ལ་དྭགས།

དེ་རིང་ཕྱི་ཟླ་ ༩ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་ལ་དྭགས་ཞི་བའི་ཚལ་གསུང་ཆོས་ར་བར་ལ་དྭགས་ནང་ཚོགས་དང་། དགོན་ཚོགས། ཁ་ཆེ་དང་ཡེ་ཤུའི་སྡེ་ཚོགས་བཅས་ཀྱིས་བཀྲིན་གཏང་རག་དང་འབྲེལ་བསྙེན་བཀུར་གསོལ་སྟོན་གྱི་མཛད་སྒོ་འཚོགས་སོང་། དེའང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་རྒྱལ་ས་ལྡི་ལིར་ཞབས་པུས་སྨན་བཅོས་ལེགས་གྲུབ་བྱུང་རྗེས་ཟླ་དེའི་ཕྱི་ཚེས་ ༢༨ ཉིན་ལ་དགས་སུ་ཞབས་སོར་བཀྲིན་མཛད་དེ་ད་བར་ཟླ་བ་གཉིས་ལྷག་ཙམ་འགྲོ་བཞིན་པའི་ཁྲོད། དེ་རིང་ལ་དྭགས་ནང་པའི་ཚོགས་འདུ་དང་དགོན་ཚོགས་ཙམ་མ་ཟད། ལ་དྭགས་ཨན་ཇུ་མན་ཨི་མ་མི་ཡ། (Anjuman Immamia) དང་། ཨན་ཇུ་མན་མོ་ཡིན་ཨུལ་ཨི་སི་ལཱམ་ (Anjuman Moin-Ul Islam) བཅས་ཁ་ཆེའི་སུ་ནི་དང་ཤི་ཡ་ཆོས་ཚོགས། དེ་བཞིན་གླེ་ཡི་ཡེ་ཤུའི་སྤྱི་ཚོགས་བཅས་ཐུན་མོང་གི་གོ་སྒྲིག་འོག ལ་དྭགས་དང་བོད་ཀྱི་ཐུན་མོང་མ་ཡིན་པའི་རྐང་བྲོ་གླུ་གཞས་གཟིགས་འབུལ་སོགས་ཀྱི་ལམ་ནས་༸གོང་ས་མཆོག་ལ་བཀྲིན་གཏང་རག་དང་གྱེས་སྟོན་མཛད་སྒོ་གཟབ་རྒྱས་ཤིག་འཚོགས་སོང་། སྐབས་དེར་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་ཀྱིས་གསུང་བཤད་ཁྲོད། འདི་ལོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་སུ་ཞབས་སོར་བསྐྱངས་ནས་ཟླ་བ་གཉིས་ཙམ་གྱི་རིང་སྐུ་ལྷོད་བཞུགས་མཛད་རྒྱུ་བྱུང་བར་སྙིང་ཐག་པ་ནས་ཐུགས་རྗེ་ཆེ་ཞུས་གནང་བ་མ་ཟད།...

