ChenQuango ཡིས་བོད་ཀྱི་འགོ་ཁྲིད་ཚོས་རང་ཚུགས་བརྟན་པོའི་ཐོག་ནས་ཁ་བྲལ་ལ་མཐའ་གཅིག་ཏུ་འགོག་རྒོལ་བྱེད་དགོས་ཚུལ་བརྗོད་འདུག

རྒྱ་ནག་གཞུང་གིས་ཟླ་བ་སྔོན་མའི་ནང་བོད་རང་སྐྱོང་ལྗོངས་ཟེར་བ་དབུ་བརྙེས་ནས་ལོ་ ༥༠ འཁོར་བའི་དུས་ཆེན་སྲུང་བརྩི་བྱེད་མ་ཐག་ཡིན་པའི་དུས་ཚམས་འདིར། རྒྱ་ནག་དམར་ཤོག་ཚོགས་པའི་དྲུང་ཆེ་ ChenQuangུuo ཡིས་བོད་ནང་གི་བརྟན་ལྷིང་སྲུང་སྐྱོབ་དང་འབྲེལ་བའི་དཔྱད་རྩོམ་ཞིག་སྤེལ་བའི་ཐོག་ནས། བོད་ཀྱི་གཞི་རིམ་འགོ་ཁྲིད་རྣམས་ཀྱིས་མཁར་རྫོང་ནང་བཞིན་རང་ཚུགས་བརྟན་པོའི་ཐོག་ནས་ཁ་བྲལ་ལ་མཐའ་གཅིག་ཏུ་འགོག་རྒོལ་བྱེད་དགོས་ཀྱི་ཡོད་སྐོར་བརྗོད་འདུག་པ་དང། བཙན་བྱོལ་ནང་གི་རྒྱ་ནག་ཉམས་ཞིབ་པས། དེ་ནི་རྒྱ་གཞུང་གི་བོད་ཐོག་དབང་གྱུར་བྱེད་དེ་ལོ་ ༦༠ ཙམ་ཕྱིན་ཟིན་པའི་སྐབས་སུ་ཡང་བོད་ནང་ད་དུང་བརྟན་ལྷིང་མེད་པ་དང་རྒྱ་གཞུང་གིས་བོད་མི་མང་གི་མངོན་འདོད་གྲུབ་ཐུབ་ཀྱི་མེད་པ་གསལ་པོ་རྟོགས་རྒྱུ་ཡོད་སྐོར་གསུངས་སོང། དེ་ཡང་དེ་རིང་ Peoples Daily ཞེས་རྒྱ་ནག་གི་མི་མང་ཉིན་རེའི་དྲ་ལམ་ཐོག་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་དྲུང་ཆེ་ Chen Quanguo ཡི་བོད་ནང་སྤྱི་ཚོགས་དང་དཔལ་འབྱོར་འཕེལ་རིམ་འགྲོ་ལུགས་དང་ཡུན་རིང་བརྟན་ལྷིང་ཡོང་རྒྱུའི་ཞི་རྩ་ཞེས་པའི་བརྗོད་གཞིའི་ཐོག་དཔྱད་ཞིག་སྤེལ་འདུག་པ་དང། དེའི་ནང་ ChenQuanguo ཡིས་རྒྱལ་ཁབ་ནང་ཟིང་འཁྲུག་ཟེར་བ་ལས་ངན་ཚབས་ཆེ་བ་གཞན་གང་ཡང་མེད་པ་དང། རྒྱ་ནག་རྒྱལ་ཡོངས་སུ་བརྟན་ལྷིང་བསྐྲུན་ཐུབ་མིན་དེ་བཞིན་བོད་ནང་བདེ་འཇགས་བརྟན་ལྷིང་ཇི་ཙམ་བསྐྲུན་ཐུབ་མིན་ལ་ཐད་ཀར་འབྲེལ་བ་ཡོད་སྐོར་བརྗོད་པ་དང་འབྲེལ། དེའི་ཆེད་གཙོ་བོ་རྒྱལ་གཅེས་ལྷག་བསམ་ཅན་གྱི་རྒྱ་རིགས་དང་བོད་རིགས་འགོ་ཁྲིད་ནུས་པ་ལྡན་པ་མང་དག་ཞིག་གསོ་སྐྱོང་བྱེད་ནས་དེ་དག་བོད་ཀྱི་རྫོང་དང་གྲོང་སྡེ་ཡོངས་སུ་དཔུང་འཇོག་བྱེད་དགོས་པ་མ་ཟད། འཛུགས་བསྐྲུན་ཕེལ་རྒྱས་ལ་རམ་འདེགས་དང། ལྷག་པར་ཁ་བྲལ་གྱི་ལས་འགུལ་ལ་མཐའ་གཅིག་ཏུ་ཁ་གཏད་ལྕོག་དགོས་ཀྱི་རེད་ཅེས་བརྗོད་འདུག...