CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་ཕྱི་ལོ་ ༢༠༢༠ ལོའི་རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཁྲིམས་ལུགས་དབང་འཛིན་གྱི་གནས་སྟངས་ཐོག་ལོ་འཁོར་སྙན་ཐོ་འདོན་སྤེལ་གནང་སྟེ་འདས་ལོ་ ༢༠༢༠ ནང་རྒྱ་ནག་གཞུང་གིས་ལྟ་སྲུང་དང་འཇིགས་སྐུལ། འཛིན་བཟུང་དོ་དམ་སོགས་བརྒྱུད་འགྲོ་བ་མིའི་ཐོབ་ཐང་ཁག་ཆེས་ཇེ་སྡུག་ཏུ་བཏང་བར་ཐེར་འདོན་གྱིས་ཨ་རིའི་འཛིན་སྐྱོང་དང་གྲོས་ཚོགས་ཀྱི་ངོས་ནས་མཉམ་སྦྲེལ་གྱི་སྲིད་བྱུས་གཏན་འབེབས་ཐོག་རྒྱ་ནག་ལ་གདོང་ལེན་གནང་དགོས་པའི་དགོས་འདུན་མངོན་གསལ་གནང་འདུག
ཁ་སང་ཕྱི་ཚེས་ ༡༤ ཉིན་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་དང་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་རྣམ་གཉིས་དབུས་ཚོགས་ཆུང་གི་ཚོགས་མི་གྲོས་ཚོགས་འཐུས་མི་རྣམ་པ་དང་ལས་བྱེད་བཅས་ཀྱིས་ཕྱོགས་སྒྲིག་གནང་བའི་ལོ་འཁོར་སྙན་ཐོ་འདོན་སྤེལ་གནང་ཡོད་པ་རེད།
དེའི་ནང་སྔ་ལོར་རྒྱ་ནག་གཞུང་གིས་རྒྱ་ནག་སྤྱི་དང་ལྷག་པར་དུ་ཤིན་ཅང་རང་སྐྱོང་གི་ས་ཁུལ། ཧོང་ཀོང་། དེ་བཞིན་བོད་ཀྱི་ས་ཁུལ་བཅས་སུ་ལྟ་སྲུང་དང་འཇིགས་སྐུལ། དེ་བཞིན་འཛིན་བཟུང་དོ་དམ་སོགས་ཀྱི་ལས་དོན་རྒྱ་ཆེ་སྤེལ་ཏེ་ས་ཁུལ་དེ་དག་གི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཆེས་ཇེ་སྡུག་ཏུ་བཏང་བར་ཐེར་འདོན་གནང་ཡོད་པ་དང་། བོད་ཁུལ་དུ་མཚོན་ན་རྒྱ་ནག་གཞུང་གིས་བོད་ཁུལ་དུ་མི་རིགས་མཐུན་སྒྲིལ་ཞེས་པའི་ཁྲིམས་སྒྲིག་གཏན་འབེབས་ཀྱིས་གཞི་རིམ་མང་ཚོགས་དང་ཚོགས་སྐྱིད་ཁག་ཏུ་རྒྱ་ནག་དམར་པོའི་ཆབ་སྲིད་དང་རྒྱལ་ཞེན་གྱི་སློབ་གསོ་སྔར་ལྷག་སྤེལ་ཡོད་པར་མ་ཟད། རྒྱ་ནག་གི་སློབ་གསོའི་ལས་གཞི་ཁག་ཏུ་མཉམ་ཞུགས་མ་གནང་མཁན་རྣམས་རྒྱལ་ཁབ་ཁ་བྲལ་གྱི་ཉེས་མིང་འོག་འཛིན་བཟུང་བཀག་་ཉར་དང་ཁྲིམས་ཐག་བཅད་ཡོད་པར་མངོལ་གསལ་གནང་འདུག