ཁ་སང་ཕྱི་ལོ་ ༢༠༢༦ ཟླ་ ༨ ཚེས་ ༩ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལྕོག་ལམ་སར་གྱི་ཉེ་འདབས་སུ་རྟེན་གཞི་བྱས་པའི་མ་ཧཱ་བོ་དྷི་རྒྱལ་སྤྱིའི་སྒོམ་སྒྲུབ་བསྟི་གནས་ཁང་དུ་ཆིབས་བསྒྱུར་མཛད་དེ།  ཁུལ་དེར་བཞེངས་གྲུབ་ཟིན་པའི་སངས་རྒྱས་སྟོང་སྐུར་རབ་གནས་བཀའ་དྲིན་མཛད་པ་མ་ཟད།  མགོན་པོ་༸གང་ཉིད་མཆོག་ནས་དམག་ཟུར་དྲན་རྟེན་ས་ཚིགས་སུའང་བྱང་ཆུབ་མཆོད་རྟེན་བཞེངས་གྲུབ་ཟིན་པ་དེར་རབ་གནས་བཀའ་དྲིན་མཛད་ཡོད་པ་རེད། https://www.youtube.com/watch?v=FsZb1-NJRYM འདི་གའི་ས་གནས་གསར་འགོད་པས་མ་ཧཱ་བོ་དྷི་རྒྱལ་སྤྱིའི་སྒོམ་སྒྲུབ་བསྟི་གནས་ཁང་གི་ཚོགས་གཙོ་སངྒ་སེ་ན་མཆོག་ལ་བཅར་འདྲི་ཞུས་པར་ཁོང་གིས། ༸གོང་ས་མཆོག་འདིར་ཕེབས་པ་ནི་ང་ཚོས་མ་ཧཱ་བོ་དྷིའི་ལོ་རྒྱུས་ནང་གནས་རྒྱུ་ཡིན་པ་དང་། དེ་རིང་འདིར་སངས་རྒྱས་སྟོང་སྐུ་བཞེངས་གྲུབ་ཟིན་བྱས་༸རྒྱལ་བ་ཡིད་བཞིན་ནོར་བུས་རབ་གནས་བཀའ་དྲིན་མཛད་རྒྱུའི་གོ་སྐབས་ཐོབ་པ་ནི་སྐལ་བ་བཟང་པ་ཞིག་དང་། ཧི་མ་ལ་ཡའི་རི་རྒྱུད་ནང་འདི་ལྟ་བུའི་སངས་རྒྱས་སྟོང་སྐུ་ Budha Park for World Peace ཞེས་པ་ནི་ས་ཕྱོགས་གང་དུའང་འཇལ་རྒྱུ་མེད་པ་ཞིག་ཡིན་ཞེས།  ༸རྒྱལ་བ་ཡིད་བཞིན་ནོར་བུ་མཆོག་ནས་དེ་སྔོན་ཕྱི་ལོ་ ༡༩༩༤ ལོར་མ་ཧཱ་བོ་དྷི་རྒྱལ་སྤྱིའི་སྒོམ་སྒྲུབ་བསྟི་གནས་ཁང་འདི་དབུ་འབྱེད་མཛད་ཡོད་པ་གསུངས་སོང་།  གཞན་ཡང་དམག་ཟུར་ཚོགས་པའི་ཚོགས་གཙོ་ཚུལ་ཁྲིམས་རྒྱ་མཚོ་ལགས་སུ་མགོན་པོ་༸གང་ཉིད་མཆོག་ནས་དམག་ཟུར་དྲན་རྟེན་ས་ཚིགས་སུ་བྱང་ཆུབ་མཆོད་རྟེན་བཞེངས་གྲུབ་ཟིན་པ་དེར་རབ་གནས་འཀའ་དྲིན་མཛད་པའི་སྐོར་ལ་བཅར་འདྲི་ཞུས་ཡོད།  དེའི་བར་ན་གནས་ཚུལ་གཞན་ཞིག་ཐོན་པ་ལ།  ཡོང་རྒྱུའི་ཕྱི་ལོ་ ༢༠༢༦ ཟླ་...

