བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་དུ་ལྷོ་ཤར་ཨེ་ཤ་ཡའི་དད་ལྡན་པ་ཁག་ཅིག་ལ་ཉིན་བཞིའི་བཀའ་ཆོས་དབུ་འཛུགས་བསྐྱངས་པ་དང་འབྲེལ། མིའི་རང་བཞིན་ལྷན་སྐྱེས་ནི་བྱམས་བརྩེ་ལྡན་པ་ཞིག་ཡིན་སྟབས་བྱམས་བརྩེ་གོང་འཕེལ་ཐོག་འབད་བརྩོན་གནང་ཚེ་དེར་ནུས་པ་ངེས་ཅན་ཞིག་ཐོན་རྒྱུ་དང་སྤྱི་ཚོགས་འཆམ་མཐུན་ཞེས་པ་དེའང་བྱམས་བརྩེའི་ཐོག་ནས་བཟོ་ཐུབ་རྒྱུ་ཡིན་པའི་ལམ་སྟོན་མཛད་སོང་།
དེའང་ཨིན་དྷུ་ནེ་ཤི་ཡ། ཀོ་རི་ཡ། མཱ་ལེ་ཤེ་ཡ། སིངྒ་པུར། ཐའེ་ལན་ཌི། ཝི་ཏི་ནམ་སོགས་ལྷོ་ཤར་ཨེ་ཤ་ཡའི་དད་ལྡན་པ་ཁག་ཅིག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་པ་བཞིན། དེ་རིང་ཟླ་ ༩ ཚེས་ ༤ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་གཞུང་སྐུལ་བ་པོས་གཙོས་པའི་ཕྱི་ནང་གི་མང་ཚོགས་སྟོང་ཕྲག་འགལ་བར་སློབ་དཔོན་སངས་རྒྱས་བསྐྱངས་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་འགྲེལ་པ་བུདྡྷ་པཱ་ལི་ཏ་ལས་སྔར་ལོའི་ཆོས་འབྲེལ་འཕྲོས་རབ་བྱེད་བདུན་པའི་བཀའ་ཆོས་དབུ་འཛུགས་བསྐྱངས་སོང་།
༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཐོག་མར་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ནས་ཕེབས་པའི་ཆོས་ཞུ་བ་རྣམས་ཀྱིས་གཙོས་པའི་ཐའེ་ལན་ཌི། ཝི་ཏི་ནམ། དེ་བཞིན་ཀོ་རི་ཡའི་སོགས་ཀྱི་ཆོས་ཞུ་བ་ཚོར་དགའ་བསུའི་འཚམས་འདྲི་བསྩལ་བ་སྦྲགས། ༸གོང་ས་མཆོག་གི་ཐུགས་བསྐྱེད་དམ་བཅའ་ཆེན་པོ་བཞི་ཡོད་པ་ལས་དང་པོ་འགྲོ་བ་མི་གཅིག་གྱུར་གྱི་ཐུགས་བསྐྱེད་ཆེན་པོ་དང་འབྲེལ་ཏེ་མགོན་པོ་༸གང་ཉིད་མཆོག་ནི་འཛམ་གླིང་འདིའི་ནང་གི་འགྲོ་བ་མི་ཞིག་ཡིན་སྟབས་འཛམ་གླིང་འདི་ལ་བདེ་སྐྱིད་ཞིག་ཡོང་ཚེ་༸གོང་ས་མཆོག་ལའང་བདེ་སྐྱིད་ཡོང་གི་ཡོད་པ་དང་། འགྲོ་བ་ཀུན་ཆོས་དད་ཡོད་མེད་ལ་ལྟོས་མེད་ཞི་བདེ་བག་ཕེབས་ཤིག་འདོད་ཀྱི་ཡོད་པ་ལྟར། དེ་ལྟར་ཡོང་བར་འབད་བརྩོན་བྱེད་དགོས་ཞེས་ལམ་སྟོན་བསྩལ་ཡོད།
