Monthly Archives: February, 2017

ཟླ་ ༢ ཚེས་ ༨ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ཝི་ཝེ་ཀ་ནནྡཱ་རྒྱལ་སྤྱིའི་ཐེབས་རྩ་ཁང་ Vivekananda International Foundation ནས་ཇི་ལྟར་གསོལ་འདེབས་ཞུས་དོན་བཞིན་ཆིབས་སྒྱུར་བཀའ་དྲིན་བསྐྱངས་ཏེ་རྒྱ་གར་གྱི་བདེ་སྲུང་དང་།   ཚོང་འབྲེལ། ཕྱི་སྲིད་ལས་དོན།    བཟོ་གྲྭའི་བདག་གཉེར་དང་དེ་བཞིན་སྤྱི་ཚོགས་ཞབས་ཞུ་བ་སོགས་རྒྱལ་ཁབ་ཀྱི་འཛུག་བསྐྲུན་གོང་འཕེལ་དང་འབྲེལ་བའི་སྲིད་བྱུས་ཉམས་ཞིབ་པ་མི་གྲངས་ ༣༠༠ ལྷག་ལ་རྒྱ་གར་གྱི་གནའ་བོའི་རིག་གཞུང་དེ་འཛམ་བུ་གླིང་འདིར་འབྲེལ་བ་གང་ཡོད་སྐོར་བཀའ་སློབ་བཀྲིན་བསྩལ་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་སློབ་དཔོན་  Vivekananda  མཆོག་ནས་འཛམ་གླིང་ཆོས་ལུགས་རིས་མེད་ཀྱི་གྲོས་ཚོགས་ཐོག་མར་དབུ་འཛུགས་བསྐྱངས་པའི་མཛད་འཕྲིན་ལུང་འདྲེན་གྱིས་ཁོང་ནི་ཕུགས་རྒྱང་རིང་པོའི་དགོངས་གཞི་ཡོད་པའི་རླབས་ཆེན་གྱི་དབུ་ཁྲིད་ཅིག་ཏུ་ངོས་འཛིན་མཛད་ཀྱི་ཡོད་ཅེས་བཀའ་བསྩལ་བ་དང་ཆབས་ཅིག ཁོང་གི་རྗེས་འཇུག་པ་ཚོས་རླབས་ཆེན་གྱི་དགོངས་གཞི་དེ་དག་ཚུལ་བཞིན་མཇུག་སྐྱོང་གནང་ཐུབ་ཀྱི་མེད་པ་བཀའ་གནང་པ་མ་ཟད།  ༸གང་ཉིད་མཆོག་ནི་རྒྱ་གར་གྱི་གནའ་བོའི་ལྟ་གྲུབ་སློབ་གཉེར་གནང་མཁན་གྱི་སློབ་ཕྲུག་ཞིག་ཡིན་པའི་ཆ་ནས་ཐོག་མར་བཙན་བྱོལ་དུ་འབྱོར་མ་ཐག་སྐབས་དེའི་སྲིད་བློན་དང་རྒྱ་གར་མི་མང་གི་བཀྲིན་ལ་བརྟེན་ནས་རྒྱ་གར་ལྷོ་ཕྱོགས་ཁུལ་དུ་རྩ་ཆེ་བའི་རིག་གཞུང་དེ་དག་མི་ཉམས་རྒྱུན་འཛིན་ཐུབ་པའི་ལྟེ་གནས་གསར་འཛུག་ཐུབ་སྐོར་སོགས་ངོ་སྤྲོད་མཛད་ཡོད། དེང་སྐབས་ངས་ཚན་རིག་པ་དང་ཤེས་ལྡན་པའི་མི་སྣ་འདྲ་མིན་ཐུགས་འཕྲད་སྐབས་ལོ་མང་རིང་བདག་ཉར་བྱས་པའི་ནཱ་ལེནྡྲའི་ཤེས་ཡོན་དེ་དངོས་གནས་དེང་དུས་ཀྱི་འཛམ་གླིང་འདིར་ཕན་ཐོགས་ཡོད་པ་ཞིག་དང་། ལྷག་པར་དུ་དངོས་ཁམས་ཚན་རིག་དང་སེམས་ཁམས་རིག་པའི་རྣམ་གཞག་ལས་ནང་པའི་རིག་ལམ་གྱི་ཐོག་ནས་འགྲེལ་བཤད་རྒྱ་ཆེ་བ་དང་གཏིང་ཟབ་པ་བརྒྱབ་རྒྱུ་ཡོད་པ་མ་ཟད།དེང་སྐབས་ཚན་རིག་པ་ཚོས་རིག་གཞུང་དེར་དམིགས་བསལ་གྱི་དོ་སྣང་བྱེད་མུས་ཡིན་པ་རེད། དེས་ན་རྒྱ་གར་གྱི་གནའ་བོའི་རིག་གཞུང་དེ་ནང་པ་ཙམ་མིན་པར་འགྲོ་བ་སྤྱི་ལ་ཕན་ཐོགས་པའི་ལེགས་བྱང་ཞིག་ལ་ངོས་འཛིན་མཛད་ཀྱི་ཡོད་ཅེས་སོགས་ལམ་སྟོན་བཀའ་སློབ་བསྩལ་སོང་། ༸གོང་ས་མཆོག་གིས་ད་དུང་རྒྱ་གར་གྱི་ཆོས་ལུགས་རིས་མེད་ཀྱི་ལྟ་གྲུབ་དང་། དེང་དུས་ཀྱི་ཤེས་ཡོན་དང་འབྲེལ་ཏེ་བཟང་སྤྱོད་ཀྱི་རིན་ཐང་སྐོར་སློབ་གསོ་སྤེལ་རྒྱུ་དེ་གལ་འགངས་ཆེན་པོ་ཡིན་པ་དང་། དེའང་བྱམས་སྙིང་རྗེའི་ལྟ་གྲུབ་ལས་བྱུང་བའི་རྒྱ་གར་གནའ་བོའི་རིག་གཞུང་དེ་དག་ཆོས་དང་མ་འབྲེལ་བའི་ཐོག་ནས་གོང་སྤེལ་གནང་ཐུབ་པ་ཡིན་ན། ཆོས་ཁས་ལེན་མིན་ཀུན་ལ་ཁྱབ་པའི་ལམ་སྟོན་བཟང་པོ་ཞིག་ཡོང་རྒྱུ་དང་། རྒྱ་གར་བ་ཚོས་དེའི་ཐོག་དམིགས་བསལ་གྱི་འགན་འཁུར་བཞེས་དགོས་པའི་ལམ་སྟོན་བཀའ་ནན་བསྩལ་ཡོད་པ་རེད། བཀའ་སློབ་ཀྱི་ལས་རིམ་དེ་གྲུབ་པའི་རྗེས་སུ་༸གོང་ས་མཆོག་གིས་རྒྱ་གར་བ་ཅིག་ནས་རྒྱ་ནག་འབྲེལ་བའི་བཀའ་འདྲི་ཞུས་པར་བཀའ་ལེན་སྩལ་བར་ངོས་རང་གིས་རྒྱ་ནག་དེ་རྒྱ་མི་རིགས་ལ་བདག་དབང་ཡོད་པ་མ་གཏོགས་དཔོན་པོ་རེ་གཉིས་ལ་བདག་དབང་ཡོད་པ་ཞིག་ལ་ངོས་འཛིན་གྱི་མེད་ཅེས་གསུངས་པ་དང་འབྲེལ། རྒྱ་ནག་མི་རིགས་ལ་ཆ་མཚོན་ན་རིག་གཞུང་ཡོད་པ་དང་ལོ་རྒྱུས་ལྡན་པའི་མི་རིགས་ཤིག་རེད། རྒྱ་གཞུང་གི་ངོས་ནས་རིག་གནས་གསར་བརྗེའི་སྐབས་འཆར་གཞི་ལྡན་པའི་ཐོག་ནས་ནང་ཆོས་གཙོ་བོར་འགྱུར་པའི་ཆོས་ལུགས་ཚང་མ་རྩ་མེད་བཏང་ཡོད་ཀྱང་། དེང་སྐབས་རྒྱ་ནག་ནང་ལ་ནང་པའི་མི་འབོར་དེ་ས་ཡ་ ༤༠༠ ལྷག་ཆགས་ནས་འཛམ་བུ་གླིང་གི་ནང་པའི་མི་འབོར་མང་ཤོས་ཀྱི་རྒྱལ་ཁབ་ཆགས་ཡོད་པ་རེད།   ངོས་ཀྱིས་རྒྱུན་དུ་རྒྱ་ནག་གཞུང་གིས་ཁྲེག་འཛིན་སྲིད་བྱུས་དེ་དོར་དགོས་པ་དང་། དེ་བཞིན་རྒྱ་གར་གྱི་ངོས་ནས་ཀྱང་རྒྱ་ནག་གི་སློབ་ཕྲུག་སོགས་ཤེས་ཡོན་སྡེ་ཁག་དང་སྨན་པ་སོགས་ཆེད་ལས་མི་སྣ་ཕན་ཚུན་འགྲོ་འོང་གི་གོ་སྐབས་ཤིག་བསྐྲུན་ཐབས་གནང་གལ་ཡིན་པ་ལམ་སྟོན་བསྩལ་ཡོད་པ་རེད། ད་ལྟའི་སྲིད་འཛིན་ཞི་ཅིང་ཕིང་ལའང་རྒྱ་ནག་རང་གི་ཁེ་ཕན་ཆེད་སྲིད་བྱུས་གུ་ཡངས་འཛིན་རྒྱུ་གལ་ཆེན་པོ་གཟིགས་ཀྱི་འདུག་ཅེས་བཀའ་བསྩལ་སོང་བ་དང་། རྒྱ་ནག་གཞུང་གི་ངོས་ནས་སོ་སོའི་ཁྱིམ་མཚེས་རྒྱལ་ཁབ་ཁག་ལ་ཡིད་ཆེས་དང་བརྩི་བཀུར་ཞུ་རྒྱུ་བཅས་ཀྱི་འོས་འགན་ཡོད་སྐོར་ལམ་སྟོན་རྒྱ་ཆེ་མཛད་ཡོད། ཁྱད་པར་དུ་༸གང་ཉིད་མཆོག་གི་ངོས་ནས་བོད་པའི་འཐབ་རྩོད་དེ་དྲང་བདེན་གྱི་སྟོབས་ཤུགས་དང་མེ་མདའི་སྟོབས་ཤུགས་ཀྱི་འཐབ་རྩོད་ལྟ་བུར་ངོས་འཛིན་གནང་གི་ཡོད་ལ། དེའང་གནས་སྐབས་རིང་མེ་མདའི་སྟོབས་ཤུགས་དེ་ནུས་པ་ཆེ་བ་ཡོད་ཀྱང་དྲང་བདེན་གྱི་སྟོབས་ཤུགས་དེ་མི་རབས་ནས་མི་རབས་བར་གནས་ངེས་རེད་ཅེས་བཀའ་སློབ་བཀྲིན་བསྩལ་གནང་ཡོད། རྩ་བའི་༸གོང་ས་མཆོག་ལྡི་ལིའི་ནང་གི་མཛད་འཕྲིན་ཁག་ལེགས་པར་གྲུབ་ཡོད་པ་དང་དེ་རིང་རྒྱལ་ས་ལྡི་ལི་ནས་རྒྱ་གར་ལྷོ་ཕྱོགས་ཁུལ་དུ་ཆིབས་བསྒྱུར་མཛད་ཡོད་པ་རེད།

ཉན་པ།: Listen ཕབ་ལེན། Download རྒྱ་གར་ལྷོ་ནུབ་མངའ་སྡེ་གཉིས་ནས་དོ་སྣང་ཆེན་པོས་ཆིབས་སྒྱུར་གྲ་སྒྲིག་གནང་བཞིན་པ། རྒྱ་གར་ནས་རྒྱ་ནག་གི་མགོ་གཉིས་མའི་བྱ་སྤྱོད་ལ་དྭོགས་ཟོན་བྱེད་དགོས་པ་གསུངས་འདུག བོད་ཀྱི་འདོགས་ཁྱི་འཁྱམ་ཁྱིར་འགྱུར་བཞིན་པ་བརྗོད་འདུག བཀའ་སློབ་ལེ་ཚན། ༸གོང་ས་མཆོག་གིས་༢༠༠༩ལོར་ཨོ་སི་ཊོ་ལོའི་ནང་གི་རྒྱ་རིགས་ཁག་ཅིག་ལ་ལམ་སྟོན་མཛད་པ། Wednesday 08/02/2017 India needs to be wary of two-faced China: Claude Arpi Andhra Pradesh and Telengana states gear up for Dalai Lama visit Tibetan mastiffs abandoned and dangerous as Chinese fad ends FEATURE: Dalai Lama speech to Chinese in Australia in 2009

བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡིའི་ནང་གི་མཛད་འཕྲིན་ལེགས་པར་གྲུབ་རྗེས་རིམ་པས་རྒྱ་གར་ལྷོ་ནུབ་མངའ་སྡེ་གཉིས་སུ་ཆིབས་བསྒྱུར་བཀྲིན་བསྐྱང་གི་ཡོད་པ་ལྟར་ད་ལྟའི་ཆར་མངའ་སྡེ་གཞུང་གིས་གྲ་སྒྲིག་གཟབ་རྒྱས་ཞུ་བཞིན་ཡོད་པ་རེད་འདུག མཛད་འཆར་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་གནངས་ཟླ་ ༢ ཚེས་ ༡༠ ཉིན་Andhra མངའ་སྡེ་ནང་ཚོགས་གཏན་འཁེལ ་བའི་ the National Women’s Parliament-2017 འམ་ ༢༠༡༧ ལོའི་རྒྱ་གར་རྒྱལ་ཡོངས་བེུད་གྲོས་ཚོགས་ཞེས་པའི་ཚོགས་ཆེན་གྱི་དབུ་འབྱེད་མཛད་སྒོར་ཆིབས་བསྒྱུུར་བསྐྱང་སྟེ་བླང་དོར་བཀའ་སློབ་བཀྲིན་བསྩལ་རྒྱུ་ཡིན་པ་རེད།  