དཔལ་ས་སྐྱའི་༸གོང་མ་ཁྲི་ཆེན་རྡོ་རྗེ་འཆང་མཆོག་གིས་ཁ་སང་རྒྱལ་ས་ལྡི་ལིའི་ཁུལ་དུ་ཆོས་འབྲེལ་ཞིག་བཀྲིན་སྩལ་གནང་སྐབས། ཆོས་ལུགས་ཀྱི་ཆ་ནས་ང་ཚོ་བོད་མི་ཚང་མ་སྟོན་པ་ཐུགས་རྗེ་ཆེན་པོའི་རྗེས་འཇུག་པ་གཅིག་པ་ཡིན་པ་མ་ཟད། ལྷག་པར་མི་རིགས་ཀྱི་ཆ་ནས་ཀྱང་། ང་ཚོ་ཚང་མ་རྩམ་པ་ཟ་མཁན། ཆོས་ལུགས་དང་གོམས་གཤིས། སྤྱོད་པ་བཅས་གཅིག་པ་དང་། ཡང་སྒོས་ང་ཚོ་དམིགས་ཡུལ་གཅིག་ལ་བརྟེན་པའི་མི་རིགས་ཤིག་ཆགས་ཡོད་སྟབས། ༸གོང་ས་༸སྐྱབས་མགོན་ཡིད་བཞིན་ནོར་བུ་མཆོག་གི་བཀའ་སློབ་ཁག་གི་སྙིང་པོ་དེ་ཡང་ཆིག་སྒྲིལ་བྱེད་དགོས་རྒྱུ་དེ་ཡིན་དུས། མང་པོའི་བློ་མཐུན་པ་ཡིན་ན་ཉམ་ཆུང་གི་ཡང་དོན་ཆེན་འགྲུབ་ཟེར་བ་ལྟར། བོད་མི་ཚང་མ་ཆིག་སྒྲིལ་བྱེད་རྒྱུ་དེ་གལ་འགངས་ཆེན་པོ་ཡིན་པ་སོགས་ཀྱི་ལམ་སྟོན་བཀའ་སྩལ་གནང་སོང་།
ས་སྐྱ་༸གོང་མ་རིན་པོ་མཆོག་གི་བཀའ་སློབ་དེ་ནི་ཁ་སང་རྒྱལ་ས་ལྡི་ལིའི་རོ་ཧི་ནི་བོད་ཕྲུག་ཁྱིམ་སྡེའི་གསོལ་འདེབས་ཞུས་པའི་ཚེ་དབང་གི་ཆོས་འབྲེལ་ཞིག་གི་སྐབས་བཀའ་རྩལ་བ་ཞིག་ཡིན་པ་དང་། དེ་ཡང་བོད་ཕྲུག་ཁྱིམ་སྡེའི་སྒོ་རར་གོ་སྒྲིག་ཞུས་པའི་ཁ་སང་ཆོས་འབྲེལ་དེའི་སྐབས། ལྡི་ལི་ཁུལ་གྱི་ས་ཕྱོགས་གང་ས་ནས་བོད་རིགས་དད་ལྡན་མི་གྲངས་བརྒྱ་ཕྲག་འགའ་ཤས་འདུ་འཛོམས་བྱུང་འདུག་པ་དང་། སྐབས་དེར་དཔལ་ས་སྐྱའི་༸གོང་མ་ཁྲི་ཆེན་རྡོ་རྗེ་འཆང་མཆོག་གིས་བླ་མའི་རྣལ་འབྱོར་དང་འབྲེལ་བའི་གྲུབ་ཆེན་ཐང་སྟོང་རྒྱལ་པོའི་ཚེ་རིང་ལོ་བརྒྱ་མའི་ཚེ་དབང་བཀྲིན་སྩལ་གནང་མཛད་ཡོད་པ་རེད།
གཞི་རྩའི་དཔལ་ས་སྐྱའི་ ༸གོང་མ་ཁྲི་ཆེན་རྡོ་རྗེ་འཆང་མཆོག་ཉེ་ཆར་འབྲུག་རྒྱལ་ཁབ་ཏུ་ཆིབས་བསྒྱུར་གནང་སྟེ་རེས་གཟའ་ཕུར་བུ་ཕྱི་ཚེས་ ༡༨ ཉིན་རྒྱལ་ས་ལྡི་ལིར་ཆེད་ཕེབས་མཛད་པ་ཞིག་ཡིན་པ་དང་། རྒྱལ་ས་ལྡི་ལིའི་གནམ་ཐང་དུ་ལྡི་ལི་ཁུལ་གྱི་བོད་མིའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་ཁག་གི་སྐུ་ཚབ་ནས་སྣེ་ལེན་ཕེབས་བསུ་ཞུས་ཡོད་པ་མ་ཟད། ༸གོང་མ་རིན་པོ་ཆེ་མཆོག་རྒྱལ་ས་ལྡི་ལིར་ཉིན་གྲངས་གཉིས་རིང་རོ་ཧི་ནི་བོད་ཕྲུག་ཁྱིམ་སྡེའི་སྡོད་ཁང་དུ་བཞུགས་བཞག་མཛད་དེ། དེ་རིང་ཕྱིར་མ་མགོན་རྡེ་ར་རྡུན་ཁུལ་དུ་ཕྱིར་ཕེབས་མཛད་ཡོད་པ་རེད།