དེ་རིང་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་ Virbhadra Singh མཆོག་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་འབྲེལ་ཏེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་སྨོན་དང་བཅས་འདས་པོ་ཁོང་གི་ཤུ་ལུས་ནང་མིར་ཐུགས་གསོ་མཛད་འདུག
ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཐེངས་ ༦ ཙམ་གནང་མྱོང་མཁན་སྐུ་ཞབས་ Virbhadra Singh མཆོག་འདི་ལོའི་ཕྱི་ཟླ་ ༤ པ་ནང་དུ་རྒྱ་ནག་ནས་ཐོག་མར་མཆེད་པའི་ཏོག་དབྱིབས་གཉན་རིམས་ཕོག་པའི་རྗེས་སུ་དྲག་སྐྱེད་བྱུང་ཡང་། ཕྱི་ཟླ་ ༦ པ་ནང་དུ་སླར་ནད་ཡམས་བསྐྱར་ལོག་གི་རྐྱེན་གྱིས་ཉེ་ཆར་དེ་འབྲེལ་སྙིང་གི་དཀའ་ངལ་འཕྲད་པ་དང་འབྲེལ་ཏེ་དེ་རིང་སྔ་དྲོ་ཕྱག་ཚོད་ ༣༌༤༠ ཐོག་སིམ་ལ་ཁུལ་གྱི་སྨན་ཁང་ཆེ་གྲས་ Indira Gandhi Medical College ནང་དུ་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་བྱུང་ཡོད་པ་རེད།
བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཁྱབ་བློན་ཆེན་ཟུར་པ་འདས་པོ་ཁོང་གི་སྐུ་ཟླ་ Pratibha Singh ལགས་ཀྱི་མཚན་ཐོག་ལ་ཐུགས་གསོའི་གསུང་འཕྲིན་ཞིག་སྩལ་འདུག་པའི་ནང་དུ་བློན་ཆེན་ཟུར་པ་དམ་པ་ཁོང་གིས་སྐུ་ཚེ་ཧྲིལ་པོ་གཞན་ལ་ཞབས་འདེགས་བསྒྲུབས་ནས་མི་ཚེ་དོན་དང་ལྡན་པ་སྐྱེལ་ཡོད་པ་དང་། ཁོང་གིས་སེམས་ཐག་ཉེ་པོ་དང་བྱམས་བརྩེ་ལྡན་པའི་ཐོག་ནས་གཞན་གྱི་དཀའ་ངལ་གསན་ཞིབ་གནང་ཕྱོགས་ལ་མགོན་པོ་༸གང་ཉིད་མཆོག་གིས་ཡི་རང་མཛད་བཞིན་ཡོད་སྐོར་བཀའ་སྩལ་བ་དང་ཆབས་ཅིག ལོ་མང་རིང་གི་འབྲེལ་བའི་ཁྲོད་དམ་པ་ཁོང་གིས་མགོན་པོ་མཆོག་ལ་ཐུགས་ཉེ་བའི་མཛའ་གྲོགས་ཀྱི་འདུ་ཤེས་ཐོག་ནས་འབྲེལ་བ་གནང་བ་དེར་བཀྲིན་ཆེན་པོར་དགོངས་ཀྱི་ཡོད་ཅེས་བཀའ་སྩལ་ཡོད།
