Monthly Archives: August, 2018

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཚོགས་ཁྲོད་ཀྱི་གཞོན་སྐྱེས་རྣམས་ལ་ནང་སེམས་ཀྱི་ཞི་བདེ་སྐྲུན་ཐབས་སླད་གོ་རྟོགས་དང་མྱོང་བ་མེད་སྟབས་མྱོས་རྫས་རིགས་ལོངས་སུ་སྤྱོད་ཀྱི་ཡོད་པ་རེད་ཅེས་བཀའ་བསྩལ་འདུག ཟླ་བ་འདིའི་ཟླ་འགོ་ཙམ་ནས་ཧི་མཱ་ཅལ་མངའ་སྡེའི་རྫོང་ཁག་སོ་སོའི་ནང་རྟེན་གཞི་བྱས་པའི་ཉེན་རྟོག་ལས་ཁུངས་ཁག་གིས་མངའ་སྡེ་ནང་མྱོས་རྫས་རིགས་ནག་ཚོང་བྱེད་མཁན་འཛིན་བཟུང་བཀག་སྡོམ་གནང་རྒྱུ་དང་། གཞོན་སྐྱེས་རྣམས་ནས་མངའ་སྡེའི་ཁོར་ཡུག་དང་རང་ཉིད་ཀྱི་འཕྲོད་བསྟེན་བདེ་ཐབས་སླད་མྱོས་རྫས་རིགས་ཉོ་ཚོང་དང་ལོངས་སུ་སྤྱོད་རྒྱུ་མེད་སྐོར་གོ་རྟོགས་ཀྱི་ལས་འགུལ་སྤེལ་བཞིན་ཡོད་པ་ལྟར། ཁ་སང་ཀངྒར་རྫོང་དཔོན་ལས་ཁུངས་ཀྱི་སྤྱི་ཁྱབ་ཉེ་རྟོག་པས་ལས་འགུལ་དེ་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་ནས་ལམ་སྟོན་གསུང་འཕྲིན་ཞིག་གསོལ་འདེབས་ཞུས་འདུག ༸གོང་ས་མཆོག་གིས་རྒྱ་གར་ནང་ཐོག་མ་ནས་མིའི་སེམས་ཁམས་དང་འབྲེལ་བའི་སྒོམ་གྲུབ་ཉམས་ལེན་གནང་མཁན་མང་པོ་ཡོད་སྟབས། ལུང་པ་འདི་ནི་ཆོས་ཕྱོགས་དང་ཧ་ཅང་འབྲེལ་ཐག་ཉེ་པོ་ཡོད་པ་ཞིག་ལ་དགོངས་བཞེས་གནང་བཞིན་ཡོད་པ་དང་། ལྷག་པར་དུ་རྒྱ་གར་གྱི་རིག་གཞུང་ངོ་མ་དེ་ཕྱིའི་དངོས་པོ་ཡར་རྒྱས་ཁོ་ནར་དོ་སྣང་གནང་རྒྱུ་ཙམ་མིན་པར་རྒྱ་གར་གྱི་མི་རབས་གསར་པའི་གཞོན་སྐྱེས་ཚོས་རང་ཉིད་ཀྱི་གནའ་བོའི་རིག་གཞུང་ལ་དོ་སྣང་མ་གནང་བར་རིག་གནས་དེ་དག་ནང་ཡོད་པའི་ནང་སེམས་ཀྱི་ཞི་བདེ་གོང་འཕེལ་ཐོག་གོ་རྟོགས་འདང་ངེས་ཤིག་མེད་སྟབས་ཉལ་ཐག་དང་ཆང་རག་སོགས་ཀྱི་མྱོས་རྫས་སྤྱོད་ཀྱི་ཡོད་སྐོར་བཀའ་བསྩལ་འདུག