ཁ་ཉིན་ཕྱི་ཟླ་ ༡ ཚེས་ ༣ ཉིན་བྱེས་འཁོད་བོད་མི་ཚོས་མང་གཙོའི་ཁེ་དབང་ལོངས་སུ་སྤྱད་ནས་ཕྱི་ལོ་ ༢༠༢༡ ལོའི་བཙན་བྱོལ་བོད་མིའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་མཉམ་ཞུགས་གནང་ཡོད་ཀྱང་། བོད་མི་གཉིས་ཀྱིས་བོད་དོན་སླད་ཞི་བའི་གོམ་བགྲོད་གནང་བཞིན་པར་བརྟེན་ཁོང་རྣམ་པ་གཉིས་ལ་འོས་འཕང་རྒྱུའི་གོ་སྐབས་བྱུང་མེད་པ་རེད།
ཁོང་རྣམ་གཉིས་ཀྱིས་མ་འོངས་པར་སྲིད་སྐྱོང་སུ་ཕེབས་ཀྱང་གཞིས་བཞུགས་བོད་མིའི་སླད་དུ་སྐུ་ལས་སྐྱོན་རྒྱུ་སྤྱི་དང་སྒོས་བོད་རྒྱ་ཞི་མོལ་བསྐྱར་གསོ་ཡོང་བར་༸གོང་ས་མཆོག་གི་སྐུ་ཚབ་བོད་དུ་ཕེབས་ཐུབ་རྒྱུ་དེ་མ་འོངས་པའི་ཕྱག་ལས་ཁྲོད་ཨང་དང་པོར་ངོས་འཛིན་གནང་དགོས་པའི་རེ་སྐུ་ཞུས་སོང་།
སྔ་ལོའི་ཕྱི་ཟླ་ ༡༡ ཚེས་ ༢ ཉིན་བོད་མི་ན་གཞོན་བསྟན་འཛིན་དོན་གྲུབ་ལགས་ཀྱིས་རྒྱ་གར་འབྲས་ལྗོངས་སུ་ཆགས་པའི་རྣ་ཐོས་ལའི་ས་མཚམས་བར་དུ་ཞི་བའི་གོམ་བགྲོད་ཀྱི་ལས་འགུལ་ཞིག་དབུ་འཛུགས་གནང་དོན་བཞིན་སང་ཉིན་ཁོང་དང་ཁོང་གི་ཕྱག་རོགས་བསྟན་འཛིན་ཉི་མ་ལགས་རྣམ་གཉིས་རྒྱ་གར་བི་ཧཱར་མངའ་སྡེའི་གནས་མཆོག་རྡོ་རྗེ་གདན་དུ་འབྱོར་གྱི་ཡོད་པ་རེད།
ཁ་སང་བསྟན་འཛིན་གྲུབ་ལགས་དང་ཉི་མ་ལགས་རྣམ་གཉིས་ཀྱིས་ March for Freedom from Dharamshala to Nathula ཞེས་པའི་ངོ་དེབ་ཐོག་ཕྱི་ལོ་ ༢༠༢༡ ལོའི་སྲིད་སྐྱོང་དུ་སུ་ཞིག་ཕེབས་ཀྱི་ཡོད་ཀྱང་གཞིས་བཞུགས་བོད་མིའི་སླད་དུ་སྐུ་ལས་སྐྱོན་རྒྱུ་སྤྱི་དང་ལྷག་པར་དུ་ཉེ་བའི་ལོ་རབས་བཅུའི་ནང་བོད་རྒྱ་ཞི་མོལ་བསྐྱར་གསོ་ཡོང་ཐབས་སུ་༸གོང་ས་མཆོག་གི་སྐུ་ཚབ་བོད་དུ་ཕེབས་ཐུབ་མེད་པ་དེ་ལྟར་ཡང་། སླད་མར་༸གོང་ས་མཆོག་གི་སྐུ་ཚབ་བོད་དུ་ཕེབས་ཐུབ་དགོས་གལ་ཡིན་པར་མ་ཟད་སྲིད་སྐྱོང་དུ་འདེམས་ཐོན་བྱུང་བའི་གང་ཟག་དེས་མ་འོངས་པའི་ཕྱག་ལས་ཁྲོད་ཨང་དང་པོར་ངོས་འཛིན་གནང་དགོས་པའི་རེ་སྐུ་གནང་གི་འདུག
དེ་བཞིན་གསར་འགོད་པས་ད་བར་ཟླ་བ་གཉིས་ལྷག་གི་གོམ་བགྲོད་ཁྲོད་རྒྱ་གར་བས་བོད་དོན་ཐད་ལ་གཟིགས་ཚུལ་དང་དོ་སྣང་གནང་ཕྱོགས་གང་འདྲ་ཡོད་མེད་ཐོག་བཅར་འདྲི་ཞུས་སྐབས་དོན་གྲུབ་ལགས་ཀྱིས་ད་བར་གོམ་བགྲོད་གནང་བའི་རིང་ལ་བོད་དོན་ཐད་ལ་གོ་རྟོགས་མེད་པའི་མི་སྣ་དང་ཐུག་འཕྲད་བྱུང་སྐབས་བོད་དོན་ངོ་སྤྲོད་གནང་བ་དང་། ལྷག་པར་དུ་འཕགས་བོད་མཛའ་འབྲེལ་ཚོགས་པ་དང་བོད་དོན་རྒྱབ་སྐྱོར་བ་རྣམས་ཀྱིས་རོགས་རམ་ཤུགས་ཆེར་གནང་བ་དེས་སེམས་ཤུགས་འཕར་མ་ཞིག་སྦྱིན་ཡོད་སྐོར་གསུངས་སོང་།
