ཇི་མི་ལའེ་ལགས་ལ་ལོ་ ༢༠ བཙོན་འཇུག་ཁྲིམས་ཐག་བཅད་པར་རྒྱལ་སྤྱིའི་ཁྱོན་ནས་སྐྱོན་བརྗོད་དྲག་པོ་གནང་བཞིན་འདུག

རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་འོག་མང་གཙོ་དོན་གཉེར་བ་དང་ Apple Daily  ཀུ་ཤུ་ཉིན་རེའི་གསར་ཁང་གི་བདག་པོ་ Jimmy Lai ཇི་མི་ལའེ་ལགས་སུ། མི་ལོ་ཉི་ཤུ་ཡི་བཙོན་འཇུག་ཁྲིམས་ཐག་བཅད་ཡོད་པ་དང་འབྲེལ། ཨ་རི་དང་ཨིན་ཡུལ། ཡུ་རོབ་མཐུན་ཚོགས། དེ་བཞིན་མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་གཞུང་དང་ཚོགས་སྡེ་ཁག་འདྲ་མིན་གྱིས་དེ་ནི་དྲང་བདེན་རྩ་བ་ནས་མ་ཡིན་པར། ཁྲིམས་ཁང་ལག་ཆར་སྤྱད་དེ་སྨྲ་བརྗོད་རང་དབང་ལ་དམ་བསྒྲགས་དང་། སྤྱི་ཚོགས་ལ་འཇིགས་སྐུལ་བྱེད་པ་ཞིག་རེད་ཅེས་སྐྱོན་བརྗོད་དྲག་པོ་གནང་འདུག

དེ་ཡང་བརྒྱུད་ལམ་ཁག་ཏུ་སྤེལ་བའི་གནས་ཚུལ་ནང་། ཁ་སང་ཕྱི་ཚེས་ ༩ ཉིན་རྒྱ་ནག་གཞུང་གིས་ ༢༠༢༠ ལོར་ཐོག་མར་འཛིན་བཟུང་བྱས་པའི་ཧོང་ཀོང་གི་ཀུ་ཤུ་ཉིན་རེའི་གསར་ཁང་གི་བདག་པོ་དང་མང་གཙོ་དོན་གཉེར་བ་ཇི་མི་ལའེ་ལགས་སུ་ཁྲིམས་མཐུན་མ་ཡིན་པའི་འདུ་འཛོམས་སུ་མཉམ་ཞུགས་བྱས་པ་དང་། རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་འོག་མི་ལོ་ཉི་ཤུ་ཡི་བཙོན་འཇུག་ཁྲིམས་ཐག་བཅད་འདུག

གནས་ཚུལ་དེ་ཐོན་མ་ཐག་ཨ་རིའི་ཕྱི་སྲིད་བློན་ཆེན་ Marco Rubio མཱར་ཁོ་རུ་བྷིཡོ་ལགས་ཀྱིས། ཁྲིམས་ཆད་དེ་ནི་དྲང་བདེན་མ་ཡིན་པ་དང་ཡ་ང་བ་ཞིག་ལ་འགྲེལ་བརྗོད་དང་འབྲེལ། ཁོང་ཁྲལ་དུ་གློད་བཀྲོལ་གཏོང་དགོས་པའི་འབོད་སྐུལ་གནང་བ་མ་ཟད། ཨིན་ཡུལ་ཕྱི་སྲིད་བློན་ཆེན་  Yvette Cooper ཡཱ་ཝིཌི་ཀུ་པཱར་ལགས་ཀྱིས་ལོ་ ༧༨ ལ་སོན་པའི་ཇི་མི་ལའེ་ལ་མཚོན་ན།  ལོ་ ༢༠ བཙོན་འཇུག་དེ་ནི་རྒྱ་གཞུང་ལ་སྐྱོན་བརྗོད་བྱེད་མཁན་རྣམས་དྲག་གནོན་སླད་དམིགས་པའི་ཆབ་སྲིད་ཀྱི་སྐུལ་སློང་ལྔན་པའི་ཚེ་གང་གི་ཁྲིམས་ཆད་ལྟ་བུ་ཞིག་ཡིན་པ་འགྲེལ་བརྗོད་བྱས་འདུག  ད་དུང་ཧོང་ཀོང་གི་དབང་འཛིན་པ་ཚོ་ལ་ཇི་མི་ལའེ་ཡི་ཡ་ང་བའི་མནར་གཅོད་མཚམས་འཇོག་གིས་ཁོང་རང་གི་ནང་མིའི་སར་གློད་བཀྲོལ་གཏོང་དགོས་པའི་དགོས་འདུན་བཏོན་འདུག

