རྒྱ་ནག་གཞུང་གིས་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ལས་འགུལ་ཞེས་པའི་མིང་བྱང་འོག་རེབ་གོང་ཧོར་རྒྱ་སྡེ་བའི་དགེ་འདུན་བཟོད་པ་དང། ཆོས་བཟང་། བན་དེ་རྡོ་རྗེ། བཀྲིས་ཚེ་རིང། བསོད་ནམས་རྒྱལ། དར་རྒྱས། ཤ་བོ་ཚེ་རིང་། མཁའ་བྱམས་རྒྱལ། དེ་བཞིན་འབྲུག་འབུམ་ཚེ་རིང་བཅས་བོད་མི་ ༩ ལ་བཙན་སྐུལ་གྱིས་ཚོང་བརྗེ་བྱེད་དུ་བཅུག་པ་དང། ཧམ་འཕྲོག་གཡོ་ལེན་བྱས་པ། དེ་བཞིན་མི་མང་དཔུང་བསྡེབས་ཀྱིས་སྤྱི་ཚོགས་སྒྲིག་ལམ་ལ་གཏོར་བརླག་གནང་ཡོད་ཚུལ་སོགས་ཀྱི་ཉེས་འོག་མི་ལོ་ ༣ ནས་ ༧ བར་གྱི་བཙོན་འཇུག་ཁྲིམས་ཐག་བཅད་འདུག
ཁ་སང་ཕྱི་ཚེས་ ༡༩ ཉིན་བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་བར་ཧོར་རྒྱ་སྡེ་བའི་ཁ་འགོ་བའི་ཚོགས་ཆུང་གི་བོད་མི་ ༩ པོ་དེ་དག་སྔར་ལོའི་ཕྱི་ཟླ་ ༧ པའི་ནང་བཀག་ཉར་གྱིས་ཕྱི་ཟླ་ ༨ ནང་དངོས་སུ་འཛིན་བཟུང་གིས་གྱོད་དོན་ཐོ་འགོད་བྱས་ནས་ཟླ་བ་བརྒྱད་ཙམ་གྱི་རྗེས་སུ་གཟའ་འཁོར་འདིའི་འགོ་ལྟོད་ཙམ་ལ་མདོ་སྨད་མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་རེབ་གོང་རྫོང་མི་དམངས་ཁྲིམས་ཁང་ནས་བོད་མི་དེ་དག་ལ་ལོ་ ༧ བར་གྱི་བཙོན་འཇུག་ཁྲིམས་ཐག་བཅད་འདུག
འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་ལ་ས་གནས་མང་ཚོགས་ནས་སྲིད་གཞུང་ལ་སྤྲད་པའི་ཡིག་ཆ་དང་བཅས་པའི་གནས་ཚུལ་ཁ་གསལ་ལག་སོན་བྱུང་བའི་ནང་དེ་སྔ་རེབ་གོང་ཧོར་རྒྱ་སྡེ་བའི་ས་གནས་སུ་སྲིད་གཞུང་གིས་མང་ཚོགས་ཀྱི་ས་ཆ་བཙན་འཕྲོག་བྱས་ནས་སོ་ཕག་བཟོ་གྲྭ་གསུམ་བཙུགས་ཡོད་པ་དང། ཕྱི་ལོ་ ༢༠༡༡ ལོར་ཁོར་ཡུག་སྲུང་སྐྱོབ་ཀྱི་མིང་ཐོག་ནས་བཟོ་གྲྭ་དེ་དག་སྒོ་བརྒྱབ་པ་དང་འབྲེལ། སྲིད་གཞུང་གིས་བཟོ་གྲྭའི་བདག་པོ་རྣམས་ལ་གུན་གསབ་འབོར་ཆེན་སྤྲད་ཡོད་ཀྱང། འདས་པའི་མི་ལོ་ ༧ རིང་ལ་ས་བདག་ས་གནས་མང་ཚོགས་རྣམས་ལ་ས་ཆ་ཕྱིར་སློག་མ་བྱེད་པའི་ཁར་ས་རིན་ཡང་སྤྲད་མེད་པ་རེད་འདུག
དེའི་ཁྲོད་ཕྱི་ལོ་ ༢༠༡༧ ཟླ་ ༢ ཚེས་ ༢༡ ཉིན་ཧོར་རྒྱ་སྡེ་བའི་མི་མང་ ༥༠༠ ཙམ་གྱི་རྒྱབ་སྐྱོར་ཡོད་པའི་ཐོག་ཁ་འགོ་བ་ཞེས་པའི་ཚོགས་ཆུང་ཞིག་གསར་འཛུགས་ཀྱིས་ས་གནས་ཀྱི་ཤེས་འཇོན་གཉིས་ལྡན་གྱི་མི་སྣ་ ༢༤ བསྐོ་གཞག་དང་འབྲེལ་ཏེ་ཁ་འགོ་བའི་ཚོགས་མི་ ༢༤ ཡི་ས་ཡིག་འཁོད་པའི་ཞུ་ཡིག་ཞིག་ས་གནས་སྲིད་གཞུང་ལ་ཕུལ་འདུག