དེ་བཞིན་རྒྱ་ནག་ཕྱོགས་ནས་བོད་རྒྱའི་བཀའ་རྙོག་ཞི་སྒྲིག་ཡོང་ཐབས་ཀྱི་མདུན་པ་ཙམ་ཡང་ཆེད་འདོན་མེད་པའི་ཁར་བོད་མིའི་འགྲོ་བ་མིའི་ཐོབ་ཐང་སྤྱི་དང་ལྷག་པར་དུ་བོད་མིའི་ཆོས་ཕྱོགས་ཀྱི་ལས་དོན་ལ་ཐེ་བྱུས་ཀྱིས་༸གོང་ས་མཆོག་གིས་དབུས་པའི་བོད་མིིའི་བླ་སྤྲུལ་ཡང་སྲིད་ངོས་འཛིན་གནང་ཕྱོགས་ཀྱི་བདག་དབང་རྒྱ་ནག་ལ་ཡོད་སྐོར་བརྗོད་བཞིན་པ་དང་། བོད་ཀྱི་དགོན་སྡེ་གྲྭ་ཚང་ཁག་ནས་རྒྱ་ནག་གི་ནང་པའི་ལྷན་ཚོགས་ཀྱིས་གཏན་འབེབས་བྱས་པའི་སྒྲིལ་གཞི་རྣམས་ལག་བསྟར་དགོས་པའི་གནོན་ཤུགས་ཆེན་པོ་སྤྲད་ཡོད་པར་ཐེར་འདོན་གནང་འདུག རྒྱ་ནག་གཞུང་གིས་ད་ལྟ་ཡང་༸ཀུན་གཟིགས་༸པཎ་ཆེན་རིན་པོ་ཆེའི་གནས་སྟངས་གང་ཡིན་ཁ་གསལ་བྱེད་ཀྱི་མེད་པར་འགྲེལ་བརྗོད་གནང་བ་འབྲེལ་ཏེ་རྒྱ་ནག་གཞུང་གིས་ཆུང་སྲིད་རིན་པོ་ཆེའི་དབུས་པའི་བོད་མིའི་ཆབ་སྲིད་བཙོན་པ་རྣམས་ཆ་རྐྱེན་གང་ཡང་མེད་པར་གློད་བཀྲོལ་དགོས་ཞེས་ནན་བརྗོད་གནང་ཡོད་པ་རེད།
གཞན་ཡང་ཤོག་གྲངས་ ༣༢ ལྷག་ཡོད་པའི་ལོ་འཁོར་སྙན་ཐོའི་ནང་རྒྱ་ནག་གཞུང་གིས་ཧོང་ཀོང་ཐོག་འཛིན་པའི་རྒྱལ་ཁབ་གཅིག་ལ་སྲིད་བྱུས་གཉིས་ཀྱི་རྩ་འཛིན་ཁྲིམས་ཡིག་དེ་རྩིས་མེད་བཏང་བ་མ་ཟད་ཁུལ་དེའི་མང་གཙོ་ལས་འགུལ་བའི་འགོ་ཁྲིད་དང་མང་ཚོགས་གང་བྱུང་དུ་འཛིན་བཟུང་བཙན་ཁྲིད་བྱས་ནས་ད་དུང་གསར་འགོད་པ་རྣམས་ལ་དམ་དྲག་ཆེན་པོ་བྱས་ཡོད་པ་སོགས་ཐེར་འདོན་གནང་འདུག མང་ཚོགས་ཀྱི་འདོད་པ་མེད་བཞིན་དུ་ཧོང་ཀོང་བདེ་འཇགས་ཀྱི་ཁྲིམས་གཞི་གཏན་འབེབས་བྱས་ཏེ་མང་ཚོགས་ཀྱི་སྨྲ་བརྗོད་དང་འདུ་འཛོམས་སོགས་ཀྱི་རང་དབང་ལ་དོ་ཕོག་ཆེན་པོ་གཏོང་བཞིན་པ་སོགས་ཆེད་བཀོད་གནང་འདུག
ཤིན་ཅང་རང་སྐྱོང་ས་ཁུལ་གྱི་གནས་སྟངས་དང་འབྲེལ་ནས་རྒྱ་ནག་གཞུང་གིས་འདས་ལོའི་ནང་ཁུལ་དེའི་ཁ་ཆེས་གཙོས་པའི་གྲངས་ཉུང་མི་རིགས་ས་ཡ་གཉིས་ཙམ་འཛིན་བཟུང་གིས་བཀག་སྐྱིལ་བྱས་པར་མ་ཟད་བཙན་དབང་ཐོག་ངལ་རྩོལ་གྱི་ལས་རིགས་འདྲ་མིན་ནང་མཉམ་ཞུགས་བྱེད་དུ་བཅུག་ཡོད་པ་དང་། ལྷག་པར་དུ་འཚར་ལོངས་འབྱུང་བཞིན་པའི་བྱིས་པ་རྣམས་སོ་སོའི་ནང་མི་དང་ཁ་བྲལ་བཏང་ཏེ་རྒྱ་ནག་གི་རྒྱལ་ཞེན་སློབ་གསོ་སྤེལ་གྱི་ཡོད་པ་བཀོད་འདུག