ཚོགས་ཆེན་དེ་ནི་རྒྱ་གར་ཡོངས་ནང་མཐོ་རིམ་སློབ་གཉེར་གནང་བཞིན་པའི་བེུད་ཆིག་ཁྲི་ལྷག་དང་རྒྱ་གར་གྱི་བེུད་གྲོས་ཚོགས་འཐུས་མི་ ༩༡ དབར་འབྲེལ་མཐུད་ཞུས་ནས་བེུད་ཀྱི་ནུས་སྟོབས་གོང་འཕེལ་གཏོང་བའི་གླེང་སྟེགས་ཆེས་ཐོག་མའི་གྲས་ཤིག་ཆགས་ཀྱི་འདུག་པ་མ་ཟད། ཚོགས་ཆེན་ཐོག་༸གོང་ས་མཆོག་གིས་དབུ་བཞུགས་གཙོས་པའི་བྷང་ལ་དེ་ཤའི་གྲོས་ཚོགས་ཀྱི་ཚོགས་གཙོ་ལྕམ་ Shirin Sharmin Chaudhury མཆོག་དང་། དེ་བཞིན་ཨནྡར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Chandrababu Naidu མཆོག་སོགས་གཞུང་འབྲེལ་ཆེས་མཐོའི་དཔོན་རིགས་དང་ཤེས་ཡོན་མི་སྣ་ཁག་ཅིག་ཕེབས་འཆར་ཡོད་པ་རེད་འདུག བོད་མིའི་སྒྲིག་འཛུགས་ཀྱི་ལྷོ་སྤྱི་ཆོས་འཕེལ་ཐུབ་བསྟན་ལགས་སུ་བཀའ་འདྲི་ཞུས་པར། ད་ལྟའི་ཆར་ Andra དང་ Telengana མངའ་སྡེ་གཞུང་གིས་༸གོང་ས་མཆོག་གི་ཆིབས་བསྒྱུར་ཐད་དོ་སྣང་ཆེན་པོས་གྲ་སྒྲིག་གཟབ་རྒྱས་ཞུ་མུས་རེད་འདུག་ཅེས་གསུངས་སོང་། Andhra མངའ་སྡེའི་ནང་གི་མཛད་འཕྲིན་གྲུབ་བསྟུན་མགོན་པོ་༸གང་ཉིད་མཆོག་ Telengana མངའ་སྡེའི་རྒྱལ་ས་Hydrabad ནང་དུ་ཆིབས་བསྒྱུར་གྱིས་ཁུལ་དེར་རྟེན་གཞི་བྱས་པའི་རྒྱ་གར་རྒྱལ་ཡོངས་ཉེན་རྟོག་སྦྱོང་བསྡར་ལྟེ་གནས་ཁང་དུ་ཆིབས་བསྒྱུར་དང་འདི་བཞིན་མང་ཚོགས་ལ་བཀའ་སློབ་བཀྲིན་བསྩལ་རྒྱུའི་མཛད་འཆར་ཐུགས་གཏན་འཁེལ་འདུག

རྒྱ་གཞུང་གིས་འབྲོག་པ་གཞིས་སྤོས་ཀྱི་སྲིད་བྱུས་དང་སྒོ་ཕྱུགས་ལོགས་གསོའི་བྱ་སྤྱོད་འོག་རྒྱལ་སྤྱིའི་ཐོག་རིང་ཐང་ཆེ་བའི་བོད་ཀྱི་འདོགས་ཁྱི་རྣམས་དེང་སྐབས་བདག་མེད་འཁྱམ་ཁྱིར་འགྱུར་བཞིན་ཡོད་པ་བརྗོད་འདུག ཁ་སང་ཟླ་ ༢ ཚེས་ ༧ ཉིན་ China Dialogue གསར་ཁང་གི་དྲ་གནས་ཐོག་གསར་འགོད་པ་ Wang Yan ལགས་ཀྱིས་དེང་སྐབས་བོད་ཀྱི་འདོགས་ཁྱིའི་གནས་སྟངས་ཆེས་ཉམས་རྒུད་འགྲོ་བཞིན་ཡོད་པའི་དཔྱད་གཏམ་ཞིག་སྤེལ་འདུག་པ་དང་། དེའི་ནང་དེ་སྔ་བོད་ཀྱི་འདོགས་ཁྱི་དེ་དག་འབྲོག་པ་ཚོས་སྒོ་ཕྱུགས་སེམས་ཅན་རྣམས་སྲུང་སྐྱོབ་བྱ་རྒྱུ་སོགས་ལ་དམིགས་ཏེ་གསོ་སྐྱོང་གང་ལེགས་གནང་གི་ཡོད་ཀྱང་། བར་སྐབས་ཤིག་ནས་ཁྲོམ་རའི་ནང་འདོགས་ཁྱིའི་གོང་ཚད་ཆག་པ་དང་། རྒྱ་ནག་གཞུང་གིས་བོད་ནང་འབྲོག་པ་གཞིས་སྤོས་ཀྱི་སྲིད་བྱུས་ལག་བསྟར་བྱེད་པ་ནས་བཟུང་བོད་ཀྱི་འདོགས་ཁྱི་རྣམས་ཟས་མ་རག་པའི་ངལ་བ་འཕྲད་པ་དང་དེང་སྐབས་བོད་ཀྱི་འདོགས་ཁྱི་རྣམས་བདག་མེད་འཁྱམ་ཁྱིར་འགྱུར་བཞིན་ཡོད་པ་བཀོད་འདུག དཔྱད་གཏམ་དེའི་ནང་ད་དུང་ཁོང་གིས་དེང་སྐབས་བོད་ཀྱི་ས་ཁུལ་ཁག་ཏུ་འདོགས་ཁྱི་བདག་མེད་ཁག་ཅིག་གིས་ཡུལ་སྐོར་སྤྲོ་འཆམས་པར་གནོད་འཚེ་བྱེད་བཞིན་ཡོད་སྐོར་གནས་ཚུལ་ཟུར་བཀོད་གནང་འདུག་པ་མ་ཟད། ཁོང་གིས་བོད་མཚོ་ཁུལ་གྱི་བོད་མི་བཀྲ་ཤིས་མགོན་པོ་ལགས་ལ་བཅར་འདྲི་ཞུས་པར་ཁོང་རང་ཉིད་རྒྱུན་དུ་འདོགས་ཁྱི་ལ་དགའ་མོས་ཆེན་པོ་གནང་མཁན་ཞིག་ཡིན་པ་དང་། ས་གནས་སུ་དེ་སྔ་འདོགས་ཁྱི་རྣམས་རང་ཉིད་ཀྱི་ནང་མི་བཞིན་གསོ་སྐྱོང་གནང་པ་ལས། ཁྱི་ཚོང་བརྒྱབ་རྒྱུ་དེ་རྣམ་རྟོག་ཞིག་ལ་ངོས་འཛིན་གནང་གི་ཡོད་པ་གསུངས་འདུག