དེ་རིང་རྒྱལ་སྤྱིའི་བྱིས་པའི་ཉིན་མོ་དང་བསྟུན་བོད་ཀྱི་བུད་མེད་ལྷན་ཚོགས་ཀྱི་དབུས་སྤྱི་ཁྱབ་ལས་ཁུངས་ནས་དེ་རིང་སྔ་དྲོ་རྒྱ་གར་གྱི་རྒྱལ་ས་ལྡི་ལིའི་ནང་གསར་འགོད་ལྷན་ཚོགས་ཤིག་གོ་སྒྲིག་ཞུས་པས་བརྒྱུད། བོད་ནང་གི་ལོ་ཆུང་བྱིས་པ་ཚོ་རྒྱ་མིའི་གཏན་འཇགས་སློབ་གྲྭར་བཏང་སྟེ་མི་རིགས་རྩ་མེད་བཟོ་བའི་ཛ་དྲག་གི་གནས་སྟངས་དང་། བོད་ནང་གི་ཁོར་ཡུག་གནས་སྟངས་བཅས་ལ་རྒྱ་གར་གཞུང་མང་ནས་རྒྱབ་སྐྱོར་གནང་དགོས་པའི་རེ་འབོད་ཞུས་ཡོད་པ་རེད།
དེ་ཡང་ཉེ་སྔོན་ཕྱི་ཚེས་ ༡༤ རྒྱ་གར་རྒྱལ་ཡོངས་བྱིས་པའི་དུས་ཆེན་དང་བསྟུན། བོད་ཀྱི་བུད་མེད་ལྷན་ཚོགས་ངོས་ནས་བཞུགས་སྒར་རྡ་རམ་ས་ལ་ནས་རྒྱ་གར་གྱི་རྒྱལ་ས་ལྡི་ལི་བར་བོད་ནང་གི་ཛ་དྲག་གནས་སྟངས་དང་འབྲེལ་བའི་དྲིལ་བསྒྲགས་ལས་འགུལ་ཞིག་འགོ་འཛུགས་གནང་ཡོད་པ་ལྟར། དེ་རིང་རྒྱལ་སྤྱིའི་བྱིས་པའི་ཉིན་མོར་བེུད་ལྷན་ཚོགས་ཀྱི་ལས་འགུལ་བ་ཚོས་རྒྱལ་ས་ལྡི་ལིའི་ Press Club of India གསར་འགོད་ལྟེ་གནས་ཁང་དུ་ལྷན་ཚོགས་ཤིག་བསྐོངས་ཚོགས་གནང་བས་བརྒྱུད། དབུས་བུད་མེད་ལྷན་ཚོགས་ཀྱི་ཚོགས་གཙོ་ཚེ་རིང་སྒྲོལ་མ་ལགས་ནས། རྒྱ་གར་གྱི་སྲིད་བློན་མོ་དྷི་མཆོག་གིས་སྲིད་གཞུང་དང་རྒྱ་གར་མང་ཚོགས་ཀྱི་ངོས་ནས་བོད་ནང་གི་ད་ལྟའི་མི་རིགས་རྩ་མེད་བཟོ་བའི་སྲིད་བྱུས་དང་ལྷག་པར་རྒྱ་གར་དང་ཐད་ཀར་འབྲེལ་བ་ཡོད་པའི་བོད་ཀྱི་ཁོར་ཡུག་གི་ཛ་དྲག་གནས་སྟངས་ཐོག་རྒྱབ་སྐྱོར་གནང་དགོས་པའི་རེ་འབོད་ཞུས་ཡོད་པ་རེད།
གསར་འགོད་ལྷན་ཚོགས་དེའི་ཐོག་ཚོགས་གཞོན་སྐལ་བཟང་སྒྲོལ་མ་ལགས་དང་ཟུང་འབྲེལ་དྲུང་ཆེ་ཆོས་ཉིད་སྒྲོལ་མ་གཉིས་ནས་དབྱིན་ཇི་དང་ཧིན་རྡིའི་སྐད་ཡིག་སོ་སོར། ད་རེས་ཀྱི་བུད་མེད་ལྷན་ཚོགས་ཀྱི་གསར་འགོད་ལྷན་ཚོགས་བསྐོངས་ཚོགས་གནང་དགོས་པའི་དམིགས་ཡུལ་དང་དགོས་འདུན་བཅས་པ་གསལ་བཤད་གནང་སོང་བ་མ་ཟད། ཚོགས་གཙོ་སྒྲོལ་མ་ཚེ་རིང་ལགས་ཀྱིས་ཕྱི་ཚེས་ ༡༤ ནས་འགོ་འཛུགས་ཀྱིས་བུད་མེད་ལྷན་ཚོགས་ངོས་ནས་ཧི་མ་ཅལ་མངའ་སྡེའི་རྡ་རམ་ས་ལ་ནས་འགོ་འཛུགས་ཀྱིས། པན་ཇབ་མངའ་སྡེའི་རྒྱལ་ས་ཅན་རྡི་གྷར་དང་། ཧར་ཡ་ནའི་མངའ་སྡེའི་ཨམ་བྷ་ལ། ཀུ་རུག་ཤེ་ཏྲ། ཀར་ནལ་སོགས་ཀྱི་གྲོང་ཁྱེར་ཁག་གི་ནང་དུའང་བོད་དོན་དྲིལ་བསྒྲགས་དང་། ལྷག་པར་བོད་ནང་གི་ད་ལྟའི་མི་རིགས་རྩ་མེད་བཟོ་བའི་གཏན་འཇགས་སློབ་གྲྭའི་ཛ་དྲག་གི་གནད་དོན་ཁག་གི་ཐོག་རྒྱབ་སྐྱོར་དགོས་པའི་ལས་འགུལ་སྤེལ་ཡོད་སྐོར་སོགས་འགྲེལ་བརྗོད་གནང་ཡོད་པ་རེད།
རྒྱལ་ས་ལྡི་ལིར་གོ་སྒྲིག་ཞུས་པའི་དེ་རིང་ཀྱི་གསར་འགོད་ལྷན་ཚོགས་དེའི་ཐོག Bharat Tibet Samavay Sangh ཞེས་པའི་རྒྱ་གར་བུད་མེད་ལྷན་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ Sandhiya Singh མཆོག་གི་དབུས་པའི་བེུད་ཁག་གཅིག་ཀྱང་ཆེད་ཕེབས་གནང་འདུག་པ་ལྟར། ལྕམ་སྐུ་ Sandhiya མཆོག་ནས་སྐབས་དེར། ད་ལྟའི་རྒྱ་གར་གཞུང་འཛིན་ BJP ཆབ་སྲིད་ཚོགས་པའི་སྲིད་བློན་མོ་དྷི་མཆོག་དང་། རྒྱ་གར་མང་ཚོགས་ངོས་ནས་བོད་དོན་ལ་རྒྱབ་སྐྱོར་ཡོད་པ་ལྟར། ཁོང་ཚོའི་ཚོགས་པའི་ངོས་ནས་ད་ལྟའི་བོད་ཀྱི་ཛ་དྲག་གནད་དོན་དེ་ཚོའི་ཐོག་ངེས་པར་དུ་ཞུ་འབོད་གནང་རྒྱུ་དང་། རྒྱ་གར་གཞུང་གི་ངོས་ནས་ངེས་པར་དུ་གནད་དོན་དེ་ཚོའི་ཐོག་རྒྱབ་སྐྱོར་གནང་རྒྱུའི་ཡིད་ཆེས་ཡོད་ཅེས་སོགས་གསུངས་གནང་སོང་།