ཐེངས་འདིའི་སྙན་ཐོར་བོད་མིའི་ཆབ་སྲིད་བཙོན་པ་དབང་འདུས་ལགས་དང་ཨ་ཉག་སེང་སྒྲ་ལགས་ཀྱིས་གཙོས་པའི་རྒྱ་རིགས་མང་གཙོ་དོན་གཉེར་བ་དང་ཧོང་ཀོང་། ཤིན་ཅང་ཁུལ་གྱི་ལས་འགུལ་བ། ཁྲིམས་རྩོད་པ་སོགས་མི་སྣ་ ༡༦ གི་ལོ་རྒྱུས་སྙིན་བསྡུས་ཆེད་བཀོད་ཀྱིས་ཨ་རི་གཞུང་དང་གྲོས་ཚོགས་ཀྱི་ངོས་ནས་ཁོང་རྣམ་པ་གཙོས་རྒྱ་གཞུང་གི་བཙོན་འོག་ཏུ་ཡོད་པའི་ཆབ་སྲིད་བཙོན་པའི་གནད་དོན་ཐོག་རྒྱ་ནག་ལ་འདྲི་རྩད་གནང་དགོས་སྐོར་གསུངས་ཡོད།
ཁ་སང་སྙན་ཐོ་དེ་འདོན་སྤེལ་གནང་བ་དང་འབྲེལ་ཏེ་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་ James McGovern ལགས་ཀྱིས་བརྙན་ཐུང་བརྒྱུད་དེ་ཨ་རིའི་སྲིད་གསར་པ་སྐུ་ཞབས་ Joe Biden མཆོག་དང་གྲོས་ཚོགས་འཐུས་མི་ཡོངས་ནས་མཉམ་བསྡུས་སྲིད་བྱུས་ཤིག་གཏན་འབེབས་གནང་སྟེ་རྒྱ་ནག་ལ་གདོང་ལེན་གནང་དགོས་པ་མ་ཟད། ཤིན་ཅང་ཁུལ་གྱི་ངལ་རྩོལ་བའི་ཐོབ་ཐང་སྲུང་ཀྱི་ཁྲིམས་ཞིག་གཏན་འབེབས་དགོས་པ། དེ་བཞིན་ཧོང་ཀོང་མང་གཙོའི་ལས་འགུལ་བ་ཚོར་དགོས་ངེས་ཀྱི་རྒྱབ་སྐྱོར་གནང་བར་མ་ཟད་ཉེ་ཆར་གཏན་འབེབས་ཟིན་པའི་ཨ་རིའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་ལག་བསྟར་གནང་དགོས་པ་སོགས་ཀྱི་དགོས་འདུན་ཁག་ཅིག་གནང་འདུག
ད་རེས་ཀྱི་སྙན་ཐོའི་ནང་རྒྱ་ནག་གཞུང་གིས་བོད་དང་ཤིན་ཅང་། ཧོང་ཀོང་བཅས་ཙམ་མིན་པར་ཨ་རི་གཙོས་རྒྱལ་སྤྱིའི་རྒྱལ་ཁབ་འདྲ་མིན་ནང་དུ་ཐབས་བྱུས་འདྲ་མིན་བརྒྱུད་དེ་འགྲོ་བ་མིའི་ཐོབ་ཐང་ལ་དོ་ཕོག་དང་། ཤེས་ཡོན་དང་ཚོགས་སྐྱིད་ཁག་གི་ལས་དོན་ལ་ཐེ་བྱུས་བྱེད་ཤུགས་ཆེ་རུ་བཏང་བ་སོགས་གསལ་འདོན་གནང་འདུག རྒྱ་ནག་ནང་ཁྱབ་བརྡལ་སོང་བའི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་ཁྲོད་གཞི་རིམ་མི་མང་ལ་དམ་དྲག་དང་གནས་ཚུལ་སྦས་གསང་བྱས་པ་སོགས་ཀྱི་བརྒྱུད་རིམ་ཁག་ཀྱང་བཀོད་འདུག
གཞི་རྩའི་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་ནས་ལོ་ལྟར་བཞིན་རྒྱ་ནག་ནང་གི་འགྲོ་བ་མིའི་ཐོབ་དང་ཁྲིམས་ལུགས་དབང་འཛིན་གྱི་གནས་སྟངས་ཐོག་སྙན་ཐོ་འདོན་སྤེལ་གནང་བ་དང་། ཡུལ་དེའི་གྲོས་ཚོགས་སུ་བོད་དང་ཤིན་ཅང་། ཧོང་ཀོང་སོགས་ཀྱི་གནད་དོན་ཐོག་ཉན་ཞིབ་ཀྱི་ལས་རིམ་གནང་ཐོག་ཁྲིམས་འཆར་འདོན་སྤེལ་སོགས་གནང་གི་ཡོད་པ་རེད།