འོན་ཀྱང་རྒྱ་རིགས་ཚོས་བར་ལམ་ཞིག་ནས་འདོགས་ཁྱི་ཚོང་འགྲེམ་གྱི་ལས་གཉེར་མགོ་འཛུགས་བྱས་པར་བརྟེན་བོད་ཀྱི་གནའ་སྔ་མོའི་སྲོལ་རྒྱུན་ལ་འགྱུར་བ་ཆེན་པོ་ཐེབས་ཡོད་ཅེས་འགྲེལ་བརྗོད་གནང་འདུག དེ་བཞིན་བོད་མི་ཚེ་རིང་དབྱངས་འཛོམས་ཀྱིས་དེང་སྐབས་བོད་ཀྱི་ས་ཁུལ་ཁག་ཏུ་འདོགས་ཁྱི་བདག་མེད་རིགས་འཕེལ་རྒྱས་འགྲོ་བཞིན་པ་དེས་ས་གནས་ཡུལ་མི་རྒན་འཁོགས་དང་སློབ་ཕྲུག་ཚོའི་བདེ་འཇགས་ལ་བློ་འཚབ་ཆེན་པོ་བཟོ་བཞིན་ཡོད་སྟབས། བོད་ནང་ཆེན་རྫོང་ཁོངས་སུ་ཡོད་པའི་ཟུར་མང་དགོན་པ་དང་ས་གནས་ཡུལ་མི་རྣམས་ཀྱིས་འདོགས་ཁྱི་བདག་མེད་འཁྱམ་ཁྱིར་འགྱུར་བ་རྣམས་བཟུང་སྟེ་གཅེས་སྐྱོང་གནང་བཞིན་ཡོད་སྐོར་གསུངས་འདུག་པ་དང་། དགོན་པ་དེའི་གྲྭ་པ་རྒན་གྲས་ཤིག་གིས་འདོགས་ཁྱི་དེ་དག་གཅེས་སྐྱོང་ཐུབ་ཐབས་སུ་ཉིན་རེར་ཨ་སྒོར་བརྒྱ་དང་བཞི་བཅུ་ཞེ་ལྔ་རེ་འགྲོ་སོང་གཏོང་བཞིན་ཡོད་སྐོར་གསུངས་འདུག གཞི་རྩའི་འདོགས་ཁྱི་ནི་བོད་ཀྱི་འབྲོག་པ་གཙོས་པའི་ས་གནས་ཡུལ་མིའི་སྲོལ་རྒྱུན་དང་འབྲེལ་བ་ཆེ་བའི་སྒོ་ཕྱུགས་སེམས་ཅན་གདན་ཆེ་ཞིག་ཆགས་ཡོད་པ་དང་། ཕྱི་ལོ་ ༢༠༡༠ ལོ་ནས་དཔལ་འབྱོར་སོགས་ཀྱི་དགོས་དམིགས་འོག་འདོགས་ཁྱི་རྣམས་ཚོང་འགྲེམ་བྱ་མགོ་བཙུགས་དོན་ལྟར་འདོགས་ཁྱི་ཁ་ཤས་ལ་ཨ་སྒོར་ས་ཡ་གཉིས་ལྷག་རག་བཞིན་ཡོད་ཀྱང་། ཕྱི་ལོ་ ༢༠༡༢ ཙམ་ནས་རྒྱལ་སྤྱིའི་དཔལ་འབྱོར་གྱི་གནས་སྟངས་ཉམས་རྒུད་ཕྱིན་པ། ལྷག་པར་དུ་རྒྱ་ནག་ནང་ལྐོག་ཟ་རུལ་སུངས་འགོག་ཐབས་དང་འབྲོག་གནས་གཞིས་སྤོས་ཀྱི་སྲིད་བྱུས་སོགས་ལག་བསྟར་རྐྱེན་པས་འདོགས་ཁྱིའི་གོང་ཚད་དང་སྲོལ་རྒྱུན་གྱི་གནས་སྟངས་ལ་དོ་ཕོག་ཆེན་པོ་ཐེབས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་ས་ལྡི་ལིའི་ Chanakya puri ཁུལ་དུ་རྟེན་གཞི་བྱས་པའི་ Jesus and Mary མཐོ་རིམ་ སློབ་གྲྭས་ཇི་ལྟར་གསོལ་འདེབས་ཞུས་དོན་བཞིན།  དེ་རིང་སྔ་དྲོ་མགོན་པོ་༸གང་ཉིད་མཆོག་མཐོ་སློབ་དེར་༸ཞབས་སོར་འཁོད་ཡོད་པ་དང་། མཐོ་སློབ་དེའི་ངོས་ནས་༸གང་ཉིད་མཆོག་ལ་བྱམས་སྙིང་རྗེ་དང་འཇིག་རྟེན་ཀུན་ཁྱབ་ཀྱི་འགན་འཁུར་སྐོར་ལམ་སྟོན་བཀྲིན་བསྩལ་གནང་ཡོང་བར་གསོལ་འདེབས་ཞུས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ཚོགས་ཁང་ནང་འདུ་འཛོམས་བྱུང་བའི་དགེ་ལས་སློབ་ཕྲུག་བཅས་མི་གྲངས་ ༡༥༠༠ ལྷག་ཡོད་པ་དེ་དག་ལ་དུས་རབས་ཉི་ཤུའི་དུས་མཇུག་དང་ཉིར་གཅིག་གི་དུས་མགོ་གཉིས་ལ་གཞིགས་ཚེ་བཟང་ཕྱོགས་ཀྱི་འགྱུར་བ་ཞིག་འགྲོ་གི་ཡོད་པ་གསལ་པོ་རེད། རྩ་བའི་དུས་རབས་ཉི་ཤུའི་ནང་མི་གསོད་ཁྲག་སྦྱོར་ཚད་མེད་བྱུང་བ་དེའི་ངན་ལན་ལྟ་བུར་སྐབས་ཤིག་དགྲ་བོར་ངོས་འཛིན་བྱས་པའི་ཕ་རན་སི་དང་འཇར་མིན་རྒྱལ་ཁབ་གཉིས་དེང་སྐབས་ཡུ་རོབ་མཐུན་ཚོགས་ནང་མཉམ་གནས་གནང་བཞིན་ཡོད་པ་མ་ཟད།  རྒྱ་གར་ལྟ་བུར་ཆ་མཚོན་ནའང་སྔོན་མ་རྒྱལ་པོ་སོ་སོའི་རྒྱལ་བརྒྱུད་འོག་གནས་ཡོད་པ་ནས་ད་ཆ་རྒྱལ་ཁབ་གཅིག་གི་ངོ་བོའི་འོག་གནས་ཡོད་པ་བཅས་ནི་བཟང་ཕྱོགས་ཀྱི་འགྱུར་བ་ཞིག་རེད་ཅེས་བཀའ་བསྩལ་གནང་པ་དང་།  ལྷག་དོན་༸གང་ཉིད་མཆོག་གི་སྐུ་སྒེར་ངོས་ནས་ཡུ་རོབ་མཐུན་ཚོགས་ལྟ་བུའི་མཉམ་གནས་བྱེད་རྒྱུའི་སྲིད་བྱུས་དེར་ཡིད་སྨོན་མཛད་ཀྱི་ཡོད་སྐོར་བཀའ་བསྩལ་གནང་སོང་། མི་ཕན་ཚུན་དབར་བསམ་ཚུལ་ཕྲན་བུ་མི་མཐུན་པ་སོགས་ཡོང་གི་ཡོད་ཀྱང་དེ་དག་གྲོས་མོལ་གྱི་ལམ་ནས་སེལ་བའི་བརྒྱུད་མ་འོངས་པར་རྒྱ་གར་དང་རྒྱ་ནག