Monthly Archives: March, 2017

ཉེ་ཆར་ཟླ་བ་འདིའི་ཕྱི་ཚེས་ ༢༢ ཕྱི་དྲོ་རྒྱ་ནག་གི་སྲིད་བློན་ Li Keqiang ཨོ་སི་ཊོ་ལི་ཡའི་ནང་དུ་གཞུང་འབྲེལ་གྱི་འཚམས་གཟིགས་ཆེད་འབྱོར་བ་དང་བསྟུན། ཡུལ་དེར་གནས་སྡོད་བོད་མི་ཚོས་ཕྱོགས་གང་ས་ནས་རྗེས་དེད་ཀྱིས་མུ་མཐུད་ངོ་རྒོལ་གནང་བཞིན་ཡོད་པ་རེད། དེའང་ཉིན་གྲངས་ལྔ་རིང་གི་གཞུང་འབྲེལ་འཚམས་དེའི་ཁྲོད་ཁ་ཉིན་ཟླ་ ༣ ཚེས་ ༢༣ ཉིན་ཨོ་སི་ཊོ་ལི་ཡའི་རྒྱལ་ས་ཁེན་སྦེ་ར་ནང་དུ་རྟེན་གཞི་བྱས་པའི་ཡུལ་དེའི་གྲོས་ཚོགས་སུ་འབྱོར་སྐབས་ཁེན་སྦེ་ར་དང་། སིཌ་ནི། དེ་བཞིན་ནོ་ར་གྲོང་ཁྱེར་གསུམ་གྱི་བོད་མི་ ༢༠༠ སྐོར་ཞིག་གིས་གྲོས་ཚོགས་ཀྱི་ཉེ་འགྲམ་དུ་བོད་མི་རྣམས་ལ་འགྲོ་བ་མིའི་ཐོབ་ཐང་དགོས། བོད་དེ་བོད་མིའི་ཡིན་པ་སོགས་ཀྱི་འབོད་ཚིག་འཁོད་པའི་འཕྲེད་དར་འདྲ་མིན་དང་བོད་ཀྱི་རྒྱལ་དར་མཁའ་དབྱིངས་སུ་འཆར་བཞིན་ངོ་རྒོལ་གྱི་ལས་འགུལ་རྒྱ་ཆེ་སྤེལ་འདུག དེ་བཞིན་ཁ་སང་ལི་ཁ་ཆང་ཡུལ་དེའི་ Sydney གྲོང་ཁྱེར་ནང་དུ་གནད་ཡོད་མི་སྣ་ཁག་ཅིག་དང་ཐུག་འཕྲད་ཀྱིས་ཚོང་འབྲེལ་གྱི་ལས་དོན་སྤེལ་བཞིན་པའི་སྐབས་བོད་མི་ལས་འགུལ་བ་ཚོས་གཙོས་པའི་ཤར་ཏུར་ཀིས་ཐན་དང་ཕ་ལུང་གྷོང་ཆོས་བརྒྱུད་ཉམས་ལེན་པ་ཁག་ཅིག་ཀྱང་ཆེད་ཕེབས་ངོ་རྒོལ་ཤུགས་ཆེ་གནང་འདུག ཁ་སང་གི་ངོ་རྒོལ་ལས་འགུལ་དེ་ཡང་ Sydney གྲོང་ཁྱེར་ནང་དུ་མི་མང་ཕོན་ཆེན་འདུ་འཛོམས་བྱུང་བའི་ལྟེ་གནས་ Martin Place ས་གནས་སུ་གནང་ཡོད་པ་དང། ཁུལ་དེའི་རྒྱ་ནག་གཞུང་ཚབ་ཀྱི་མཐུན་འགྱུར་འོག་ལི་ཁ་ཆང་ལ་རྒྱབ་སྐྱོར་གྱི་དགའ་བསུ་ཞུ་མཁན་རྒྱ་རིགས་སློབ་ཕྲུག་ཁག་ཅིག་དང་བོད་མི་ལས་འགུལ་བ་རྣམས་ས་གནས་གཅིག་ཏུ་ལས་འགུལ་སྤེལ་ཡོད་པ་ལྟར། ཕན་ཚུན་དབར་རྩོད་རྙོག་རིགས་ཕྲན་བུ་བྱུང་འདུག དེ་རིང་ཟླ་ ༣ ཚེས་ ༢༥ ཉིན་ཨོ་སི་ཊོ་ལི་ཡ་ནང་གི་ཕྱི་དྲོ་ཚོུད་ ༦།༠༠ ཐོག་སིཌ་ནི་གྲོང་ཁྱེར་གྱི་གཞུང་འབྲེལ་གསོལ་སྟོན་ཁང་དུ་རྒྱ་ནག་གི་སྲིད་བློན་འབྱོར་སྐབས་ས་གནས་དེ་ནས་རྒྱང་ཐག་རིང་པོ་མེད་པའི་སར་བོད་མི་རྣམས་ལ་ངོ་རྒོལ་སྐད་འབོད་གནང་རྒྱུའི་ཆོག་མཆན་ཐོབ་དོན་ལྟར། ལི་ཁ་ཆང་བཞེས་ལག་བཞེས་སྐབས་སུའང་བོད་མི་ཚོས་ཚོར་ཤུགས་ཆེན་པོའི་ཐོག་ནས་ངོ་རྒོལ་གནང་ཡོད་པའི་རྣམ་པ་མངོན་རྒྱུ་འདུག རྩ་བའི་རྒྱ་ནག་གི་སྲིད་བློན་ནས་ཉིན་ལྔ་རིང་གི་ Australia འི་འཚམས་གཟིགས་དེ་དེ་རིང་ནས་མཇུག་སྒྲིལ་ཟིན་གྱི་ཡོད་པ་དང་། སང་ཉིན་ New Zealand དུ་ཉིན་བཞི་རིང་གི་སྐོར་བསྐྱོད་ཆེད་ཐོན་གྱི་ཡོད་པ་རེད།  

དེ་སྔ་༸གོང་ས་མཆོག་གི་༸སྐུའི་གྱ་སྟོན་སྐབས་མགོན་པོ་༸གང་ཉིད་མཆོག་ལ་འཁྲུངས་སྐར་གྱི་འཚམས་འདྲི་ཞུས་པའི་གནད་དོན་དང་འབྲེལ་བའི་ཐོག་ནས་རྒྱ་ནག་སྐམ་ས་ཆེན་མོའི་དྲ་རྒྱ་ཁག་ཏུ་ཀུ་ཤུ་རྟགས་ཅན་ཁ་པར་ཐོན་གསར་པ་ཞིག་བཀག་སྡོམ་བྱས་འདུག དེའང་ Apple ཚོང་ལས་ཁང་གིས་ཁ་སང་རེས་གཟའ་པ་སངས་ཉིན་མཚོན་དམར་ཅན་གྱི་ཀུ་ཤུ་རྟགས་ཅན་ཁ་པར་ཐོན་གསར་པ་ཞིག་འགྲེམས་སྤེལ་བྱས་ཡོད་པ་དང་།  