དེ་རིང་སྔ་ཐོག་བཞུགས་སྒར་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་སྐབས་ལྔ་པའི་འཐུས་མི་དང་ལས་བྱེད་མི་གྲངས་ ༡༢ ཙམ་ལ་དམིགས་བསལ་མཇལ་ཁ་དང་བཀའ་སློབ་བཀའ་དྲིན་བསྩལ་འདུག
སྐབས་དེར་༸གོང་ས་མཆོག་གིས་བོད་ཀྱི་གསོ་བ་རིག་པའམ་དེང་བོད་སྨན་ཞེས་ཡོངས་སུ་གྲགས་པ་འདི་ནི་བོད་ཀྱི་རིག་གནས་ཆེ་བ་ལྔའི་ཡ་གྱལ་གཞན་རྗེས་སུ་འཛིན་པའི་རིག་གནས་གལ་ཆེ་ཤོས་ཤིག་ཡིན་པ་དང་ཁྱད་པར་དུ་བོད་སྨན་གྱིས་ནད་རིགས་ཁག་བཅོས་ཐབས་བྱས་ཏེ་མང་ཚོགས་ལ་ལུས་སེམས་གཉིས་ཀྱི་བདེ་ཐང་སོགས་ལ་ཞབས་ཞུ་བསྒྲུབས་ཡོད་པ་དང་ཆབས་ཅིག་ཏུ་བོད་ཀྱི་མཚན་མཐོང་ལའང་ཕན་ཐོགས་བྱུང་ཡོད་པ་བཀའ་བསྩལ་སོང་།
མགོན་པོ་༸གང་ཉིད་མཆོག་གིས་བོད་ཀྱི་གསོ་བ་རིག་པའི་ངོས་ནས་དེང་གི་འཛམ་གླིང་འདིར་ཚན་རིག་འཕེལ་རྒྱས་དང་བསྟུན་འཕྲུལ་ཆས་ཀྱིས་དཔྱད་དེ་ཚན་རིག་དང་མཐུན་པའི་ར་སྤྲོད་དང་དེ་བཞིན་རྒྱ་གར་གྱི་སྨན་པ་མཁས་པ་དག་དང་ལྷན་དེང་གི་ཕྱི་ནང་གསོ་རིག་གི་ལེགས་ཆ་ཕན་ཚུན་སྤེལ་རེས་ཀྱིས་བོད་ཀྱི་གསོ་བ་རིག་པ་འདི་འཛམ་གླིང་ལ་ཁ་ཕྱོགས་ཏེ་འཕེལ་རྒྱས་ཡོང་ཐབས་གནང་རྒྱུ་ཤིན་ཏུ་ནས་གལ་ཆེན་པོ་ཡིན་པ་བཀའ་བསྩལ་ཡོད།
རྩ་བའི་ཟླ་ ༩ ཚེས་ ༡༡ ཉིན་རྒྱ་གར་གྱི་རྒྱལ་ས་ལྡི་ལིར་བོད་ཀྱི་གསོ་བ་རིག་པའི་ལྷན་ཚོགས་ཀྱིས་གོ་སྒྲིག་ཞུས་ཐོག་གསོ་བ་རིག་པའི་ཉིན་མོ་ཐེངས་དང་པོ་སྲུང་བརྩི་ཞུས་ཡོད་པ་དང་སྐབས་དེར་མགོན་པོ་༸གང་ཉིད་མཆོག་ནས་ཀྱང་གསོ་བ་རིག་པའི་ཉིན་མོ་སྲུང་བརྩི་ཐོག་ལ་གསུང་འཕྲིན་ཞིག་བསྩལ་ཡོད་པ་རེད།
དེ་རིང་སྔ་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ཀྱི་གསོ་བ་རིག་པའི་ལྷན་ཚོགས་ཀྱི་ཚོགས་མི་རྣམས་ལ་མཇལ་ཁ་དང་བཀའ་སློབ་བསྩལ་བ་དང་ལྷན་དུ་ཕྱི་ནང་གི་དད་ལྡན་མང་དག་ཅིག་ལ་མཇལ་ཁ་གནང་ཡོད་པ་དང་། དེའི་ཁོངས་སུ་ཁེ་ན་ཌ་ནས་ཕེབས་པའི་བོད་རིགས་ཁག་གཅིག་ལ་མཇལ་ཁ་བསྩལ་སྐབས་བོད་ཕྲུག་ཚོས་བོད་ཡིག་ལ་དོ་སྣང་ཤུགས་ཆེ་བྱེད་དགོས་ཞེས་བཀའ་ནན་བསྩལ་ཡོད་པ་རེད།
