དེ་རིང་ཡོ་རོབ་རྒྱལ་ཁབ་སུད་སིའི་ཇི་ནི་ཝ་གྲོང་ཁྱེར་དུ་རྒྱལ་ཚོགས་ཀྱི་བེུད་ལ་དབྱེ་འབྱེད་འགོག་ཐབས་ཚོགས་ཆུང་གི་ལྷན་ཚོགས་ཐེངས་ ༨༥ པ་དབུ་འཛུགས་གནང་བ་དང་བསྟུན་སུད་སི་བོད་ཀྱི་སྐུ་ཚབ་དོན་ཁང་དང་བོད་ཀྱི་བེུད་ལྷན་ཚོགས་གཉིས་ཀྱིས་ཚོགས་འདུའི་ཐོག་བོད་ནང་གི་བེུད་རྣམས་ཀྱི་གནས་སྟངས་སྐོར་སྙན་ཐོ་ཁག་གཉིས་ཕུལ་འདུག
གསར་འགོད་པས་ཚོགས་འདུ་དེའི་ཆེད་དུ་ཇི་ནི་ཝར་ཆེད་བཅར་ཞུས་པའི་བོད་ཀྱི་བེུད་ལྷན་ཚོགས་ཀྱི་ཚོགས་གཙོ་བསྟན་འཛིན་སྒྲོལ་མ་ལགས་སུ་བཅར་འདྲི་ཞུས་པར་ཁོང་གིས་བེུད་ལྷན་ཚོགས་ཀྱི་ངོས་ནས་སྙན་ཐོ་དེ་གློག་འཕྲིན་བརྒྱུད་རྒྱལ་ཚོགས་ཀྱི་ཚོགས་ཆུང་ལ་ཕུལ་ཟིན་པ་དང་། སྙན་ཐོ་ནང་གཙོ་བོ་བོད་ནང་གི་བེུད་རྣམས་ལ་ཤེས་ཡོན་དང་རིག་གཞུང་། ལས་ཀ་སོགས་གཞི་རྩའི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་བཏང་བའི་ངལ་བ་མྱོང་བཞིན་པའི་གནས་སྟངས་རྣམས་ཞིབ་རྒྱས་སུ་ངོ་སྤྲོད་ཞུས་པ་དང་སྦྲགས། རྒྱ་ནག་གཞུང་ལ་དོན་ཚན་བཅུ་ཅན་གྱི་འདྲི་རྩད་གནང་ཡོད་པ་ལྟར་ཚོགས་འདུ་ཐོག་སྐར་མ་གཉིས་ཀྱི་རིང་བཀའ་མོལ་ཞུ་རྒྱུ་བྱུང་ཞེས་གསུངས་ཡོད།
ཐེངས་འདིའི་རྒྱལ་ཚོགས་ཀྱི་བེུད་ལ་དབྱེ་འབྱེད་འགོག་ཐབས་ཀྱི་ཚོགས་ཆུང་གི་ལྷན་ཚོགས་དེ་དེ་རིང་ཚེས་ ༨ ནས་དབུ་འཛུགས་ཀྱིས་ཚེས་ ༢༦ བར་ཚོགས་གནང་གི་ཡོད་པ་དང་། བོད་ཀྱི་བེུད་ལྷན་ཚོགས་དང་སུད་སི་བོད་ཀྱི་སྐུ་ཚབ་དོན་ཁང་གིས་སྙན་ཐོ་ཞིག་ཕུལ་ཡོད་པ་ལྟར། བོད་ནང་གི་བེུད་རྣམས་ཀྱི་ཡ་ང་བའི་གནས་སྟངས་དང་བློ་འཚབ་ཆེས་ཆེར་གནང་དགོས་པའི་གནད་དོན་ཁག་ཅིག་མངོན་གསལ་དང་ཆབས་ཅིག རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་འོག་བོད་མི་ཡོངས་དང་ལྷག་པར་བེུད་རྣམས་ལ་ངལ་བ་ཆེས་ཆེར་འཕྲད་བཞིན་ཡོད་སྐོར་མངོན་གསལ་གནང་འདུག རྒྱ་ནག་གཞུང་ལ་བོད་ནང་གི་བེུད་རྣམས་ལ་སྐྱེས་པ་ཚོ་དང་དེ་བཞིན་རྒྱ་རིགས་བེུད་ཚོ་དང་ཐོབ་ཐང་དང་གོ་སྐབས་འདྲ་མཉམ་ཕུལ་དགོས་པར་མ་ཟད། བེུད་ཆབ་སྲིད་བཙོན་པ་རྣམས་གློད་བཀྲོལ་དགོས་པ། བོད་མི་རྣམས་དང་བེུད་རྣམས་ཀྱི་རིགས་རྫས་བསྡུ་ལེན་མཚམས་འཇོག་བྱེད་དགོས་པ་སོགས་དོན་ཚན་དྲུག་ཅན་གྱི་དགོས་འདུན་མངོན་གསལ་གནང་འདུག པར་བདག་དབང་སྤྱི་ཚོགས་དྲ་རྒྱ།
