ཟླ་བ་འདིའི་ཕྱི་ཚེས་ ༢༠ ནས་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཆེ་གྲས་མོན་གྷོ་འདོད་རྒུ་གླིང་དུ་ལྷོ་ཕྱོགས་ཁུལ་གྱི་ཕྱི་ལོ་ ༢༠༢༣ ལོའི་རྐང་རྩེད་སྤོ་ལོའི་རྩེད་འགྲན་གནང་བཞིན་ཡོད་པ་ལྟར། དེ་རིང་ཕྱི་ཚེས་ ༣༠ ཉིན་གྱི་དགོང་དྲོའི་ཆུ་ཚོད་ ༧ ཐོག་ཀོ་ལེ་གྷལ་དོན་ལྡན་གླིང་རྐང་སྤོལ་རུ་ཁག་དང་སྦེལ་ཀོབ་བདེ་སྐྱིད་སླར་གསོའི་རྐང་སྤོལ་རུ་ཁག་གཉིས་དབར་རྩེད་འགྲན་མཐའ་མའི་འགྲན་བསྡུར་གནང་གི་ཡོད་པ་རེད།
གཞི་རྩའི་ཐེངས་འདིའི་རྒྱ་གར་ལྷོ་ཕྱོགས་ཁུལ་གྱི་རྐང་རྩེད་སྤོ་ལོའི་རྩེད་འགྲན་དེ་ཉིད་མོན་གྷོ་འདོད་རྒུ་གླིང་གཞིས་ཆགས་སུ་ཡོད་པའི་འདོད་རྒུ་གླིང་ན་གཞོན་རྩེད་རིགས་མཐུན་ཚོགས་ཀྱིས་གོ་སྒྲིག་ཞུས་ཡོད་པ་དང་། རྩེད་འགྲན་ནང་སྦེལ་ཀོབ་གྷོ་ལ་ཐ་ལའི་རུ་ཁག་དང་། ཧོན་སུར་རབ་རྒྱས་གླིང་རུ་ཁག ཀོ་ལེ་གྷལ་དོན་ལྡན་གླིང་རུ་ཁག སྦེལ་ཀོབ་བདེ་སྐྱིད་སླར་གསོའི་རུ་ཁག དེ་བཞིན་མོན་གྷོ་འདོད་རྒུ་གླིང་རུ་ཁག གྷོ་ཝ་རུ་བཅས་ཁྱོན་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཁག་ལྔ་དང་གྷོ་ཝ་བཅས་ཀྱི་རྐང་སྤོར་རུ་ཁག་བདུན་མཉམ་ཞུགས་གནང་ཡོད།
དེ་རིང་རྩེད་འགྲན་མཐའ་མའི་འགྲན་བསྡུར་ཁྲོད་ཨང་དང་པོ་སོན་མཁན་གྱི་རུ་ཁག་ལ་གཟེངས་ཐོན་གྱི་ཕོར་པ་དང་ཧིན་སྒོར་འབུམ་གཅིག ཨང་གཉིས་པ་སོན་མཁན་གྱི་རུ་ཁག་ལ་ལེགས་གསོའི་ཕོར་པ་དང་ཧིན་སྒོར་ཁྲི་ལྔ། དེ་བཞིན་ཨང་གསུམ་སོན་མཁན་གྱི་རུ་ཁག་ལ་ཧིན་སྒོར་སྟོང་ཕྲག་ཉི་ཤུ་རྩ་ལྔ་བཅས་ཀྱི་བྱ་དགའ་གནང་གི་ཡོད་པ་རེད།
འདི་ལོ་ ༢༠༢༣ ལོའི་རྒྱ་གར་ལྷོ་ཕྱོགས་ཁུལ་གྱི་རྐང་སྤོལ་རྩེད་འགྲན་མཇུག་སྒྲིལ་ལ་ཉེ་བའི་མཚམས་འདིར་མོན་གྷོ་འདོད་རྒུ་གླིང་ན་གཞོན་རྩེད་རིགས་མཐུན་ཚོགས་ཀྱིས་ཚོགས་གཙོ་ལས་ཚབ་བསྟན་འཛིན་ཚེ་རིང་ལགས་སུ་རྒྱ་གར་ལྷོ་ཕྱོགས་ཁུལ་གྱི་རྐང་སྤོལ་རྩེད་འགྲན་གྱི་བྱུང་རིམ་དང་། དཔལ་འབྱོར་བསྡུ་འགོད་སོགས་ཀྱི་ལས་གཞི་སྐོར་བཅར་འདྲི་ཞུས་ཡོད།