ཉི་ཧོང་སོགས་ཨེ་ཤ་ཡའི་མཉམ་འབྲེལ་མཐུན་ཚོགས་དང་ཨ་ཕི་རི་ཀའི་ཕྱོགས་དེ་དག་ཀྱང་མཉམ་འབྲེལ་ཐོག་གནས་ཐུབ་པ་ཡིན་ཚེ་དགེ་མཚན་ཆེན་པོ་ཡོད་པར་གཟིགས་ཀྱི་ཡོད་སྐོར་བཀའ་བསྩལ་མཛད་ཡོད་པ་རེད། དཀའ་ངལ་དེ་དག་ཡོང་གཞི་ནི་མ་ཤེས་པའི་ཉོན་མོངས་དབང་གིས་ཡོང་གི་ཡོད་པ་དང་། ཉོན་མོངས་ཀྱི་གཉན་པོ་བྱམས་པ་དང་སྙིང་རྗེ་ཡིན་པའི་སྐོར་འགྲེལ་བརྗོད་ནན་པོ་གནང་ཡོད་པ་རེད། དེང་སྐབས་རྒྱ་གར་བ་མང་པོས་སོ་སོའི་གནའ་སྔ་མོའི་རིག་གཞུང་ལ་དོ་སྣང་བྱེད་ཀྱི་ཡོད་པ་དེ་ནི་བློ་སྟོབས་སྐྱེས་དགོས་པ་ཞིག་རེད་འདུག་ཅེས་བཀའ་སྩལ་བ་དང་འབྲེལ། ༸གང་ཉིད་མཆོག་གིས་གོང་དུ་ངོས་ནས་བརྗོད་ཟིན་པ་ལྟར་ཚད་མ་རིག་པ། སེམས་དང་ཚོར་བའི་འདུ་ཤེས་སོགས་ལ་སློབ་སྦྱོང་བྱ་རྒྱུ་ཡོད་པ་དེ་དག་ནི་དེང་དུས་ཀྱི་ཀླད་པའི་ཚན་རིག་ལྟ་བུར་ཆོས་དང་འབྲེལ་བ་མེད་པའི་སློབ་ཚན་གྱི་ངོ་བོའི་ཐོག་ནས་སྦྱོང་བརྡར་བྱེད་དགོས་པའི་ཤེས་རིག་ཅིག་རེད།   ངོས་ནས་རྟག་ཏུ་དེ་ཚོར་སེམས་ཀྱི་ཚན་རིག་ཅེས་བརྗོད་ཀྱི་ཡོད།  འདས་པའི་ལོ་ཤས་སྔོན་ནས་ང་ཚོས་ལོ་རྒྱུས་སུ་ང་ཚོའི་དགེ་རྒན་ཡིན་པའི་རྒྱ་གར་བ་ཚོར་གནའ་སྔ་མོ་ནས་ང་ཚོས་སྲུང་སྐྱོབ་ཞུས་པའི་རིག་གཞུང་དེ་དག་གོང་འཕེལ་ཡོང་ཐབས་གནང་གི་ཡོད།  དེ་དང་དུས་མཚུངས་ཨ་རི་དང་ཡུ་རོབ་སོགས་ཀྱི་ཚན་རིག་པ་ཚོའི་མཉམ་དུའང་སེམས་ཀྱི་ཚན་རིག་སྐོར་བགྲོ་གླེང་བྱེད་མུས་ཡིན་ལ། ཁོང་ཚོའི་ངོས་ནས་ཀྱང་དོ་སྣང་ཆེན་པོ་གནང་གི་འདུག་ཅེས་བཀའ་བསྩལ་ཡོད། ༸གོང་ས་མཆོག་གིས་སྐབས་དེར་ད་དུང་རྒྱུན་དུ་ང་ཚོས་གཟུགས་ཅན་གྱི་ཤེས་པའི་བདེ་སྐྱིད་ཙམ་ལ་དོ་སྣང་མ་གནང་པར་ནང་སེམས་ཀྱི་བདེ་སྐྱིད་དེ་བདེ་སྐྱིད་ཀྱི་གཞི་རྩ་གཙོ་བོ་ཡིན་པ་ཤེས་དགོས་གལ་ཡིན་པ་རེད་ཅེས་ལམ་སྟོན་བཀའ་སློབ་བསྩལ་སོང་བ་དང་།དེ་བཞིན་༸གང་ཉིད་མཆོག་གིས་ཡེ་ཤུའི་ཆོས་ཉམས་ལེན་བྱེད་མཁན་ཚོས་དཀོན་མཆོག་ལ་སྐྱབས་བཅོལ་ཏེ་རང་ཉིད་དཀོན་མཆོག་གི་རིགས་མྱུག་ཞིག་དང་དཀོན་མཆོག་ནི་མུ་མཐའ་མེད་པའི་བྱམས་བརྩེའི་བདག་ཉིད་ཅན་ཞིག་ཏུ་ངོས་འཛིན་གནང་གི་ཡོད་པ་རེད། ཕྱོགས་གཞན་དེར་ང་ཚོ་ནང་པས་རང་ཉིད་རང་གི་མགོན་ཡིན་པར་ངོས་འཛིན་གྱི་ཡོད། དེས་ན་རྒྱུན་དུ་ང་ཚོས་གཟུགས་ཅན་གྱི་ཤེས་པའི་བདེ་སྐྱིད་ཀྱི་ཉམས་མྱོང་དེ་དང་སེམས་ཀྱི་བདེ་སྐྱིད་གཉིས་ཀྱི་ཐོག་བསམ་བློ་ནན་གཏན་གཏང་སྟེ་ཞིབ་འཇུག་བྱ་དགོས་སྐོར་སོགས་ལམ་སྟོན་མཛད་ཡོད། ༸གོང་ས་མཆོག་གིས་མུ་མཐུད་གསུངས་པར་རྩ་བའི་ཤེས་པའི་བདེ་སྐྱིད་དེ་དགོས་ཚེ་དེ་ཙམ་གལ་ཆེན་པོ་མ་རེད། དཔེར་ན་སེམས་སྐྱིད་པོ་ཞེ་དྲག་ཡོད་པའི་སྐབས་དེར་སོ་སོའི་གཟུགས་པོར་ན་ཟུག་ལྟ་བུ་ཞིག་བྱུང་བ་ཡིན་ཡང་དཀའ་ངལ་དེ་ཆུང་དུ་གཏོང་བའི་ཐབས་ཡོད་པ་རེད། འོན་ཀྱང་ཕྱོགས་གཞན་ནས་སེམས་ལ་དཀའ་ངལ་ཆེན་པོ་ཞིག་འཕྲད་པ་ཡིན་ན་གཟུགས་ཅན་ཤེས་པའི་ཐོག་ནས་ཐབས་ཤེས་ན་གང་ཡང་བྱ་རྒྱུ་མེད་ཅེས་བཀའ་བསྩལ་བ་དང་ཆབས་ཅིག རྒྱུན་དུ་བསམ་བློ་རྒྱ་ཆེ་ས་ནས་གཏོང་དགོས་གལ་ཡིན་པར་ལམ་སྟོན་བཀའ་སློབ་བཀྲིན་ཆེ་བ་བསྩལ་གནང་མཛད་ཡོད་པ་རེད།  