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་གཞོན་ནུ་ཚོར་མྱོ་རྫས་ངན་གོམས་དང་འབྲེལ་བའི་ཡིག་ཐོག་གསུང་འཕྲིན་ཞིག་སྩལ་ཡོད་པ་དང་།  དེ་འབྲེལ་ལ་དྭགས་གཞོན་སྐྱེས་ཁག་གཅིག་གིས་༸གང་ཉིད་མཆོག་གི་བཀའ་སློབ་ལམ་སྟོན་དེ་དག་ཡིག་ཐོག་ཁོ་ནར་ལུས་སུ་མ་བཅུག་པར་ངེས་པར་དུ་རང་སོ་སོའི་མི་ཚེའི་ཁྲོད་ལག་བསྟར་དགོས་པའི་གཞེན་སྐུལ་གནང་འདུག  https://youtu.be/TTutLVVWrlk?si=gKxt2jz7lmbTtuww དེ་ཡང་ཉེ་ཆར་༸གོང་ས་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་སེམས་ངལ་སོགས་ཀྱི་བདེ་སྡུག་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་པར།  དེ་འབྲེལ་༸གོང་ས་༸སྐྱབས་མགོན་ཆེན་པོ་མཆོག་གིས་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་ཡོད་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་ཡོད་པ་རེད། འདི་ག་རླུང་འཕྲིན་ཁང་གི་བཅར་འདྲིར་དང་ལེན་ཁྲོད་ལ་དྭགས་གཞོན་སྐྱེས་ཁག་གཅིག་གིས་ཉེ་ལམ་༸གོང་ས་མཆོག་གི་མྱོ་རྫས་ངན་གོམས་སོགས་དང་འབྲེལ་བའི་གསུང་འཕྲིན་དེའི་སྐོར་ཁོང་རྣམས་ཀྱིས།  ༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་འགན་གྲངས་ལས་འདས་པ་ཡོད་ཀྱང་།  ༸གང་ཉིད་མཆོག་གིས་ཐུགས་བརྩེ་བ་ཆེན་པོས་ལ་དྭགས་གཞོན་སྐྱེས་ཚོའི་བདེ་སྡུག་ཆ་ཚང་གསན་བཞེས་ཀྱིས་དུས་མཐུན་འོས་ཤིང་འཚམས་པའི་ཐབས་ལམ་སྟོན་གནང་མཛད་པ་དེར་ཐུགས་རྗེ་ཆེ་ཞུས་ཀྱི་བཀའ་དྲིན་རྗེས་དྲན་ཞུས་པ་མ་ཟད།  གསུང་འཕྲིན་ནང་དམིགས་བསལ་གྱིས་༸གོང་ས་མཚོག་ནས་རང་གཅེས་འཛིན་གྱི་བློ་དོར་ཏེ་གཞན་གཅེས་འཛིན་གྱི་བློ་ཇི་ལྟར་གོང་འཕེལ་གཏོང་དགོས་པ་སོགས་སེམས་ལ་སྦྱོང་བརྡར་སྤྲད་དགོས་གལ་སྐོར་གྱི་བཀའ་སློབ་ལམ་སྟོན་ཕེབས་ཡོད་པ་དེ་དུས་ལ་བབས་པ་ཞིག་རེད་འདུག་ཅེས་གསུངས་འདུག  མ་ཟད་བདེ་བ་ངོ་མ་དེ་སེམས་ཀྱི་ཞི་བདེ་དང་གཞན་ཕན་གྱི་བསམ་བློ་ནས་ཡོང་གི་ཡོད་སྐོར་བཀའ་སློབ་ལམ་སྟོན་སྩལ་བ་དེ་ལ་དྭགས་མི་མང་ལ་ཧ་ཅང་གི་གལ་ཆེན་པོ་ཆགས་ཀྱི་ཡོད་པ།  ལྷག་པར་དུ་༸གོང་ས་མཆོག་གིས་བཀའ་སློབ་ལམ་སྟོན་ལྟར་སྡུག་བསྔལ་ཅི་འདྲ་ཞིག་ཡིན་རུང་མཐར་ཐུག་ན་ནང་སེམས་ལ་རག་ལས་ཀྱི་ཡོད་པ་དང་།  