ཧི་མཱ་ཅལ་གཞུང་གིས་སློབ་གྲྭ་དང་མཐོ་སློབ་ཁག་གནས་སྐབས་རིང་སྒོ་རྒྱག་དགོས་པའི་གསལ་བསྒྲགས་སྤེལ་འདུག

ད་ཆ་རྒྱལ་སྤྱིའི་ཁྱོན་དུ་ཏོག་དབྱིབས་རིམས་ནད་ཁྱབ་གདལ་འགྲོ་མུས་ལ་བརྟེན་གཞུང་གི་ལྷན་ཁང་དང་ཚོང་ལས། སློབ་གྲྭ་ཁག་སོགས་སྒོ་རྒྱག་དགོས་པའི་བཀོད་ཁྱབ་གགནང་བཞིན་པའི་ཁྲོད་འདིར་ཁ་ཉིན་ཕྱི་ཚེས་ ༡༤ ཉིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་གིས་མངའ་སྡེའི་གྲོས་ཚོགས་ནང་གསལ་བསྒྲགས་ཤིག་གནང་སྟེ་རིམས་ནད་དེ་སྔོན་འགོག་ཆེད་ཧི་མཱ་ཅལ་མངའ་སྡེ་ནང་ཡོད་པའི་སློབ་གྲྭ་དང་མཐོ་སློབ། དེ་བཞིན་གཙུག་ལག་སློབ་གཉེར་ཁང་ཡོངས་རྫོགས་ཟླ་ ༣ ཚེས་ ༣༡ བར་སྒོ་རྒྱག་རྒྱུ་ཐུགས་ཐག་བཅད་ཡོད་པ་མ་ཟད། མངའ་སྡེ་གཞུང་གི་བཀོད་ཁྱབ་ལམ་སྟོན་འོག་མངའ་སྡེ་ནང་གི་གློག་བརྙན་ཁང་ཁག་དང་དེ་བཞིན་གྲོང་རྡལ། གྲོང་ཁྱེར་ས་ཁུལ་ནང་ཡོད་པའི་མ་དང་བྱིས་པའི་འཕྲོད་བསྟེན་སློབ་གསོ་བསྟི་གནས་སོགས་གནས་སྐབས་རིང་སྒོ་རྒྱག་དགོས་པར་གསུངས་འདུག ལྷག་དོན་ཧི་མཱ་ཅལ་མངའ་གཞུང་གི་ཁུལ་འདིའི་ནང་གི་སྨན་ཁང་ཁག་ནས་ཏོག་དབྱིབས་རིམས་ནད་ལ་དོགས་ཟོན་གནང་བཞིན་ཡོད་པས་མི་མང་འདུ་འཛོམས་སོགས་ཀྱི་གནང་སྒོ་རིགས་འཕྲལ་མར་མཚམས་འཇོག་དགོས་པའི་འབོད་སྐུལ་གནང་འདུགསིམ་ལའི་གྲོས་ཚོགས་ལས་རིམ་ཞིག་ཐོག་མངའ་སྡེའི་སྤྱི་ཁྱབ་བློན་ཆེན་མཆོག་གིས་ད་ཆ་སློབ་གྲྭ་ཁག་གི་ནང་འགྲོ་བཞིན་པའི་ཡིག་རྒྱུགས་ཁག་དེ་སྔའི་འཆར་གཞི་ལྟར་མུ་མཐུད་གནང་དགོས་ཀྱང་། གཞུང་དང་སྒེར་གྱི་ཤེས་ཡོན་བསྟི་གནས་ཁང་ཡོངས་རྫོགས་སྒོ་རྒྱག་རྒྱུ་ཡིན་པ་དང་དེའི་ཁོངས་ཆོས་ཕྱོགས་དང་མི་མང་འདུ་འཛོམས། རྩེད་མོའི་གནང་སྒོ་རིགས་ཡོངས་རྫོགས་རེ་ཞིག་ཕྱིར་བཤོལ་གནང་དགོས་པའི་བཀོད་ཁྱབ་བཏང་བ་དང་། མངའ་སྡེའི་གྲོས་ཚོགས་འཐུས་མི་དང་བློན་ཆེན་ཁག་ལ་སྐུ་ཉིད་ཀྱི་ས་ཁུལ་ནང་སྤྱི་དམངས་ཀྱི་ཚོགས་འདུ་དང་ཟབ་སྦྱོང་རིགས་འཚོགས་གནང་རྒྱུ་མེད་པ་ལམ་སྟོན་གནང་འདུག སྐུ་ཞབས་ཇེ་རཱམ་མཆོག་གིས་ད་དུང་ད་ཆ་ཧི་མཱ་ཅལ་མངའ་སྡེ་གཞུང་གི་སྨན་ཁག་ཁག་ཏུ་རིམས་ནད་དེ་ཕོག་པའི་དོགས་གཞི་ཡོད་པ་མི་གྲངས་ ༥༣༩ བྱུང་ཡོད་པ་དང་དེའི་ཁྲོད་མི་བདུན་ལ་བརྟག་དཔྱད་གནང་བ་བརྒྱུད་ནས་ནད་གཞི་ཕོག་པར་ངོ་རྟགས་ཆོད་མེད་པ་དང་ད་རེས་སློབ་གྲྭ་དང་མཐོ་སློབ་ཁག་སྒོ་རྒྱག་དགོས་པའི་ཐུགས་ཐག་བཅད་པ་དེ་གཙོ་བོ་ནད་གཞི་དེ་མ་ཕོག་པར་སྔོན་འགོག་གནང་བ་ཙམ་ལས་མང་ཚོགས་ནས་ཞེད་སྣང་གནང་དགོས་པའི་རྒྱུ་མཚན་གང་ཡང་མེད་པའི་གསལ་བསྒྲགས་གནང་འདུགཁ་སང་ཧི་མཱ་ཅལ་ཀང་ར་རྫོང་དཔོན་གྱིས་རྫོང་འདིའི་ནང་ཁྲིམས་ཡིག་དོན་ཚན་ ༡༤༤ དགོངས་དོན་བཞིན་རྫོང་ནང་མི་ལྔ་དང་ལྔ་ལས་མང་བ་འདུ་འཛོམས་མི་ཆོག་པའི་བཀོད་ཁྱབ་བཏང་ཡོད་པ་རེད། ...