མགོན་པོ་༸གང་ཉིད་མཆོག་ནས་མྱོས་རྫས་རིགས་ལོངས་སུ་སྤྱོད་ན་ལུས་སེམས་གཉིས་ཀྱི་བདེ་ཐང་ལ་གནོད་ངེས་ཡིན་སྟབས། སློབ་གྲྭའི་ནང་དགེ་རྒན་ཚོས་སློབ་མའི་ཤེས་ཡོན་ཁྲོད་ནང་སེམས་ཀྱི་ཞི་བདེ་གོང་འཕེལ་ཐད་ཐུགས་སྣང་ཆེན་པོ་གནང་དགོས་པའི་ལམ་སྟོན་མཛད་འདུག གཞི་རྩའི་ཧི་མཱ་ཅལ་མངའ་སྡེ་ནང་གི་མྱོས་རྫས་དང་འབྲེལ་བའི་ལས་གུལ་དེར་མངའ་སྡེ་འདིའི་ནང་འཚར་ལོངས་བྱུང་བའི་རྒྱ་གར་གློག་བརྙན་འཁྲབ་སྟོན་པ་ Preity Zinta ལགས་དང་སྦེ་ག་རྩེ་མཁན་ Khali ལགས། རྒྱ་གར་གྱི་རྩེད་མོ་བ་དང་སྒྱུ་རྩལ་བ་ཁག་ཅིག་ནས་རྒྱབ་སྐྱོར་དང་སྦྲགས་ཏེ་མངའ་སྡེ་ནང་མྱོས་རྫས་རིགས་ནག་ཚོང་གནང་རྒྱུ་མེད་པ་དང་། གཞོན་སྐྱེས་རྣམས་ནས་ཀྱང་དེ་དག་ལོངས་སུ་སྤྱོད་རྒྱུ་མེད་པར་འབོད་སྐུལ་ཞུ་བཞིན་འདུག

ཉེ་ལམ་ཕྱི་ལོ་ ༢༠༡༨ ཟླ་༨ ཚེས་ ༡༨ ཉིན་ནས་འགོ་འཛུགས་ཀྱིས་དུས་ཡུན་གཟའ་འཁོར་བཞི་ཙམ་རིང་བོད་རང་སྐྱོང་ལྗོངས་ཁྱབ་ཁོངས་དམའ་རིམ་སློབ་འབྲིང་ནས་འབྲིང་རིམ་སློབ་འབྲིང་དུ་འཕར་མཁན་སློབ་ཕྲུག་རྣམས་ལ་རྒྱ་ནག་གཞུང་གིས་བཙན་དབང་ཐོག་དམག་གི་ཟབ་སྦྱོང་ཞིག་སྤྲོད་བཞིན་ཡོད་པ་རེད་འདུག སློབ་གྲྭ་གནས་རིམ་གོང་མར་འཕར་མཁན་སློབ་ཕྲུག་སུ་ཡིན་རུང་ཐོག་མར་དམག་གི་ཟབ་སྦྱོང་དེར་ངེས་པར་དུ་ཞུགས་དགོས་པ་དེ་ལྟར་ཡང་། ཟབ་སྦྱོང་ལ་མ་ཞུགས་ཚེ་སློབ་གྲྭ་གོང་མར་འཕར་མ་ཐུབ་པའི་ཆ་རྐྱེན་བཟོ་རྐྱེན་དེང་སྐབས་བོད་ནང་གི་སློབ་ཕྲུག་གི་ཤེས་ཡོན་ཁ་ཕྱོགས་ལ་འགྱུར་བ་འགྲོ་བཞིན་ཡོད་པ་རེད་འདུག དེང་སྐབས་ནི་དམའ་འབྲིང་ནས་མཐོ་འབྲིང་དུ་འཕར་བའི་དུས་ཚིགས་ཡིན་པ་དང་སློབ་གྲྭ་གནས་རིམ་གང་དུ་འཕར་ཡང་ཐོག་མར་དམག་གི་ཟབ་སྦྱོང་དེར་ཞུགས་དགོས་པ་མ་ཟད་བོད་ས་ཡོངས་ནང་གཅིག་གྱུར་ཡིན་ཞིང་རྒྱ་ནག་ནང་ཡིག་ཚད་ལོན་མཁན་ཚོས་ཀྱང་དམག་སྦྱོང་དེ་གནང་དགོས་ཀྱི་འདུག