༸གོང་ས་མཆོག་གིས་རྡོར་གདན་གྱི་ཆོས་འབྲེལ་དབུ་འཛུགས་དང་སྦྲགས་ལག་ལེན་སོ་བདུན་མའི་བཀའ་ཆོས་བསྩལ་བ།

དེ་རིང་ཕྱི་ལོ་ ༢༠༢༠ ཟླ་ ༡ པོའི་ཚེས་ ༢ ནས་འགོ་འཛུགས་ཀྱིས་ཕྱི་ཚེས་ ༦ བར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་ཆོས་འབྲེལ་བསྐྱངས་རྒྱུའི་མཛད་འཆར་ཡོད་པ་ལྟར། དེ་རིང་ཆོས་འབྲེལ་དངོས་གཞི་དབུ་འཛུགས་ཀྱིས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་བསྩལ་གནང་སོང་།

དེ་ཡང་དེ་རིང་སྔ་དྲོ་ཕྱག་ཚོད་ ༨།༣༠ ཡོལ་ཙམ་ལ་༸གོང་ས་མཆོག་གིས་རྡོར་གདན་གྱི་དུས་འཁོར་དབང་ཆེན་ར་བའི་ནང་རྒྱལ་སྲས་ལག་ལེན་སོ་བདུན་མའི་བཀའ་ཆོས་མ་བསྩལ་བའི་གོང་དུ་དགེ་འདུན་པ་ཁག་ཅིག་ནས་པཱ་ལིའི་གསུང་སྐད་ཐོག་སངས་རྒྱས་རྗེས་དྲན་དང་། དེ་བཞིན་རྒྱ་རིགས་དང་རྒྱ་གར་སློབ་ཕྲུག་ཁག་ཅིག་ནས་ཤེས་རབ་སྙིང་པོ་གསུང་འདོན་གནང་བ་དང་སྦྲགས། ༸གང་ཉིད་མཆོག་གིས། སྤྱིར་འཛམ་གླིང་ནང་ཆོས་ལུགས་མང་པོ་ཡོད་པའི་ཁྲོད་མང་དག་ཅིག་དཀོན་མཆོག་ལ་གསོལ་བ་བཏབ་པ་མ་གཏོགས་རང་གི་རྒྱུད་བློ་སྦྱོང་སྟངས་ཐད་དོ་སྣང་གནང་གི་མེད་པ་དང་། ཡང་སྒོས་སངས་རྒྱས་པའི་ཆོས་དེ་བློ་སྦྱོང་སྟངས་ཐད་ཤུགས་ཆེར་གསུང་ཡོད་སྟབས། ཆོས་ལུགས་འགའ་ཤས་ལ་ཕྲན་བུ་ཐེ་ཚོམ་བྱེད་མཁན་ཚོས་སངས་རྒྱས་པའི་ཆོས་ལ་དོ་སྣང་དམིགས་བསལ་གནང་གི་ཡོད་པ་བཀའ་བསྩལ་སོང་། མ་ཟད། ༸གང་ཉིད་མཆོག་གིས། ང་ཚོ་ད་རེས་འདིར་འཛོམས་པ་རྣམས་ཕ་མེས་ནས་སངས་རྒྱས་པའི་ཆོས་ཉམས་ལེན་གནང་མཁན་ཞིག་ཆགས་སྟབས། སངས་རྒྱས་པའི་ཆོས་ཚུལ་ལ་ཤེས་ནས་དད་པ་ཐོབ་པ་ཞིག་དགོས་རྒྱུ་གལ་ཆེ་ཡིན་སྐོར་བཀའ་བསྩལ་སོང་།

