སྡེ་དགེ་རྫོང་སྲིད་གཞུང་གི་སྒོ་འགྲམ་དུ་བོད་མི་མང་དག་འདུ་འཛོམས་ཀྱིས་རྫོང་དེའི་ཁོངས་གཏོགས་འབྲི་ཆུའི་ཆུ་རྒྱུན་དུ་རྒྱ་ནག་གིས་ཆུ་མཛོད་གསར་རྒྱག་དང་ཡུལ་མི་རྣམས་བཙན་གྱིས་གནས་སྤོ་བྱེད་དུ་བཅུག་བཞིན་པར་མཚམས་འཇོག་ཡོང་སླད་ངོ་རྒོལ་ལས་འགུལ་སྤེལ་འདུག
ཡུལ་དངོས་ཀྱི་བརྙན་ཐུང་ཁག་ཅིག་སྤྱི་ཚོགས་དྲྭ་ལམ་གང་སར་བརྒྱུད་སྤེལ་བྱེད་བཞིན་ཡོད་པའི་ནང་གསལ་ལྟར་ན། ཁ་སང་ཕྱི་ཚེས་ ༡༤ ཉིན་སྡེ་དགེ་རྫོང་གི་བོད་མི་མང་དག་ཅིག་རྫོང་དེའི་ས་གནས་རྒྱ་ནག་མི་དམངས་སྲིད་གཞུང་གི་སྒོ་འགྲམ་དུ་འདུ་འཛོམས་གནང་སྟེ། རྫོང་སྲིད་གཞུང་གི་འགོ་ཁྲིད་ཚོར་འབྲི་ཆུའི་བཞུར་རྒྱུན་དུ་ཆུ་མཛོད་གསར་རྒྱག་གི་ལས་གཞིར་མོས་མཐུན་མེད་པར་ལས་གཞི་དེ་མཚམས་འཇོག་བྱ་དགོས་པ་དང་། དེ་བཞིན་ས་གནས་མི་མང་གནས་སྤོས་མི་དགོས་པའི་ཞུ་འབོད་ལས་འགུལ་སྤེལ་བར་བརྟེན། སྒྲིག་ཆས་སྤྲས་པའི་ཉེན་རྟོག་པ་དང་གཞུང་གི་ལས་བྱེད་སོགས་ཀྱིས་བཀག་འགོག་བྱེད་ཀྱིན་ཡོད་པ་མངོན་གྱི་འདུག་ལ། སྐབས་དེར་ས་གནས་བོད་མི་རྣམས་ཀྱིས་ཆུ་མཛོད་གསར་རྒྱག་གི་ལས་གཞི་དེ་མཚམས་འཇོག་བྱེད་རོགས། དགེ་བ་ཡོད། ཁ་དྲོ་ཞེས་རེ་འབོད་གནང་བཞིན་པར་རྫོང་གི་ལས་བྱེད་ཁག་ཅིག་གིས་གནད་དོན་འདིའི་ཐད་སྡེ་དགེ་རྫོང་ལ་ཐག་གཅོད་ཀྱི་དབང་ཆ་མེད་སྐོར་བརྗོད་ནས་མི་དམངས་ལ་སྐད་ཅོར་མ་རྒྱག་ཟེར་བཞིན་པ་གོ་རྒྱུ་འདུག
རྩ་བའི་གནས་ཚུལ་དེ་རྒྱུས་མངའ་ཡོད་མཁན་ཕ་ཡུལ་སྡེ་དགེ་ནས་ཡིན་པའི་བཙན་བྱོལ་ནང་གི་བོད་མི་ཞིག་གིས་གསར་ཁང་ཁག་ལ་འགྲེལ་བརྗོད་གནང་བར་གཞིགས་ན། འདས་པའི་ལོ་བཅུ་གྲངས་ནས་རྒྱ་ནག་གཞུང་གིས་སྡེ་དགེ་རྫོང་ནང་གློག་ཁང་ཆེན་གྲས་གསར་རྒྱག་གི་ལས་གཞི་སྤེལ་ཆེད་རྫོང་དེའི་ནང་གི་འབྲི་ཆུའི་བཞུར་རྒྱུན་བཀག་ཏེ། དབོན་པོ་སྟོད་ཤང་ཁག་གཉིས་དང་དགོན་ཁག་དྲུག་ཡོད་པ་དེ་དག་ཚང་མ་ས་གནས་གཞན་ལ་གནས་སྤོ་བྱ་དགོས་པའི་བཙན་བཀའ་བཏང་ཡོད་སྟབས། འདི་ཚེས་ ༡༤ ཉིན་རྫོང་དེའི་ཁོངས་གཏོགས་བོད་མི་ཧ་ཅང་མང་པོས་སྡེ་དགེ་རྫོང་མི་དམངས་སྲིད་གཞུང་གི་སྒོ་འགྲམ་དུ་སོང་ནས་ངོ་རྒོལ་ལས་འགུལ་དེ་སྤེལ་ཡོད་པ་རེད་འདུག