ཀུ་ཤུ་རྟགས་ཅན་གྱི་ཚོང་ལས་ཁང་གིས་ད་རེས་གསར་དུ་ཐོན་པའི་ཁ་པར་ཚོང་འགྲེམས་བྱས་པའི་ཁེ་ཕན་ཇི་བྱུང་རྣམས་གཉན་ནད་རེག་དུག་སྔོན་འགོག་ཐོག་ཕྱག་ལས་གནང་མཁན་གཞུང་འབྲེལ་མིན་པའི་ RED ཚོང་ལས་ཁང་དུ་སྤྲོད་རྒྱུ་རེད་འདུག ད་རེས་ཀུ་ཤུ་རྟགས་ཅན་ཁ་པར་ཐོན་གསར་པ་དེ་རྒྱ་ནག་སྐམ་ས་ཆེན་མོའི་ནང་བཀའ་སྡོམ་བྱས་སྟབས། དྲ་རྒྱ་བཀོལ་སྤྱོད་གནང་མཁན་རྒྱ་རིགས་ཚོས་རྒྱུ་མཚན་གཉིས་ཀྱི་ཐོག་ནས་ཚོད་དཔག་དང་འགྲེལ་བརྗོད་གནང་གི་འདུག དང་པོ་རྒྱ་གཞུང་གིས་གཞུང་འབྲེལ་མིན་པའི་ཚོགས་སྡེ་ཁག་གི་ཁྲིམས་སྒྲིག་གསར་བཟོ་བྱས་པ་ལྟར་གཞུང་འབྲེལ་མིན་པའི་ RED ཚོང་ལས་ཁང་དེ་དང་ཐད་ཀར་འབྲེལ་བ་ཡོད་པས་དེ་ལྟར་བཀག་འགོག་བྱས་པ་ཞིག་ཡིན་པ་དང་། གཉིས་པ་དེ་སྔ་ཕྱི་ལོ་ ༢༠༡༥ ལོའི་ཟླ་ ༧ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་དང་བསྟུན་རྒྱ་ནག་ནང་རྟེན་གཞི་བྱས་པའི་ Red ཚོང་ལས་ཁང་གིས་སྤྱི་ཚོགས་འབྲེལ་ལམ་ Instagram བརྒྱུད་ནས་མགོན་པོ་༸གང་ཉིད་མཆོག་ལ་འཚམས་འདྲི་ཞུས་པའི་རྐྱེན་གྱིས་བཀག་སྡོམ་བྱས་པར་ཚོད་དཔག་གནང་མུས་ཡིན་འདུག ཚོང་ལས་ཁང་དེས་༸གང་ཉིད་མཆོག་གི་གྱ་སྟོན་ལ་འཚམས་འདྲི་ཞུས་པའི་རྐྱེན་གྱིས་དྲ་རྒྱ་བཀོལ་སྤྱོད་པ་མང་དག་ཞིག་ལ་ཁོང་ཁྲོ་སློང་ཡོད་སྟབས། དེ་དག་གིས་རྒྱ་ནག་སྐམ་ས་ཆེན་མོའི་ནང་ཀུ་ཤུ་རྟགས་ཅན་ཁ་པར་གསར་དུ་ཐོན་པའི་མཚོན་དམར་ཅན་ RED iPhone དེ་བཀའ་སྡོམ་བྱེད་དགོས་པ་བཤད་པ་མ་ཟད། དྲ་རྒྱ་བཀོལ་སྤྱོད་པ་གཅིག་གིས་ཕྱི་རྒྱལ་གྱི་ཚོང་ལས་ཁང་ཁག་གིས་རྒྱ་ནག་གི་ཁྲོམ་རའི་ནང་དཔལ་འབྱོར་གྱི་ཁེ་དབང་ལེན་པ་དང་ཆབས་ཅིག རྒྱ་ནག་གི་བདག་དབང་ལ་དོ་ཕོག་ཤུགས་ཆེ་གཏོང་བཞིན་པ་དེར་ངོ་རྒོལ་ཡོད་ཅེས་བཤད་འདུག གཞི་རྩའི་རྒྱ་ནག་དེ་ཀུ་ཤུ་རྟགས་ཅན་གྱི་འཕྲུལ་ཆས་ཀྱི་ཁྲོམ་ར་གཙོ་བོ་ཞིག་ཡིན་པ་རེད། ཀུ་ཤུ་རྟགས་ཅན་གྱི་ཚོང་ལས་ཁང་དང་ Red ཚོང་ལས་ཁང་གཉིས་ལོ་ངོ་ ༡༠ རིང་ཟུང་འབྲེལ་གྱིས་ཐོན་སྐྱེད་གསར་བསྐྲུན་བྱས་པ་མ་ཟད། ཀུ་ཤུ་རྟགས་ཅན་ཚོང་ལས་ཁང་གིས་ཚོང་ལས་དེའི་ཐོན་རྫས་ཨ་སྒོར་ས་ཡ་ ༡༣༠ ཚོང་འགྲེམས་བྱས་ཡོད་པ་རེད།    

བཙན་བྱོལ་བོད་མིའི་འོས་བསྡུའི་སྒྲིག་གཞི་ཁོངས་སྲིད་སྐྱོང་དང་སྤྱི་འཐུས་གཉིས་ལ་སྔོན་འགྲོ་དང་དངོས་གཞི་གཉིས་དགོས་མིན་སོགས་ཀྱི་ཐད་ལ་ཐེངས་འདིའི་གྲོས་ཚོགས་སྟེང་། འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་ཀྱི་ཁྲིམས་འཆར་ཞིག་བསྣམས་ཕེབས་པ་ལྟར། འདས་པའི་གྲོས་ཚོགས་ཀྱི་ལས་ཉིན་དེའི་ཁྲོད་ཁྲིམས་འཆར་དེ་དང་འབྲེལ་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ་ལས་རིམ་ནང་ཆ་ཤས་མ་བཞེས་པར་གྲོས་ཚོགས་ནས་ཕྱིར་ཐོན་གནང་པ་དང་། དེ་དང་འབྲེལ་སྤྱི་འཐུས་རྣམ་པས་སྐྱོན་བརྗོད་དང་གཟིགས་ཚུལ་མཐུན་མིན་སོགས་གླེང་སློང་དང་བགྲོ་གླེང་ལྷུག་པོ་བྱུང་ཡོད་པ་རེད། དེ་རིང་གྲོས་ཚོགས་ཀྱི་ལས་ཉིན་བཅུ་པ་འདིའི་ཐོག་ཁྲིམས་འཆར་དེའི་བརྗོད་པ་གཉིས་པའི་སྐབས་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གི་ཚོགས་གཙོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