ལ་དྭགས་གཞོན་སྐྱེས་ཚོའི་ངོས་ནས་ཀྱང་གཞི་རྩའི་ལྟ་གྲུབ་ཤེས་ཀྱི་ཡོད་ཀྱང་གཙོ་བོ་ལག་ལེན་ལ་ཐུག་ཡོད་པ་དང་།  སྤྱིར་དེང་དུས་སྤྱི་ཚོགས་དྲྭ་རྒྱ་སོགས་ཀྱི་རྣམ་གཡེང་གི་གནས་སྟངས་འོག་བཀའ་སློབ་དེ་དག་ལག་བསྟར་གནང་རྒྱུ་ཁག་པོ་ཏན་ཏན་ཡོད་རེད་དེ།  གོམ་པ་རེ་རེ་བྱས་ཏེ་སྤོ་ནས་རིམ་པས་གང་ཟག་བྱམས་བརྩེ་ལྡན་པ་དྲང་པོ་ཞིག་ཏུ་འགྱུར་རྒྱུར་འབད་བརྩོན་བྱས་ན།  དེ་ནི་༸གང་ཉིད་མཆོག་ལ་ལེགས་སྐྱེས་ཡག་ཤོས་ཤིག་རེད་ལ།   མ་འོངས་ལ་དྭགས་དེ་བཞིན་བདེ་སྐྱིད་བདེ་ཐང་ལྡན་པ་ཞིག་ཏུ་འགྱུར་རྒྱུར་རེ་བ་འཆང་གི་ཡོད་པ་གསུངས་འདུག  དེ་བཞིན་ཉེ་ལམ་༸གོང་ས་མཆོག་གིས་གསུང་འཕྲིན་ནང་དམིགས་བསལ་གྱིས་ལ་དྭགས་གཞོན་ནུ་ཚོས་མྱོ་རྫས་ལོངས་སུ་སྤྱོད་རྒྱུ་འཛེམ་དགོས་པའི་སྐོར་བཀའ་མངགས་སྩལ་བའི་སྐོར་དང་འབྲེལ།  མྱོ་རྫས་བེད་སྤྱོད་བྱས་ན།  རང་སོ་སོའི་འཕྲོད་བསྟེན་ལ་གནོད་པ་ཙམ་མིན་པར།  ནང་མི་སྤུན་མཆེད་ཡོངས་རྫོགས་གཏོར་བཤིག་གཏོང་གི་ཡོད་པ་དང་། ...

ཉེ་ལམ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཞི་བའི་ཚལ་ཕོ་བྲང་དུ་མང་མཇལ་སྐབས།  ལ་དྭགས་གཞོན་ནུ་ཁག་གཅིག་གིས་གནད་དོན་འདྲ་མིན་སྐོར་བཀའ་འདྲི་ཞུས་ཡོད་པ་དང་།  དེ་དག་ཁོངས་ནས་གཅིག་གིས་ཡུལ་དེའི་ནང་གི་གཞོན་སྐྱེས་ཁྲོད་མྱོ་རྫས་རྐྱེན་པས་དཀའ་ངལ་འཕྲད་མཁན་ཇེ་མང་དུ་འགྲོ་བཞིན་པའི་སྐོར་བཀའ་འདྲི་ཞུས་ཡོད་པ་རེད།    དེ་འབྲེལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་ཕྱི་ཚེས་ ༢༠ ཉིན་དྲྭ་རྒྱའི་སྟེང་ཡིག་ཐོག་གསུང་འཕྲིན་ཞིག་སྩལ་ཡོད་པའི་ནང་།  ༸གང་ཉིད་མཆོག་གིས་མྱོ་རྫས་ལོངས་སུ་སྤྱོད་པའི་གནོད་སྐྱོན་གྱི་རང་བཞིན་དང་དེ་ནི་གོམས་གཤིས་ངན་པ་ཞིག་ཡིན་པ་ཤེས་རྟོགས་དགོས་རྒྱུ་གལ་ཆེན་པོ་ཡིན་པ་མ་ཟད།  ནམ་ཞིག་མྱོ་རྫས་བེད་སྤྱོད་བྱེད་པའི་མཇུག་འབྲས་སྐོར་བསམ་གཞིག་བྱེད་ན།  དེས་སྡུག་བསྔལ་ཁོ་ན་ལས་ཡོང་གི་མེད་པ་མངོན་གསལ་ཡིན་སྐོར་བཀའ་སྩལ་འདུག་པ་དང་།  མྱོ་རྫས་ངན་གོམས་ལས་བཅོས་ཐབས་དང་དྲག་སྐྱེད་ཀྱི་ལམ་དུ་གནས་རྒྱུ་དེར་དངོས་ནས་ཀྱི་སྙིང་སྟོབས་དང་ཆོད་སེམས་བརྟན་པོ་དགོས་པ་མཁྱེན་གྱི་ཡོད་སྐོར་དང་།  