ཁ་སང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༥ མཇུག་སྒྲིལ་གནང་དང་བསྟུན། ཨ་རི་དང་ཨིན་ཡུལ། འཇར་མ་ནི། ཨོ་སི་ཊོ་ལི་ཡ། ཨོ་སི་ཊེ་ཡ། སྦེལ་འཇམ། སུད་སི། ནོར་ཝེ། ཁེ་ན་ཌ་སོགས་རྒྱལ་ཁབ་ ༣༩ མཉམ་རུབ་ཀྱིས་རྒྱ་གཞུང་གིས་ཤིན་ཅང་དང་ཧོང་ཀོང་དེ་བཞིན་བོད་བཅས་ཀྱི་ནང་དུ་མང་ཚོགས་ཀྱི་འགྲོ་བ་མིའི་ཐོབ་ཐང་བརྩི་མེད་རྡོག་རོལ་གཏོང་བཞིན་པའི་གནས་སྟངས་ཐད་བློ་འཚབ་ཡོད་པའི་བསྒྲགས་གཏམ་ཞིག་སྤེལ་གནང་འདུག
རྒྱལ་ཚོགས་ཀྱི་འཇར་མ་ནི་སྐུ་ཚབ་སྐུ་ཞབས་ Christoph Heusgen ལགས་ཀྱིས་འཇར་མ་ནིས་གཙོས་པའི་རྒྱལ་ཁབ་ ༣༩ པོ་དེ་དག་མཉམ་རུབ་ཐོག་སྤེལ་བའི་བསྒྲགས་གཏམ་དེ་རྒྱལ་ཚོགས་སུ་སྙན་སྒྲོན་ཞུས་འདུག་པ་དང་། དེའི་ནང་ཤིན་ཅང་ནང་གི་གནས་སྟངས་དང་དེང་སྐབས་ཧོང་ཀོང་ནང་གི་དེ་བྱུང་ཁག་གི་ཐོག་ཐུགས་འཚབ་ཡོད་སྐོར་དང་འདི་ལོའི་ཕྱི་ཟླ་ ༦ པའི་ནང་དུ་རྒྱལ་ཚོགས་ཀྱི་དམིགས་གསལ་ལས་དོན་འགན་འཁུར་བ་ ༥༠ ནས་རྒྱ་ནག་ནང་གི་ཆེས་ཞན་པའི་འགྲོ་བ་མིའི་ཐོབ་ཐང་གི་གནས་སྟངས་ལ་ཐུགས་འཚབ་ཀྱི་ཕྱག་ཡིག་སྤེལ་ཡོད་པ་ལུང་འདྲེན་དང་འབྲེལ་ཏེ་རྒྱ་ནག་གཞུང་ལ་མང་ཚོགས་ཀྱི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་དགོས་པའི་རེ་སྐུལ་ཞུས་པ་མ་ཟད། ལྷག་པར་དུ་ཤིན་ཅང་དང་བོད་བཅས་གྲངས་ཉུང་མི་རིགས་ཀྱི་ཐོབ་ཐང་ཁག་སྲུང་སྐྱོབ་བྱེད་དགོས་པ་གསུངས་འདུག
རྒྱལ་ཁབ་ ༣༩ ཐུན་མོང་གིས་སྤེལ་བའི་བསྒྲགས་གཏམ་ནང་རྒྱ་གཞུང་གི་ཤིན་ཅང་ནང་དུ་མི་ས་ཡ་གཅིག་ལྷག་བཙན་དབང་གིས་ངལ་རྩོལ་ར་བར་བཞག་པ་དང་ཤིན་ཅང་ཡུ་གུར་མང་ཚོགས་ལ་ཆོས་དད་རང་དབང་དང་འགྲུལ་སྐྱོད། དེ་བཞིན་ཕན་ཚུན་འབྲེལ་ལམ་དང་སྨྲ་བརྗོད་རང་དབང་སོགས་མེད་པའི་ཁར་ངལ་རྩོལ་ར་བར་བེུད་རྣམས་ལ་བཙན་དབང་གིས་སྐྱེས་སྒོ་བཀག་པ་སོགས་ཀྱི་གནད་དོན་ཐོག་ལའང་བློ་འཚབ་ཡོད་པ་མངོན་གསལ་གནང་འདུག