དེ་བཞིན་༸གོང་ས་མཆོག་གིས། དེ་སྔ་ནུབ་ཕྱོགས་ལུང་པའི་ནང་སངས་རྒྱས་པའི་ཆོས་དང་འབྲེལ་བ་མེད་བསྡད་མཁན་ཆོས་རབ་ཏུ་རྣམ་འབྱེད་ཀྱི་ཤེས་རབ་ཡོད་མཁན་ཚོས་ད་ཆ་ནང་ཆོས་ཐོག་དོ་སྣང་གནང་བཞིན་པ་དང་ཆབས་ཅིག བཅོམ་ལྡན་འདས་ཀྱིས་ལོ་ ༢༥༠༠ སྔ་རོལ་དུ་ངས་བསྟན་པ་བྱང་ནས་བྱང་དུ་ཁྱབ་གདལ་འགྲོ་གི་རེད་གསུངས་པ་བཞིན་ཆ་དདངོས་སུ་གྲུབ་ཡོད་པ་དང་། ཕྱོགས་མཚུངས་༸གང་ཉིད་མཆོག་གི་དགོངས་གཞིར་སངས་རྒྱས་བསྟན་པ་དེ་ད་ཆ་ལྷོ་ནས་ལྷོ་ལ་དར་ཁྱབ་འགྲོ་ངེས་ཡིན་སྐོར་བཀའ་བསྩལ་སོང་།
ལྷག་པར་དུ་༸གང་ཉིད་མཆོག་གིས་ད་དུང་སེམས་འདུལ་ཐབས་ལས་འཕྲོས་ཏེ། ད་ཆ་འཛམ་བུ་གླིང་ནང་གི་སྡུག་བསྔལ་མང་དག་ཅིག་མིས་བཟོས་པ་ཞིག་དང་། སྡུག་བསྔལ་དེ་དག་ཡང་སྡུག་བསྡལ་འདོད་ནས་བཟོས་པ་མ་ཡིན་པ་དེ་དག་རྨོངས་ནས་ཆགས་སྡངས་དང་དུ་བླངས་ཏེ། ཆགས་སྡང་གཉེན་པོ་བསྟེན་མི་ཤེས་པའི་དབང་གིས་སྡུག་བསྡལ་ཡོང་བ་དང་། གང་ལྟར་བདེ་སྐྱིད་ཀྱི་འཛམ་བུ་གླིང་ཞིག་བསྐྲུན་ཐབས་སུ་བྱམས་བརྩེ་དང་དུ་ལེན་དགོས་སྐོར་བཀའ་བསྩལ་སོང་།

༸གོང་ས་མཆོག་གིས་བཀའ་ཆོས་བསྩལ་གྲུབ་རྗེས་རྒྱལ་སྲས་ཐོག་མེད་བཟང་པོའི་མཛད་པས་ལག་ལེན་སོ་བདུན་མའི་ཆོས་འབྲེལ་བསྩལ་བ་དང་། ཡང་སྒོས་ཆོས་འབྲེལ་རྗེས་སུ་༸རྗེ་རིན་པོ་ཆེ་མཆོག་དགོངས་པ་རྫོགས་ནས་ལོ་ངོ་ ༦༠༠ འཁོར་བའི་རྗེས་དྲན་སླད་ལྷ་ལྡན་ཆོ་འཕྲུལ་སྨོན་ལམ་ཚོགས་གནང་སོང་།
གཞི་རྩའི་ད་རེས་༸གང་ཉིད་མཆོག་གིས་བཀའ་ཆོས་དང་བཀའ་དབང་སླད་འཛམ་བུ་གླིང་གི་རྒྱལ་ཁབ་ ༦༧ ལྷག་ནས་བོད་མི་གཙོས་པའི་ཕྱི་རྒྱལ་བའི་ཆོས་ཞུ་བ་ ༣༠༠༠༠ ལྷག་ཕེབས་ཡོད་པ་དང་། སང་ཕྱི་ཚེས་ ༣ ཉིན་༸གོང་ས་མཆོག་གིས་སྤྱན་རས་གཟིགས་ཀྱི་བཀའ་དབང་བསྩལ་གནང་རྒྱུ་ཡིན་པ་རེད།