དཀའ་ངལ་དེ་དག་ལས་ཐར་བར་བྱེད་མཁན་གཞོན་སྐྱེས་ཡོངས་ལ་ཡིད་རངས་བསྔགས་བརྗོད་ཡོད་ཅེས།  ལ་དྭགས་གཞོན་ནུ་ཚོའི་ངོས་ནས་མྱོ་རྫས་ལོངས་སུ་སྤྱོད་རྒྱུར་འཛེམ་དགོས་པ་དང་།  ངན་གོམས་དེའི་རྐྱེན་པས་དཀའ་ངལ་འཕྲད་བཞིན་པ་ཡོངས་ལ་མྱུར་དུ་བདེ་ཐང་དང་དོན་སྙིང་ལྡན་པའི་མི་ཚེ་སྐྱིད་པོ་ཞིག་སྐྱེལ་ཐུབ་པའི་སྨོན་ལམ་འདེབས་ཀྱིན་ཡོད་པ་བཀའ་སྩལ་འདུག འདི་ག་རླུང་འཕྲིན་ཁང་གི་ལ་དྭགས་ས་གནས་གསར་འགོད་པས་ཡུལ་དེར་གནས་སྡོད་ལ་དྭགས་དང་བོད་མི་གཞོན་སྐྱེས་ཁག་གཅིག་ལ་༸གོང་ས་མཆོག་གི་གསུང་འཕྲིན་དེས་ཁོང་ཚོར་སེམས་འགུལ་ཇི་ལྟར་ཐེབས་ཡོད་སྐོར་བཀའ་འདྲི་ཞུས་པར་ཁོང་རྣམས་ཀྱིས།  ༸གང་ཉིད་མཆོག་ལ་སྐུ་ངལ་ཧ་ཅང་ཡོད་ཀྱང་ལ་དྭགས་གཞོན་སྐྱེས་ཚོའི་དྲི་བར་བཀའ་ལན་འཛད་མེད་སྩལ་གྱི་ཡོད་པ་དེ་ཤིན་ཏུ་ནས་བཀའ་དྲིན་ཆེན་པོ་ཡིན་པ་དང་།  ཁ་ཉིན་ལ་དྭགས་ཁུལ་གྱི་གཞོན་སྐྱེས་ཚོར་མྱོ་རྫས་སོགས་དང་འབྲེལ་བའི་བཀའ་སློབ་དེ་དག་འཛམ་གླིང་གཞོན་སྐྱེས་ཚང་མར་ཁྱབ་ཀྱི་ཡོད་ལ།  མྱོ་རྫས་ཀྱིས་གང་ཟག་སོ་སོའི་འཕྲོད་བསྟེན་ལ་གནོད་པ་ཙམ་མིན་པར་ནང་མི་ཕན་ཚུན་འཆམ་མཐུན་མེད་པ་བཟོ་ཡི་ཡོད་པར་བརྟེན།  ལ་དྭགས་གཞོན་སྐྱེས་ཚོས་ངོས་ནས་མྱོ་རྫས་ལོངས་སྤྱོད་ནི་རང་གི་སྡུག་བསྔལ་སེལ་བའི་ཐབས་ལམ་ཞིག་གཏན་ནས་མིན་པ་ཤེས་དགོས་པ་གསུངས་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་གསུང་འཕྲིན་སྩལ་བའི་ནང་གཞན་ཡང་ལ་དྭགས་གཞོན་ནུ་ཁག་གཅིག་གིས་སེམས་ཀྱི་ཞི་བདེ་ཇི་ལྟར་འཚོལ་དགོས་པ་མ་ཟད།  དངངས་འཚབ་དང་། ཁོང་ཁྲོ། སེམས་ངལ་སོགས་ཀྱི་ཉོན་མོངས་ལས་ཇི་ལྟར་རྒྱལ་དགོས་པའི་སྐོར་བཀའ་འདྲི་ཞུས་མཁན་བྱུང་སོང་ཞེས།  དེར་༸གང་ཉིད་མཆོག་གིས་བཀའ་ལན་དུ།  མི་ཚེ་ནང་གི་གཞི་རྩའི་དགོས་དོན་ནི་བདེ་བ་འཚོལ་རྒྱུ་དེ་ཡིན་དུས།  བདེ་བ་ངོ་མ་སྟེ་ཕྱིའི་རྒྱུ་ནོར་ལོངས་སྤྱོད་དང་དབང་ཆ་ནས་ཡོང་གི་མེད་པར་དེ་ནི་སེམས་ཀྱི་ཞི་བདེ་ནས་ཡོང་གི་ཡོད་པ་དང་།  དེ་ཡང་ང་ཚོས་སེམས་ལ་སྦྱོང་བརྡར་སྤྲད་དེ་བྱམས་བརྩེ་དང་གཞན་ཕན་གྱི་བསམ་བློ་གོང་འཕེལ་ལས་བསྒྲུབ་ཐུབ་ཀྱི་ཡོད་པ་བཀའ་སྩལ་དང་འབྲེལ། ...

དེ་རིང་ཕྱི་ཟླ་ ༧ ཚེས་ ༦ ཉིན་མོ་དེ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༡ ཕེབས་པའི་༸སྐུའི་འཁྲུངས་སྐར་ཉིན་མོ་ཡིན་པ་ལྟར། དེ་རིང་ལ་དྭགས་ཀྱི་རྒྱལ་ས་གླེ་ནང་ཆགས་པའི་ཞི་བའི་ཚལ་ཕོ་བྲང་གི་ཐང་ཆེན་ཐོག་ཕྱི་ནང་མང་ཚོགས་སྟོང་ཕྲག་ཁ་ཤས་འདུ་འཛོམས་ཀྱིས་དགའ་དད་སྤྲོ་གསུམ་ངང་༸རྒྱལ་བའི་འཁྲུངས་སྐར་སྲུང་བརྩི་གཟབ་རྒྱས་ཞུས་པ་མ་ཟད། ༸གོང་ས་མཆོག་གིས་སྐབས་དེར་ས་གནས་འདི་ལྟ་བུར་དད་པ་དམ་ཚིག་གཡོ་བ་མེད་པའི་ཐོག་༸གང་ཉིད་སྐུ་ཚེ་ཡུན་རིང་བརྟན་རྒྱུའི་གསོལ་འདེབས་ཞུ་བཞིན་པ་བཞིན། མགོན་པོ་༸གང་ཉིད་མཆོག་ནས་ཀྱང་འཛམ་གླིང་ཡོངས་ལ་མིག་ལྟོས་བཟང་པོ་ཞིག་ཡོང་རྒྱུ་ཐུགས་སྨོན་དང་འབྲེལ། དགུང་ལོ་ ༡༣༠ ལྷག་སྐུ་བཞུགས་མཛད་རྒྱུའི་བཀའ་བཞེས་བཟང་པོ་སྨིན་སྩལ་གནང་སོང་། https://youtu.be/BDwkxaDqKkw?si=Vd74OMFHP_-4K8ll དེའང་༸གོང་ས་མཆོག་དེ་རང་སྔ་དྲོ་ཆུ་ཚོད་ ༨།༤༠ ཙམ་གྱི་ཐོག་ལ་དྭགས་ཡུལ་མི་སོགས་དད་ལྡན་སྟོང་ཕྲག་མང་པོས་རུ་སྒྲིག་གིས་དཀར་གཙང་མཇལ་དར་དང་མེ་ཏོག བདུག་སྤོས་ཐོག་ནས་ཕེབས་བསུ་གཟབ་རྒྱས་དང་བཅས་མཛད་སྒོའི་ཚོམས་ཆེན་དུ་ཞབས་སོར་འཁོད་རྗེས། ལ་དྭགས་ནང་ཚོགས་དང་དགོན་ཚོགས་ཀྱི་དབུ་ཁྲིད་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཆེས་མཐོའི་ཁྲིམས་ཞིབ་པ་མཆོག དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག