ཇར་མི་ནིར་འཁོད་བོད་མིའི་རྒྱང་རྒྱུག་རུ་ཁག་གིས་ཁུལ་དེའི་ནང་གི་ཡོངས་གྲགས་ཆེ་བའི་ Germany post Marathon Bonn ཞེས་པའི་རྒྱང་རྒྱུག་ཆེན་མོར་མཉམ་ཞུགས་ཀྱིས་ས་གནས་ཡུལ་མིར་བོད་ནང་གི་འགྲོ་བ་མིའི་ཐོབ་ཐང་གི་གནས་བབས་སྐོར་དྲིལ་བསྒྲགས་གནང་བ་གཙོས་བོད་མིའི་ངོ་བོ་མཚོན་པ་གནང་ཡོད།
སྤྱིར་ལོ་ལྟར་ཇར་མི་ནི་རྒྱལ་ས་རྙིང་པ་ Bonn ནང་འཚོགས་བཞིན་པའི་Germany post Marathon Bonn ཞེས་པ་རྒྱང་རྒྱུག་ཆེན་མོ་དེ་ནི། འཛམ་གླིང་ཡུལ་གྲུ་འདྲ་མིན་ནས་རྒྱང་རྒྱུག་བ་ ༡༤༠༠༠ ལྷག་ནས་མཉམ་ཞུགས་གནང་བ་དང། གཟིགས་མོ་བ་འབུམ་གཉིས་ལྷག་འདུ་འཛོམས་གནས་ཆེས་ཡོངས་གྲགས་ཅན་གྱི་རྒྱང་རྒྱུག་ཆེན་མོ་ཞིག་ཡིན་ཅིང། རྒྱང་རྒྱུག་ཆེན་མོ་དེ་ལོ་ལྟར་གྲོང་ཁྱེར་ Bonn ནང་ཕྱི་ཟླ་ ༤ ནང་ཚོགས་ཀྱི་ཡོད་ཀྱང། འདི་ལོར་ཏོག་དབྱིབས་ནད་ཡམས་ཁྱབ་གདལ་ཆེ་རྐྱེན་ཕྱི་ཟླ་ ༡༠ ནང་ཚོགས་ཡོད་པ་རེད།
མང་ཚོགས་འདུ་འཛོམས་ཆེ་བའི་རྒྱང་རྒྱུག་ཆེན་མོ་འདིའི་ཁྲོད་ཇར་མ་ནིར་གནས་འཁོད་བོད་མི་ཚོར་བོད་ནང་གི་བོད་མིའི་དངོས་ཡོད་གནས་སྟངས་ཁག་དྲིལ་བསྒྲགས་གནང་རྒྱུའི་སྡིངས་ཆ་དང་གོ་སྐབས་ཆེན་པོ་ཞིག་ཆགས་ཀྱི་ཡོད་པ་དང་། ས་གནས་བོད་མིའི་རུ་ཁག་ཚོས་བོད་དོན་ཆེད་རྒྱང་རྒྱུག་ཆེན་མོར་མཉམ་ཞུགས་ཀྱིས་བོད་དོན་དྲིལ་བསྒྲགས་ལས་འགུལ་ཞིག་སྤེལ་ཀྱི་ཡོད་པ་ལྟར། འདི་ལོ་ཡང་བོད་མིའི་རྒྱང་རྒྱུག་རུ་ཁག་གི་སྟོད་གོས་སྟེང་ལ་བོད་ཀྱི་རྒྱལ་དར་དང་བོད་དོན་སྐྱོབ་དགོས་པ་སོགས་ཀྱི་འབོད་ཚིག་གི་སྦྱར་ཤོག་བཏགས་ཏེ་རྒྱང་རྒྱུག་ཆེན་མོར་མཉམ་ཞུགས་གནང་སྟེ་མི་རིགས་འདྲ་མིན་གྱི་རྒྱང་རྒྱུག་རུ་ཁག་དང་གཟིགས་མོ་བ་ཚོར་བོད་ནང་གི་བོད་མིའི་ཡ་ང་བའི་དངོས་ཡོད་གནས་སྟངས་དྲིལ་བསྒྲགས་གནང་འདུག
དེ་བཞིན་ཁ་སང་ཕྱི་ཟླ་ ༡༠ ཚེས་ ༡༧ ཉིན་མོ་སྟེ་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཨ་རི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་ངོ་ ༡༤ འཁོར་བའི་ཉིན་མོ་ཞིག་ཡིན་སྟབས། ཇར་འཁོད་བོད་རིགས་ཚོགས་པའི་ཁྱབ་ཁོངས་ North Rhine-Westphalia བོད་རིགས་ཚོགས་ཆུང་ནས་རྒྱང་རྒྱུག་གོ་སྒྲིག་ཞུ་ཡུལ་གྱི་སྤྱི་གླིང་དུ་གཟིགས་མོ་བ་ཚོར་བོད་ཀྱི་གཞས་སྣ་ཁག་གཟིགས་འབུལ་གནང་བ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གསེར་གྱི་གཟེངས་རྟགས་འབུལ་བཞེས་མཛད་པའི་ཉིན་མོར་དགའ་དད་སྤྲོ་གསུམ་གྱི་ཐོག་ནས་སྲུང་བརྩི་ཞུས་ཡོད།
སྤྱིར་ཇར་འཁོད་བོད་རིགས་ཚོགས་པའི་ངོས་ནས་ Germany post Marathon Bonn ཞེས་པ་རྒྱང་རྒྱུག་ཆེན་མོ་ནང་མཉམ་ཞུགས་གནང་བ་དེ་ནི། ཐེངས་དྲུག་པ་ཆགས་ཀྱི་འདུག་ཅིང་། ལས་འགུལ་གྱི་དམིགས་ཡུལ་གཙོ་བོ་ནི་རྒྱང་རྒྱུག་ལམ་ནས་ས་གནས་ཀྱི་ཡུལ་མིར་བོད་ནང་གི་ཛ་དྲག་གནས་སྟངས་དྲིལ་བསྒྲགས་དང་། རྒྱལ་སྤྱིའི་མང་ཚོགས་ནས་བོད་དོན་ལ་གདུང་སེམས་མཉམ་བསྐྱེད། བོད་མིའི་ངོ་བོ་དང་རིག་གཞུང་ངོ་སྤྲོད། དེ་བཞིན་ས་གནས་སུ་ཁ་འཐོར་དུ་གནས་པའི་བོད་མི་ཕན་ཚུན་དབར་ངོ་ཤེས་དང་མཐུན་ལམ་གོང་འཕེལ་ཆེད་ཡིན་པ་རེད།
