Monthly Archives: December, 2017

དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་ཟུར་པ་ཨོ་བྷ་མ་མཆོག་རྒྱལ་ས་ལྡི་ལིའི་ ITC Maurya  གསོལ་མགྲོན་ཁང་དུ་དམིགས་བསལ་མཇལ་འཕྲད་གནང་ཡོད་པ་རེད། དེ་ཡང་ཨ་རིའི་སྲིད་འཛིན་ཟུར་པ་མཆོག་ད་རེས་རྒྱ་ནག་གཙོས་པའི་ཨེ་ཤ་ཡའི་རྒྱལ་ཁབ་ཁག་ཅིག་ནང་གོ་ལའི་ཁོར་ཡུག་དང་དཔལ་འབྱོར་སོགས་ཀྱི་གནད་དོན་དང་འབྲེལ་ཕྱོགས་ཕེབས་གནང་བཞིན་པ་ལྟར། ཁ་སང་ཁོང་རྒྱལ་ས་ལྡི་ལིར་ཕེབས་འབྱོར་བྱུང་ཡོད་པ་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་སྔ་དྲོ་གྷ་གྷལ་གནམ་ཐང་ནས་མཁའ་ལམ་བརྒྱུད་ལྡི་ལིར་ཆེད་ཕེབས་ཀྱིས་ ITC Maurya  མགྲོན་ཁང་དུ་སྲིད་འཛིན་ཟུར་པ་ཨོ་བྷ་མ་མཆོག་དང་ཚོུད་གཅིག་ཙམ་རིང་ཟུར་དུ་དམིགས་བསལ་མཇལ་མོལ་མཛད་ཡོད་པ་རེད། དབུ་ཁྲིད་རྣམ་པ་གཉིས་དབར་ཆུ་ཚོད་གཅིག་ཙམ་གྱི་མཇལ་མོལ་གནང་གྲུབ་མཚམས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐད་ཀར་བཞུགས་སྒར་རྡ་རམ་ས་ལར་ཕྱིར་ཆིབས་སྒྱུར་གནང་སོང་བ་དང་། གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་མགོན་པོ་༸གང་ཉིད་མཆོག་གིས་གསར་འགོད་པའི་བཅར་འདྲིར་བཀའ་ལན་དུ་དེ་རིང་དབུ་ཁྲིད་རྣམ་གཉིས་ཀྱི་མཇལ་མོལ་སྐབས་གཙོ་བོ་འཛམ་གླིང་འདིའི་ནང་འཕྲད་བཞིན་པའི་དཀའ་ངལ་ཁག་སེལ་ཆེད་དུ་བྱམས་བརྩེ་ལྡན་པའི་འགྲོ་བ་མི་གཅིག་འགྱུར་གྱི་འདུ་ཤེས་གོང་འཕེལ་གནང་དགོས་གལ་སྐོར་བཀའ་བསྡུར་གནང་ཡོད་པ་བཀའ་བསྩལ་ཡོད་པ་རེད། རྩ་བའི་སྐུ་ཞབས་ཨོ་བྷ་མ་མཆོག་གིས་ཕྱི་ལོ་ ༢༠༠༥ ལོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཐོག་མ་གནང་ཡོད་པ་དང་། སྐབས་དེར་ཁོང་ཨ་རིའི་གྲོས་ཚོགས་གོང་མའི་འཐུས་མི་ཡིན་པ་རེད། དེ་རྗེས་ཁོང་ཨ་རིའི་སྲིད་འཛིན་དུ་བདམས་ཐོན་བྱུང་ནས་སྔ་རྗེས་སུ་མཇལ་འཕྲད་ཐེངས་ ༤ གནང་ཡོད་པ་མ་ཟད་དེ་རིང་ཁོང་ཨ་རིའི་སྲིད་འཛིན་ལས་འགན་ནས་འཁྱུར་རྗེས་༸གོང་ས་མཆོག་དང་མཇལ་འཕྲད་ཐོག་མ་དེ་ཆགས་ཀྱི་ཡོད་པ་རེད།