དེ་བཞིན་༸གོང་ས་མཆོག་གིས་གཞུང་དངོས་གཞི་དབུ་འཛུགས་མ་མཛད་གོང་དུ་རྣམ་ཀུན་ལྟར་ནང་ཆོས་ངོ་སྤྲོད་སྤྱི་བཤད་བསྩལ་སྐབས་སུ་མིའི་རང་བཞིན་ལྷན་སྐྱེས་དེ་ནི་བྱམས་བརྩེ་ལྡན་པའི་རང་བཞིན་ཡིན་པ་ཚན་རིག་པ་ཚོས་ཀྱང་བརྟག་དཔྱད་གནང་འབྲས་སུ་ར་འཕྲོད་ཡོད་སྐོར་དཔེ་མཚོན་དང་བཅས་ངོ་སྤྲོད་མཛད་པ་དང་འབྲེལ། སྤྱི་ཚོགས་འཆམ་མཐུན་ཞེས་པ་དེ་བྱམས་བརྩེས་བཟོ་ཐུབ་པ་མ་གཏོགས་ཁོང་ཁྲོ་དང་ང་རྒྱལ་གྱི་བཟོ་ཐུབ་རྒྱུ་མེད་པར་བཀའ་བསྩལ་སོང་།
མགོན་པོ་༸གང་ཉིད་མཆོག་གིས་གཞན་ཡང་འཛམ་གླིང་འདིའི་ཐོག་ཡོད་པའི་ཆོས་ལུགས་ཡོད་དོ་ཅོག་ཕན་ཚུན་མཐུན་འབྲེལ་ཡོང་ཐབས་སུ་ང་ཚོས་བདེ་སྐྱིད་ཀྱི་རྩ་བ་བྱམས་བརྩེའི་བློ་ལ་ཡོན་ཏན་དུ་བལྟས་ནས་དང་འདོད་གནང་དགོས་པ་དང་། དེང་སྐབས་ཆོས་ལུགས་རྒྱུ་མཚན་དུ་བྱས་ནས་མི་གསོད་རེས་ཀྱི་གནས་དོན་བྱུང་བཞིན་ཡོད་པ་ནི་ཆེས་ཡིད་སྐྱོ་དགོས་པའི་གནས་ཚུལ་ཐོན་བཞིན་པ་རེད། ལྷག་དོན་མི་དང་འབྲེལ་བའི་ཆོས་ལུགས་ཚང་མའི་ནང་བྱམས་བརྩེའི་སྐོར་གསུངས་ཡོད་པ་ལྟར། དེ་རིང་ཆོས་འབྲེལ་ཐོག་བཅར་བའི་ཆོས་གྲོགས་ཕོ་མོ་ཚོས་རང་ཉིད་ཀྱི་ལུང་པར་ལོག་རྗེས་ཆོས་ལུགས་མཐུན་འབྲེལ་ཐོག་བསམ་བློ་གཏོང་དགོས་པའི་ལམ་བསྟོན་མཛད་ཡོད།
རྩ་བའི་༸གོང་ས་མཆོག་གིས་དེ་རིང་ཆོས་འབྲེལ་བྱ་རྒྱུའི་བུདྡྷ་པཱ་་ལི་ཏའི་ལུང་དེ་དགའ་ལྡན་ཁྲི་ཟུར་རིན་པོ་ཆེ་མཆོག་གི་དྲུང་ནས་ཞུས་ཡོད་པ་དང་། གཞུང་འདི་ནི་བསྟན་འགྱུར་ནང་གི་གཞུང་གལ་ཆེ་ཞིག་ཆགས་ཀྱི་ཡོད་པ་ལྟར་བསྟན་འགྱུར་གྱི་གཞུང་ཁག་ལ་སློབ་གཉེར་གནང་དགོས་གལ་ཡིན་པའི་ལམ་སྟོན་མཛད་ཡོད་པ་རེད།
ཐེངས་འདིའི་ཆོས་འབྲེལ་ཐོག་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ཅིག་ནས་ཆོས་ཞུ་བ་ཞལ་གྲངས་ ༧༠༠ ཡས་མས་ཤིག་དང་ལྷག་དོན་ལྷོ་ཀོ་རི་ཡ་ནས་ཆོས་ཞུ་བ་ ༤༠༠ ལྷག་བཅར་ཡོད་པ་རེད་འདུག
ཉིན་གྲངས་བཞིའི་ཆོས་འབྲེལ་དེ་སྔ་དྲོ་ཚོུད་ ༩་༠༠ ནས་ ༡༡༌༣༠ བར་ཡིན་པ་དང་། ཉིན་རྒྱབ་ཏུ་མཁན་པོ་དང་དགེ་བཤེས་རྣམ་པས་ཉིན་སོ་སོའི་ཆོས་ཐུན་བསྐྱར་བཤད་དང་དྲི་བ་འདྲི་ལན་བཅས་གནང་གི་ཡོད་པ་རེད།