ཞུ་ཡིག་དེའི་ནང་དེ་སྔོན་སྲིད་གཞུང་གིས་མང་ཚོགས་ཀྱི་ས་ཆ་བཙན་འཕྲོག་བྱེད་དེ་སོ་ཕག་བཟོ་གྲྭ་བཙུགས་ཡོད་ཀྱང་བཟོ་གྲྭ་སྒོ་བརྒྱབ་རྗེས་ས་ཆ་དེ་དག་ཕྱིར་མང་ཚོགས་ལ་སྤྲོད་དགོས་པའི་ཞུ་སྐུལ་གནང་དོན་ལྟར། སྐབས་དེར་ཧོར་རྒྱ་སྡེ་གཞུང་གིས་རྒྱབ་སྐྱོར་དང་ཁག་ཐེག་བྱས་ཡོད་པ་རེད་འདུག འོན་ཀྱང་སྲིད་གཞུང་གི་ངོས་ནས་བོད་མིའི་སྐུ་ཚབ་ཚོགས་ཆུང་གི་ཞུ་ཡིག་ལ་དང་ལེན་བྱེད་རྒྱུ་ལས་ལྡོག་སྟེ་ཞུ་གཏུག་གི་ལས་འགུལ་སྤེལ་བར་དྲག་གནོན་བྱས་པ་མ་ཟད། ཧོར་རྒྱ་སྡེ་བའི་འགོ་ཁྲིད་ཀྱི་སྟོབས་ཤུགས་མེད་པ་བཟོ་ཐབས་ཀྱི་ཉེས་འཛུགས་བྱས་འདུག
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་ཀྱིས་རྒྱ་གཞུང་གི་བརྒྱུད་ལམ་ཐོག་ཧོར་རྒྱ་སྡེ་བའི་བོད་མི་ ༩ པོ་དེ་དག་སྐོར་གནས་ཚུལ་སྤེལ་བ་དང་འབྲེལ། ཁ་འགོ་བ་ཞེས་པའི་ཚོགས་པ་དེ་ནག་ཚོགས་ཡིན་པ་དང། བོད་མི་དེ་དག་གིས་མི་མང་དཔུང་བསྡེབས་ཀྱི་སྤྱི་ཚོགས་སྒྲིག་ལམ་ལ་གཏོར་བརླག་གནང་རབས་སོགས་བཤད་ཡོད་ཀྱང་། རྒྱ་གཞུང་གིས་འཁྱོག་བཤད་བྱས་པ་ཁོ་ན་ཡིན་སྐོར་གསུངས་སོང་།
ལྷག་པར་དུ་ཁོང་གིས་རྒྱ་གཞུང་གིས་ཕྱི་ལོ་ ༢༠༡༨ ཟླ་ ༡ པོ་ནས་མགོ་འཛུགས་ཀྱིས་ལོ་གསུམ་གྱི་རིང་ལ་སྤེལ་རྒྱུ་ཡིན་པའི་ནག་སེལ་གཤེད་བཅོམ་གྱི་ཆེད་དོན་འཐབ་རྩོད་ལས་འགུལ་ཞེས་པ་དེ་གཙོ་བོ་གནད་དོན་གསུམ་གྱི་ཐོག་ནས་བོད་མིར་དྲག་གནོན་དང་བོད་མིའི་ངོ་བོ་རྩ་བརླག་གཏོང་ཐབས་ཀྱི་ལག་ཆ་གཙོ་ཆེར་སྤྱོད་བཞིན་ཡོད་པ་དང་། རྒྱ་གཞུང་གིས་ཆེད་བཙུགས་བྱས་པའི་བདེ་མི་དབུ་ཡོན་ལྷན་ཁང་ཟེར་བ་དེའང་མིང་གི་ཐོག་ནས་མང་ཚོགས་ཀྱི་བདེ་དོན་སེལ་མཁན་ཡིན་ཟེར་བ་ཙམ་ལས་དོན་དངོས་ཐོག་གཞི་རིམ་མང་ཚོགས་ཁྲོད་དམར་ཤོག་ཚོགས་པའི་དབང་ཆ་ཤུགས་ཆེ་སྤེལ་བར་སྤྱོད་ཀྱི་ཡོད་པ་གསུངས་ཡོད།
རྩ་བའི་རེབ་གོང་ཧོར་རྒྱ་སྡེ་བའི་ས་གནས་བོད་མིའི་རྒྱབ་སྐྱོར་ཐོག་ནས་ཕྱི་ལོ་ ༢༠༡༧ ལོར་གསར་འཛུགས་གནང་བའི་ཁ་འགོ་བ་ཚོགས་པ་དེས་ནམ་རྒྱུན་སྡེ་བའི་སྤྱི་དོན་གལ་ཆེན་རིགས་ལ་གྲོས་བསྡུར་ཐག་གཅོད་གནང་གི་ཡོད་པ་མ་ཟད། སྤྱི་ཚོགས་ཀྱི་འགན་ཁུར་བླངས་ནས་མང་ཚོགས་ལ་གྲོས་བསྡུར་དང་ཁ་ཏ་སྐུལ་ལྕག་གནང་སྲོལ་ཡོད་པ་རེད།