དེ་རིང་ཕྱི་ཟླ་ ༡༢ ཚེས་ ༡ ཉིན་མོ་འདི་ནི་འཛམ་གླིང་གཉན་ནད་རེག་དུག་ཉིན་མོ་འམ་ World AIDS Day ཡིན་པ་དང། དེ་རིང་ཉིན་མོ་འདིར་འཛམ་གླིང་ས་ཕྱོགས་གང་སར་བྱེད་སྒོ་འདྲ་མིན་བརྒྱུད་མང་ཚོགས་ཁྲོད་ལ་ནད་གཞི་དེ་སྔོན་འགོག་ཇི་ལྟར་གནང་དགོས་པའི་ཐོག་གོ་རྟོགས་སྤེལ་ནས་སྲུང་བརྩི་ཞུ་བཞིན་ཡོད་པ་རེད། དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་དྲུང་ཆེ་ཚེ་རྒྱལ་ལགས་ཀྱིས་རྒྱལ་བལ་གཉིས་ནང་གི་བཙན་བྱོལ་བོད་མིའི་མི་འབོར་ལ་གཞིགས་པའི་གཉན་ནད་རེག་དུག་གི་ནད་གཞི་དེ་ནི་ཧ་ཅང་གི་ཛ་དྲག་ཞིག་ཆགས་ཡོད་པ་དང། མང་ཚོགས་ཚོས་ངེས་པར་དུ་ནད་གཞི་དེ་ཇི་ལྟར་སྔོན་འགོག་གནང་དགོས་པ་ཤེས་དགོས་གལ་ཡིན་པ་དང་། ལྷག་དོན་བོད་མི་ཚོས་བཙན་བྱོལ་སྤྱི་ཚོགས་ཁྲོད་ནད་གཞི་དེ་ཕོག་ཟིན་པ་ཚོར་མཐོང་ཆུང་དང་ཁྱད་གསོད་རིགས་མི་བྱེད་པར་རོགས་རམ་གང་ཐུབ་གནང་དགོས་གལ་ཡིན་པའི་འབོད་སྐུལ་ནན་པོ་གནང་སོང་། དེ་རིང་འཛམ་གླིང་གཉན་ནད་རེག་དུག་ཉིན་མོ་འདིར་འཛམ་གླིང་ས་ཕྱོགས་གང་སར་གཞུང་སྒེར་ཚོགས་པ་ཁག་གིས་མང་ཚོགས་ཁྲོད་ནད་གཞི་དེ་དང་འབྲེལ་བའི་གོ་རྟོགས་ཀྱི་བྱེད་སྒོ་འདྲ་མིན་སྤེལ་བཞིན་ཡོད་པ་དང། བཙན་བྱོལ་བོད་མིའི་བསྟི་གནས་བཞུགས་སྒར་རྡ་རམ་ས་ལར་ཆ་མཚོན་ན། འཕྲོད་བསྟེན་ལས་ཁུངས་དང་རྡ་ས་ཀུན་ཕན་ཚོགས་པ་གཉིས་ཟུང་འབྲེལ་གྱིས་ཕྱི་ཟླ་ ༡༡ ཚེས་ ༢༧ ནས་སང་ཉིན་ཕྱི་ཟླ་ ༡༢ ཚེས་ ༢ བར་ནད་གཞི་དེ་དང་འབྲེལ་བའི་སློབ་གྲྭ་ཁག་ནང་རྩོམ་ཡིག་འགྲན་སྡུར་དང། མང་ཚོགས་ཁྲོད་གཏམ་བཤད། གོ་རྟོགས་ཀྱི་ཁྲོམ་སྐོར། དེ་བཞིན་རིན་མེད་བརྟག་དཔྱད་སོགས་ཀྱི་ལས་རིམ་གནང་རྒྱུ་རེད་འདུག རྩ་བའི་གཉན་ནད་རེག་དུག་གི་ནད་གཞི་དེ་ཁྱབ་བརྡལ་བྱུང་བ་ནས་ད་བར་འཛམ་གླིང་ནང་མི་འབོར་ས་ཡ་ ༧༥ ལྷག་ལ་ནད་དེ་ཕོག་ཡོད་པ་དང་ས་ཡ་ ༣༦ ལྷག་ཙམ་ནད་གཞི་དེའི་རྐྱེན་པས་འདས་གྲོངས་སུ་གྱུར་ཡོད་པ་རེད། ད་ལྟའི་ཆར་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་གྲངས་ཐོ་ལ་གཞིགས་ན་བཙན་བྱོལ་ནང་ནད་གཞི་དེ་ཕོག་པ་བོད་མི་ ༤༠ ལྷག་ཙམ་ཆགས་ཀྱི་འདུག འོན་ཀྱང་དོན་དངོས་ཐོག་བཙན་བྱོལ་ནང་ནད་གཞི་དེ་ཕོག་པའི་གྲངས་འབོར་དེ་ལས་མང་བ་ཡོད་པ་ཚོད་དཔག་གནང་གི་ཡོད་པ་རེད། འཕྲོད་བསྟེན་ལས་ཁུངས་ཀྱི་ངོས་ནས་གཉན་ནད་རེ་དུག་ཕོག་པའི་ནད་པ་ཚོར་སྨན་གྲོན་གྱི་རོགས་སྐྱོར་དང། ཟླ་བ་དྲུག་རེ་མཚམས་སུ་གཟུགས་གཞི་ཆ་ཚང་བརྟག་དཔྱད་ཀྱི་མཐུན་འགྱུར་དང། དེ་བཞིན་ཟླ་རེར་ཟས་བཅུད་ཀྱི་དོད་སྒོར་ ༡༠༠༠ རེ་གནང་གི་འདུག ཁྱད་པར་དུ་བོད་མིའི་སྒྲིག་འཛུགས་བཀག་ཤག་ནས་གཉན་ནད་རེག་དུག་ཕོག་པའི་ནད་པ་ཚོའི་འཚོ་བའི་གནས་སྟངས་ཡར་རྒྱས་གཏང་ཕྱིར་འདི་ལོ་ཕྱི་ཟླ་ ༡༠ ནང་མོན་གྷོ་འདོད་རྒུ་གླིང་དུ་ཚེམ་བཟོ་ཁང་གི་ཞིག་ཀྱང་ཆེད་འཛུགས་གནང་ཡོད་པ་རེད་འདུག

ཉན་པ།: Listen ཕབ་ལེན། Download ༸གོང་ས་མཆོག་དང་ཨ་རིའི་སྲིད་འཛིན་ཟུར་པ་ཨོ་སྦ་མ་མཆོག་མཇལ་འཕྲད་གནང་འདུག གཉེན་ནད་རེག་དུག་ཡོད་མཁན་ཚོར་ཁད་གསོད་བྱ་རྒྱུ་མེད། ཁེ་ན་ཌའི་སྲིད་བློན་མཆོག་ནས་རྒྱ་ནག་ལྷན་དུ་འགྲོ་བ་མིའི་ཐོབ་ཐང་དང་ཆབ་སྲིད་བཙོན་པའི་གནད་དོན་གླེང་སློང་གནང་དགོས། རྒྱལ་སྤྱིའི་ནང་པའི་ཚོགས་ཆེན་ཐོག་བོད་བརྒྱུད་ནང་བསྟན་གྱི་སྐུ་ཚབ་ཀྱིས་གསུངས་བཤད་གནང་འདུག བཙན་བྱོལ་བོད་མིའི་གནས་སྟངས་ངོ་སྤྲོད། ཤ་མོ་ཚོང་ལས། Friday 01/12/2017 Dalai Lama meets with former US President Barack Obama Tibetans mark World Aids Day with awareness campaign Trudeau urged to take up rights issue on China visit Tibetan representatives participate in Intl. Buddhist Conference in Myanmar Diaspora feature: Mushroom Cultivation