དེ་རིང་ཕྱི་ཚེས་ ༣ ཉིན་གྱི་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་ཌི་ཤའི་སྤྱི་ཁྱབ་བློན་ཆེན་སྐུ་ཞབས་ Naveen Patnaik མཆོག་གི་མཚན་ཐོག་ཏུ་ཁ་སང་ཕྱི་དྲོ་མངའ་སྡེ་དེའི་ Balasore ཞེས་པའི་ཁུལ་དུ་གློ་བུར་མེ་འཁོར་རྡུང་ཁ་ཐེབས་རྐྱེན་མི་མང་མང་པོ་རྨས་སྐྱོན་དང་འདས་གྲོངས་སུ་གྱུར་བར་གདུང་སེམས་མཉམ་བསྐྱེད་ཀྱི་ཐུགས་གསོའི་གསུང་འཕྲིན་སྩལ་འདུག
དེ་ཡང་༸གོང་ས་མཆོག་གིས་ཐུགས་གསོའི་གསུང་འཕྲིན་དེའི་ཐོག་མར་ཨོ་ཌའི་ཤ་མངའ་སྡེའི་ Balasore ཞེས་པའི་ཁུལ་དུ་གློ་བུར་མེ་འཁོར་རྡུང་ཁ་ཐེབས་ཏེ་མི་མང་པོ་རྨས་སྐྱོན་དང་འདས་གྲོངས་སུ་གྱུར་བའི་གནས་ཚུལ་ཐོས་མ་ཐག་ཐུགས་ཕམ་ཆེན་པོ་བྱུང་ཞེས་བཀའ་སྩལ་དང་སྦྲགས། དོན་རྐྱེན་དེའི་ཁྲོད་འདས་གྲོངས་སུ་གྱུར་བའི་ནང་མི་ལྟོས་བཅས་ཡོངས་ལ་ཐུགས་གསོ་དང་། རྨས་སྐྱོན་ཕོག་མཁན་རྣམས་མྱུར་དུ་དྲག་སྐྱེད་ཡོང་བའི་ཐུགས་སྨོན་མཚམས་སྦྱོར་མཛད་འདུག
དེ་བཞིན་༸གོང་ས་མཆོག་གིས་རྒྱ་གར་དབུས་གཞུང་དང་མངའ་སྡེའི་གཞུང་གིས་གཙོས་པའི་ཚོགས་པ་ཁག་འདྲ་མིན་ནས་དོན་རྐྱེན་དེའི་ཁྲོད་དཀའ་སྡུག་མྱོང་མཁན་རྣམས་ལ་སྨན་བཅོས་སོགས་ཀྱི་མཐུན་འགྱུར་གང་ལེགས་གནང་བཞིན་ཡོད་པར་རྗེས་སུ་ཡི་རང་ཡོད་ཅེས་བཀའ་སྩལ་མཛད་འདུག
༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་མགོན་པོ་༸གང་ཉིད་མཆོག་དེ་སྔོན་ཁུལ་དེར་ལེན་མང་ཆིབས་བསྒྱུར་མཛད་ཡོད་པ་དང་། ལྷག་པར་དུ་ཕྱི་ལོ་ ༢༠༡༧ ལོར་སྐུ་ཞབས་ཁོང་དང་མཇལ་མོལ་བྱུང་ཡོད་སྐོར་ཐུགས་དྲན་གསོ་མཛད་དེ། ཨོ་ཌི་ཤ་མངའ་སྡེའི་མི་མང་ལ་གདུང་སེམས་མཉམ་བསྐྱེད་མཚོན་ཆེད་ཏཱ་ལའི་བླ་མའི་དགེ་རྩ་ཚོགས་པ་ནས་སྨན་བཅོས་མཐུན་འགྱུར་དང་ཉེན་སྐྱོབ་ཆེད་ཞལ་འདེབས་སྩལ་རྒྱུར་བཀའ་སྩལ་དང་སྦྲགས། ཐུགས་སྨོན་མཚམས་སྦྱོར་མཛད་འདུག
གཞི་རྩའི་ཨོ་ཌི་ཤའི་ཁུལ་དུ་གློ་བུར་མེ་འཁོར་རྡུང་ཁའི་དོན་རྐྱེན་དེ་ཁ་སང་ཕྱི་དྲོ་ཆུ་ཚོད་ ༧ ཡས་མས་སུ་བྱུང་བ་ཞིག་ཡིན་འདུག་ཅིང་། བརྒྱུད་ལམ་ཁག་གི་ནང་གནས་ཚུལ་སྤེལ་བ་ལྟར་ན་ Balasore ཞེས་པའི་ཁུལ་དུ་མེ་འཁོར་གསུམ་བར་རྡུང་ཁ་བྱུང་རྐྱེན་དེའི་ཁྲོད་ད་བར་ཤེས་རྟོགས་ཐུབ་པའི་ནང་མི་གྲངས་ ༢༣༠ ལྷག་འདས་གྲོངས་སུ་གྱུར་ཡོད་པ་མ་ཟད། མི་གྲངས་ ༩༠༠ ལྷག་རྨས་སྐྱོན་ཕོག་ཡོད་པ་རེད་འདུག དེ་བཞིན་དོན་རྐྱེན་དེ་བྱུང་འཕྲལ་རྒྱ་གར་གྱི་སྲིད་བློན་མཆོག་དང་སྲིད་འཛིན་མཆོག་གིས་གཙོས་པའི་གནད་ཡོད་མི་སྣ་མང་པོས་དེ་འབྲེལ་ཐུགས་གསོ་གནང་འདུག
