དེ་རིང་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་སེམས་དང་སྲོག་གི་ལྷན་ཚོགས་སྟེང་འགྲོ་བ་མི་གཅིག་གྱུར་གྱི་འདུ་ཤེས་ཁྱབ་སྤེལ་དང་འཕྲུལ་རིག་གི་གལ་གནད་ཐོག་བཀའ་བསྡུར་གནང་སྟེ་ཉིན་གཉིས་ཀྱི་བགྲོ་གླེང་ལྷན་ཚོགས་མཇུག་སྒྲིལ་གནང་བ་དང་། མགོན་པོ་༸གང་ཉིད་མཆོག་གིས་འཕྲུལ་རིག་གལ་ཆེའི་ཐོག་བཀའ་ལན་མཛད་སྐབས་འཕྲུལ་རིག་བཟོ་མཁན་ཚོས་འགྲོ་བ་མིའི་དགོས་མཁོ་དང་ཁེ་ཕན་ལ་དགོངས་པ་བཞེས་དགོས་གལ་ཡིན་པར་ལམ་སྟོན་མཛད་ཡོད།
དེ་རིང་སྔ་དྲོར་ཨ་རི་དང་ཡུ་རོབ་ཀྱི་སེམས་དང་སྲོག་ལྟེ་གནས་ཁང་མཉམ་སྦྲེལ་གྱིས་གོ་སྒྲིག་འོག་བཞུགས་སྒར་༸རྒྱལ་བའི་ཕོ་བྲང་དུ་ཚོགས་པའི་སེམས་དང་སྲོག་གི་ལྷན་ཚོགས་ལ་སེམས་དང་སྲོག་གི་ཚོགས་པའི་ཚོགས་མི་གཙོས་ཚན་རིག་པ་སོགས་ནས་མཉམ་ཞུགས་གནང་བའི་ཁྲོད་འདིར་༸གོང་ས་༸སྐྱབས་མགོན་ཆེན་པོ་མཆོག་གིས་ཚན་རིག་པ་ཚོས་ཤེས་པའི་སྐོར་ཉམས་ཞིབ་དེ་ཙམ་གནང་མེད་པ་དང་ཤེས་པ་ཟེར་སྐབས་ང་ཚོས་ཀླད་པ་ཟེར་ནས་གོ་བ་ལེན་གྱི་ཡོད་ཀྱང་། དཔེ་མཚོན་གསལ་ཤོས་ནི་མགོན་པོ་༸གང་ཉིད་མཆོག་དགུང་ལོ་བགྲེས་པོར་ཕེབས་ཡོད་ཀྱང་ཐུགས་གཞོན་དུ་འགྲོ་གྱི་ཡོད་པ་དང་། སེམས་དེ་རང་དབང་ཅན་ཞིག་ཡིན་སྟབས་ཚན་རིག་པ་ཚོས་སེམས་དང་ཤེས་པར་ཉམས་ཞིབ་མང་ཙམ་གནང་ཐུབ་ཚེ་དགེ་མཚན་ཆེན་པོ་ལྡན་ཡོད་སྐོར་བཀའ་སྩལ་སོང་།
དེ་བཞིན་མགོན་པོ་༸གང་ཉིད་མཆོག་གིས་བྱིས་པ་མཚེ་མ་ལྟ་བུར་ཤེས་པའི་ཆ་ནས་མི་འདྲ་བ་ཡོང་གི་ཡོད་སྟབས་ལུས་པོ་ལས་གཞན་པའི་རྣམ་པར་ཤེས་པ་ཡོད་པ་གསལ་པོ་ཡིན་སྐོར་བཀའ་སྩལ་བ་དང་སྦྲགས། ཤེས་པ་དང་ཀླད་པའི་དབར་ཁྱད་པར་གང་ཡོད་མེད་ཚོགས་བཅར་བར་མར་བཀའ་འདྲི་མཛད་པར་ཀླད་པའི་ཚན་རིག་པ་གྲགས་ཅན་སྐུ་ཞབས་ Richard Davidson ལགས་ཀྱིས་ཚན་རིག་གི་ཐོག་ནས་ད་བར་རྣམ་ཤེས་ཀྱི་རང་བཞིན་གང་ཡིན་འགྲེལ་བརྗོད་གསལ་པོ་ཞིག་ཞུ་ཐུབ་ཀྱི་མེད་སྐོར་སྙན་སེང་ཞུས་ཡོད།