་བཟོ་བཅོས་གྲོས་འཆར་བསྣམ་ཕེབས་རྒྱུའི་གོ་སྐབས་གནང་སྐྱོང་ཡོང་བ་ཞུས་ཡོད་པ་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཀའ་ཤག་ནས་གྲོས་ཚོགས་ཚོགས་ཐུན་རྗེས་མའི་སྟེང་ཁྲིམས་འཆར་དེའི་བཟོ་བཅོས་ཁྲིམས་འཆར་བསྣམ་ཕེབས་དགོས་པའི་ཐག་གཅོད་གནང་སོང་། གཞི་རྩའི་གྲོས་ཚོགས་ཀྱི་ལས་ཉིན་ལྔ་པའི་ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་ཚོགས་ཆུང་གི་འཆར་ཟིན་སྙན་ཐོའི་ནང་བཀའ་ཤག་གི་དགོངས་ཚུལ་དང་མི་མཐུན་པ་སྔོན་འགྲོ་དང་དངོས་གཞི་གཉིས་ཀ་སྔར་བཞིན་དགོས་པའི་རྒྱབ་གཉེར་ཞུས་ཡོད་སྟབས། སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པས་སྙན་ཐོ་འདིར་འགག་བྱ་གནང་པ་དང་འབྲེལ། བགྲོ་གླེང་ནང་ཆ་ཤས་མི་ལེན་པར་གྲོས་ཚོགས་ནས་ཕྱིར་ཐོན་གནང་ཡོད་པ་རེད། དེ་རིང་ཉིན་རྒྱབ་ལས་ཉིན་བཅུ་པ་འདིའི་ཐོག་ཁྲིམས་འཆར་དེའི་བརྗོད་པ་གཉིས་བསྐྱོད་སྐབས་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གི་དྲུང་ཆེ་སྤྱི་འཐུས་དགེ་བཤེས་སྨོན་ལམ་ཐར་ཕྱིན་ལགས་ནས་ཚོགས་ཆུང་གི་གྲུབ་དོན་ཁག་ནི་གཞི་རྐང་མང་ཚོགས་དང་ཚོགས་པ་ཁག་གི་བསམ་འཆར་གཞི་བཞག་གནང་ཡོད་པ་ལས་གང་ཟག་སུ་ཡིན་སོགས་ལ་གཞི་བཅོལ་མེད་པ་གསལ་བཤད་གནང་སོང་། ཚོགས་ཆུང་གི་དྲུང་ཆེས་ད་དུང་མུ་མཐུད་བཀའ་ཤག་གི་གསལ་བཤད་ལས་འཕྲོས་ནས་སྔོན་འགྲོ་དངོས་གཞི་གཅིག་བཟོས་པ་ལ་བརྟེན་ནས་མ་འོངས་འོས་བསྡུའི་སྐབས་༸གོང་ས་མཆོག་ཐུགས་ཕམ་བྱུང་གཞི་དང་སྤྱི་ཚོགས་ནང་བརྡབ་གསིག་ཡོང་རེ་མེད་སྐོར་དང། རྒྱ་མིའི་རྒྱུགས་ཁྱི་སོགས་ལ་དཀྲོག་གཏམ་སྤེལ་རྒྱུའི་དུས་ཚོད་མེད་པ་ཁྱབ་པ་ཏན་ནས་མེད་པའི་གྲུབ་བྱེད་ཞིབ་ཕྲ་བཀོད་གནང་ཡོད་པ་རེད། རྩ་བའི་དེ་རིང་གྲོས་ཚོགས་ཀྱི་ལས་ཉིན་བཅུ་པ་འདིའི་ཐོག་ནས་སྤྱི་འཐུས་ཚོགས་གཙོ་མཆོག་གིས་བཙན་བྱོལ་བོད་མིའི་འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཡིག་ཆ་ ༡༤ པ་དང་འབྲེལ་བའི་ཐོག་ལ་འཛིན་སྐྱོང་ལ་གྲོས་ཚོགས་ཚོགས་དུས་རྗེས་མའི་སྐབས་བཟོ་བཅོས་ཁྲིམས་འཆར་བསྣམ་ཕེབས་དགོས་སྐོར་གསུངས་ཡོད་པ་རེད།

དེ་རིང་ཟླ་ ༣ ཚེས་ ༢༤ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཨོ་སི་ཊོ་ལི་ཡའི་རྒྱལ་ཡོངས་དབྱུག་རྩེད་སྤོ་ལོ་རྩེད་འགྲན་པ་ཁག་ཅིག་ལ་མཇལ་ཁ་བསྩལ་བ་དང་འབྲེལ། སྐབས་དེར་མགོན་པོ་༸གང་ཉིད་མཆོག་གིས་རྩ་བའི་རྒྱ་གར་མི་མང་ཚོ་དབྱུག་རྩེད་སྤོ་ལོ་རྩེད་འགྲན་འདིར་དགའ་མོས་ཆེན་པོ་ཡོད་ཀྱང་། ༸སྐུ་ཉིད་མཆོག་རྩེད་འགྲན་དེའི་ཐོག་མྱོང་བ་གང་ཡང་མེད་པར་བརྟེན་དོ་སྣང་ཡང་དེ་ཙམ་མེད་ཅེས་བཀའ་སྩལ་སོང་བ་དང་། ཆེད་ལས་རྩེད་འགྲན་འདི་ལྟ་བུ་བརྒྱུད་ནས་མང་ཚོགས་མང་པོ་ཞིག་ལ་སྤྲོ་སྣང་དང་བདེ་སྐྱིད་བསྐྲུན་བཞིན་ཡོད་སྟབས། མགོན་པོ་མཆོག་གིས་རྩེད་རིགས་དེར་བསྔགས་བརྗོད་ཀྱང་མཛད་སོང་། དེ་བཞིན་༸གོང་ས་མཆོག་གིས་དེ་སྔ་༸གང་ཉིད་མཆོག་༸སྐུ་གཞོན་ནུའི་སྐབས་རྒྱ་ནག་གི་རྒྱལ་ས་པེ་ཅིང་དུ་རྒྱ་གཞུང་གི་སྲིད་བློན་ Chou En Lai དང་ལྷན་ ping Pong རྩེད་གནང་བ་དང་དེ་རྗེས་དྷ་སར་ཐོག་མར་འབྱོར་སྐབས་སུ་བྱ་བྲོ་རྩེད་གནང་སྐོར་གསུངས་ཡོད་པ་རེད། ༸གོང་ས་མཆོག་གིས་རྩེད་འགྲན་པ་དང་མཇལ་མོལ་སྐབས་གཙོ་བོ་མགོན་པ་མཆོག་གི་ཐུགས་ཀྱི་མཛད་ཁུར་ཆེན་པོ་གསུམ་གྱི་ཐོག་བཀའ་བསྩལ་མཛད་པ་ལས། འགྲོ་བ་མི་ལ་གཅིག་མཚུངས་ཀྱི་བདེ་སྐྱིད་བསྐྲུན་ཐབས། ཆོས་ལུགས་མཐུན་འབྲེལ། བོད་ཀྱི་ཆོས་རིག་འཛིན་སྐྱོང་དང་ཁོར་ཡུག་སྲུང་སྐྱོབ་ཀྱི་གལ་གནད་རང་བཞིན་སོགས་ངོ་སྤྲོད་དང་འགྲེལ་བརྗོད་གནང་སོང་།  རྩེད་འགྲན་པ་ཚོའི་ངོས་ནས་འགྲོ་བ་མི་ཞིག་ཡིན་པའི་ཆ་ནས་མ་འོངས་པར་ས་ཕྱོགས་གང་དུ་བསྐྱོད་ཀྱང་འགྲོ་བ་མི་གཅིག་འགྱུར་དང་ཆོས་ལུགས་མཐུན་སྒྲིལ་ཡོང་རྒྱུར་སྒོ་གང་ས་ནས་ཤུགས་སྣོན་བསྐྱོན་དགོས་པར་སྐུལ་མ་གནང་ཡོད་པ་རེད། ༸གོང་ས་མཆོག་གིས་རྩེད་འགྲན་པ་རྣམས་ལ་བཀའ་སློབ་བསྩལ་གྲུབ་ཟིན་རྗེས་རྩེད་འགྲན་པ་ཚོས་༸གོང་ས་མཆོག་ལ་ནང་སེམས་ཀྱི་བདེ་སྐྱིད་བསྐྲུན་ཐབས་དང་རྩེད་འགྲན་གོང་བསམ་བློ་ལྷིང་འཇགས་ཡོང་ཐབས་སོགས་ཀྱི་ཐད་བཀའ་འདྲི་མང་དག་ཞིག་ཞུས་ཡོད་པ་རེད། སྐབས་དེར་རྩེད་འགྲན་པ་ཞིག་གིས་༸གོང་ས་མཆོག་ལ་མགོན་པོ་༸གང་ཉིད་མཆོག་ནས་རྒྱ་ནག་གི་འགོ་ཁྲིད་ཚོ་དང་མཇལ་འཕྲད་གནང་རྒྱུའི་གོ་སྐབས་བྱུང་ཚེ་བཀའ་གང་གནང་རྒྱུ་ཡོད་སྐོར་བཀའ་འདྲི་ཞུས་པར་བཀའ་ལན་ལས་འཕྲོས་ཏེ་ད་ལྟའི་རྒྱ་ནག་གཞུང་འདི་དོན་དམ་གྱི་སྤྱི་ཚོགས་རིང་ལུགས་པ་ཞིག་མིན་སྐོར་བཀའ་བསྩལ་བ་དང་འབྲེལ། རྒྱ་ནག་གི་མང་ཚོགས་ཐེར་འབུམ་གཅིག་ལྷག་ཡོད་པ་དེ་དག་ལ་དངོས་ཡོད་ཀྱི་གནས་ཚུལ་ཤེས་ཆོག་པའི་ཐོབ་ཐང་ཡོད་པ་དང། རྒྱ་ནག་གཞུང་གིས་དེ་ལས་ལྡོག་སྟེ་གནས་ཚུལ་ལ་དམ་བསྒྲགས་བྱེད་བཞིན་པ་དེ་མཐའ་གཅིག་ཏུ་ནོར་འཁྲུལ་ཞིག་རེད་ཅེས་བཀའ་ནན་བསྩལ་ཡོད། ༸གོང་ས་མཆོག་ད་དུང་རྒྱ་ནག་གི་འགོ་ཁྲིད་ཚོས་བོད་ཀྱི་གནད་དོན་ཐད་དངོས་ཡོད་ཀྱི་གནས་ཚུལ་རྟོགས་ཐུབ་ཀྱི་མེད་སྐོར་བཀའ་གནང་བ་དང་འབྲེལ། མགོན་པོ་༸གང་ཉིད་མཆོག་གིས་རྒྱུན་རིང་པོ་ཞིག་ནས་ཡུ་རོབ་མཐུན་ཚོགས་ཀྱི་སྒྲོམ་གཞིར་ཡིད་མོས་ཆེན་པོ་གནང་བཞིན་པ་ལྟར། བོད་ཀྱི་གནད་དོན་ཐོག་ལའང་དེ་ལྟར་ཞིག་ཡོང་བར་ཐུགས་རེ་དང་། བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་འོག་གནས་ཏེ་རང་ཉིད་ཀྱི་ཐོུང་མ་ཡིན་པའི་སྐད་ཡིག་དང་རིག་གཞུང་། ཁོར་ཡུག་བཅས་པ་སྲུང་སྐྱོབ་གོང་སྤེལ་བྱ་རྒྱུའི་ཐོབ་ཐང་རྩོད་བཞིན་ཡོད་པ་བཀའ་སློབ་བསྐྱར་ནན་མཛད་འདུག ཨོ་སི་ཊོ་ལི་ཡའི་རྩེད་འགྲན་རུ་ཁག་གི་རུ་དཔོན་ Steve Smith ལགས་ཀྱིས་ད་ལན་༸གོང་ས་ཏཱ་ལའི་བླ་མ་ལྟ་བུའི་རྩ་ཆེ་བའི་དབུ་ཁྲིད་ཀྱི་དྲུང་ནས་བྱམས་བརྩེ་དང་འགྲོ་བ་མིའི་ཕན་ཚུན་དབར་ལ་གཅིག་འགྱུར་གྱི་འདུ་ཤེས་འཛིན་རྒྱུ་གནང་ཆེའི་རང་བཞིན་གྱི་བཀའ་སློབ་ཉན་རྒྱུའི་གོ་སྐབས་བཟང་པོ་ཐོབ་པ་འདིས་སེམས་ནང་ཞི་བདེ་ལྷིང་འཇགས་ཤིག་བྱུང་སོང་། ལྷག་དོན་དེ་རིང་མགོན་པོ་༸གང་ཉིད་མཆོག་གི་བཀའ་སློབ་ལས་ང་ཚོ་རྩེད་འགྲན་པ་རྣམས་ལ་དམིགས་བསལ་གྱི་མྱོང་བ་གསར་པ་ཞིག་ཐོབ་སོང་ཞེས་གསུངས་ཡོད། རྩ་བའི་ཨོ་སི་ཊོ་ལི་ཡའི་དབྱུག་རྩེད་སྤོ་ལོའི་རུ་ཁག་དང། རྒྱ་གར་དབྱུག་རྩེད་སྤོ་ལོའི་རུ་ཁག་དབར་གྱི་རྩེད་འགྲན་ཐེངས་ ༤ པ་དེ་སང་ཉིན་ཚེས་ ༢༥ ནས་དྷ་རྨ་ས་ལར་རྩེད་ཀྱི་ཡོད་པ་དང། ཐེངས་འདིའི་རྩེད་འགྲན་དང་བསྟུན་ཨོ་སི་ཊོ་ལི་ཡའི་དབྱུག་རྩེད་སྤོ་ལོའི་རུ་ཁག་ནས་༸གོང་ས་མཆོག་ལ་ལྷན་མཇལ་ཞུ་རྒྱུར་གསོལ་འདེབས་ཞུས་པ་ཞིག་ཡིན་འདུག

