ཁ་སང་ཕྱི་ཟླ་ ༩ ཚེས་ ༢ ཉིན་མོ་དེ་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་བོད་པ་ཚོར་མང་གཙོའི་ལམ་བཟང་གསོལ་སྩལ་བཀའ་དྲིན་བསྐྱངས་ཏེ་མི་ལོ་ ༦༡ འཁོར་བའི་ཉིན་མོ་ཞིག་ཆགས་ཀྱི་ཡོད་པ་དང་དུས་རྒྱུན་བཙན་བྱོལ་བོད་མི་རྣམས་ཀྱིས་ཉིན་མོ་དེར་དགའ་དགའ་སྤྲོ་སྤྲོའི་ངང་སྲུང་བརྩི་ཞུ་བཞིན་ཡོད་ཀྱང་། ད་ཆ་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་འཚོགས་མ་ཐུབ་པ་དང་དེའི་རྐྱེན་གྱིས་བཀའ་བློན་རྣམ་པ་བསྐོ་གཞག་གནང་མ་ཐུབ་པ་སོགས་ཀྱི་དཀའ་ངལ་རིམ་པ་འཕྲད་བཞིན་པའི་གནད་དོན་ལ་བརྟེན་ནས་གཞིས་བྱེས་གཉིས་ཀྱི་བོད་མི་ཡོངས་ནས་ཐུགས་འཚབ་ཆེན་པོ་གནང་བཞིན་པ་མ་ཟད། ལྷག་པར་དུ་བོད་མིའི་གཞོན་སྐྱེས་རྣམས་ཀྱིས་ཀྱང་གནད་དོན་དེར་བློ་འཚབ་དང་འབྲེལ་ཏེ་ཕན་ཚུན་དབར་གྲོས་མོལ་གྱི་སྒོ་ནས་དཀའ་རྙོག་དེ་གང་མགྱོགས་སེལ་མ་ཐུབ་ཚེ་གཞོན་སྐྱེས་ཚོས་རང་ཉིད་ཀྱི་གཞུང་ལ་བཅངས་པའི་ཡིད་ཆེས་དང་རེ་བ་བརླག་ཉེན་ཡོད་པར་འགྲེལ་བརྗོད་གནང་ཡོད།
གསར་འགོད་པས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་ནང་དུ་བཅའ་བཞུགས་བོད་པའི་མཐོ་རིམ་སློབ་མ་ཁག་ཅིག་ལ་བོད་ཀྱི་མང་གཙོའི་དུས་དྲན་ཐེངས་ ༦༡ པའི་ཐོག་རང་ཉིད་ཀྱི་རྒྱུད་ལ་ཚོར་བ་གང་འདྲ་ཞིག་ཡོང་གི་ཡོད་པ་དང་། སྤྱི་འཐུས་རྣམ་པའི་དམ་འབུལ་དང་འབྲེལ་བའི་གནད་དོན་ཐོག་བསམ་ཚུལ་ཇི་ཡོད་བཅར་འདྲི་ཞུས་པར་ཁོང་རྣམ་པས་མང་གཙོའི་དུས་དྲན་གོང་དུ་གནད་དོན་དེ་སེལ་བའི་རེ་བ་ཆེན་པོ་གནང་ཡོད་ཀྱང་དངོས་སུ་དེ་ལྟར་གནང་ཐུབ་མེད་སྟབས་ཧ་ཅང་སེམས་འཚབ་གནང་བཞིན་པ་དང་ལྷག་དོན་༸གོང་ས་མཆོག་གིས་ཐུགས་བརྩེ་ཆེན་པོས་བོད་མི་རྣམས་ལ་ཡང་དག་པའི་མང་གཙོ་གསོལ་སྩལ་མཛད་པ་དེར་ཆེས་མཐོང་རྩ་བ་ནས་ཞུ་གི་མེད་པའི་རྣམ་པ་མཚོན་གྱི་ཡོད་པ་མ་ཟད། རང་རིགས་གཞོན་སྐྱེས་ཚོར་མིག་དཔེ་ངན་པ་ཞིག་ཆགས་ཀྱི་སྐོར་གསུངས་ཡོད།
མཐོ་རིམ་སློབ་མ་དེ་དག་གིས་ཐེངས་འདིའི་དུས་ཚིགས་དང་བསྟུན། བཙན་བྱོལ་བོད་མིའི་དབུ་འཁྲིད་རྣམས་ལ་གུ་ཡངས་ཀྱི་ཐོག་ནས་ཕན་ཚུན་དབར་བཀའ་བསྡུར་གནང་དགོས་པའི་ཞུ་སྐུལ་དང་། ཕྱི་ཟླ་དགུ་པའི་གྲོས་ཚོགས་དེ་འཚོགས་ཐུབ་པ་གནང་སྟེ་རིམ་པས་བཅའ་ཁྲིམས་ལ་བསྐྱར་བཅོས་གནང་དགོས་གལ་སྐོར་གསུངས་པ་དང་འབྲེལ། གལ་ཏེ་འཕྲལ་དུ་གནང་མ་ཐུབ་པ་ཡིན་ན་འཐབ་རྩོད་ཐོག་ང་ཚོར་གྱོང་གུད་ཆེན་པོ་ཕོག་ངེས་པ་ལ་ཁ་གསབ་ཐུབ་རྒྱུ་དཀའ་སྐོར་གསུངས་ཡོད།
