ཕྱི་ཟླ་ ༨ ཚེས་ ༢༥ ཉིན་ནས་དབུ་འཛུགས་ཀྱིས་ཚེས་ ༢༧ བར་ཁྱོན་ཉིན་གྲངས་གསུམ་རིང་རྒྱ་གར་བྱང་ཕྱོགས་ལ་དྭགས་བསོད་ནམ་གླིང་བོད་མིའི་གཞིས་སྒར་མཉམ་འབྲེལ་ཚོགས་ཁང་དུ་བོད་མིའི་གཞིས་རིམ་སོ་ནམ་མཉམ་འབྲེལ་ཁག་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༡༨ ཚོགས་ཡོད་པ་རེད།
ཐེངས་འདིའི་ཚོགས་ཆེན་ཐོག་ས་གནས་ཁག་ ༡༥ ནས་ཚོགས་མི་གྲངས་ ༥༠ ལྷག་ནས་འདུ་འཛོམས་ཀྱིས་འདས་པའི་ལོ་གཅིག་གི་ལས་སྡོམ་དང་བྱུང་སོང་རྩིས་ཁྲ་ཁག་སྙན་སེང་ཞུས་ཏེ་དེ་དག་ཐད་དགོངས་ཚུལ་དང་འདྲི་རྩད་སོགས་གནང་བ་མ་ཟད་མཐར་གྲོས་ཆོད་ཁག་ ༡༠ གཏན་འབེབས་གནང་འདུག
ཚོགས་འདུའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག དབུས་རྒྱ་གར་གཞུང་གི་ཆེ་མཐོའི་མི་སྣ་སོགས་གདན་ཞུས་གནང་ཡོད་པ་རེད།
རྩ་བའི་བོད་མིའི་མཉམ་འབྲེལ་དེ་ཕྱི་ལོ་ ༡༩༦༣ ལོར་བོད་མི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་འཚོ་རྟེན་ཡར་རྒྱས་ལ་དམིགས་ཏེ་བཞུགས་སྒར་ལ་ཆེད་འཛུགས་གནང་བ་ཞིག་ཡིན་པ་དང་། དེས་ནས་རིམ་བཞིན་བཙན་བྱོལ་བོད་མིའི་གཞིས་ཆགས་ཁག་གི་ནང་མཉམ་འབྲེལ་ཁག་ ༡༥ བྱུང་ཡོད་པ་དང་། ཕྱི་ལོ་ ༢༠༠༥ ལོར་བཀའ་ཤག་སྐབས་ ༡༢ པས་བོད་མི་མཉམ་འབྲེལ་ཁག་ ༡༥ དེ་དག་ལ་ཐུན་མོང་གི་སྒྲིག་འཛུགས་ཤིག་དགོས་གལ་གཟིགས་པ་ལྟར་རྒྱ་གར་དབུས་མཉམ་འབྲེལ་གྱི་ཁོངས་སུ་བོད་མི་སྤྱི་མཐུན་མཉམ་འབྲེལ་ཞེས་དེབ་སྐྱེལ་ཞུས་ཡོད་པ་རེད། བོད་མི་སྤྱི་མཐུན་མཉམ་འབྲེལ་གྱི་ཁོངས་སུ་ལས་རིགས་ཞབས་ཞུ་དང་ས་ཞིང་འདེབས་ལས་ཀྱི་ཚོང་ལས་བཅས་གཉིས་ཡོད་པ་དེ་དག་གིས་སྟོན་ཐོག་དང་ཤིང་འབྲས་སོགས་ཀྱི་ཚོང་ལས་དང་། མཉམ་འབྲེལ་དངུལ་ཁང་། སུད་ཚོང་གཉེར་མཁན་རྣམས་ལ་བུན་གཡར། འཐུང་ཆུ་གཙང་བཟོ། ཁྲོམ་ར་གསར་འཛུགས། སྣུམ་གྱི་ཚོང་ལས། བརྙན་འཕྲིན་གྱི་ཚོང་ལས། སྤོས་གྱི་ཚོང་ལས། ཐུག་པའི་ཚོང་ལས། ཚོང་ཁང་དང་ཟ་ཁང་སོགས་ཀྱི་ལས་གཞི་འདྲ་མིན་ཐོག་ཚོང་ལས་གཉེར་བཞིན་ཡོད་པ་དང་། ལོ་རེའི་ཁེ་སང་རྣམས་ཤེར་བདག་མི་མང་ལ་བགོས་འགྲེམས་བྱ་རྒྱུ་དང་སྤྱི་ཚོགས་ཡར་རྒྱས། མ་འོངས་ལས་གཞི། གཏན་འཇགས་མ་དངུལ་བཅས་སུ་བདེ་སྤྱོད་གནང་གི་ཡོད་པ་མ་ཟད། བོད་ཕྲུག་ཚོའི་སློབ་ཡོན་ཆེད་དུ་ཤེར་བདག་མི་མང་གི་སློབ་ཕྲུག་དང་ལས་བྱེད་པའི་སློབ་ཕྲུག་རྣམས་ལ་ལོ་རེ་བཞིན་སློབ་ཡོན་ཡང་གནང་སྲོལ་ཡོད་པ་རེད།
