དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཟླ་བ་འདིའི་ཚེས་ ༢༤ ཉིན་སྐུ་ཞབས་ Scott Morrison མཆོག་གིས་ཨོ་སི་ཊོ་ལི་ཡའི་སྲིད་བློན་གསར་པའི་ལས་ཁུར་དམ་འབུལ་གནང་བར་དགའ་བསུའི་འཚམས་འདྲི་གནང་འདུག
དེའང་བོད་མིའི་སྒྲིག་འཛུགས་ཀྱི་དྲྭ་གནས་ཐོག་གནས་ཚུལ་སྤེལ་བར་གཞིགས་ན། སྲིད་སྐྱོང་མཆོག་གིས་འཚམས་འཕྲིན་དེའི་ནང་བོད་མིའི་སྒྲིག་འཛུགས་ཀྱི་སྐུ་ཚབ་ཞུས་ནས་སྐུ་ཞབས་ Scott Morrison མཆོག་ཨོ་སི་ཊོ་ལི་ཡའི་སྲིད་བློན་གསར་པར་བསྐོ་བཞག་བྱུང་བར་དགའ་བསུའི་འཚམ་འདྲི་ཡོད་ཅེས་དང་། ལྷག་དོན་སྐུ་ཞབས་ Scott Morrison མཆོག་གི་སྲིད་གཞུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་ལ་རྒྱབ་སྐྱོར་གནང་རྒྱུར་ཡིད་ཆེས་བརྟན་པོ་ཡོད་ཅེས་བཀོད་འདུག
རྩ་བའི་སྐུ་ཞབས་ Scott John Morrisonམཆོག་ནི་དགུང་ལོ་ ༥༠ ལ་ཕེབས་ཡོད་པ་དང་། ཨོ་སི་ཊོ་ལི་ཡའི་ཆབ་སྲིད་ནང་ལོ་ངོ་ ༣༠ ཙམ་གྱི་རིང་ཕྱག་ལས་གནང་མྱོང་ཡོད་པ་རེད། ད་ལྟའི་ཆར་ཨོ་སི་ཊོ་ལི་ཡའི་སྲིད་བློན་གསར་པར་བསྐོ་བཞག་བྱུང་བ་དང་གུ་ཡངས་མང་གཙོ་ཚོགས་པའི་དབུ་ཁྲིད་ཞིག་ཡིན་པ་རེད། སྐུ་ཞབས་ཁོང་སྲིད་བློན་དུ་བསྐོ་བཞག་མ་བྱུང་གོང་ཨོ་སི་ཊོ་ལི་ཡའི་ནང་སྲིད་ལྷན་ཁང་གི་བློན་ཆེན་ལས་ཚབ་གནང་མྱོང་ཡོད་པ་རེད།
