རྒྱ་གར་འབྲས་ལྗོངས་མངའ་སྡེའི་འཕགས་བོད་ས་ཚམས་རྣ་ཐོས་ལ་བར་དུ་བོད་དོན་གོམ་བགྲོད་གནང་མཁན་བསྟན་འཛིན་དོན་གྲུབ་ལགས་དང་བསྟན་འཛིན་ཉི་མ་ལགས་རྣམ་གཉིས་དེ་རིང་འབྲས་ལྗོངས་མངའ་སྡེའི་རྒྱལ་ས་སྒང་ཐོག་ཏུ་འབྱོར་འདུག
བོད་ནང་གི་ཁོར་ཡུག་གི་ཛ་དྲག་གནས་སྟངས་དང་བོད་དེ་རྒྱ་ནག་གིས་བཙན་འཛུལ་བྱས་པའི་རྒྱལ་ཁབ་ཅིག་ལ་ངོས་འཛིན་གནང་རྒྱུ། དེ་བཞིན་རྒྱ་གར་དང་བོད་ཀྱི་ས་མཚམས་དབར་རྒྱ་དཀར་ནག་གཉིས་ཀྱི་རྙོག་འཛིང་གི་རྐྱེན་གྱིས་རྒྱ་ནག་གི་ཅ་དངོས་ཉོ་ཚོང་གནང་རྒྱུ་མེད་པ་བཅས་དགོས་འདུན་དོན་ཚན་གསུམ་གྱི་ཐོག་ནས་ཟླ་ ༡༡ ཚེས་ ༢ ཉིན་བོད་མི་ན་གཞོན་བསྟན་འཛིན་དོན་གྲུབ་ལགས་ཀྱིས་བཞུགས་སྒར་དྷརྨ་ས་ལ་ནས་དབུ་འཛུགས་ཀྱིས་རྣ་ཐོས་ལའི་ས་མཚམས་བར་ཞི་བའི་གོམ་བགྲོད་ཀྱི་ལས་འགུལ་དབུ་འཛུགས་གནང་དོན་ལྟར་ད་ཆ་ཟླ་བ་གསུམ་ཙམ་སོང་བའི་མཚམས་སུ་ཁོང་དང་ཁོང་གི་ཕྱག་རོགས་གཅིག་བཅས་རྣམ་པ་གཉིས་དེ་རིང་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ཏུ་བདེ་འབྱོར་བྱུང་ཡོད་པ་རེད།
བསྟན་འཛིན་དོན་གྲུབ་ལགས་དང་རྒྱ་གར་གྱི་གྲོང་ཁྱེར་ཅན་རྡི་གྷར་ནས་ཁོང་དང་ལྷན་དུ་གོམ་བགྲོད་ནང་མཉམ་ཞུགས་གནང་མཁན་བསྟན་འཛིན་ཉི་མ་ལགས་རྣམ་གཉིས་ཉེ་སྔོན་ཕྱི་ཟླ་ ༡ ཚེས་ ༢༧ ཉིན་ནུབ་བྷེང་གྷལ་མངའ་སྡེའི་སི་ལི་གོ་རིའི་གྲོང་ཁྱེར་དུ་འབྱོར་བ་དང་བསྟུན་ཁུལ་དེར་ཁོང་གི་ལས་འགུལ་ཁྲོད་ཀྱི་དགོས་འདུན་དོན་ཚན་གསུམ་པོའི་ཐོག་གསར་འགོད་ལྷན་ཚོགས་གནང་ཡོད་པ་དང་། ཕྱི་ཚེས་ ༢༩ ཉིན་ཁུལ་དེ་ནས་ཕེབས་ཐོན་གནང་སྐབས་ནུབ་བྷེང་གྷལ་དང་འབྲས་ལྗོང་ཁུལ་གྱི་ཀ་རྡོར་སྒང་གསུམ་གྱི་ས་གནས་བོད་མི་དང་གཞོན་ནུ་དང་བེུད་སོགས་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་མི་གྲངས་ ༣༤ ཙམ་གྱིས་བོད་དོན་གོམ་བགྲོད་དེར་མཉམ་ཞུགས་ཀྱིས་ཁ་སང་ཟླ་ ༢ ཚེས་ ༡ ཉིན་འབྲས་ལྗོངས་མངའ་སྡེའི་ས་མཚམས་སུ་འབྱོར་བ་དང་དེ་རིང་མངའ་སྡེ་དེའི་རྒྱལ་ས་སྒང་ཏོག་ཏུ་འབྱོར་ཡོད་པ་རེད། 
འབྲས་ལྗོངས་ནང་དུ་བོད་དོན་གོམ་བགྲོད་ཀྱི་ལས་འགུལ་ནང་མཉམ་ཞུགས་དང་མཐུན་འགྱུར་གནང་མཁན་ སྒང་ཏོག་ས་གནས་གཞོན་ནུའི་དྲུང་ཆེ་བསྟན་འཛིན་ཚེ་འཕེལ་ལགས་ཀྱིས་གསུངས་པར་འབྲས་ལྗོང་མངའ་སྡེ་གཞུང་གིས་ད་བར་གོམ་བགྲོད་པ་རྣམས་ལ་རྣ་ཐོས་ལའི་མཚམས་སུ་རང་དབང་ཐོག་ཕེབས་རྒྱུར་ཆོག་མཆན་གནང་མེད་པ་ལྟར་ཁོང་རྣམས་ཀྱིས་ས་མཚམས་ས་ཁུལ་ཉེ་འགྲམ་ Third Mile CheckPost ཞེས་པའི་འགག་སྒོ་བར་དུ་གོམ་བགྲོད་གནང་སྟེ་ས་གནས་དེར་ལས་འགུལ་མཇུག་སྒྲིལ་གྱི་གསར་འགོད་ལྷན་ཚོགས་འཚོགས་འཆར་ཡོད་པ་གསུངས་སོང་།
གསར་འགོད་པས་བསྟན་འཛིན་དོན་གྲུབ་ལགས་སུ་གོམ་བགྲོད་དང་འབྲེལ་བའི་བཅར་འདྲི་ཁག་ཅིག་ཞུས་པར་ཁོང་གིས་ད་བར་ཁོང་གཉིས་ཀྱིས་རྒྱ་གར་གྱི་མངའ་སྡེ་ཁག་ ༩ ཙམ་གྱི་ནང་དུ་གོམ་བགྲོད་གནང་བའི་ཁྲོད་མངའ་སྡེའི་ཚང་མར་དགོས་འདུབ་གསུམ་གྱི་ཐོག་གསར་འགོད་ལྷན་ཚོགས་གནང་སྟེ་བོད་དོན་དྲིལ་བསྒྲགས་ཤུགས་ཆེ་གནང་ཐུབ་སྐོར་གསུངས་པ་དང་ཆབས་ཅིག་བོད་མི་ཚོས་དྲྭ་རྒྱ་དང་དངོས་སུ་བོད་དོན་དྲིལ་བསྒྲགས་གནང་བཞིན་པ་དེ་དག་ནི་ཁོང་གིས་ད་བར་བོད་དོན་ལས་འགུལ་སྤེལ་བའི་གྲུབ་འབྲས་ཤིག་ལ་ངོས་འཛིན་གནང་གི་ཡོད་ཅེས་གསུངས་སོང་།