དེ་བཞིན་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་གཙོ་འཛིན་ Volker Türk ཝོལ་ཀར་ཏུ་རུཀ་ལགས་ཀྱིས་ལོ་ ༢༠ ཁྲིམས་ཆད་དེ་ནི་རྒྱལ་སྤྱིའི་ཁྲིམས་དང་རྩ་བ་ནས་མི་མཐུན་པ་ཞིག་ཡིན་པ་གསུངས་ཏེ། དེ་འབྲེལ་ཁྲིམས་ཆད་ཕྱིར་འཐེན་དགོས་པ་དང་།  ཁྲིམས་ཆད་དེའི་ནང་དོན་གསལ་པོ་མེད་པའི་ཁར་རྒྱ་ཆེ་དྲག་པའི་ཧོང་ཀོང་གི་རྒྱལ་ཁབ་བདེ་འཇགས་ཁྲིམས་ལུགས་ཞེས་པ་དེ་བཞིན་རྒྱལ་སྤྱིའི་འགྲོ་བ་མིའི་ཐོབ་ཐང་གི་འགན་འཁྲི་དང་འགལ་བ་ཡོད་པ་སོགས་འགྲེལ་བཤད་ཀྱིས་དེ་ལྟར་ལག་བསྟར་བྱེད་ཐུབ་པ་གསལ་སྟོན་བྱས་ཡོད་སྐོར་གསུངས་འདུག

གཞན་ཡང་ཡུ་རོབ་མཐུན་ཚོགས་ཀྱི་མགྲིན་ཚབ་པ་ལྕམ་སྐུ་  Anitta Hipper ཨཱ་ནི་ཊ་ཧཡེ་པཱར་ལགས་ཀྱི་ཀྱང་རྒྱ་ནག་གི་ཁྲིམས་ཆད་དེར་སྐྱོན་བརྗོད་ཤུགས་ཆེ་གནང་བ་དང་འབྲེལ།  ཁོང་འཁྲལ་དུ་ཆ་རྐྱེན་གང་ཡང་མེད་པའི་སྒོ་ནས་གློད་བཀྲོལ་གཏོང་དགོས་པའི་འབོད་སྐུལ་ཞུས་འདུག

དེ་བཞིན་ CECC ཞེས་ཨ་རིའི་གྲོས་ཚོགས་ཀྱི་རྒྱ་ནག་ཐོག་གི་ལས་དོན་ཚོགས་ཆུང་གི་འཐུས་མི་ནས་ཇི་མི་ལའེ་ལ་ཁྲིམས་ཐག་བཅད་པ་དེར་ངོ་རྒོལ་མཐའ་གཅིག་ཏུ་གནང་བ་དང་ཆབས་ཅིག འདི་ནི་རྒྱ་གཞུང་གིས་ཧོང་ཀོང་ནང་གི་གསར་འགོད་རང་དབང་དང་། ཞི་བའི་ལས་འགུལ་ལ་རྡུང་རྡེག་གཏོང་བའི་བྱ་སྤྱོད་ཞིག་ཡིན་པ་མ་ཟད། ཁྲིམས་ཁང་ལག་ཆར་སྤྱད་དེ་སྨྲ་བརྗོད་རང་དབང་ལ་དམ་བསྒྲགས་དང་སྤྱི་ཚོགས་ལ་འཇིགས་སྐུལ་བྱེད་པའི་བྱ་སྤྱོད་ཞིག་ཡིན་པའི་སྐྱོན་བརྗོད་གནང་འདུག

དེ་མ་ཟད་ཇི་མི་ལའེ་ཡི་བུ་ Sebastien སེ་བྷེས་ཊིན་ལགས་ཀྱིས། པ་ལགས་ཀྱིས་ནང་མི་རྣམས་སླར་ཡང་མི་མཐོང་བར་དངངས་སྐྲག་དང་།  ཁོང་གཅིག་པུར་གྲོངས་རྒྱུར་ཞེད་སྣང་བྱེད་ཀྱིན་འདུག་བཅས་ཀྱང་བརྗོད་འདུག

