སྤྱི་ནོར་༸གོང་ས་༸སྐྱབས་མཆོན་ཆེན་པོ་ཆེ་མཆོག་གིས་རྒྱ་གར་གྱི་སྲིད་བློན་མོ་དཱི་མཆོག་གི་འཁྲུངས་སྐར་ལ་འཚམས་འདྲི་མཛད་པ་དང་སྦྲགས། སྲིད་བློན་མཆོག་གི་དབུ་འཁྲིད་འོག་རྒྱ་གར་རྒྱལ་ཁབ་དེ་སྔར་ལས་དར་རྒྱས་སུ་འགྲོ་ངེས་ཡིན་པར་བཀའ་བསྩལ་འདུག
དེའང་ ༸གོང་ས་མཆོག་གིས་དེ་རིང་ཚེས་ ༡༧ ཉིན་སྲིད་བློན་མོ་དཱི་མཆོག་དགུང་ལོ་ ༦༨ ལ་ཕེབས་པའི་འཁྲུངས་སྐར་ལ་འཚམས་འཕྲིན་ཞིག་བསྩལ་ནས། སྲིད་བློན་མཆོག་སྐུ་གཟུགས་སྔར་ལྟར་བདེ་ཐང་ཡོང་བར་ཐུགས་སྨོན་མཛད་གྱིན་ཡོད་ཅེས་བཀའ་བསྩལ་བ་དང་། ཐེངས་འདིའི་གོ་སྐབས་ཆེས་བཞེས་དང་འབྲེལ། རྒྱ་གར་ནི་འཛམ་བུ་གླིང་གི་མང་གཙོའི་རྒྱལ་ཁབ་ཆེ་ཤོས་དེ་ཡིན་པ་ཙམ་དུ་མ་ཟད། རྒྱལ་སྤྱིའི་ཁྲོད་ཐུན་མོང་མ་ཡིན་པའི་ལག་རྗེས་འབུལ་ཐུབ་པའི་རྒྱལ་ཁབ་ཅིག་ཡིན་པ་དང་། རྒྱ་གར་གཞུང་ངོས་ནས་འགྲོ་བའི་བདེ་དོན་སླད་རྒྱལ་ཁབ་དེའི་རྩ་ཆེའི་རིན་ཐང་སྟེ། ཆོས་ལུགས་མཐུན་འབྲེལ་དང་། སྙིང་རྗེ། འཚེ་བ་མེད་པའི་ལྟ་གྲུབ་བཅས་འཛམ་གླིང་དེའི་ཐོག་སྤེལ་རྒྱུར་ཐུགས་འགན་ཆེ་ཙམ་བཞེས་ཐུབ་པའི་གདེང་ཚོད་ཡོད་ཅེས་བཀའ་བསྩལ་འདུག
ལྷག་དོན་༸གོང་ས་མཆོག་ནས་གང་ཉིད་རྒྱ་གར་གྱི་བང་ཆེན་ཞིག་ཡིན་པར་དགོངས་ཀྱི་ཡོད་པ་བཞིན། ས་ཕྱོགས་གང་དུ་ཕེབས་ན་ཡང་རྒྱ་གར་གྱི་སྲོལ་རྒྱུན་རང་བཞིན་གྱི་བཟོད་སྲན་དང་ཆོས་ལུགས་མཐུན་འབྲེལ་སོགས་ལ་བསྟོད་བསྔགས་ཞུ་བཞིན་ཡོད་པ་མ་ཟད། ཉེ་བའི་ལོ་ཁ་ཤས་ནས་བཟུང་རྒྱ་གར་གྱི་གནའ་བོའི་རིག་གཞུང་བསྐྱར་གསོའི་ཐད་དང་དོད་ཆེན་པོ་གནང་བཞིན་ཡོད་པ་དང་། དེའང་ནང་སེམས་ཀྱི་རིན་ཐང་གོང་འཕེལ་དང་ཉོན་མོངས་འདུལ་བའི་སླད་གལ་ཆེན་ཡིན་པར་ཡིད་ཆེས་དང་བརྒྱུད་སྤེལ་ཞུ་བཞིན་ཡོད་ཅེས་བཀའ་གནང་འདུག དེ་བཞིན་ང་ཚོའི་ལུས་པོའི་བདེ་ཐང་ཆེད་འཕྲོད་བསྟེན་གལ་ཆེན་ཡིན་པ་བཞིན་ནང་སེམས་ཀྱི་ཉོན་མོངས་དུག་གསུམ་འདུལ་བའི་སླད་སེམས་ཀྱི་འཕྲོད་བསྟེན་གལ་ཆེན་ཡིན་པར་གསུངས་པ་དང་འབྲེལ། རྒྱ་གར་གྱི་གནའ་བོའོ་ཤེས་རབ་ཀྱི་མ་ལག་དག་གིས་དེའི་ཐད་ངེས་གཏན་གྱིས་ཕན་ཐོག་བྱེད་ཐུབ་ཀྱི་རེད་ཅེས་བཀའ་བསྩལ་འདུག
༸གོང་ས་མཆོག་གིས་གཞན་ཡང་། རྒྱ་གར་རྒྱལ་ཁབ་ནི་གནའ་བོའི་ཤེས་ཡོན་དང་དེང་རབས་ཀྱི་ཤེས་ཡོན་གཉིས་ཟུངའབྲེལ་བྱས་ནས་སེམས་ཀྱི་ཞི་བདེ་བསྐྲུན་ཐུབ་མཁན་གྱི་ནུས་པ་ཡོད་པའི་རྒྱལ་ཁབ་གཅིག་ཁོ་ན་དེ་ཡིན་པ་དང་། རྒྱ་གར་གྱི་གཞོན་སྐྱེས་དག་གི་ཁྲོད་ནས་འདི་ལ་དགའ་མོས་བྱེད་མཁན་མང་པོ་ཞིག་ཡོང་བཞིན་པ་དེས་མགོན་པོ་གང་ཉིད་ལ་སེམས་ཤུགས་བསྩལ་སོང་ཞེས་བཀའ་གནང་བ་མ་ཟད། འཚམས་འཕྲིན་གྱི་མཇུག་སྡོམས་སུ་རྒྱ་གར་ནི་ང་ཚོའི་ཁྱིམ་གཞི་ཆགས་ནས་མི་ལོ་ ༥༩ ཕྱིན་ཡོད་སྟབས། ངོས་ནས་བོད་མི་དག་གི་ཚབ་བྱས་ནས་རྒྱ་གར་གཞུང་མང་གཉིས་ཀྱི་བཀའ་དྲིན་དང་སྦྱིན་སེམས་ལ་ལྷག་བསམ་འཁོལ་བའི་བཀའ་དྲིན་ཆེ་ཞུ་བ་དང་། རྒྱ་གར་གྱི་སྦྱིན་སེམས་དང་བྱམས་བརྩེ་ལ་བརྟེན་ནས་ང་ཚོས་བཙན་བྱོལ་དུ་བོད་ཀྱི་གནའ་བའི་རིག་གཞུང་རྒྱུད་འཛིན་ཐུབ་པ་བྱུང་ཡོད་ཅེས་བཀའ་བསྩལ་འདུག
