སྦག་སྦག་སྐོར་སྐྱོད་ཀྱི་ལས་འགུལ་བ་གཉིས་ཝཱ་རཱ་ཎ་སཱིར་འབྱོར་བ།

བོད་ཀྱི་དྭང་ཞབས་དམག་མི་ཟུར་པ་ཚེ་རིང་ཡེ་ཤེས་ལགས་དང་ཁོང་གི་གྲོགས་པོ་འཆི་མེད་རྟ་མགྲིན་ལགས་རྣམ་གཉིས་ཀྱིས་བཞུགས་སྒར་དྷ་རམ་ས་ལ་ནས་རྒྱ་གར་རྒྱལ་ཡོངས་སུ་བོད་དོན་ཆེད་སྦག་སྦག་སྐོར་སྐྱོད་ཀྱི་ལས་འགུལ་ཞིག་དབུ་འཛུགས་གནང་ཡོད་པ་ལྟར་ཁ་སང་དགོང་དྲོར་ཁོང་གཉིས་རྒྱ་གར་ཡུ་པི་མངའ་སྡེའི་ཝཱ་རཱ་ཎ་སཱིར་འབྱོར་འདུགགསར་འགོད་པས་ཚེ་རིང་ཡེ་ཤེས་ལགས་སུ་ལས་འགུལ་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གཉིས་ཀྱིས་ཐོག་མའི་འཆར་གཞིར་གཞིགས་ཚེ་སྦག་སྦག་སྐོར་སྐྱོད་གནང་སྟེ་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱ་གར་གྱི་སྤྱི་དམངས་གཟེངས་རྟགས་མཐོ་ཤོས་ Bharat Ratna ཞེས་པ་དེ་འབུལ་ལམ་ཞུ་རྒྱུར་མཚན་རྟགས་བསྡུ་རུབ་ཀྱི་ཞུ་སྐུལ་ལས་འགུལ་དེ་དབུ་འཛུགས་གནང་ཡོད་ཀྱང་། ཕྱིས་སུ་ Chandigarh ལ་འབྱོར་སྐབས་གནད་དོན་ཞིག་གི་རྐྱེན་གྱིས་ལས་འགུལ་གྱི་འབོད་སྒྲར་བསྒྱུར་བཅོས་གནང་དགོས་བྱུང་སྟེ་ Rights For Pride ཞེས་པའི་འབོད་ཚིག་འོག་ད་བར་བོད་མིའི་གཞིས་ཆགས་ཁག་ ༢༣ ནང་སྐོར་སྐྱོད་ཀྱིས་ས་གནས་བོད་མི་དང་གཞུང་འབྲེལ་མིན་པའི་ཚོགས་ཁག་སོགས་དང་ཐུག་འཕྲད་ཀྱིས་བོད་ཀྱི་རྩ་དོན་ཐོག་ཚང་མས་སྔར་ལྷག་ནུས་པ་སྤུངས་དགོས་གལ་ཡིན་པའི་གཞེན་སྐུལ་གནང་འདུགཚེ་རིང་ཡེ་ཤེས་ལགས་ནས་ཐེངས་འདིའི་ལས་འགུལ་དགོས་དམིགས་དང་འབྲེལ་ས་གནས་སོ་སོའི་བོད་མི་རྣམས་ནས་བོད་ཀྱི་རྩ་དོན་ཐོག་འགན་ཁུར་བཞེས་ཐོག་རྒྱ་གར་གྱི་དཔོན་རིགས་རྣམ་པ་བརྒྱུད་བོད་ཀྱི་གནད་དོན་འདི་རྒྱ་གར་གྱི་གྲོས་ཚོགས་སུ་གླེང་སློང་གནང་ཐུབ་ཚེ་དེས་ཐུགས་ཕན་གསོས་ངེས་ཡིན་པར་གསུངས་ཡོད། དེ་བཞིན་ཁོང་དང་ཁོང་གི་གྲོགས་པོ་གཉིས་ནས་རང་ཉིད་ཀྱི་དང་བླངས་དཔྱ་དངུལ་ལག་དེབ་ལྷན་དུ་བསྣམས་ཡོད་པ་དང་འོས་བསྡུའི་དངོས་གཞི་ཉིན་མོར་ས་གནས་གང་དུ་འབྱོར་བ་དེར་འོས་འཕེན་རྒྱུ་ཡིན་པ་གསུངས་ཡོད།གཞི་རྩའི་ཁོང་རྣམ་གཉིས་ཀྱི་སྦག་སྦག་སྐོར་སྐྱོད་ཀྱི་ལས་འགུལ་དེ་ནི་བཞུགས་སྒར་ནས་དབུ་འཛུགས་ཀྱིས་རྒྱ་གར་རྒྱལ་ཡོངས་ཀྱི་ཤར་ལྷོ་ནུབ་བྱང་གང་སར་བཞུགས་པའི་བོད་རིགས་གནས་ཡུལ་ས་ཁུལ་རེ་རེར་ཆེད་བསྐྱོད་ཀྱིས་བོད་མིའི་ཚོགས་སྡེ་ཁག་ལ་འབྲེལ་བ་གནང་སྟེ་ས་གནས་སོ་སོའི་རྒྱ་གར་གྱི་དཔོན་རིགས་གཙོས་མི་མང་ཁྲོད་ནས་བོད་དོན་ལ་རྒྱབ་སྐྱོར་སྔར་ལྷག་ཐོབ་ཆེད་ནུས་པ་གང་ཐུབ་འདོན་དགོས་པར་ཆེད་དམིགས་གནང་སྟེ་སྤེལ་བ་ཞིག་ཡིན་པ་རེད།