དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་ ༤༡ པ་ཆེན་པོ་མཆོག་འདི་ལོར་བོད་ལུགས་ལྟར་དགུང་ལོ ༨༠ ལ་ཕེབས་ཀྱི་ཡོད་པ་དང་བསྟུན། དེ་རིང་ཕྱི་ཟླ་ ༤ ཚེས་ ༢༥ ཉིན་རྒྱ་གར་བྱང་ཕྱོགས་སྤུར་ཝ་ལར་རྟེན་གཞི་བྱས་པའི་དཔལ་ལྡན་ས་སྐྱ་པའི་མ་དགོན་ཐུབ་བསྟན་རྣམ་རྒྱལ་གླིང་དུ་སྤུར་ཝ་ལ་གཞིས་འབངས་ཡོངས་ནས་དཔལ་ས་སྐྱ་གོང་མ་ཁྲི་ཆེན་རྡོ་རྗེ་འཆང་མཆོག་ལ་བཀྲིན་རྗེས་དྲན་གྱི་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་སྐུའི་གྱ་སྟོན་གྱི་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་།
བརྟན་བཞུགས་ཀྱི་མཛད་སྒོའི་ཐོག་དཔལ་ས་སྐྱ་ཁྲི་འཛིན་ ༤༣ པ་ཛྙ་ན་བཛྲ་རིན་པོ་ཆེ་མཆོག་གི་མཎྜལ་ལྗགས་བཤད་དང་། བརྟན་བཞུགས་བསྟར་འབུལ་ཞུ་མཁན་གྱི་སྐུ་ཚབ་མི་སྣས་འབུལ་རྫས་འདེགས་འབུལ་ཞུས་པ་མ་ཟད། དཔལ་ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ་མཆོག་གིས་༸གོང་མ་ཁྲི་ཆེན་མཆོག་སྐུ་ཚེ་ཡུན་རིང་བརྟན་རྒྱུར་གསོལ་འདེབས་ཞལ་བཞེས་སྐྱབས་འཇུག་ཞུས་པར་༸གོང་མ་ཁྲི་ཆེན་རྡོ་རྗེ་འཆང་མཆོག་གིས་བཀའ་བཟང་པོ་དང་འབྲེལ། སྤུར་ཝ་ལ་གཞིས་འབངས་ཡོངས་ནས་བརྟན་བཞུགས་འདེགས་འབུལ་ཞུ་བར་ཐུགས་རྗེ་ཆེ་ཞེས་བཀའ་མཛད་སོང་བ་མ་ཟད། གོང་ས་སྐྱབས་མགོན་ཆེན་པོ་མཆོག་གི་དབུས་བསྟན་བདག་བླ་ཆེན་རྣམ་པ་སྐུ་ཚེ་ཡུན་རིང་བརྟན་པའི་གསོལ་འདེབས་དང་སྦྲགས། གང་ཉིད་མཆོག་ཀྱང་བསྟན་དང་འགྲོ་བའི་དོན་དུ་སྐུ་ཚེ་ཡུན་རུང་བརྟན་རྒྱུ་ཡིན་ཞེས་བཀའ་བཞེས་བཟང་པོ་མཛད་སོང་།
