སང་ཉིན་ཟླ་ ༧ ཚེས་ ༦ སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུ་ཆེད་༸རྒྱལ་བའི་བཀའ་དགོངས་བཞིན་རྭ་སྟོད་གྲྭ་ཚང་གིས་གཞིས་མི་ཉམ་ཐག་དང་ཉེ་འཁོར་གྱི་རྒྱ་གར་ཡུལ་མི་རྣམས་ལ་སྐམ་ཟས་བགོ་འགྲེམས་གནང་འདུག
ཕྱི་ཟླ་ ༧ ཚེས་ ༤ དང་ ༥ ཉིན་གཉིས་རིང་ལྷོ་ཕྱོགས་མོན་གྷོར་རྟེན་གཞི་བྱས་པའི་རྭ་སྟོད་གྲྭ་ཚང་གིས་ས་གནས་ཀྱི་བོད་མི་ཉམ་ཐག་ ༡༦༠ དང་མི་ཚང་རེར་སྒོར་ ༢༠༠༠ གི་བཟའ་བཅའ་དང་ཉེ་འཁོར་རྒྱ་གར་ཡུལ་མི་ ༢༡༥ དང་ཁོང་རྣམས་ལ་སྒོར་ ༡༠༠༠ གནང་བ་བཅས་ཁྱོན་མི་ཚང་ཉམ་ཐག་ ༣༧༥ ལ་སྐམ་ཟས་སྦྱིན་གཏོང་གནང་བ་བརྒྱུད་༸རྒྱལ་བའི་༸སྐུའི་འཁྲུངས་སྐར་སྲུང་བརྩི་ཞུ་བཞིན་འདུག
དེ་བཞིན་གཞན་ཕན་ཐེབས་རྩའི་ཁྱབ་ཁོངས་མཱེ་སོར་བོད་ཀྱི་སྡོད་ཁང་གིས་གོ་སྒྲིག་ཞུས་ཏེ་ཟླ་བ་འདི་ཚེས་ ༢ ནས་ ༧ བར་ཉིན་དྲུག་རིང་ས་གནས་ཀྱི་ཡུལ་མི་བཀྲེས་སྐོམ་གྱིས་མནར་བའི་མི་ ༡༠༠ ལ་ཉིན་དགུང་དང་དགོང་མོའི་ཞལ་ལག་སྟབས་བདེ་གནང་བཞིན་འདུག
ལས་འཆར་དེའི་དམིགས་ཡུལ་གཙོ་བོ་ནི་༸རྒྱལ་བའི་བཀྲིན་རྗེས་དྲན་དང་མགོན་པོ་༸གང་ཉིད་མཆོག་གི་༸སྐུའི་འཁྲུངས་དེའང་༸རྒྱལ་བའི་བཀའ་དགོངས་བཞིན་འགྲོ་བ་མིའི་རིན་ཐང་གོང་འཕེལ་དང་འགྲོ་བ་མི་གཅིག་གྱུར་གྱི་འདུ་ཤེས་བཅས་པ་གོང་འཕེལ་གནང་སྟེ་སང་ཉིན་༸སྐུའི་འཁུངས་སྐར་ཉིན་སྔར་བཞིན་མང་ཚོགས་འདུ་འཛོམས་གནང་ཐབས་བྲལ་ནའང་གཞན་ཕན་གྱི་ཕྱག་ལས་གནང་རྒྱུ་རེད་འདུག
