྒྲིག་འོག་རྒྱ་གར་གྱི་སྐད་ཡིག་དུས་སྟོན་ཐེངས་ལྔ་པའི་ཐོག་བོད་མི་སྙན་ངག་མཁན་བསྟན་འཛིན་བརྩོན་འགྲུས་ལགས་དང་ཚེ་རིང་དབང་མོ་ལགས། དེ་བཞིན་བུ་ཆུང་བསོད་ནམས་ལགས་བཅས་ལྷན་ཞུགས་ཀྱིས་སྙན་ངག་གྱེར་སྟོན་གནང་པ་དང་སྦྲགས། བོད་མི་དང་བོད་དོན་སྐོར་ཡང་གླེང་སློང་གནང་ཡོད་པ་རེད། དེ་མཚུངས་ཁ་སང་རྒྱ་གར་གྱི་སྐད་ཡིག་དུས་སྟོན་གྱི་དབུ་འབྱེད་མཛད་སྒོའི་ཐོག་བོད་མི་སྒྱུ་རྩལ་པ་བློ་བསྟན་རྣམ་གླིང་ལགས་དང་བསོད་ནམས་སྒྲོལ་མ་ལགས།  འཇམ་དབྱངས་བཀྲིས་ལགས་བཅས་རྣམ་པ་གསུམ་ནས་བོད་ཀྱི་རིག་གཞུང་འཁྲབ་སྟོན་གནང་ཡོད་པ་རེད། རྩ་བའི་དུས་སྟོན་དེ་ཟླ་བ་འདིའི་ཕྱི་ཚེས་ ༢༦ ནས་ ༢༩ བར་བཅས་ཉིན་བཞིའི་རིང་ཚོགས་གནང་གི་ཡོད་པ་རེད་འདུག འདི་ག་རླུང་འཕླིན་ཁང་གིས་རྒྱ་གར་གྱི་སྐད་ཡིག་དུས་སྟོན་ཐེངས་ལྔ་པའི་ཐོག་ལ་བོད་མི་སྙན་ངག་པ་དང་སྒྱུ་སྩལ་བ་བཅས་ལྷན་ཞུགས་གནང་མཁན་ཁོངས་ལས་བུ་ཆུང་བསོད་ནམས་ལགས་སུ་མྱོང་ཚོར་ཇི་བྱུང་ཐད་བཅར་འདྲི་ཞུས་པར་ཁོང་གིས་ད་ལན་གྱི་དུས་སྟོན་འདིའི་ནང་རྒྱ་གར་གྱི་མངའ་སྡེ་རེ་ནས་མི་རེ་མ་གཏོགས་ལྷན་ཞུགས་གནང་རྒྱུའི་གོ་སྐབས་མེད་ཀྱང། ཐེངས་ལྔ་པ་འདིའི་ཐོག་ལ་བོད་མི་དྲུག་ཙམ་ལྷན་ཞུགས་གནང་རྒྱུ་ཙམ་མ་ཟད། ལྷག་དོན་དབུ་འབྱེད་མཛད་སྒོར་རིག་གཞུང་འཁྲབ་སྟོན་སོགས་གནང་རྒྱུའི་གོ་སྐབས་རག་པར་སྤོབས་པ་དམིགས་བསལ་ཞིག་སྦྱིན་བྱུང་ཞེས་གསུང་སོང། རྒྱ་གར་གྱི་སྐད་ཡིག་དུས་སྟོན་འདིའི་ཐོག་བོད་མི་སྙན་ངག་མཁན་གསུམ་པོས་བོད་མིའི་འཐབ་རྩོད་དང་འབྲེལ་བའི་སྙན་ངག་གྱེར་སྟོན་གནང་ཡོད་པ་རེད།