དེ་རིང་སྔ་དྲོ་ཚོུད་ ༡༠ ཐོག་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྨོན་ལམ་བརྡ་འཕྲིན་ཞིབ་འཇུག་ཁང་གིས་གོ་སྒྲིག་གི་འོག་ནང་བསྟན་ཆོས་ལུགས་དང་འབྲེལ་བའི་ཐ་སྙད་རྩོམ་སྒྲིག་གནང་ཕྱོགས་ཀྱི་ཆོས་བརྒྱུད་ཁག་གི་རྩོམ་སྒྲིག་མི་སྣའི་ཉིན་གཉིས་ཀྱི་ཚོགས་འདུ་ཐེངས་བདུན་པ་དབུ་འཛུགས་གནང་སོང་།
སྐབས་དེར་ཚོགས་འདུའི་སྐུ་མགྲོན་གཙོ་བོ་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་དབུ་བཞུགས་ཐོག་བོད་ཀྱི་ཆོས་བརྒྱུད་ཆེན་པོ་བཞི་དང་གཡང་དྲུང་བོན། དེ་བཞིན་རྒྱལ་བ་ཇོ་ནང་པ་སོགས་ཀྱི་འཐུས་ཚབ་ཀྱི་ཐ་སྙད་རྩོམ་སྒྲིག་པ་མི་གྲངས་སུམ་བཅུ་ལྷག་འདུ་འཛོམས་བྱུང་འདུག
དགེ་བཤེས་སྨོན་ལམ་ལགས་ཀྱིས་ལས་རིམ་ངོ་སྤྲོད་དང་སྦྲགས་ནས་སྨོན་ལམ་བརྡ་འཕྲིན་ཞིབ་འཇུག་ཁང་གིས་ལོ་དགུའི་ལས་འཆར་གྲ་སྒྲིག་བྱས་ཡོད་པ་ལྟར། ད་ཆ་ལོ་དྲུག་གི་རིང་ཚིག་མཛོད་ཐོན་རིམ་གཉིས་ལྷག་ཕྱོགས་སྒྲིག་གིས་སྤྱི་ཚོགས་ཐོག་ཐ་སྙད་གྲངས་འབུམ་གཉིས་ཙམ་གཏན་འབེབས་ཀྱིས་བཀྲམ་ཡོད་པ་མ་ཟད་ད་ལྟའི་ཆར་བོད་ནང་གཅིག་པུར་ཚིག་མཛོད་བེད་སྤྱོད་གཏོང་མཁན་ས་ཡ་བཞི་ཙམ་ཡོད་པ་སོགས་གསུངས་ཡོད། 
སྐུ་མགྲོན་གཙོ་བོ་དགེ་བཤེས་ལྷག་རྡོར་ལགས་ཀྱིས་གཞུང་ལུགས་ཡོད་ཚད་ཀྱི་རྩ་བ་ཐ་སྙད་རིག་གནས་ཆགས་ཡོད་སྟབས་སྨོན་ལམ་ཚིག་བརྡ་འཕྲིན་ཞིབ་འཇུག་ཁང་གི་ལས་གཞི་དེ་རླབས་ཆེན་གྱི་བྱ་བཞག་ཅིག་ཡིན་པར་བསྔགས་བརྗོད་གནང་དང་འབྲེལ། ཐ་སྙད་ཕྱོགས་སྒྲིག་གི་སྐབས་ཚིག་གཅིག་ཡིན་ཡང་གཟབ་གཟབ་གནང་དགོས་གལ་ཡིན་པ་གསུངས་ཡོད།
གསར་འགོད་པས་དགེ་བཤེས་སྨོན་ལམ་ལགས་སུ་བཙན་བྱོལ་དུ་མི་ལོ་དྲུག་ཅུའི་རིང་བརྡ་འཕྲིན་གྱི་ཚིག་མཛོད་ཅིག་ཕྱོགས་སྒྲིག་གནང་མ་ཐུབ་པའི་རྒྱུ་རྐྱེན་གང་ལ་ཐུག་ཡོད་སྐོར་བཀའ་འདྲི་ཞུས་པར་ཁོང་གིས་བོད་པའི་སྤྱི་ཚོགས་ཀྱི་ནང་མཉམ་འབྲེལ་གྱི་ནུས་པ་དང་ལས་གཞི་རྩ་འཛུགས་ཀྱི་བློ་ཁོག་མེད་རྐྱེན་སོགས་གསུངས་སོང་།
སྨོན་ལམ་བརྡ་འཕྲིན་ཞིབ་འཇུག་ཁང་གི་སྤྱི་ཁྱབ་རྩོམ་སྒྲིག་པ་མཁན་པོ་འཇུ་བསྟན་སྐྱོང་ལགས་ཀྱིས་ཐ་སྙད་ཕྱོགས་སྒྲིག་དང་འབྲེལ་ནས་བོད་ཀྱི་ཚིག་མཛོད་རིག་པའི་སྐོར་པ་གསུངས་ནས་བོད་ཀྱི་སྐད་བརྡ་རིག་པ་དང་ཚིག་མཛོད་རིག་པ་དེ་རྒྱལ་སྤྱིའི་ཚིག་མཛོད་རིག་པ་དང་ཕྱོགས་མཐུན་པ་ཞིག་དགོས་གལ་ ཡིན་སྐོར་གསུངས་ཡོད།
