ཉེ་ལམ་རྒྱ་གར་དབུས་གཞུང་གིས་འདི་ལོའི་ཟླ་ ༡ ཚེས་ ༣ ནས་ཕྲུ་གུ་ལོ་ན་ ༡༥ ནས་ ༡༨ སོན་པ་རྣམས་ལ་སྔོན་འགོག་སྨན་ཁབ་བསྐྱོན་རྒྱུའི་གསལ་བསྒྲགས་གནང་བ་ལྟར། དེ་རིང་རྡ་སྟེང་བོད་ཁྱིམ་ནང་ཕྲུ་གུ་ཚོར་ཏོག་དབྱིབས་སྔོན་ཁབ་སྐྱོན་འགོ་ཚུགས་སོང་།
གཞི་རྩའི་ད་ལྟའི་ཆར་མདུན་ཐོན་ཞབས་ཞུ་བ་དང་ལོ་ན་བཅོ་བརྒྱད་ཡན་ཕལ་མོ་ཆེར་ཏོག་དབྱིབས་སྔོན་ཁབ་བརྒྱབ་ཟིན་ཏེ་ད་ཆ་ལོ་ན་རྒན་གྲས་ལ་རིམས་ནད་སྔོན་འགོག་གི་སྨན་ཁབ་གསུམ་པ་སྐྱོན་འགོ་བཙུགས་མཚམས་ལ་སླེབས་ཡོད་པ་རེད། སྤྱིར་དེ་སྔ་རྒྱ་གར་ནང་ཏོག་དབྱིབས་གཉན་རིམས་ཀྱི་ནད་རླབས་གཉིས་པའི་སྐབས་ནད་གཞི་ཁྱབ་གདལ་མྱུར་བ་སོགས་ཀྱི་རྐྱེན་དུ་མར་བརྟེན་ཉིན་རེར་ནད་གཞི་ཕོག་མཁན་དང་འདས་གྲོངས་སུ་གྱུར་བའི་གནད་དོན་མང་དག་བྱུང་ཡོད་པ་རེད།
ལྷག་པར་ནད་རླབས་གཉིས་པའི་རྗེས་དང་ལོ་ན་ ༡༨ ཡན་མང་དག་ཅིག་ལ་སྔོན་ཁབ་སྐྱོན་ཟིན་པའི་དུས་སྐབས་སུ་ཁག་ཅིག་གིས་གལ་ཏེ་རྒྱ་གར་ནང་ནད་རླབས་གསུམ་པ་བྱུང་བ་ཡིན་ན་དེས་ཕྲུ་གུ་ཚོར་ཉེན་ཚབས་ཆགས་ངེས་ཡིན་པ་གསུངས་ཡོད་པ་ལྟར། ཕ་མ་མང་པོ་ཞིག་དངངས་འཚབ་སྐྱེས་པ་ཡང་གྱུར་ཡོད་པ་རེད། འོན་ཀྱང་དེ་རིང་ནས་འགོ་འཛུགས་ཀྱིས་ཡུན་རིང་ངང་སྒུག་བྱས་པའི་སྔོན་ཁབ་དེ་བཞིན་ལོ་ན་ ༡༥ ནས་ ༡༨ བར་དུ་སྐྱོན་འགོ་བཙུགས་ཡོད་པ་རེད།
ད་ལན་རྡ་སྟེང་བོད་ཁྱིམ་ནས་ཕྲུ་གུ་ ༢༠༠ ཙམ་ཞིག་ནས་ཕ་མའི་མོས་མཐུན་དང་སྦྲགས་སྔོན་ཁབ་སྐྱོན་གནང་སོང་བ་དང་། རྡ་སྟེང་བོད་ཁྱིམ་གྱི་ངེས་སྟོན་པ་ཚུལ་ཁྲིམས་རྡོ་རྗེ་ལགས་ཀྱིས་ལོ་ན་ ༡༥ ནས་ ༡༨ བར་སྔོན་ཁབ་ཐོབ་པས་སློབ་གྲྭའི་ནང་ནད་ཡམས་དང་འབྲེལ་ཉེན་ཚབས་ཆུང་དུ་འགྲོ་རྒྱུ་ཡིན་པ་དང་། རྒྱ་གར་གཞུང་གི་དགོངས་གཞིའི་ཐོག་ནས་སྔོན་ཁབ་བསྐྱོན་རྒྱུར་ཆོག་མཆན་སོགས་ཐོབ་དུས་སེམས་ནང་དགའ་ཚོར་དང་སྤྲོ་སྣང་ཡོང་གི་འདུག་ཅེས་གསུངས་སོང་།
རྩ་བའི་ཏོག་དབྱིབས་ནད་ཡམས་རྐྱེན་གྱིས་འདས་པའི་དུས་ཡུན་ནང་སློབ་གྲྭ་དངོས་སུ་འཚོགས་མ་ཐུབ་པ་དང་ཡང་ན་སློབ་གྲྭ་འཚོགས་སྐབས་ཏོག་དབྱིབས་ནད་གཞི་ཕོག་མཁན་ཁག་ཅིག་བྱུང་ཡོད་པ་རེད།
དེ་བཞིན་རྒྱ་གར་ལྷོ་ཕྱོགས་གཞིས་ཆགས་ཁག་ལྟ་བུར་མཚོན་ན། ས་གནས་རྒྱ་གར་གཞུང་གི་འབྲེལ་ཡོད་ལས་ཁུངས་ཀྱི་མཐུན་འགྱུར་འོག དེ་རིང་མོན་གྷོ་འདོད་དུ་དགོན་སྡེ་སོ་སོར་ཆ་བགོས་ཀྱིས་སློབ་ཕྲུག་དང་གྲྭ་ཕྲུག་ ༣༠༠ ལ་སྔོན་ཁབ་སྐྱོན་བཞིན་པ་མ་ཟད། ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་ནང་སྡ་དྲོ་ཕྱག་ཚོད་༡༡ ནས་འགོ་འཛུགས་ཀྱིས་གཞིས་ཆགས་དེའི་ནང་གི་རང་ལོ་༡༨ མན་ལ་སྔོན་ཁབ་རྒྱབ་འདུག
སྤྱིར་ཐོ་གཞུང་ནང་མོན་གྷོ་འདོད་རྒུ་གླིང་དུ་ལོ་ ༡༥ ནས་༡༨ བར་གྱི་ན་གཞོན་ཁྱོན་ ༦༥༠ ལྷག་བྱུང་ཡོད་པ་དང་། ཀོ་ལེ་གྷལ་དོན་ལྡན་གླིང་དུ་ས་གནས་ཀྱི་བརྒྱ་ཤོག་སོ་སོའི་བརྒྱ་དཔོན་རྣམས་ཀྱི་རོགས་སྐྱོར་འོག་ཐོ་གཞུང་བསྡུས་པའི་ཁྲོད་སློབ་ཕྲུག་༨༩ དང་གྲྭ་ཕྲུག་༥༠་ཙམ་གྱི་མིང་ཐོ་འབྱོར་འདུག
