རྒྱ་ནག་གཞུང་གིས་འཛིན་བཟུང་བྱས་པའི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་དང་གྲྭ་རིན་ཆེན་ཚུལ་ཁྲིམས་ལགས་རྣམ་གཉིས་ཀྱི་གནད་དོན་ཐད་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཁག་བཞིར་ལན་འདེབས་བྱས་པ་དེ་ནི་འགྲོ་བ་མིའི་ཐོབ་ཐང་ཚོགས་པ་ཁག་གིས་ཆབ་སྲིད་བཙོན་པ་རྣམ་གཉིས་ཀྱི་གནད་དོན་ཐོག་ད་བར་བློ་འཚབ་གནང་བ་དེ་རྒྱུ་མཚན་ལྡན་པ་ཞིག་ཡིན་པར་ར་འཕྲོད་བྱུང་སྐོར་མངོན་གསལ་གནང་འདུག
རྒྱལ་སྤྱིའི་བོད་དོན་ལས་འགུལ་ཁང་གིས་གྲྭ་རིན་ཆེན་ཚུལ་ཁྲིམས་ལགས་རྒྱ་གཞུང་གིས་ཕྱི་ལོ་ ༢༠༡༩ ལོར་འཛིན་བཟུང་གིས་སྔ་ལོའི་ཟླ་ ༡༡ ནང་ཁ་བྲལ་ལ་བརྒྱུད་སྐུལ་གྱི་ཉེས་འཛུགས་འོག་ལོ་བཞི་དང་ཟླ་བ་དྲུག་གི་བཙོན་འཇུག་ཁྲིམས་ཐག་བཅད་ཡོད་པ་དང་སྐབས་དེར་རྒྱ་གཞུང་གིས་ཁོང་ལ་རྒྱ་ནག་གི་སྤྱི་ཚོགས་དྲ་ལམ་ Wechat ཞེས་པའི་སྐད་འཕྲིན་གླེང་སྟེགས་ཐོག་སྤེལ་བའི་གནས་ཚུལ་ཞིག་བརྒྱུད་སྤེལ་གནང་བ་བརྒྱུད་རྒྱལ་ཁབ་ཀྱི་ཆིག་སྒྲིལ་དང་བདག་དབང་། སྤྱི་ཚོགས་བརྟན་ལྷིང་སོགས་ལ་ཉེན་ཁ་བཟོས་ཡོད་ཚུལ་བརྗོད་ཡོད་པ་དེ་ལྟར་ཡང་ཉེ་ཆར་རྒྱ་གཞུང་དེ་འབྲེལ་གནད་དོན་ཐོག་རྒྱལ་ཚོགས་ཀྱི་ཆེད་མཁས་མི་སྣར་ལེན་འདེབས་བྱས་པའི་ནང་དུ་གྲྭ་རིན་ཆེན་ཚུལ་ཁྲིམས་ལགས་ཀྱིས་སྐད་འཕྲིན་ཐོག་སྤེལ་བའི་གནས་ཚུལ་དེ་རྒྱ་ནག་གི་ཁྲིམས་དང་འགལ་ཡོད་ཚུལ་ལ་བདེན་དཔང་ར་སྤྲོད་ཐུབ་མེད་པར་གསལ་བཏོན་གནང་བ་མ་ཟད། ད་ཆ་མང་ཚོགས་ཁྲོད་ཡོངས་གྲགས་གནང་བའི་འཕྲིན་སྟེགས་ཀྱི་གནས་ཚུལ་དེའི་ནང་ཁྲིམས་མཐུན་གྱི་སྨྲ་བརྗོད་དང་བསམ་བརྗོད་རང་དབང་བཅས་ཀྱི་གནད་དོན་ཡིན་པས་དེ་དག་རྒྱལ་སྤྱིའི་ཁྲིམས་དང་མཐུན་པ་ཞིག་ཡིན་པར་ནན་བརྗོད་གནང་འདུག
