དེ་རིང་རྒྱ་གར་གྱི་ The week ཞེས་པའི་གསར་ཁང་གིས་གནས་ཚུལ་སྤེལ་བར་འབྲས་ལྗོངས་མངའ་སྡེའི་བློན་ཆེན་ Prem Singh Tamang ལགས་ཀྱིས་ཁ་སང་རྒྱ་གར་གྱི་སྲིད་བློན་མོ་དཱི་མཆོག་ལ་ཕྱག་ཡིག་ཅིག་ཕུལ་ཏེ་འབྲས་ལྗོངས་མི་མང་གིས་༸དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་ཕྱིར་རྒྱ་གར་དུ་ཆེད་ཕེབས་ཀྱིས་ས་གནས་ཀྱི་དད་ལྡན་མི་མང་ཚོགས་ལ་ཆོས་ཀྱི་བདུད་རྩི་སྩོལ་རྒྱུའི་རེ་འདུན་ཤུགས་དྲག་ཡོད་པར་བརྟེན་སྲིན་བློན་མཆོག་གིས་༸རྒྱལ་དབང་ཀརྨ་པ་མཆོག་གང་མགྱོགས་ཕྱིར་རྒྱ་གར་དུ་ཕེབས་འཐུས་ཆོག་པའི་ཆོག་མཆན་གནང་རྒྱུའི་རེ་སྐུལ་ཞུས་འདུག
དེ་རིང་རྩོམ་པ་པོ་ Namrata Biji Ahuja ལགས་ཀྱིས་ The week གསར་ཁང་ལ་ད་ཆ་རྒྱ་གར་གྱིས་རྒྱ་དཀར་ནག་གི་ས་མཚམས་རྙོག་གླིང་གི་རྐྱེན་བྱས་ཏེ་རྒྱ་ནག་གི་ཚོང་ལས་ལ་དམིགས་པའི་བྱ་ཐབས་སྣ་ཚོགས་ཤིག་སྤེལ་བཞིན་པའི་སྐབས་འདིར་རྒྱ་གར་གྱིས་༸དཔལ་རྒྱལ་དབང་ཀརྨ་པ་མཆོག་ཕྱིར་རྒྱ་གར་དུ་ཕེབས་སུ་བཅུག་ཚེ་རང་བཞིན་གྱིས་རྒྱ་ནག་ལ་བརྡ་ལན་གསལ་པོ་ཞིག་ཆགས་ཀྱི་ཡོད་པར་འཁོད་འདུག
མངའ་སྡེ་བློན་ཆེན་མཆོག་གིས་༸རྒྱལ་དབང་ཀརྨ་པ་མཆོག་ཕྱི་ལོ་ ༢༠༠༠ ལོར་རྒྱ་གར་དུ་བཙན་བྱོལ་ལ་ཕེབས་ཡོད་སྐོར་དྲན་གསོ་ཞུས་པ་དང་སྦྲགས། ཕྱིས་སུ་རྒྱ་གར་གྱི་གསང་བའི་ལས་ཁུངས་ཀྱི་གནས་ཚུལ་ཞིག་དང་འབྲེལ་ནས་རིན་པོ་མཆོག་རྒྱ་གར་གྱི་ནང་དུ་རང་དབང་གིས་ཕེབས་རྒྱུར་བཀག་སྡོམ་བྱས་ཡོད་ཀྱང་། འབྲས་ལྗོངས་ཀྱི་དད་ལྡན་མི་མང་གིས་རིན་པོ་ཆེ་མཆོག་འབྲས་ལྗོངས་སུ་ཕེབས་རྒྱུར་རེ་འདུན་ཤུགས་དྲག་ཡོད་པར་འགྲེལ་བརྗོད་གནང་འདུག
དེ་བཞིན Namrata Biji Ahuja ལགས་ཀྱིས་༸དཔལ་རྒྱལ་དབང་ཀརྨ་པ་མཆོག་ནི་བོད་བརྒྱུད་ནང་བསྟན་གྱི་ཆོས་བརྒྱུད་ཆེན་པོ་བཞིའི་ཁྲོད་ཀྱི་བཀའ་བརྒྱུད་པའི་དབུ་ཁྲིད་ཡིན་པར་ལུང་འདྲེན་གྱིས་རྒྱ་ནག་གིས་༸གོང་ས་༸སྐྱབས་མགོན་ཆེན་པོ་༸སྐུ་གཞན་གཤེགས་པའི་དུས་མཚམས་སུ་བོད་ཀྱི་བླ་སྤྲུལ་དབུ་ཁྲིད་རྣམས་ཀྱི་རོགས་སྐྱོར་འོག་ནས་རྒྱ་ནག་གིས་འདེམས་སྒྲུག་ཞུས་པའི་སྐུའི་ཡང་སྲིད་ཅིག་བསྐོ་གཞག་བྱེད་རྒྱུའི་བྱུས་ངན་འཐེན་གྱི་ཡོད་པ་མངོན་གསལ་གནང་སྟེ་རྒྱ་གར་གཞུང་གིས་རྒྱ་ནག་གི་འཆར་གཞི་དེ་ལེགས་འགྲུབ་ཡོང་རྒྱུར་བཀག་འགོག་གནང་རྒྱུའི་གོ་སྐབས་ཡོད་པར་ཡོངས་གྲགས་གནང་འདུག
དེ་བཞིན་ཁོང་གིས་༸དཔལ་རྒྱལ་དབང་ཀརྨ་པ་མཆོག་ནི་༸གོང་ས་མཆོག་དང་རྒྱ་ནག་སྲིད་གཞུང་གཉིས་ཀྱིས་ངོས་འཛིན་གནང་བའི་བླ་སྤྲུལ་མཐོ་ཤོས་ཤིག་ཡིན་པར་ཡོངས་གྲགས་ཀྱིས་ད་ཆ་རྒྱ་ནག་གིས་༸གོང་ས་མཆོག་གི་༸སྐུའི་ཡང་སྲིད་ཀྱི་ཐད་ལ་བཙན་འཛུལ་བྱེད་བཞིན་པ་དང་། རྒྱ་དཀར་ནག་གི་ས་མཚམས་ཀྱི་རྙོག་གླིང་ཆེ་རུ་འགྲོ་བཞིན་པའི་དུས་སྐབས་འདིར་རྒྱ་གར་གཞུང་གིས་༸དཔལ་རྒྱལ་དབང་ཀརྨ་པ་མཆོག་ལ་མགྲོན་ཤོག་ཅིག་ཕུལ་ཚེ་རྒྱ་ནག་དང་འབྲེལ་བའི་བཞེངས་ཕྱོགས་དེ་ཤུགས་ཆེ་རུ་འགྲོ་རྒྱུ་ཡིན་སྐོར་བརྗོད་འདུག