བཀའ་སློབ་ཀྱི་ལས་རིམ་དེ་གྲུབ་པའི་རྗེས་སུ་༸གོང་ས་མཆོག་གིས་སློབ་ཕྲུག་ཁག་ཅིག་ནས་བཀའ་འདྲི་ཞུས་པར་བཀའ་ལེན་སྩལ་རྒྱུ་བཅས་ཀྱི་མཛད་རིམ་ལེགས་པར་གྲུབ་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་དེང་སྐབས་རྒྱ་གར་ཚོས་རང་གི་གནའ་རབས་རིག་གཞུང་ལ་དོ་སྣང་གནང་པར་བསྔགས་བརྗོད་མཛད་པ། རྒྱ་གཞུང་གིས་ཨ་རིའི་ཤེས་ཡོན་རང་དབང་ལ་ཐེ་བྱུས་བྱེད་བཞིན་པར་སྐྱོན་བརྗོད། ཀཱམ་བྷོ་ཌི་ཡའི་ནང་དུ་བོད་དང་ཐེ་ཝན་གཉིས་ཀྱི་རྒྱལ་དར་བསྒྲེང་འཛུགས་བྱ་རྒྱུ་མེད་པ་བཟོས་འདུག ཉི་མ་ལྷ་མོ་ལགས་ཀྱིས་ཡུ་རོབ་རྒྱལ་ཁབ་དྲུག་ནང་བོད་དོན་ཞུ་གཏུག་ལས་འགུལ་སྤེལ་བཞིན་པ། སྲི་ཞུ་བ་ཁག་ཅིག་ལ་འཛིན་སྐྱོང་དང་འབྲེལ་བའི་དམིགས་བསལ་ཟབ་སྦྱོང་། གླུ་གཞས་ལེ་ཚན། བདེ་སྐྱིད་མཚོའི་གླུ་གཞས་བདག་གིས་འབུལ། Tuesday 07/02/2017 It is encouraging to see more Indians showing interest in their ancient culture: Dalai Lama China should not be allowed to interfere with US academic freedom Cambodian Prime Minister bans Taiwanese, Tibetan flags in Cambodia Late Tulku Tenzin Delek’s niece on Europe tour to highlight situation in Tibet CTA begins leadership training to managerial level staff in Shimla MUSIC FEATURE: ‘Dak Kyi Bul’ by Dhekyi Tso

རྒྱལ་གཅེས་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་དང་བོད་མིའི་སྒྲིག་འཛུགས་ཀྱི་ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐལ་ལྡན་མཚོ་མོ་ལགས་རྣམ་གཉིས་ཀྱིས་རྒྱལ་ཚོགས་སུ་བོད་དོན་ཞུ་གཏུག་ལས་འགུལ་སྤེལ་བ་དང་འདི་བཞིན་ཡུ་རོབ་རྒྱལ་ཁབ་དྲུག་ནང་སྐོར་བསྐྱོད་ཀྱིས་བོད་དོན་ཞུ་གཏུག་གནང་རྒྱུ་རེད་འདུག   དེའང་ཕྱི་དྲིལ་འགྲོ་བ་མིའི་ཐོབ་ཐང་ཚན་པ་དང་སུད་སི་བོད་ཀྱི་སྐུ་ཚབ་དོན་ཁང་། ལོན་ཊན་བོད་ཀྱི་སྐུ་ཚབ་དོན་ཁང་གསུམ་གྱིས་གོ་སྒྲིག་འོག་ཁོང་རྣམ་གཉིས་ཀྱིས་ཡུ་རོབ་རྒྱལ་ཁབ་ནང་བོད་དོན་ཞུ་གཏུག་ལས་འགུལ་དབུ་འཛུགས་དང་སྦྲགས། ཟླ་འདིའི་ཚེས་ ༥ དང་ ༦ བཅས་སུ་སུ་ཝེ་ཌན་ནང་ཆེད་བསྐྱོད་ཀྱིས་ཁུལ་དེའི་གྲོས་ཚོགས་འཐུས་མི་དང་གསར་འགོད་པ། དེ་བཞིན་སུ་ཝེ་ཌན་གྱི་གློག་བརྙན་འཁྲབ་ཁྲིད་པ་སོགས་དང་མཇལ་མོལ་གནང་འདུག ཉི་མ་ལྷ་མོ་ལགས་ཀྱིས་སྐབས་དེར་གཙོ་བོ་ཁོང་གི་ཨ་ཞང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གིས་མ་ཉེས་ཁ་གཡོག་འོག་སྐུ་བཀྲོངས་ཡོད་པ་དང་སྲིད་གཞུང་ནས་རིན་པོ་ཆེ་མཆོག་གི་གནད་དོན་ཐད་ཐག་གཅོད་འཐུས་གཙང་གནང་དགོས་པའི་དགོས་འདུན་གསལ་བཏོན་གནང་པ་མ་ཟད། ཞིང་གཤེགས་དམ་པ་རིན་པོ་ཆེ་མཆོག་གི་ཚ་མོ་ཙམ་མིན་པར་གཞིས་ལུས་བོད་མི་ཡོངས་ཀྱི་མངོན་འདོད་དང་ངོ་བོ་མཚོན་ཐབས་སུ་འདིར་ཡོང་བ་ཡིན། རྒྱལ་སྤྱིའི་ངོས་ནས་བོད་ནང་གི་ཛ་དྲག་གནས་སྟངས་ཐོག་དོན་ཕན་སོན་པའི་རྒྱབ་སྐྱོར་གནང་སྐྱོང་ཡོང་བ་བཅས་ཀྱི་འབོད་སྐུལ་ཤུགས་ཆེ་ཞུས་འདུག ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འགན་འཛིན་སྐལ་ལྡན་མཚོ་མོ་ལགས་ཀྱིས་གསུངས་པར་ཁོང་དང་ཉི་མ་ལྷ་མོ་ལགས་རྣམ་གཉིས་ཀྱིས་ཡུ་རོབ་རྒྱལ་ཁབ་སུ་ཝེ་ཌན་ནས་བོད་དོན་ཞུ་གཏུག་ལས་འགུལ་དབུ་འཛུགས་གནང་ཡོད་པ་དང་། དེ་རིང་ཌེན་མག་ཕྱོགས་སུ་ཐོན་འབྱོར་གནང་གི་ཡོད་པ་དང་། ཁུལ་དེར་ཉིན་གྲངས་གཉིས་རིང་ཌེན་མག་གཞུང་གི་ཕྱི་སྲིད་ལས་ཁུངས་ཀྱི་ལས་བྱེད་དང་ཆབ་སྲིད་ཚོགས་པ་འདྲ་མིན་བཞིའི་གྲོས་ཚོགས་འཐུས་མི་རྣམས་དང་མཇལ་མོལ་ཞུ་རྒྱུ་དང་། སང་ཚེས་ ༨ ཉིན་ཁུལ་དེའི་རྒྱལ་སྤྱིའི་ཉེས་ཡངས་ཚོགས་པ་དང་བོད་དོན་རྒྱབ་སྐྱོར་ཚོགས་པ་བཅས་དང་མཇལ་མོལ་དང་མི་མང་འདུ་འཛོམས་ཀྱི་ལས་རིམ་ཞིག་ཐོག་བོད་དོན་ཞུ་གཏུག་གི་གསུང་བཤད་ཀྱང་གནང་རྒྱུ་ཡིན་སྐོར་གསུངས་སོང་། གཞི་རྩའི་ཉི་མ་ལྷ་མོ་ལགས་དང་སྐལ་ལྡན་མཚོ་མོ་ལགས་རྣམ་གཉིས་ཀྱིས་ཌེན་མག་ནང་བོད་དོན་ཞུ་གཏུག་ལས་འགུལ་སྤེལ་གྲུབ་རྗེས། ཟླ་ ༢ ཚེས་ ༩ ཉིན་སི་པཱན་དུ་ཕེབས་ཐོན་གྱིས་ཁུལ་དེར་ཚེས་ ༡༡ བར་ཞུ་གཏུག་གནང་རྒྱུ་དང་། རིམ་བཞིན་འཇར་མ་ནི་དང་ཅེཀ དེ་བཞིན་སུད་སིའི་ཇི་ནི་ཝ་སོགས་ཡུ་རོབ་རྒྱལ་ཁབ་དྲུག་ནང་ཆེད་བསྐྱོད་ཀྱིས་ས་གནས་སོ་སོའི་གཞུང་འབྲེལ་གནད་ཡོད་མི་སྣ་དང་གྲོས་ཚོགས་འཐུས་མི། མང་ཚོགས་རྣམས་ལ་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་སྒོས་ཁོང་གི་ནང་མིར་འཕྲད་པའི་དངོས་ཀྱི་གནས་ཚུལ་ཁག་བོད་སྤྱིའི་གནས་སྟངས་མཚོན་གྱི་ཡོད་པས་དེ་དག་འཛམ་གླིང་གི་མང་ཚོགས་ཚོར་བདེན་པ་ར་སྤྲོད་དང་འབྲེལ་བོད་དོན་ཞུ་གཏུག་ལས་འགུལ་མུ་མཐུད་སྤེལ་གནང་གི་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་ལྡི་ལིར་སློབ་གྲྭ་ཁག་ ༩༠ ལྷག་གི་སློབ་མར་བཀའ་སློབ་བསྩལ་བ། ༸གོང་ས་མཆོག་གི་མཚན་བེད་སྤྱོད་ནས་རྒྱ་ནག་དང་ཨ་རིའི་འབྲེལ་ལམ་ལ་དོ་ཕོག་བཟོ་མི་རུང་བརྗོད་འདུག སློབ་དཔོན་ཨེ་ལི་ཡེཊ་སི་པར་ལིངྒ་དམ་པར་མྱ་ངན་གུས་འདུད་ཀྱི་རྗེས་དྲན་འདུ་འཛོམས། ཆོས་དང་མ་འབྲེལ་བའི་བཟང་སྤྱོད་དང་འཚེ་མེད་ཞི་བའི་ལྟ་གྲུབ་གཉིས་དེང་གི་འཛམ་གླིང་འདིར་འོས་ཤིང་འཚམ་པ་ཡོད་ཅེས་བཀའ་སྩལ་འདུག དམིགས་བསལ་ལེ་ཚན། ཕྱི་ལོ་༡༩༥༢-༡༩༥༦ བོད་ཀྱི་ཆབ་སྲིད་གནས་བབ། Monday 06/02/2017 Dalai Lama addresses Itihaas event, interacts with students from 90 schools in Delhi Beijing to Washington: Using Dalai Lama will bring trouble for mutual interest Exile Tibetans pay tribute to late Prof. Elliot Sperling Dalai Lama talks on ‘Reviving Indian Wisdom in Contemporary India’ at Vidyaloke HISTORY FEATURE: Tibet’s political situation during 1952 to 1956

དེ་རིང་ཟླ་ ༢ ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་ས་ལྡི་ལིའི་ convent of Jesus and Mary ཞེས་པར་ལྡི་ལི་ཁུལ་གྱི་སློབ་གྲྭ་ ༩༠ ལྷག་གི་སློབ་ཕྲུག་ ༡༤༠༠ ལྷག་ལ་བྱམས་བརྩེ་དང་བཟང་སྤྱོད་གཉིས་བདེ་སྐྱིད་ཀྱི་འབྱུང་ཁུངས་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་སྩལ་ཡོད་པ་དང་། མགོན་པོ་༸གང་ཉིད་མཆོག་གིས་ལྡི་ལིའི་ནང་སྙན་གྲགས་ཆེ་བའི་སློབ་གྲྭ་ཁག་ནས་ཆེད་བཅར་ཞུས་པའི་སློབ་ཕྲུག་ཚོར་གཙོ་བོ་མི་སེམས་པ་བཟང་པོ་ཞིག་བྱེད་དགོས་གལ་ཡིན་པ་དང་། འགྲོ་བ་མིའི་རིགས་ལ་སེམས་ཅན་གཞན་དང་མི་འདྲ་བའི་ཀླད་པ་ཡོད་པ་དང་། ཀླད་པ་དེའི་ཐོག་ནས་དྲན་པ་དང་བསམ་བློ་གཏོང་བའི་རྣམ་སྤྱོད་དེ་སེམས་ཅན་གཞན་དང་མི་གཅིག་པའི་ཁྱད་ཡོད་སྐོར་ལམ་སྟོན་བཀའ་བསྩལ་གནང་སོང་།  ༸གོང་ས་མཆོག་གིས་སྐབས་རེ་ང་ཚོས་ང་ཚོ་ཚང་མ་འགྲོ་བ་མིའི་མཆེད་གྲོགས་གཅིག་མཚུངས་ཡིན་པའི་འདུ་ཤེས་དེ་བརྗེད་འགྲོ་བའམ་སྣང་མེད་ལྟ་བུ་བཞག་སྟེ་གཞི་རྩ་གཉིས་པ་ཆོས་ལུགས་མི་འདྲ་བ་དང་། སྐད་ཡིག་མི་འདྲ་བ། ལུང་པ་མི་འདྲ་བ་སོགས་ཀྱི་ཁྱད་པ་ལ་བསམ་བློ་ནན་པོ་བཏང་བ་དང་། དེའི་བརྒྱུད་ནས་ང་དང་ཁྱོད་ཟེར་བའི་ལྷན་སྐྱེས་ཀྱི་བར་ཁྱད་ཅིག་སླེབས་ཀྱི་ཡོད་སྟབས།  ལོ་རྒྱུས་ལ་ཕྱི་མིག་ཞིག་བལྟ་ཚེ་དཀའ་སྡུག་ཚད་མེད་མྱོང་བའི་ངལ་བ་དེ་དག་ང་དང་ཁྱོད་ཟེར་བའི་བར་ཁྱད་དེའི་དབང་གིས་བྱུང་ཡོད་པ་ང་ཚོས་གསལ་པོ་ཤེས་ཐུབ་ཀྱི་ཡོད་པ་ལྟར། ངལ་བ་ཕྲན་བུ་འཕྲད་ཀྱི་ཡོད་ཀྱང་ང་ཚོས་གཞི་རྩ་དང་པོ་མི་གཅིག་མཚུངས་ཡིན་པའི་འདུ་ཤེས་དེ་ཆེ་ཙམ་བཟུང་ནས་གཞི་རྩ་གཉིས་པ་ཆོས་ལུགས་མི་འདྲ་བ་དང་། སྐད་ཡིག་མི་འདྲ་བ། ལུང་པ་མི་འདྲ་བ་སོགས་ཀྱི་ཁྱད་པར་ཐོག་བསམ་བློ་དེ་ཙམ་གཏོང་རྒྱུ་མེད་སྐོར་བཀའ་ནན་བསྩལ་སོང་། ༸གོང་ས་མཆོག་གིས་ད་དུང་ཇི་སྲིད་ང་ཚོ་འགྲོ་བ་མི་རྣམས་གནས་པ་དེ་སྲིད་དུ་དཀའ་ངལ་ཡོང་རྒྱུ་ནི་ཆོས་ཉིད་ཡིན་པ་དང་། དཀའ་ངལ་དེ་དག་གྲོས་མོལ་གྱི་ལམ་ནས་སེལ་ཐབས་བྱེད་དགོས་པ་དང་། གལ་ཏེ་ང་ཚོའི་འཛམ་བུ་གླིང་འདི་བདེ་སྐྱིད་དང་ལྡན་པ་ཞིག་འདོད་ཚེ་ངེས་པར་དུ་དཀའ་ངལ་གང་ཞིག་འཕྲད་ཀྱང་དེ་དག་གྲོས་མོལ་གྱི་ལམ་ནས་སེལ་ཐབས་བྱེད་དགོས་པ་རེད་ཅེས་བཀའ་བསྩལ་སོང་བ་དང་། དེ་ལྟར་ཡོང་བར་ངེས་པར་དུ་ཕྱོགས་གཞན་དེར་བྱམས་པ་དང་བརྩེ་བའི་འདུ་ཤེས་ཡོད་པ་བྱེད་དགོས་པ་མཟད།  ཁོང་ཚོའི་ཐོབ་ཐང་དང་བསམ་ཚུལ་ལ་ངེས་པར་དུ་བརྩི་བཀུར་ཡང་བྱེད་དགོས། གང་ལ་ཞེ་ན་ང་ཚོ་ཚང་མ་འགྲོ་བ་མིའི་མཆེད་གྲོགས་གཅིག་པ་ཡིན་པའི་འདུ་ཤེས་དེའི་ཐོག་ནས་དཀའ་ངལ་སེལ་ཐབས་གནང་པ་ཡིན་ན་གྲོས་མོལ་དེ་དོན་སྙིང་ལྡན་པ་ཞིག་ཡོང་སྐོར་ལམ་སྟོན་བཀའ་ནན་མཛད་ཡོད་པ་རེད། ཁྱད་པར་དུ་མགོན་པོ་༸གང་ཉིད་མཆོག་གིས་སློབ་ཕྲུག་ཁྱེད་རང་ཚོ་ད་ལྟའི་དུས་རབས་ ༢༡ གི་མི་རབས་ཤ་སྟག་ཡིན་པས་དུས་རབས་འདི་བདེ་སྐྱིད་དང་ལྡན་པ་ཞིག་ཡོང་ཐབས་སུ་ད་ལྟ་ནས་བསམ་བློ་དོ་ནན་གཏང་ཐོག་ལས་འགུལ་སྤེལ་དགོས་པའི་ལམ་སྟོན་སོགས་རྒྱ་ཆེ་བསྩལ་སོང་། མགོན་པོ་༸གང་ཉིད་མཆོག་གིས་ཚོུད་གཅིག་ཙམ་རིང་གི་ལམ་སྟོན་བཀའ་སློབ་བཀྲིན་བསྩལ་གྲུབ་བསྟུན་སློབ་ཕྲུག་ཚོས་དྲི་བ་ཁག་ཅིག་ལ་ཕུལ་བར་བཀའ་ལན་ཡང་བསྩལ་ཡོད་པ་རེད། གནས་ཚུལ་ཤེས་རྟོགས་བྱུང་བར། དེ་རིང་ཉིན་རྒྱབ་ད་དུང་རྒྱ་གར་གྱི་གསར་འགོད་པ་གྲགས་ཅན་     Shekhar Gupta  མཆོག་གི་  OFF the CUFF ཞེས་པའི་བརྙན་འཕྲིན་ལས་རིམ་ཞིག་ཐོག་མགོན་༸གང་ཉིད་ལྷན་ཞུགས་གནང་རྒྱུ་ཡིན་པ་མ་ཟད།  སང་ཚེས་ ༧ ཉིན་  Jesus and Mary མཐོ་རིམ་སློབ་གཉེར་ཁང་དུ་བྱམས་བརྩེ་དང་འཇིག་རྟེན་ཀུན་ཁྱབ་འགན་ཁུར་ཐོག་བཀའ་སློབ་དང་མཐར་ཚེས་ ༩ ཉིན་ Vivekananda International Foundation བཅས་ལ་ཆིབས་བསྒྱུར་གྱིས་བཀའ་སློབ་བསྩལ་རྒྱུ་ཡིན་པ་རེད། རྩ་བའི་དེ་རིང་རྒྱལ་ས་ལྡི་ལིའི་ Convent of Jesus and Mary སློབ་གྲྭའི་མཛད་རིམ་དེ་ནི་  Itihaas ཞེས་པའི་རྒྱ་གར་གྱི་ལེགས་བྱང་དང་གནའ་བོའི་གཅེས་ནོར་སྲུང་སྐྱོབ་ཚོགས་པས་གོ་སྒྲིག་ཞུས་པ་ཞིག་ཡིན་ཞིང་། མཛད་རིམ་ཡོངས་རྫོགས་རྒྱ་གར་རྒྱལ་ཡོངས་ཀྱི་སློབ་གྲྭ་ཚང་མའི་ནང་དྲ་རྒྱ་བརྒྱུད་ནས་ཐད་སྲིང་གནང་གི་འདུག་པ་མ་ཟད། རྒྱལ་སྤྱིའི་ནང་ Jesus and mary སློབ་གྲྭའི་ཡན་ལག་ཁག་གི་ནང་དུའང་ཐད་སྲིང་གནང་ཡོད་པ་རེད།