ཉན་པ།: Listen ཕབ་ལེན། Download གསེར་རྟ་ཁྲོམ་གཞུང་ནས་བོད་མི་གང་བྱུང་འཛིན་བཟུང་བྱད་བཞིན་འདུག སྤྱི་འཐུས་ཚོགས་གཙོ་མཆོག་གིས་འཛིན་སྐྱོང་ནས་འོས་བསྡུའི་སྒྲིག་གཞི་བསྐྱར་བཅོས་ཀྱི་བཟོ་བཅོས་ཁྲིམས་འཆར་བསྣམས་དགོས་པའི་ཐག་གཅོད་གནང་སོང་། ༸གོང་ས་མཆོག་ནས་ཨོ་སི་ཀྲོ་ལི་ཡའི་དབྱུག་རྩེད་སྤོ་ལོའི་རུ་ཁག་ལ་མཇལ་ཁ་བསྩལ་བ། འཕྲོད་བསྟེན་བཀའ་བློན་མཆོག་ནས་གློ་ནད་ཉིན་མོར་མང་ཚོགས་ལ་འབོད་སྐུལ་གནང་པ། མོན་རྟ་དབང་རྒྱ་ནག་གི་ཆ་ཤས་ཡིན་པ་དང་༸སྐུའི་ཡང་སྲིད་ཀྱི་འགན་དབང་རྒྱ་ནག་ལ་ཡོད་པ་བརྗོད་འདུག Friday 24/03/2017 Chinese police beat and arrest random Tibetans in Serta Amendment to Tibetan Electoral reform pushed to next session Dalai Lama meets with Australian cricketers in Dharamsala World TB Day: Health Kalon cautions Tibetan general public on TB Beijing think tank asserts Tawang part of China, warns on Dalai Lama's visit

དེ་རིང་ཟླ་ ༣ ཚེས་ ༢༤ ཉིན་སྔ་དྲོ་བོད་གསེར་རྟ་རྫོང་གི་ཁྲོམ་གཞུང་དུ་རྒྱ་གཞུང་གི་དྲག་ཆས་ཉེན་རྟོག་པ་ཕོན་ཆེན་འགྲེམས་འཇོག་གིས་བོད་ཆས་སྤྲས་པའི་བོད་མི་རྣམས་གང་བྱུང་འཛིན་བཟུང་བྱེད་བཞིན་པ་ཡོད་པ་རེད་འདུག དེའང་གནད་དོན་འབྲེལ་བའི་བརྙན་པར་ཞིག་ཕྱིར་གྱར་བྱུང་བའི་ནང་གསལ་བ་ལྟར་ན། གསེར་རྟ་རྫོང་གི་ཁྲོམ་གཞུང་དུ་ཉེན་རྟོག་པའི་མོ་ཊའི་ནང་ནས་དྲག་ཆས་སྔོན་ནག་གྱོན་པའི་ཉེན་རྟོག་པ་དུ་མ་བསླེབས་ཏེ་བོད་མི་རྣམས་ལ་གང་བྱུང་འཛིན་བཟུང་དང་ལྕགས་རྒྱུག་གིས་རྡུང་རྡེག་གཏོང་བཞིན་བོད་མི་རེ་ལ་ཉེན་རྟོག་པ་ལྔ་དྲུག་གིས་རུབ་རྡུང་བྱེད་ཞོར་ཉེན་རྟོག་པའི་སྤྱི་སྤྱོད་རླངས་འཁོར་ནང་དུ་བཙན་ཁྲིད་བྱས་པ་མ་ཟད། ཉེ་འཁོར་དུ་ཡོད་པའི་བོད་མི་དག་ལ་འཇིགས་སྐུལ་བྱེད་བཞིན་པ་ཡང་མངོན་རྒྱུ་འདུག གཞི་རྩའི་རྒྱ་ནག་གཞུང་གིས་གསེར་རྟ་ཁུལ་དུ་རྟེན་གཞི་བྱས་པའི་འཛམ་གླིང་ནང་གི་ནང་པའི་སློབ་གཉེར་ཁང་ཆེ་ཤོས་གྲས་ཡིན་ཀྱང་། གསེར་རྟ་བླ་རུང་སྒར་དུ་སྔ་ལོའི་ཟླ་ ༧ ཚེས་ ༢༠ ནས་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་ཀྱི་ལས་གཞི་སྤེལ་བའི་ཁྲོད། ད་བར་གྲྭ་ཤག་ ༡༥༠༠ ཙམ་གཏོར་བཤིག་བཏང་ཟིན་ཡོད་པ་དང། གྲྭ་བཙུན་ ༤༠༠༠ ཙམ་ཕྱིར་ཕུད་བཏང་རྗེས་དགུན་ཁའི་གནམ་གཤིས་གྲང་ངར་ཆེ་བའི་རྐྱེན་གྱིས་ལས་གཞི་རེ་ཞིག་མཚམས་འཇོག་བྱས་ཡོད་པ་རེད། འདི་ལོའི་ཟླ་ ༡ པོ་ནས་སླར་ཡང་གྲྭ་ཤག་ ༣༠༠༠ ལྷག་གཏོར་བཤིག་གཏང་རྒྱུའི་བརྡ་ཁྱབ་བཏང་ཡོད་པ་མ་ཟད། དེར་གདོང་ལེན་བྱེད་མཁན་རྣམས་ལ་ཐག་གཅོད་ནན་པོ་བྱེད་ངེས་ཡིན་པ་བརྗོད་ཡོད་པ་རེད། གནད་དོན་དེའི་ཐོག་དགོན་པའི་མཁན་པོ་རྣམས་དང་འགན་འཛིན་ལྷན་ཚོགས་ནས་གོང་རིམ་ལ་ཞུ་གཏུགས་རིམ་པ་བྱས་ཀྱང་གྲུབ་འབྲས་གང་ཡང་སོན་མེད་པ་རེད། མཁན་པོ་ཚོས་མང་ཚོགས་ལ་མུ་མཐུད་སངས་རྒྱས་ཀྱི་བཀའ་དང་། བླ་མའི་གསུང་བཅས་ལ་བརྩི་ནས་བཟོད་སྒོམ་གནང་རོགས་ཞེས་འབོད་སྐུལ་སོགས་གནང་འདུག རྒྱ་ནག་གཞུང་གིས་གྲྭ་བཙོན་ཕྱིར་ཕུད་གཏང་རྒྱུའི་གྲངས་ཐོ་གཏན་འབེབས་བྱས་པར་ཁྱོན་གྲྭ་བཙུན་ ༤༨༢༨ ཡོད་པའི་ཁོངས་ནས་མང་ཆེ་བ་ད་ལྟ་ཕྱིར་ཕུད་བཏང་ཟིན་ཡོད་པ་དང། རིང་མིན་ཉིན་ཤས་ནང་བཙུན་མ་ ༢༥༠ ཙམ་ཕྱིར་ཕུད་གཏང་རྒྱུ་ཡིན་འདུག་པ་དང། གྲྭ་ཤག་ཁྱོན་ ༤༧༢༥ གཏོར་བཤིག་གཏང་འཆར་ཡོད་པ་མངོན་གསལ་བྱས་འདུག

རྒྱ་ནག་གི་རྒྱལ་ས་པེ་ཅིང་དུ་རྟེན་གཞི་བྱས་པའི་བོད་རིག་པའི་ཞིབ་འཇུག་ལྟེ་གནས་ཁང་གིས་མོན་རྟ་དབང་དེ་རྒྱ་ནག་གི་ཆ་ཤས་ཡིན་པ་དང། རྒྱ་གར་དབུས་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་རྩོད་རྙོག་ཡོད་པའི་ས་ཁུལ་དེར་ཆིབས་བསྒྱུར་བསྐྱང་བཅུག་རྒྱུ་མེད་སྐོར་བརྗོད་པ་མ་ཟད།  ལྷག་དོན་དགོས་གལ་བྱུང་ཚེ་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐད་ལའང་ཐག་གཅོད་བྱ་རྒྱུའི་ཐོབ་ཐང་དེ་རྒྱ་ནག་ལ་མ་གཏོགས་མེད་སྐོར་བརྗོད་འདུག མཛད་འཆར་ལྟར་ན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆཚེན་པོ་མཆོག་ཟླ་ ༤ ཚེས་ ༡ ཉིན་ཐོག་མར་རྒྱ་གར་གྱི་ཨ་སམ་མངའ་སྡེ་དང་དེ་རྗེས་ཨ་རུ་ནཱ་ཅལ་མངའ་སྡེའི་མོན་རྟ་དབང་གཙོས་པའི་ས་གནས་ཁག་ཅིག་ཏུ་ཆིབས་བསྒྱུར་གྱིས་ཆོས་འབྲེལ་གྱི་མཛད་འཆར་ཁག་ཅིག་བསྐྱང་གི་ཡོད་པ་དང། རྒྱ་ནག་གཞུང་གིས་གནད་དོན་དེའི་ཐོག་རྒྱ་གར་ལ་ཉེན་བརྡ་མང་དག་ཞིག་བཏང་དང་གཏོང་མུས་ཡིན་པ་རེད། རྒྱ་གར་གྱི་ Hindustan Times གསར་ཤོག་ཐོག་གནས་ཚུལ་སྤེལ་བར་གཞིགས་ན། རེས་གཟའ་ཕུར་བུ་ཉིན་རྒྱ་ནག་གི་རྒྱལ་ས་པེ་ཅིང་དུ་བོད་རིག་པའི་ཞིབ་འཇུག་ལྟེ་གནས་ཁང་གི་མཁས་དབང་བརྒྱད་གཙོ་བཞུགས་ཐོག་གསར་འགོད་ལྷན་ཚོགས་ཤིག་ཚོགས་ཡོད་པ་དང། སྐབས་དེར་ལྟེ་གནས་ཁང་དེའི་གཙོ་འཛིན་Lian Xiangmin  ཡིས་མོན་རྟ་དབང་དེ་བོད་ཀྱི་ཆ་ཤས་ཤིག་ཡིན་པ་དང། བོད་ནི་རྒྱ་ནག་གི་ཆ་ཤས་ཡིན་སྟབས། ཁུལ་དེ་རྒྱ་ནག་གི་མངའ་ཁོངས་སུ་གཏོགས་ཀྱི་ཡོད་པར་ཐེ་ཚོམ་གང་ཡང་མེད་ཅེས་དང། རྒྱ་གར་གཞུང་གིས་ཉེ་བའི་ལོ་ཤས་ནས་ཏཱ་ལའི་བླ་མ་ཁུལ་དེར་ཆིབས་བསྒྱུར་གནང་རྒྱུའི་ཐད་རྒྱབ་སྐྱོར་དང་མཐུན་འགྱུར་གནང་བཞིན་པ་དེ་ནི་འོས་འཚམས་ཞིག་མིན་པ་དང། རྒྱ་དཀར་ནག་གཉིས་དབར་ས་མཚམས་ཀྱི་གནད་དོན་ཐད་དེ་སྔ་ནས་དཀའ་ངལ་ཞིག་ཡོད་པའི་ཁར། ༸གོང་ས་མཆོག་རྙོག་གཞི་ཅན་གྱི་ཁུལ་དེའི་ནང་དུ་ཆེད་ཕེབས་ཀྱིས་ཚོར་བ་རྣོ་བའི་བཀའ་མོལ་རིགས་གནང་ན་དེས་རྒྱ་དཀར་ནག་གཉིས་ཀྱི་འབྲེལ་ལམ་ལ་དོ་ཕོག་གཏོང་ངེས་རེད་བཅས་བརྗོད་འདུག ཁོང་པས་ད་དུང་༸གོང་ས་མཆོག་ནས་ཁུལ་དེར་ཆིབས་བསྒྱུར་མཐའ་མའི་སྐབས་རྟ་དབང་དེ་རྒྱ་གར་གྱི་ཆ་ཤས་ཡིན་ཅེས་བརྗོད་ཡོད་པ་དེ་ནི་བདེན་པ་མིན་པ་མ་ཟད། དེས་དངོས་ཀྱི་གནད་དོན་མཚོ ན་ཐུབ་ཀྱི་མེད་སྐོར་བརྗོད་པ་དང་སྦྲགས། རྟ་དབང་དགོན་པ་དེ་བོད་ནང་ཡོད་པའི་འབྲས་སྤུངས་དགོན་པའི་ཆ་ཤས་ཤིག་ཡིན་པ་དང་དེའང་བོད་ཀྱི་དགོན་སྡེ་ཆེ་གྲས་གསུམ་གྱི་ཡ་གྱལ་ཞིག་ཡིན་པ་མ་ཟད། རྟ་དབང་དགོན་པའི་དགེ་འདུན་པ་ཚོས་འབྲས་སྤུངས་དགོན་པར་བསླབ་པ་སློབ་གཉེར་གནང་པར་ཕེབས་སྲོལ་ཡོད་པ་འགྲེལ་བརྗོད་བྱས་འདུག Lian Xiangmin  ཡིས་གཞན་ཡང་༸སྐུའི་ཡང་སྲིད་ཀྱི་གནད་དོན་དང་འབྲེལ་ཏེ། ཏཱ་ལིའི་བླ་མའི་ཡང་སྲིད་ཚོལ་ཞིབ་བྱ་རྒྱུ་དེ་ལོ་རྒྱུས་དང་ཆོས་ཕྱོགས་ཀྱི་བྱེད་སྒོ་ལྟར་བྱ་དགོས་གལ་ཡིན་པ་འབྲེལ་བརྗོད་བྱས་འདུག་པ་དང་། ཁོ་པས་༸གོང་ས་མཆོག་གི་༸སྐུའི་ཡང་སྲིད་དེ་༸གང་ཉིད་ཀྱི་འཁྲུངས་ཡུལ་རྒྱ་ནག་ནང་དུ་འཁྲུངས་དགོས་ཞེས་བཤད་འདུག བོད་ནང་ལ་བོད་མི་ས་ཡ་དྲུག་ཡོད་པ་དང་། དེ་བཞིན་ནང་པ་སངས་རྒྱས་པའི་ཆོས་ལུགས་ཀྱི་རྗེས་འབྲང་པ་ཧ་ཅང་མང་པོ་ཡོད་པར་བརྟེན་ཁོང་ཚོའི་རེ་འདོད་ལ་གུས་བརྩི་ཞུས་པའི་ཐོག་ངའི་ངོས་ནས་ཏཱ་ལའི་བླ་མ་སྐུ་ཕྲེང་ ༡༤ པའི་ཡང་སྲིད་དེ་རྒྱ་ནག་ནང་དུ་འཁྲུངས་པར་རེ་བ་ཡོད་ཅེས་ཀྱང་བརྗོད་འདུག རྩ་བའི་༸གོང་ས་༸སྐྱབས་མགོན་ཆེན་པོ་མཆོག་ད་ལན་ཨ་རུ་ནཱ་ཅལ་མངའ་སྡེར་ཆིབས་བསྒྱུར་བསྐྱང་རྒྱུའི་མཛད་འཆར་ཐོས་མ་ཐག་རྒྱ་ནག་གཞུང་གིས་རྒྱུན་ལྡན་ལྟར་སྐྱོན་བརྗོད་བྱས་པ་མ་ཟད། མགོན་པོ་མཆོག་ཁུལ་དེར་ཆིབས་བསྒྱུར་གནང་རྒྱུར་དགག་པ་ཡོད་ཅེས་བརྗོད་པ་ལན་འགའ་བྱས་པ་འབྲེལ།  རྒྱ་གར་དང་རྒྱ་ནག་གཉིས་ཀྱི་ས་མཚམས་དཀའ་རྙོག་ཆེ་རུ་མི་གཏོང་བའི་རེ་བ་ཡོད་སྐོར་བརྗོད་ཡོད་པ་རེད།

ཉན་པ།: Listen ཕབ་ལེན། Download ཤེས་རིག་བཀའ་བློན་མཆོག་གིས་དཔེ་སྟོན་སློབ་གྲྭར་གཞི་རིམ་འོག་མའི་རྗེས་སློབ་ཞུགས་བྱེད་མཁན་ཉུང་དུ་འགྲོ་བཞིན་པ་གསུངས་སོང་། འཛིན་སྐྱོང་ནས་བོད་ནས་ཕེབས་མཁན་རྣམས་ལ་གཟིགས་སྐྱོང་ཆེ་མ་དྲག་ཀྱང་ཆུང་མ་དྲག་པ་ཞིག་གནང་ཡོད་གསུངས་པ། ཨོ་སི་ཊོ་ལི་ཡའི་བོད་མི་ཚོས་ལི་ཁེ་ཆང་ལ་ངོ་རྒོལ་གནང་པ། ཀརྨ་པ་རིན་པོ་ཆེ་མཆོག་གིས་ཁོར་ཡུག་སྲུང་སྐྱོབ་ཀྱི་བྱ་བ་ནི་ཆོས་དང་བཟང་སྤྱོད་གཉིས་དང་མཐུན་གྱི་ལམ་སྟོན་བསྩལ་འདུག Thursday 23/03/2017 More students opting out of post primary education from Petoen School: Sherig Kalon Home Kalon speaks on CTA’s effort towards welfare of newly arrived Tibetans Exile Tibetans welcome Chinese Premiere with protests in Canberra Karmapa opens Khoryug conference, says environment conservation concordant with Buddhist principle