དེ་བཞིན་དེ་སྔ་རྒྱལ་ཚོགས་ཀྱི་ཆེད་ལས་པ་ཁག་ཅིག་གིས་འདི་ལོར་རྒྱ་གཞུང་གིས་ཧོང་ཀོང་ནང་ལག་བསྟར་བྱེད་བཞིན་པའི་བདེ་འཇགས་ཀྱི་ཁྲིམས་གཞི་དེ་རྒྱ་ནག་གི་བརྩི་སྲུང་ཞུ་རྒྱུའི་ཁས་ལེན་བྱས་པའི་རྒྱལ་སྤྱིའི་ཁྲིམས་སྒྲིགསཁག་དང་ཡོངས་སུ་འགལ་ཡོད་པར་སྐྱོན་བརྗོད་གནང་བ་བཞིན། ད་རེས་རྒྱལ་ཁབ་ ༣༩ དེ་དག་གིས་ཀྱང་བདེ་འཇགས་ཀྱི་ཁྲིམས་གཞིའི་འོག་ཧོང་ཀོང་ནང་གི་ཁྲིམས་ཀྱི་གྱོད་གཞི་ཁག་ཅིག་རྒྱ་ནག་སྐམ་ས་ཆེན་མོར་ཐག་གཅོད་བྱ་རྒྱུ་སོགས་ཀྱི་འབྲུ་དོན་ཐད་ཐུགས་འཚབ་ཆེན་པོ་ཡོད་སྐོར་གསུངས་པ་དང་ཆབས་ཅིག འབྲེལ་ཡོད་རྒྱ་ནག་གཞུང་འབྲེལ་དཔོན་རིགས་རྣམས་ནས་དེ་སྔ་དབྱིན་ཡུལ་གྱི་ལག་ནས་ཧོང་ཀོང་རྩིས་ལེན་སྐབས་ཧོང་ཀོང་མང་ཚོགས་ལ་སྨྲ་བརྗོད་དང་གསར་འགོད་དེ་བཞིན་འདུ་འཛོམས་བཅས་ཀྱི་རང་དབང་སྤྲོད་ངེས་ཡིན་པར་ཁས་ལེན་བྱས་ཡོད་དོན་ལྟར་ཡུལ་གཉིས་དབར་བཞག་པའི་གྲོས་མཐུན་ལྟར་ཧོང་ཀོང་མང་ཚོགས་ཀྱི་འགྲོ་བ་མིའི་ཐོབ་ཐང་དེ་དག་སྲུང་སྐྱོབ་བྱེད་དགོས་པའི་གཞེན་སྐུལ་བསྐྱར་ནན་གནང་འདུག
ལྷག་པར་དུ་རྒྱ་ནག་གཞུང་ལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་གཙོ་འཛིན་གྱིས་དབུས་པའི་འབྲེལ་ཡོད་ལས་བྱེད་དང་ལས་དོན་འགན་འཁུར་བ་བཅས་རང་དབང་ཅན་གྱི་རྟོག་ཞིབ་རུ་ཁག་ཤིན་ཅང་ནང་ཐོངས་ཤིག རྒྱལ་ཚོགས་ཀྱི་མི་རིགས་དབྱེ་འབྱེད་འགོག་ཐབས་ཚོགས་ཆུང་གི་རྒྱ་ནག་ནང་མི་རིགས་དབྱེ་འབྱེད་འགོག་ཐབས་དང་འབྲེལ་བའི་ལམ་སྟོན་དོན་ཚན་ ༨ པོ་དེ་དག་འཕྲལ་དུ་ལག་བསྟར་བྱོས་ཤིག དེ་བཞིན་ཧོང་ཀོང་ནང་གི་རང་སྐྱོང་གི་གནས་བབ་ལ་བརྩི་སྲུང་དང་ཁུལ་དེའི་ཁྲིམས་ཀྱི་དབང་སྒྱུར་ལ་གུས་བརྩི་ཞུས་ཤིག་དང་ལྷག་དོན་རྒྱལ་སྤྱིའི་སྤྱི་ཚོགས་ཀྱི་རྒྱལ་ཁབ་ཁག་ནས་སྒེར་སོ་སོའི་ལུང་པར་ཤིན་ཅང་སོགས་ནས་སྐྱབས་བཅོལ་ཞུ་བར་ཕེབས་མཁན་རྣམས་ཕྱིར་སློག་གནང་རྒྱུ་མེད་པའི་བཞེངས་ཕྱོགས་འཛིན་དགོས་པའི་རེ་སྐུལ་གནང་འདུག