སྤྱིར་ཕྱི་ལོ་ ༡༩༩༧ ལོར་ཨིན་ཡུལ་གིས་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག ཧོང་ཀོང་རྒྱ་ནག་ལ་རྩིས་སྤྲོད་བྱས་ཡོད་པ་དང་། སྐབས་དེར་རྒྱ་ནག་གཞུང་གིས་ཧོང་ཀོང་གི་གཞི་རྩའི་ཁྲིམས་ཀྱི་དགོངས་དོན་ལྟར། ཧོང་ཀོང་ནང་སྨྲ་བརྗོད་རང་དབང་དང་འདུ་འཛོམས་རང་དབང་སོགས་ཁག་ཐེག་བྱས་ཡོད་པ་རེད།  ཕྱི་ལོ་ ༢༠༡༩ ལོར་ཧོང་ཀོང་གཞུང་གིས་རྒྱ་ནག་སྐམ་ས་དང་མཉམ་དུ་ཉེས་ཅན་རྩིས་སྤྲོད་ཀྱི་ཁྲིམས་གཏན་འབེབས་བྱ་རྩིས་བྱས་པ་ལ་བརྟེན་ནས། མང་གཙོ་དོན་གཉེར་བས་སྣེ་ཁྲིད་པའི་གཞུང་རྒོལ་གྱི་ལས་འགུལ་ཤུགས་ཆེན་བྱུང་ཡོད་པ་དང་། ལས་འགུལ་ཁྲོད་དྲག་པོའི་དོན་རྐྱེན་ཡང་བྱུང་ཡོད་སྟབས། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་ཧོང་ཀོང་གི་མང་གཙོ་དོན་གཉེར་བར་དམིགས་ཏེ། རྒྱལ་ཁབ་བདེ་འཇགས་ཀྱི་ཁྲིམས་གཞི་ཞེས་པ་ཞིག་གཏན་འབེབས་བྱས་ནས། རྒྱལ་ཁབ་ཁ་བྲལ་དང་མགོ་རྟིང་སློག་པ། གྱེན་ལོག་གིས་མཚོན་པའི་བདེ་སྲུང་ལ་གནོད་པའི་བྱ་སྤྱོད་ཁག་བཀག་འགོག་བྱེད་པར་ཁ་གཡར་ཏེ། ཧོང་ཀོང་གི་ལས་འགུལ་བ་ཚོ་འཛིན་བཟུང་བྱས་པ་དང་། གྲོས་ཚོགས་འཐུས་མི་མང་གཙོ་དོན་གཉེར་ཅན་ཕྱིར་ཕུད་བཏང་བ་སོགས་བྱས་ཡོད་པ་རེད། རྒྱལ་ཁབ་བདེ་འཇགས་ཀྱི་ཁྲིམས་གཏན་འབེབ་བྱེད་སྐབས་ཉུང་མཐར་མི་གྲངས་ ༣༠༠ ལྷག་འཛིན་བཟུང་བྱས་པའི་གནས་ཚུལ་ཐོན་ཡོད་པ་དང་། ཀུ་ཤུ་ཉིན་རེའི་གསར་ཁང་གཙོས་པའི་རང་དབང་གི་གསར་འགོད་པ་དང་རྩོམ་པ་པོ། ལས་འགུལ་བ་མང་པོ་འཛིན་བཟུང་བྱས་པ་དང་། ཁག་ཅིག་བཙན་བྱོལ་དུ་འགྲོ་དགོས་བྱུང་ཡོད་པ་རེད།

གཞི་རྩའི་ཨིན་ཡུལ་གྱི་སྲིད་བློན་ Keir Starmer མཆོག་ཟླ་ ༡ ཚེས་ ༢༨ ཉིན་རྒྱ་ནག་ཏུ་ཉིན་བཞིའི་རྒྱལ་དོན་འཚམས་གཟིགས་སུ་ཆེད་ཕེབས་ཀྱིས། རྒྱ་ནག་གི་སྲིད་འཛིན་ཞི་ཅིན་ཕིང་དང་ཐུག་འཕྲད་བྱས་ཡོད་པ་དང་། སྐབས་དེར་ཞི་ཅིན་ཕིང་དང་ལྷན་ཨིན་ཇིའི་མི་སེར་ཡིན་པའི་ཧོང་ཀོང་གི་ཚོང་པ་ཇི་མི་ལའེ་ལགས་ཀྱིས་གནད་དོན་གཙོས་གྲོས་བསྡུར་བྱ་འོས་པའི་གནད་དོན་ཁག་གླེང་སློང་བྱས་ཡོད་པ་རེད་འདུག