རྒྱ་གཞུང་གིས་རྒྱལ་ཚོགས་ཀྱི་ཆེད་ལས་མི་སྣར་གྲྭ་རིན་ཆེན་ཚུལ་ཁྲིམས་ལགས་དང་རྩོམ་པ་པོ་སྒོ་ཤེས་རབ་རྒྱ་མཚོ་ལགས་རྣམ་གཉིས་ཀྱི་གནད་དོན་ཐད་ལན་འདེབས་གནང་བར་རྒྱ་གཞུང་གིས་གྲྭ་རིན་ཆེན་ཚུལ་ཁྲིམས་ལགས་སུ་ཁྲིམས་བཤེར་རྒྱུད་རིམ་ཀྱི་ཐོབ་ཐང་དང་འབྲེལ་བའི་དགོས་ངེས་ཀྱི་མཐུན་རྐྱེན་སྦྱོར་ཡོད་ཀྱང་བདེན་པར་ར་སྤྲོད་བྱ་རྒྱུར་ལམ་ལྷོངས་བྱུང་མེད་ཚུལ་བཀོད་འདུག འོན་ཀྱང་དེའི་རྒྱབ་འགལ་དུ་རྒྱལ་སྤྱིའི་བོད་དོན་ལས་འགུལ་ཁང་གིས་འགྲེལ་བརྗོད་གནང་བར་གྲྭ་རིན་ཆེན་ཚུལ་ཁྲིམས་ལགས་ཀྱི་ཁྲིམས་བཤེར་དེ་ཡོངས་གྲགས་ཤིག་མིན་པའི་ཁར་ཁོང་ལ་ཁྲིམས་ཀྱི་འགྲོ་ལུགས་གཞིར་བཞག་གི་ཁྲིམས་རྩོད་པ་གླ་མི་ཆོག་པ་མ་ཟད། ཁོང་འཛིན་བཟུང་བྱས་ནས་ད་ཆ་ལོ་གཉིས་ལྷག་འགྲོ་མུས་ཁྲོད་ཁོང་གི་ནང་མི་ཉེ་འབྲེལ་རྣམས་ནས་ཁོང་དང་ཐུག་འཕྲད་རྩ་བ་ནས་གནང་ཐུབ་ཀྱི་མེད་པའི་གནས་ཚུལ་སོགས་ལུང་འདྲེན་གནང་སྟེ། དེ་ནི་རྒྱལ་སྤྱིའི་ཁྲིམ་ལྟར་བཀག་སྐྱིལ་བྱེད་པོའི་ཐོབ་ཐང་ལ་བརྩི་མེད་རྡོག་རོལ་བཏང་བ་ཞིག་མཚོན་གྱི་ཡོད་པར་མངོན་གསལ་གནང་འདུག
དེ་བཞིན་གཞིས་བཞུགས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་ཀྱི་གནད་དོན་དང་འབྲེལ་ཏེ་རྒྱལ་སྤྱིའི་བོད་དོན་ལས་འགུལ་ཁང་ནས་རྒྱ་གཞུང་གིས་རྩོམ་པ་པོ་ཁོང་ལའང་ཁ་བྲལ་ལ་བརྒྱུད་སྐུལ་བྱས་པའི་དོགས་གཞིའི་འོག་ཁྲིམས་འགལ་གྱི་དོ་དམ་བཀག་ཉར་འོག་བཞག་ཡོད་པ་དང་འདི་ལོའི་ཕྱི་ཟླ་ ༡ ནང་རྒྱ་ནག་གི་གྲོང་ཁྱེར་ཁྲིན་ཏུ་རུ་བོད་ལྗོངས་ལྷ་ས་གྲོང་ཁྱེར་གྱི་འབྲིང་རིམ་མི་མང་ཁྲིམས་ཁང་ནས་ཁོང་གི་གནད་དོན་ཐད་ཁྲིམས་བཤེར་བྱས་ཀྱང་དེ་འབྲེལ་གྱི་དཔྱད་ཁྲ་གང་ཡང་བཏང་མེད་པ་མ་ཟད། རྒྱ་གཞུང་གིས་སྒོ་ཤེས་རབ་ལགས་ཀྱི་ནང་མི་ཉེ་འབྲེལ་ཚོར་ཁོང་དང་འབྲེལ་བའི་གནས་ཚུལ་ཁག་མཁོ་སྤྲོད་བྱས་ཡོད་ཚུལ་བཀོད་ཡོད་ཀྱང་དོན་དངོས་ཐོག་བཙོན་འཇུག་གི་དོན་རྐྱེན་གང་ཡིན་ཤེས་རྟོགས་མེད་པའི་ཁར་རྒྱ་གཞུང་གིས་ཁོང་གི་ནང་མི་རྣམས་ལ་དེ་འབྲེལ་གནས་ཚུལ་གསང་རྒྱ་དགོས་པ་དང་སྒོ་ཤེས་རབ་རྒྱ་མཚོ་ལགས་ཀྱི་གནད་དོན་དང་འབྲེལ་བའི་བདེན་དཔང་ར་སྤྲོད་ཀྱི་གནས་ཚུལ་མང་དག་ཅིག་གསང་ཉར་བྱེད་བཞིན་པ་མ་ཟད། ཐེངས་འདིའི་རྒྱ་གཞུང་གི་ལན་འདེབས་དེའང་ཁོང་གི་འགལ་ཟླར་སྤྱོད་བཞིན་པའི་བདེན་དཔང་ར་སྤྲོད་རྣམས་དང་མཐུན་གྱི་མེད་པ་དེ་ནི་ངེས་པར་དུ་དོ་སྣང་གནང་འོས་ཤིག་རེད་ཅེས་ནན་སྐུལ་གནང་འདུག
རྒྱལ་སྤྱིའི་བོད་དོན་ལས་འགུལ་ཁང་གིས་ད་རེས་རྒྱ་གཞུང་གིས་གྲྭ་རིན་ཆེན་ཚུལ་ཁྲིམས་ལགས་དང་རྩོམ་པ་པོ་སྒོ་ཤེས་རབ་རྒྱ་མཚོ་ལགས་རྣམ་གཉིས་ཀྱི་གནད་དོན་ཐད་ལེན་འདེབས་བྱས་པའི་དགོས་དམིགས་གཙོ་བོ་ནི་རྒྱ་གཞུང་གིས་ཁོང་གཉིས་ལ་རང་གི་སྨྲ་བརྗོད་དང་བསམ་བརྗོད་རང་དབང་བཅས་ཞི་བའི་ངང་ལོངས་སུ་སྤྱོད་པར་རང་སྣང་གང་དྲན་གྱིས་འཛིན་བཟུང་བྱས་པ་དེ་རེད་ཅེས་གསུངས་ཏེ་གྲྭ་རིན་ཆེན་ཚུལ་ཁྲིམས་ལགས་གང་མགྱོགས་གློད་བཀྲོལ་དགོས་པ་དང་དེ་བཞིན་སྒོ་ཤེས་རབ་རྒྱ་མཚོ་ལགས་གར་ཡོད་གནས་སྟངས་གསལ་བཟོ་དགོས་པ་མ་ཟད། ཉེས་མེད་ཉེས་འཛུགས་རྣམས་བདེན་དཔང་ར་སྤྲོད་མ་ཐུབ་ཚེ་གང་མགྱོགས་གློད་བཀྲོལ་དགོས་སྐོར་ནན་བརྗོད་གནང་སྟེ་རྒྱལ་སྤྱིའི་བོད་དོན་ལས་འགུལ་ཁང་གི་རྒྱལ་ཚོགས་ནང་གི་ཁྲིམས་དོན་ཞུ་གཏུག་འགན་འཛིན་སྐུ་ཞབས་ Kai Mueller ལགས་ཀྱིས་ཁོང་གཉིས་ཀྱི་གནད་དོན་དེས་རྒྱའི་བཙོན་འཇུག་འོག་ཡོད་པའི་བོད་མི་ཆབ་སྲིད་བཙོན་པ་མང་དག་ཅིག་གི་གནད་དོན་མཚོན་གྱི་ཡོད་སྟབས། རྒྱལ་སྤྱིའི་ཚོགས་སྡེ་ཁག་དང་གཞུང་། དེ་བཞིན་མཉམ་འབྲེལ་རྒྱལ་ཚོགས་སོགས་ཀྱིས་རྒྱ་གཞུང་ལ་གྲྭ་རིན་ཆེན་ཚུལ་ཁྲིམས་ལགས་དང་སྒོ་ཤེས་རབ་རྒྱ་མཚོ་ལགས་རྣམ་གཉིས་གང་མགྱོགས་གློད་བཀྲོལ་བཏང་ནས་བོད་མིའི་སྨྲ་བརྗོད་རང་དབང་དང་བསམ་བརྗོད་རང་དབང་། ཆོས་ལུགས་དད་མོས་རང་དབང་སོགས་ངེས་སྲུང་དགོས་པའི་དགོས་འདུན་ཤུགས་ཆེ་གནང་ཡོད།