གཞན་ཡང་སྐྱབས་རྗེ་ཁྲིག་སེ་རིན་པོ་ཆེ་མཆོག་དང་། ཐུགས་སྲས་རིན་པོ་མཆོག་བཅས་ཀྱིས་མཎྜལ་རྟེན་གསུམ་འདེགས་འབུལ་དང་འབྲེལ་མཛད་སྒོ་དབུ་འཛུགས་གནང་སོང་། དེ་རྗེས་ལ་དྭགས་ནང་ཚོགས་ཀྱི་ཚོགས་གཙོ་སྐུ་ཞབས་ཚེ་རིང་རྡོ་རྗེ་ལགས་ཀྱིས་ལ་དྭགས་མང་ཚོགས་ཡོངས་ཀྱི་ཚབ་ཞུས་ཏེ་མགོན་པོ་༸གང་ཉིད་མཆོག་ལ་འཁྲུངས་སྐར་འཚམས་འདྲི་དང་། ༸གོང་ས་མཆོག་ཉེ་ལམ་ཞབས་པུས་སྨན་བཅོས་མཛད་ནས་ཉིན་རེ་བཞིན་༸སྐུའི་འཕྲོད་བཞེས་ཡར་རྒྱས་བྱུང་བར་དགའ་སྤྲོ་དང་། སྔར་ལམ་བཞིན་གསུང་ཆོས་རྭ་བ་དེའི་ནང་༸གོང་ས་མཆོག་གི་དྲུང་ནས་བཀའ་སློབ་དང་བཀའ་ཆོས་ཡང་བསྐྱར་ཐོབ་པའི་རེ་བ་ཡོད་སྐོར་གསུངས་སོང་། ལྷག་པར་དེ་རིང་གི་མཛད་སྒོ་དེའི་སླད་བོད་མིའི་སྒྲིག་འཛུགས་ཀྱི་མང་གཙོའི་མཛད་གཙོ་རྣམ་པ་ཆེད་མངགས་ལ་དྭགས་སུ་ཆེད་ཕེབས་གནང་བ་ལྟར། སྲིད་སྐྱོང་སྤེན་པ་ཚེ་རིང་མཆོག་གིས་དབྱིན་སྐད་ཐོག་བཀའ་ཤག་གི་གསུང་འཕྲིན་ནང་གཙོ་བོ་འདས་པའི་ལོ་གཅིག་རིང་བཀའ་ཤག་ངོས་ནས་རྒྱལ་སྤྱིའི་ཡུལ་གྲུ་གང་སར་༸རྒྱལ་བའི་གོ་སྟོན་གྱི་ལོ་དེ་བྱམས་བརྩེའི་ལོར་སྲུང་བརྩི་གཟབ་རྒྱས་ཞུས་པའི་ལས་གཞི་ཆེ་གྲས་ཁག་སྙན་སེང་ཞུས་པ་དང་འབྲེལ། ...

འཕགས་བོད་ས་མཚམས་ཀྱི་དཀའ་རྙོག་རིམ་པས་ཞི་ནས་ཧི་མ་ལ་ཡའི་རི་རྒྱུད་དུ་ཞི་བདེ་ལྷིང་འཇགས་ཡོང་བའི་ཐུགས་རེ་ཡོད་ཅེས་བཀའ་བསྩལ།

ལ་དྭགས་མི་མང་ཚོས་ཆོས་ཤེས་པའི་ཐོག་ནས་དད་པ་ཐོབ་པའི་ཐབས་ལམ་གང་ཡོང་གནང་བཞིན་འདུག

ལ་དྭགས་ཡུལ་མི་རྣམས་ཀྱིས་བོད་ནང་གི་ས་ཡོམ་གྱི་གོད་ཆགས་ཕོག་པ་རྣམས་ལ་གདུང་སེམས་མཉམ་བསྐྱེད།

སྲིད་སྐྱོང་མཆོག་གིས་ལ་བྱང་ཉོ་མའི་མང་ཚོགས་དང་མཇལ་འཕྲད།