གྲོས་ཚོགས་སུ་ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་གནང་སྐབས་ཤེས་རིག་བཀའ་བློན་མཆོག་གིས་མེས་དབོན་གཙུག་ལག་དཔེ་སྟོན་སློབ་གྲྭར་གཞི་རིམ་འོག་མ་ཐོན་པའི་རྗེས་སུ་མུ་མཐུད་སློབ་ཞུགས་བྱེད་མཁན་ལོ་རེ་བཞིན་ཉུང་དུ་འགྲོ་བཞིན་འདུག་ཅེས་གསུངས་སོང། དེ་རིང་ཟླ་ ༣ ཚེས་ ༢༣ ཉིན་སྔ་དྲོ་གྲོས་ཚོགས་ཀྱི་ལས་ཉིན་དགུ་པའི་ཐོག་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་སྔོན་རྩིས་ཐོག་བགྲོ་གླེང་དང་གྲོས་ཆོད་གྲོད་འཆར་ཁག་གཏན་འབེབས་གནང་སྐབས་གྲོས་ཚོགས་ཀྱི་འཐུས་མི་ཁག་ཅིག་གིས་བཞུགས་སྒར་དུ་རྟེན་གཞི་བྱས་པའི་མེས་དབོན་གཙུག་ལག་དཔེ་སྟོན་སློབ་གྲྭ་གནས་སྤོ་གནང་རྒྱུའི་ལས་འཆར་དང། སློབ་གྲྭ་དེ་བཞིན་མུ་མཐུད་རྒྱུན་གནས་ཐོག་སྤྱི་ཚོགས་ཁྲོད་དམིགས་དཔེ་འོས་པ་ཞིག་བཟོ་ཐུབ་པ་གནང་དགོས་གལ་ཡིན་པ་དང། སློབ་གྲྭ་དེའི་ནང་དུ་སློབ་ཞུགས་གནང་ཕྱོགས་སོགས་ཀྱི་ཐད་ལ་བཀའ་འདྲི་ཞུ་མཁན་དང་དགོངས་ཚུལ་ཕུལ་མཁན་སོགས་བྱུང་ཡོད། སྐབས་དེར་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་མཆོག་གིས་ད་ཡོད་མེས་དབོན་གཙུག་ལག་དཔེ་སྟོན་སློབ་གྲྭར་འཛིན་རིམ་དགུ་པ་དང་བཅུ་པ་ཆེད་འཛུགས་བྱ་རྒྱུར་རྒྱ་གར་དབུས་གཞུང་ལ་དེབ་སྐྱེལ་ཞུ་ཐབས་ཀྱི་ཐོག་ལ་འབད་བརྩོན་སྒོ་གང་ས་ནས་ཞུས་ཡོད་ཀྱང། ད་ཡོད་དཔེ་སྟོན་སློབ་གྲྭའི་ས་ཁྱོན་སོགས་ཀྱི་དཀའ་ངལ་མང་པོ་ཞིག་ལ་བརྟེན་ནས་དེབ་སྐྱེལ་ཞུ་ཐུབ་མེད། འོན་ཀྱང་ཤེས་རིག་ལས་ཁུངས་ཀྱི་ངོས་ནས་ཤེས་ཡོན་སྲིད་བྱུས་དེ་གནད་ཆེ་ཞིག་ལ་ངོས་འཛིན་མ་ཞུས་པ་ཞིག་རྩ་བ་ནས་མིན་སྐོར་གསུངས་སོང་བ་དང་། དཔེ་སྟོན་སློབ་གྲྭ་ནང་དུ་སློབ་ཞུགས་གནང་མཁན་གྲངས་འབོར་མང་པོ་ཡོད་ཀྱང་། གཞི་རིམ་འོག་མ་ཐོན་པའི་རྗེས་སུ་སློབ་གྲྭར་མུ་མཐུད་ནས་སློབ་ཞུགས་ཀྱིས་སློབ་གཉེར་བྱེད་མཁན་གྲངས་འབོར་ལོ་རེ་བཞིན་ཉུང་དུ་འགྲོ་བཞིན་འདུག་ཅེས་གསུངས་སོང། གཞན་ཡང་གྲོས་ཚོགས་སུ་དེ་རིང་ཤེས་རིག་ལས་ཁུངས་ཀྱི་སྔོན་རྩིས་དང་འབྲེལ་ནས་སློབ་གྲྭ་ཁག་གི་སློབ་ཕྲུག་ཉུང་དུ་འགྲོ་བཞིན་པའི་གནད་དོན་དང། བོད་སློབ་འཛིན་ཚོགས་ཀྱི་སློབ་གྲྭ་རྩིས་ལེན་གནང་ཕྱོགས་ཀྱི་བརྒྱུད་རིམ་ཁྲོད་སློབ་མའི་ཤེས་ཡོན་ལ་འཐུས་ཤོར་འགྲོ་སྐོར། སློབ་གྲྭ་ཁག་གི་ནང་ལ་མདུན་ལམ་སློབ་སྟོན་པའི་སྤུས་ཚད་དང། དགེ་རྒན་གྱི་གསོལ་ཕོག བདེ་དོན་སོགས་ཀྱི་སྐོར་གླེང་སློང་ཤུགས་ཆེ་གནང་ཡོད། ཤེས་རྟོགས་བྱུང་བར། འདས་པའི་ལོ་ཤས་གོང་བོད་མིིའི་སྒྲིག་འཛུགས་ཤེས་རིག་ལས་ཁུངས་ཀྱིས་བོད་སློབ་འཛིན་ཚོགས་ཁག་གི་སློབ་གྲྭ་ཁག་རྩིས་ལེན་གནང་པ་ནས་བཟུང་སྟེ་ད་ལྟའི་ཆར་སྔོན་འགྲོ་སློབ་གྲྭ་ ༣༣ དང་གཞི་རིམ་འོག་མིའི་སློབ་གྲྭ་ ༩ དེ་བཞིན་འབྲིང་རིམ་སློབ་གྲྭ་ ༥ བཅས་རྩིས་བཞེས་ཟིན་འདུག། འོན་ཀྱང་ད་དུང་སློབ་གྲྭ་ ༡༤ རྩིས་ལེན་རྒྱུ་ཡོད་པ་རེད་འདུག དེ་རིང་སྔ་དྲོའི་གྲོས་ཚོགས་ཀྱི་ཚོགས་དུས་ཐོག་རྒྱ་གར་ཕྱི་སྲིད་ལས་ཁུངས་ཀྱི་དྲུང་ཆེ་ཟུར་པ་དང་རྒྱལ་ཁབ་ཁག་ཅིག་ནང་གཞུང་ཚབ་གནང་མྱོང་མཁན་སྐུ་ཞབས་ Kanwal Sibal མཆོག་ཟུར་ཉན་དུ་ཕེབས་ཡོད་པ་རེད། བོད་མིའི་སྒྲིག་འཛུགས་ཤེས་རིགས་ལས་ཁུངས་ཀྱི་སྔོན་རྩིས་ཐོག་བགྲོ་གླེང་དང་གཏན་འབེབས་གནང་གྲུབ་རྗེས་ནང་སྲིད་ལས་ཁུངས་ཀྱི་སྔོན་རྩིས་ཐོག་ཉིན་རྒྱབ་ཚོགས་ཐེངས་གསུམ་པར་བགྲོ་གླེང་དང་གཏན་འབེབས་གནང་ཡོད།  དེ་བཞིན་ཚོགས་ཐེངས་གསུམ་པའི་རྗེས་སུ་སྤྱི་འཐུས་རྣམ་པ་བཞུགས་མོལ་ཚོགས་ཡོད།