དེ་རིང་ཉིན་གཉིས་པའི་ཐོག་ Basque གཙུག་ལག་སློབ་གཉེར་ཁང་གི་སློབ་དཔོན་ Hanne De Jaegher ལགས་དང་། Dublin གཙུག་ལག་སློབ་གཉེར་ཁང་གི་ Abeba Birhane ལགས་རྣམ་གཉིས་ཀྱིས་གསུང་བཤད་གནང་བའི་ཁྲོད་མི་ཕན་ཚུན་དབར་འབྲེལ་བ་བྱེད་སྟངས་ཐད་ཞིབ་འཇུག་གནང་མཁན་ Hanne De Jaegher ལགས་ཀྱིས་༸གོང་ས་མཆོག་ལ་མི་ཕན་ཚུན་འབྲེལ་བ་བྱེད་སྐབས་ཕན་ཚུན་ཐ་དད་ཡིན་པའི་ངོས་འཛིན་དེ་གལ་ཆེན་པོ་ཆགས་ཀྱི་ཡོད་དམ་ཞེས་བཀའ་འདྲི་དགོངས་སྐོར་ཞུས་པར་༸གོང་ས་མཆོག་གིས་འགྲོ་བ་མི་གཅིག་གྱུར་གྱི་འདུ་ཤེས་འཛིན་དགོས་རྒྱུ་ནི་ཆེས་གནད་ཆེ་ཡིན་པ་དང་། རྒྱལ་ཁབ་མི་འདྲ་བ་དང་ལམ་ལུགས་མི་འདྲ་བ་ཟེར་བ་རྣམས་མིས་བཟོས་པ་ཞིག་དང་ང་ཚོ་ཚང་མ་སྐྱེས་པ་དང་འཚར་ལོངས་བྱུང་བ་གཅིག་མཚུངས་རེད། སློབ་གྲྭར་ཞུགས་པའི་སྐབས་དང་མིས་བཟོས་པའི་ལམ་ལུགས་སོགས་ལ་བརྟེན་ནས་དབྱེ་འབྱེད་ཀྱི་བསམ་བློ་དེ་དག་རིམ་པས་ཡོང་གི་ཡོད་སྟབས། ང་ཚོ་ཕན་ཚུན་དབར་དབྱེ་འབྱེད་གནང་དྲག་ན་ཕན་ཚུན་བཀའ་མོལ་གནང་སའི་གཞི་རྩ་མེད་པ་ཆགས་ཉེན་ཡོད་པར་ལམ་སྟོན་སྩལ་ཡོད།
སྐབས་དེར་ Hanne De Jaegher ལགས་ཀྱིས་༸གོང་ས་མཆོག་གིས་བཀའ་ལན་ལ་མོས་མཐུན་ཡོད་ཅེས་ཞུས་པ་དང་སྦྲགས་མགོན་པོ་༸གང་ཉིད་མཆོག་གིས་བཀའ་སྩལ་བ་དེ་དག་ད་ལྟའི་དུས་རབས་འདིར་ཆེས་ཉེར་མཁོ་ཆགས་ཡོད་པ་དང་མི་མང་རྣམས་ཀྱིས་ཀྱང་དེར་གསན་འཇོག་གནང་བའི་རེ་བ་ཡོད་ཅེས་གསུངས་སོང་། 
Dublin གཙུག་ལག་སློབ་གཉེར་ཁང་གི་ Abeba Birhane