ཕྱི་ལོ་གསར་ཚེས་འགོ་མ་ཚུགས་གོང་གི་ཕྱི་ཚེས་ ༣༡ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་ནས་འཛམ་གླིང་ཡུལ་གྲུ་གང་སར་གནས་པའི་ཆོས་གྲོགས་ཕོ་མོ་ཡོངས་ལ་ཕྱི་ལུགས་ཀྱི་གནམ་ལོ་གསར་དུ་བཞད་པར་དགའ་བསུའི་འཚམས་འདྲི་བསྩལ་འདུག
༸གོང་ས་༸སྐྱབས་མགོན་ཆེན་པོ་མཆོག་གིས་བསྩལ་བའི་འཚམས་འཕྲིན་དེའི་ནང་ཕྱི་ལོ་གསར་པའི་དུས་ཆེན་དང་བསྟུན་ནས་༸གང་ཉིད་མཆོག་ལ་འཚམས་འདྲི་ཞུ་མཁན་ཚང་མར་ཐུགས་རྗེ་ཆེ་ཞེས་བཀའ་བསྩལ་བ་དང་འབྲེལ། ང་ཚོ་ནི་གཞན་གྱི་འཚོ་གནས་ལ་བརྟེན་དགོས་པའི་སྤྱི་ཚོགས་རང་བཞིན་གྱི་སེམས་ཅན་ཞིག་ཡིན་སྟབས། གཞན་ལ་ཕན་མ་ཐོགས་ནའང་གཞན་ལ་གནོད་འཚེ་མི་བྱེད་པའི་སྒོ་ནས་གཞན་གྱི་བདེ་སྡུག་གི་ཆེད་དུ་འབད་པ་བྱེད་དགོས་པ་བཀའ་བསྩལ་འདུག
༸གོང་ས་མཆོག་གིས་ད་དུང་ང་ཚོས་རང་གི་རྒྱལ་ཁབ་དང་ཆོས་ལུགས་གང་ཡིན་ལ་མ་ལྟོས་པར་སེམས་ཀྱི་ཞི་བདེ་དང་སྙིང་རྗེ་གོང་འཕེལ་གཏོང་བར་འབད་བརྩོན་བྱེད་དགོས་པ་མ་ཟད། དུས་རབས་སྔོན་མ་ནི་མཚན་ཉིད་ངེས་མེད་ཀྱི་དྲག་སྤྱོད་ཀྱི་དུས་རབས་ཤིག་ཡིན་ཡང་དུས་རབས་འདི་གྲོས་མོལ་གྱི་དུས་རབས་ཤིག་ཏུ་གྱུར་བར་འབད་བརྩོན་གནང་རྒྱུ་ནི་ང་ཚོའི་ལས་འགན་ཆགས་ཡོད་ཅེས་བཀའ་བསྩལ་འདུག
དེ་བཞིན་ཁ་སང་ཕྱི་ལོ་གསར་པའི་ཚེས་ ༡ ཉིན་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་ལ་བོད་མིའི་ཚོགས་སྡེ་ཁག་གསུམ་གྱི་ངོས་ནས་བརྟན་བཞུགས་བསྟར་འབུལ་ཞུས་སྐབས་མང་ཚོགས་ཀུན་ལ་ཕྱི་ལུགས་ཀྱི་གནམ་ལོ་གསར་དུ་བཞད་པར་འཚམས་འདྲི་དང་སྦྲགས། འགྲོ་བ་གཅིག་འགྱུར་གྱི་འདུ་ཤེས་ཐོག་ནས་གཅིག་ཕན་གཅིག་གྲོགས་གནང་རྒྱུ་གལ་འགངས་ཆེ་བ་མ་ཟད། ད་ཆ་ང་ཚོས་མི་རབས་གསར་པ་ཞིག་དང་བསམ་བློ་གསར་པ་ཞིག་གི་ཐོག་ནས་གཅིག་ཕན་གཅིག་གྲོགས་ཡོང་ཐབས་གནང་གལ་ཡིན་པའི་ལམ་སྟོན་བཀྲིན་ཆེ་བ་མཛད་ཡོད་པ་རེད།
༸སྐུ་པར་བདག་དབང་༸དཔལ་ལྡན་དགའ་ལྡན་ཕོ་བྲང་ཡིག་ཚང་།
