ཟླ་འདིའི་ཕྱི་ཚེས་ ༡༨ ཉིན་ཐའེ་ཝན་སྐུ་ཚབ་དོན་གཅོད་སྤྱི་ཟུར་སྐལ་བཟང་རྒྱལ་མཚན་ལགས་ནས་ཐའེ་ཝན་ནང་སྲིད་ལས་ཁུངས་ཀྱི་བློན་ཆེན་གཞོན་པ་ Sawyer Mars ལགས་དང་། ལས་ཁུངས་དེའི་ཕྱི་མི་ཞིབ་བཤེར་ལས་ཁུངས་ཀྱི་འགན་འཛིན་ Lee His-Zen གཉིས་དང་ལྷན་དུ་ཐུག་འཕྲད་གནང་འདུག
དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། མཇལ་འཕྲད་སྐབས་སུ་སྐུ་ཚབ་དོན་གཅོད་སྐལ་བཟང་རྒྱལ་མཚན་ལགས་ནས་ཐའེ་ཝན་ནང་བོད་མི་རྣམས་ལ་གནས་སྡོད་ཆོག་མཆན་ཐོབ་དཀའ་བའི་སྐོར་དང་། ཐའེ་ཝན་ཤེས་རིག་ལས་ཁུངས་ཀྱིས་རྒྱལ་ཁབ་ཀྱི་ཐོབ་ཐང་མེད་པའི་ཕྱི་རྒྱལ་སློབ་མ་ཚོར་འགྲུལ་བཞུད་ཀྱི་མཐོང་མཆན་སྤྲོད་རྒྱུར་བཀག་སྡོམ་བྱས་པའི་རྐྱེན་གྱིས་བོད་རིགས་སློབ་མ་རྣམས་ལ་དཀའ་ངལ་འཕྲད་བཞིན་ཡོད་སྐོར་སོགས་དང་འབྲེལ་ནས་བཀའ་མོལ་གནང་ཡོད་པ་རེད་འདུག
བློན་ཆེན་གཞོན་པ་ Sawyer Mars ལགས་ཀྱིས་གནད་དོན་དེ་དག་ངོས་ལེན་གནང་སྟེ། ཐའེ་ཝན་ནང་སྲིད་བློན་ཆེན་ Liu Shyh-Fang ནས་ལས་བྱེད་ཚོར་གནས་སྡོད་བོད་མིའི་དཀའ་ངལ་དེ་དག་ལ་གདོང་ལེན་བྱ་དགོས་པའི་བཀའ་ཁྱབ་བཏང་ཟིན་ཡོད་པ་གསུངས་འདུག
ཚོགས་འདུ་དེའི་རྗེས་སུ་ཐའེ་ཝན་ཕྱི་མི་ཞིབ་བཤེར་ལས་ཁུངས་ཀྱིས་ལམ་སེང་སྐུ་ཚབ་དོན་གཅོད་ལས་ཁུངས་ལ་ཐའེ་ཝན་གཞུང་གིས་བོད་མིའི་སློབ་ཕྲུག་ཚོར་སློབ་གཉེར་གྱི་མཐོང་མཆན་སྔོན་ཚུད་ནས་ཐོབ་ཆོག་པ་དང་། ཐའེ་ཝན་བོད་མི་གནས་སྡོད་པ་ཚོར་སྡོད་གནས་ཆོག་མཆན་མ་རྫོགས་གོང་དུ་ཕར་འགྱངས་ཆོག་པའི་བཀའ་འཁྲོལ་སྤྲད་ཟིན་པའི་བརྡ་ལན་གནང་ཡོད་པ་རེད་འདུག
དེའི་སྐོར་ཐའེ་ཝན་སྐུ་ཚབ་དོན་གཅོད་སྤྱི་ཟུར་སྐལ་བཟང་རྒྱལ་མཚན་ལགས་སུ་བཀའ་འདྲི་ཞུས་པར་ཁོང་གིས་ད་ལྟའི་ཐའེ་ཝན་ནང་སྲིད་བློན་ཆེན་གཞོན་པ་དང་མཇལ་འཕྲད་དེས་བོད་མིའི་སློབ་ཕྲུག་དང་ཆོས་ཚོགས་ཁག་གི་དགེ་འདུན་པ་ཚོར་མཐོང་མཆན་གྱི་དུས་ཡུན་ཕར་འགྱངས་ཐུབ་ཡོད་པ་དང་འབྲེལ་ནས་དཀའ་ངལ་ཁག་གཅིག་སེལ་ཡོད་པར་གྲུབ་འབྲས་གང་ལ་གང་ཙམ་བཟང་པོ་ཐོན་ཡོད་པ་སོགས་གསུངས་སོང་།