༸གོང་ས་མཆོག་གིས་ད་དུང་བློན་ཆེན་དམ་པ་ཁོང་ཧི་མཱ་ཅལ་མངའ་སྡེའི་ Bushahr རྒྱལ་རྒྱུད་ཞེས་པ་ནས་ཡིན་པ་དང་རྒྱལ་རྒྱུད་དེ་དང་བོད་དབར་གནའ་སྔ་མོ་ནས་འབྲེལ་བ་བཟང་པོ་ཡོད་པར་བཀའ་སྩལ་ཏེ་མངའ་སྡེའི་བློན་ཆེན་ཡུན་རིང་ཤོས་གནང་མྱོང་མཁན་ཁོང་ལ་མངའ་སྡེེ་འདིའི་མང་ཚོགས་ནས་དྲན་ངེས་ཡིན་པར་བཀའ་སྩལ་མཛད་འདུག
རྩ་བའི་ Raja Virbhadra Singh ཁོང་ཧི་མཱ་ཅལ་མངའ་ཁུལ་གྱི་ Bushahr རྒྱལ་རྒྱུད་ནས་ཡིན་པ་དང་། མངའ་སྡེའི་མང་ཚོགས་ཀྱིས་ཁོང་ལ་དགའ་མོས་ཐོག་ནས་ Raja Sahib འམ་རྒྱལ་པོ་མཆོག་ཅེས་འབོད་སྲོལ་ཡོད་པ་རེད། ཁོང་ཕྱི་ལོ་ ༡༩༦༢ ལོར་རྒྱ་གར་གྱི་ Congress ཆབ་སྲིད་ཚོགས་པའི་ཚོགས་མིའི་ཁོངས་ནས་རྒྱ་གར་གྱི་ཆབ་སྲིད་ནང་དུ་ཞུགས་པའི་ཁྲོད་ས་གནས་གྲོས་ཚོགས་འཐུས་མི་ཐེངས་ ༩ དང་དབུས་གྲོས་ཚོགས་འཐུས་མི་ཐེངས་ ༥ དེ་བཞིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ཐེངས་ ༦ གནང་སྟེ་མངའ་སྡེ་འདིའི་སྤྱི་ཁྱབ་བློན་ཆེན་ཡུན་རིང་ཤོས་དེ་གནང་ཡོད་པ་རེད། དེ་རིང་ཁོང་སྐུ་ཚེའི་འཕེན་པ་རྫོགས་པའི་གནས་ཚུལ་ཐོན་པ་དང་འབྲེལ་ཏེ་ཧི་མཱ་ཅལ་མངའ་སྡེ་གཞུང་གི་ངོས་ནས་མངའ་སྡེ་ནང་དུ་དེ་རིང་ནས་དབུ་འཛུགས་ཀྱིས་གནངས་ཚེས་ ༡༠ བར་མྱ་ངན་གུས་འདུད་ཞུ་རྒྱུ་ཡིན་པར་ཡོངས་གྲགས་གནང་འདུག
དེ་བཞིན་རྒྱ་གར་གྱི་སྲིད་བློན་ Narender Modi མཆོག་གིས་ཀྱང་ཁོང་གི་ Twitter དྲ་ལམ་བརྒྱུད་ཧི་མཱ་ཅལ་སྤྱི་ཁྱབ་བློན་ཆེན་ཟུར་པ་ཁོང་ལ་གདུང་སེམས་མཉམ་བསྐྱེད་ཀྱི་འཕྲིན་ཐུང་སྤེལ་བར་སྐུ་ཞབས་ Virbhadra Singh དམ་པ་ཁོང་ནི་ལོ་མང་རིང་ཆབ་སྲིད་ཀྱི་ཉམས་མྱོང་ཡོད་པའི་ཐོག་ལ་འཛིན་སྐྱོང་དང་ཁྲིམས་ཀྱི་ཉམས་མྱོང་ཡང་ཆེན་པོ་ཡོད་མཁན་ཞིག་ཡིན་པ་དང་། ལྷག་པར་དུ་ཧི་མཱ་ཅལ་མངའ་སྡེ་ནང་དུ་མང་ཚོགས་ཀྱི་བདེ་དོན་སེལ་རྒྱུར་ཕྱག་ལས་རླབས་ཆེན་གནང་ཡོད་སྐོར་གསུངས་པ་དང་ཆབས་ཅིག ད་རེས་ཁོང་སྐུ་ཚེའི་འཕེན་པ་རྫོགས་པའི་གནས་ཚུལ་གསན་པར་ཐུགས་ཕམ་ཆེན་པོ་བྱུང་ཞེས་གསུངས་ཏེ་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཡོད་ཅེས་གསུངས་འདུག