ལགས་ཀྱིས་འཕྲུལ་རིག་གི་ཤུགས་རྐྱེན་སྐོར་འགྲེལ་བརྗོད་དང་འབྲེལ་ཏེ་ཁོང་གིས་འཕྲུལ་ཆས་གསར་པའི་རིགས་དེ་དག་གིས་ཁྱབ་ཚད་ཤུགས་ཆེ་ཡོད་པའི་ཁྲོད་འདིར་ཚོང་ལས་ཁང་ཆེན་པོ་ཚོས་དེས་ཁེ་ཕན་རྣམས་ལེན་ཀྱང་ཕྱོགས་གཞན་ཞིག་ནས་དེས་གནོད་མང་པོ་སྐྱེལ་གྱི་ཡོད་སྐོར་སྙན་སེང་ཞུས་པ་དང་ཆབས་ཅིག་བཀའ་འདྲི་དགོངས་སྐོར་ཞུས་པར་༸གོང་ས་མཆོག་གིས་འཕྲུལ་ཆས་འདྲ་མིན་ག་ཚོད་ཡོད་ཀྱང་བེད་སྤྱོད་གནང་མཁན་ལ་རག་ལས་ཀྱི་ཡོད་པ་དང་ང་ཚོ་འགྲོ་བ་མི་རྣམས་འཕྲུལ་ཆས་ཀྱི་བྲན་གཡོག་མིན་སྐོར་བཀའ་ལན་སྩལ་སོང་།
Abeba Birhane ལགས་ཀྱིས་ད་དུང་འཕྲུལ་རིག་གི་ཚོང་ལས་ཁང་མང་པོས་དངུལ་ཁོ་ན་བཟོ་རྒྱུར་དམིགས་པ་མ་གཏོགས་སྤྱི་ཚོགས་ཞབས་ཞུ་དང་དྲང་བདེན་གྱི་ཐོག་ནས་དགོངས་པ་བཞེས་མཁན་དཀོན་པོ་འདུག་ཅེས་ཞུས་སྐབས་མགོན་པོ་༸གང་ཉིད་མཆོག་གིས་དེར་ངོས་རང་མོས་མཐུན་ཡོད། འགྲོ་བ་མིའི་རིན་ཐང་དེ་རིམ་པ་གཉིས་པར་བཞག་ཏེ་དངུལ་གཙོ་བོར་ངོས་འཛིན་པ་དེ་ཕྱིའི་དངོས་པོར་དོ་སྣང་ཤུགས་ཆེ་བའི་རྐྱེན་གྱིས་ཡོང་གི་ཡོད་པ་དང་། ང་ཚོ་འགྲོ་བ་མི་ཡིན་པའི་ཆ་ནས་གཞི་རྩའི་འགྲོ་བ་མིའི་རིན་ཐང་ལ་སྣང་མེད་དུ་འཇོག་རྒྱུ་མེད་ཅེས་དང་འཕྲུལ་རིག་བཟོ་མཁན་ཚོས་འགྲོ་བ་མིའི་དགོས་མཁོ་དང་ཁེ་ཕན་ཆེད་དགོངས་བཞེས་གནང་གལ་ཡིན་པར་ལམ་སྟོན་བཀའ་དྲིན་ཆེ་བ་མཛད་ཡོད།
སེམས་དང་སྲོག་གི་ལྷན་ཚོགས་ཐོག་བཀའ་འདྲི་དགོངས་སྐོར་ཞུས་ཟིན་པའི་རྗེས་ལ། ༸གོང་ས་མཆོག་གིས་མགོན་པོ་༸གང་ཉིད་མཆོག་བཙན་བྱོལ་བ་ཅིག་ལ་ཆགས་ཡོད་པ་དང་། འོན་ཀྱང་མགོན་པོ་མཆོག་འགྲོ་བ་མི་གཅིག་གྱུར་གྱི་འདུ་ཤེས་ཐོག་ནས་གཞན་དང་མཇལ་འཕྲད་སྐབས་ཐུགས་དགྱེས་ཚོར་ཆེན་པོ་བྱུང་བ་དང་། ལྷག་པར་གཞིས་བཞུགས་བོད་མི་ཚོས་མགོན་པོ་༸གང་ཉིད་མཆོག་གི་མཛའ་གྲོགས་རྣམས་བོད་ཀྱི་གྲོགས་པོར་ངོས་འཛིན་གནང་གི་ཡོད། བོད་མིར་ཆ་མཚོན་ན་གཉན་འཕྲང་གི་དུས་ཚོད་འདི་ལྟ་བུའི་ནང་ལྷུང་ཡོད་ཀྱང་ང་ཚོར་དྲང་བདེན་ཡོད་སྐོར་བཀའ་སྩལ་མཛད་པའི་ཐོག་ནས་ཐེངས་འདིའི་སེམས་དང་སྲོག་གི་ལྷན་ཚོགས་རེ་ཞིག་མཇུག་སྒྲིལ་ཡོད།
