ལུམས་བཅོས་དེ་དངོས་མིན་རིག་གནས་ཤུལ་བཞག་ཁོངས་སུ་ཚུད་པ་དེས་རྒྱ་གཞུང་ནས་རྒྱལ་ཚོགས་ལ་རོགས་རམ་གནང་སྐོར་བཤད་པར་སྐྱོན་བརྗོད།

བཞུགས་སྒར་དུ་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་ནས་དེ་རིང་ཟླ་ ༡༢ ཚེས་ ༧ ཉིན་སྨན་རྩིས་ཁང་གི་མཐོ་སློབ་ཚོགས་ཁང་དུ་གསར་འགོད་ལྷན་ཚོགས་ཤིག་གནང་བ་དང་སྦྲགས། རྒྱ་གཞུང་གིས་ལུམས་བཅོས་དེ་དངོས་མིན་རིག་གནས་ཤུལ་བཞག་ཁོངས་སུ་ཚུད་ཐབས་སླད་རྒྱལ་ཚོགས་ལ་རོགས་རམ་གནང་གི་ཡོད་སྐོར་བཤད་པར་སྐྱོན་བརྗོད་གནང་སོང། གསར་འགོད་ལྷན་ཚོགས་ཐོག་སྨན་རྩིས་ཁང་གི་སྤྱི་ཁྱབ་འགན་འཛིན་བཀྲ་ཤིས་ཚེ་རིང་ལགས་ཀྱིས་རྒྱ་གཞུང་ནས་ལུམས་བཅོས་དེ་དངོས་མིན་རིག་གནས་ཤུལ་བཞག་ཁོངས་སུ་དེབ་སྐྱེལ་བྱས་པའི་བརྒྱུད་རིམ་ངོ་སྤྲོད་དང་། བཙོ་ཐལ་དང་རྒྱུད་བཞི་བདག་དབང་སྐོར། དེ་བཞིན་སྨན་རྩིས་ཁང་གི་ཐ་སྙད་དེབ་སྐྱེལ་སྐོར་བཅས་བརྗོད་གཞི་ཁག་བཞིའི་ཐོག་གསར་འགོད་ལྷན་ཚོགས་གནང་ཡོད་པ་རེད།བཀྲ་ཤིས་ཚེ་རིང་ལགས་ཀྱིས་རྒྱལ་ཚོགས་ཀྱི་དངོས་མིན་རིག་གནས་ཤུལ་བཞག་ཞེས་མིང་ཆེན་པོ་ཞིག་འཁྱེར་བ་མ་གཏོགས་དེར་རྒྱ་གཞུང་ནས་དུས་ནས་དུས་སུ་རོགས་རམ་གནང་ནས་རྒྱ་གཞུང་གི་བཀོད་ཁྱབ་འོག་འགྲོ་ཡི་ཡོད་པ་མ་ཟད། དངོས་མིན་རིག་གནས་ཤུལ་བཞག་གི་ཐ་སྙད་དེའི་ངེས་ཚིག་དེ་འགྲིག་གི་མེད་པ་དང། རྒྱ་གཞུང་གིས་ཕྱི་ལོ་ ༡༩༥༩ ལོར་ལྕགས་པོ་རི་གཏོར་བཤིགས་བཏང་བ་དང་སྨན་རྩིས་ཁང་སྒོ་བརྒྱབ་པ། དེ་བཞིན་༸སྐུའི་བླ་སྨན་པས་གཙོས་པའི་སྨན་པ་རྣམས་བཙོན་འཇུག་བྱས་པའི་དངོས་མིན་རིག་གནས་ཤུལ་བཞག་ཆེད་མངགས་བཟོས་པ་ཞིག་ཡིན་སྟབས། ལུམས་བཅོས་གཙོ་གྱུར་བོད་ཀྱི་གསོ་བ་རིག་པ་རྣམས་དངོས་མིན་རིག་གནས་ཤུལ་བཞག་ཁོངས་སུ་དེབ་སྐྱེལ་བྱེད་པའི་བདག་དབང་དེ་རྒྱ་ནག་ལ་མེད་པ་གསུངས་སོང་། དེ་བཞིན་བོད་ཀྱི་གསོ་བ་རིག་པའི་བདག་དབང་ཐད་རྒྱ་དཀར་ནག་གཉིས་བར་རྩོད་རྙོག་བྱུང་བས་དེའི་སྐབས་རྒྱ་གར་གཞུང་གི་རིག་གཞུང་ལྷན་ཁང་གི་ཟུང་འབྲེལ་དྲུང་ཆེ་ ML Shrivastav ལགས་ནས་སྨན་རྩིས་ཁང་ལ་དེར་དགག་པ་མ་གནང་རོགས་ཞེས་རེ་སྐུལ་གནང་བ་དང་སྦྲགས། རྒྱ་གར་གྱིས་དེབ་སྐྱེལ་གནང་བའི་བོད་ཀྱི་གསོ་བ་རིག་པ་དེ་རིང་མིན་དངོས་མིན་རིག་གནས་ཤུལ་བཞག་ཁོངས་སུ་ཐོན་སྲིད་ཀྱང་། གལ་ཏེ་དེ་མ་ཐོན་ཚེ་རྒྱ་གཞུང་ནས་རྒྱལ་ཚོགས་སུ་དེ་འབྲེལ་ཤུགས་རྐྱེན་སྤྲད་རྒྱུ་ཡིན་པར་ངོས་འཛིན་གནང་གི་ཡོད་པ་གསུངས་ཡོད།