དེ་དེ་བཞིན་དེ་རིང་བོད་མིའི་སྒྲིག་འཛུགས་ཀྱིས་དམ་པ་ཁོང་གི་ཆེད་དུ་ལས་ཁུངས་སོ་སོའི་ནང་གདུང་སེམས་མཉམ་བསྐྱེའི་མཆོད་འབུལ་སྨོན་ལམ་ཚོགས་ཡོད་པ་དང་། མྱ་ངན་གུས་འདུད་མཚོན་ཕྱིར་ཉིན་རྒྱབ་ཆུ་ཚོད་ ༡ ནས་དབུས་ཀྱི་ལས་ཁུངས་ཁག་ལས་མཚམས་བཞག་ཡོད་པ་རེད།
སྲིད་སྐྱོང་སྤེན་པ་ཚེ་རིང་མཆོག་གིས་ལྕམ་སྐུ་ Pratibha Singh མཆོག་གི་མཚན་ཐོག་ཏུ་ཐུགས་གསོའི་གསུང་འཕྲིན་ཕུལ་གནང་བ་བརྒྱུད་དེ་སྐུ་ཞབས་དམ་པ་ཁོང་དགོངས་པ་རྫོགས་པར་ཧ་ཅང་བློ་ཕམ་ཆེན་པོ་བྱུང་ཞེས་གསུངས་པ་དང་འབྲེལ། སྲིད་སྐྱོང་མཆོག་གིས་བོད་མིའི་སྒྲིག་འཛུགས་དང་བོད་མི་མང་ཚོགས་ཡོངས་ཀྱི་ཚབ་ཞུས་ཏེ་ཤུལ་ལུས་ནང་མི་དང་ཧི་མཱ་ཅལ་མངའ་སྡེའི་མང་ཚོགས་ལ་གདུང་སེམས་མཉམ་བསྐྱེད་ཞུ་རྒྱུ་ཡིན་ཞེས་གསུངས་འདུག 
སྲིད་སྐྱོང་མཆོག་གིས་ད་དུང་སྐུ་ཞབས་ Virbhadra Singh དམ་པ་དེ་ཉིད་ཀྱིས་ཡང་དག་པའི་དབུ་ཁྲིད་འོག་ལོ་བཅུ་ཕྲག་མང་པོའི་རིང་རྒྱ་གར་རྒྱལ་ཁབ་ཆེན་པོ་དེ་ཉིད་དང་ལྷག་པར་དུ་ཧི་མཱ་ཅལ་མངའ་སྡེ་ལ་ཞབས་འདེགས་རླབས་ཆེན་ཞུས་གནང་བ་དེས་མི་མང་པོའི་མི་ཚེ་དང་སེམས་ནང་བརྗེད་ཐབས་མེད་པའི་བག་ཆགས་བཟང་པོ་ཞིག་བཞག་ཡོད་སྐོར་གསུངས་པ་དང་སྦྲགས། དམ་པ་ཁོང་གིས་ལོ་ངོ་བཅུ་ཕྲག་མང་པོའི་རིང་བོད་མིར་རྒྱབ་སྐྱོར་དང་གཟིགས་སྐྱོང་གནང་ཡོད་སྟབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་མི་རྣམས་ལ་མཚོན་ན་དམ་པ་ཁོང་ཆེས་བཀའ་དྲིན་ཆེན་པོ་ཡིན་ཞེས་གསུངས་ཏེ། སྐུ་ཞབས་དམ་པ་ཁོང་གི་མཛད་རྗེས་དག་ལ་དྲན་གསོ་ཞུས་ནས་བོད་མི་ཡོངས་ནས་སྐུ་ཉིད་ཀྱི་ནང་མི་ལྷན་རྒྱས་དང་ཧི་མཱ་ཅལ་མི་མང་ལ་མྱ་ངན་གུས་འདུད་ཞུ་བཞིན་ཡོད་པར་གསུངས་ཡོད།