དམག་སྦྱོང་གཙོ་བོ་ནི་གོམ་པ་སྤོ་སྟངས་དང་མེ་མདའ་འཕེན་སྟངས། ལག་ཏུ་དབྱུག་པ་དང་འགོག་སྲུང་ཡོ་ཆས་བཟུང་ནས་ཕ་རོལ་བར་ཇི་ལྟར་རྒོལ་བ་དང་རང་ཉིད་སྲུང་ཐབས་བྱེད་པའི་ཐད་སྦྱོང་བརྡར་སྤྲོད་རྒྱུ་ཡིན་འདུག ཕྱོགས་མཚུངས་རྒྱལ་ཁབ་སློབ་གསོ་ཅུས་ཟེར་བས་སློབ་མའི་དམག་སྦྱོང་ལ་ཤུགས་སྣོན་རྒྱག་དགོས་ཚུལ་གྱི་བརྡ་ཐོ་ཞིག་ཀྱང་བཏང་བའི་ནང་དམག་སྦྱོང་སྐབས་དོན་རྐྱེན་མི་ཡོང་བ་བྱེད་དགོས་ཚུལ་ནན་བཤད་བྱས་ཡོད་པ་མ་ཟད་དགེ་སློབ་ཀྱི་བདེ་འཇགས་སློབ་གསོར་ཤུགས་སྣོན་བརྒྱབ་སྟེ་དམག་སྦྱོང་བྱེད་སྒོ་བདེ་འཇགས་ཡོང་བའི་འགན་ལེན་བྱེད་དགོས་པ་དང་། ལྷག་དོན་དམག་སྦྱོང་གོང་ལ་དགེ་རྒན་ལ་ཟབ་སྦྱོང་སྤྲོད་དགོས་ཀྱི་འདུག སློབ་གྲྭའི་འགན་ཁུར་བས་ཀྱང་དམག་སྦྱོང་བྱེད་རིང་དམག་སྦྱོང་གི་བདེ་འཇགས་གནས་ཚུལ་ཕྱོགས་ཡོངས་ནས་ཁོང་དུ་ཆུད་པ་བྱས་ཏེ་དུས་ཐོག་ཐག་གཅོད་བྱེད་དགོས་ཚུལ་བརྗོད་ཡོད་པ་མ་ཟད་སློབ་མ་སྒྲིག་འཛུགས་བྱས་ཏེ་མེ་མདའ་དངོས་སུ་རྒྱག་པའི་དམག་སྦྱོང་མ་གནང་གོང་ངེས་པར་དུ་བདེ་འཇགས་སློབ་གསོ་སྤྲོད་པ་དང་བདེ་འཇགས་འཆར་གཞི་དང་ཐོལ་བྱུང་དོན་རྐྱེན་གྱི་འཕྲལ་སྡོམ་སྔོན་བྱུས་ཞིབ་ཕྲ་བཟོས་ནས་མེ་མདའ་རྒྱག་པའི་དམག་སྦྱོང་ཁྲོད་མི་སྣ་དང་མེ་མདའ་སོགས་བདེ་འཇགས་ཡིན་པའི་འགན་ལེན་བྱེད་དགོས་པ་བཅས་ནན་བཤད་བྱས་ཡོད་པ་རེད།

ལྷོ་ཨ་རིའི་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ནས་ཟླ་བ་འདིའི་ཚེས་ ༡༧ ཙམ་ནས་ལྷོ་ཨ་རིའི་ནུབ་ཕྱོགས་སུ་ཆགས་པའི་ Chile རྒྱལ་ཁབ་ནང་འཚམས་གཟིགས་དང་གཞུང་འབྲེལ་ལས་དོན་ཁག་ཅིག་གནང་བཞིན་ཡོད་པ་ལྟར། ཁ་ཉིན་ཚེས་ ༢༡ ཉིན་ཡུལ་དེའི་གྲོང་ཁྱེར་ Valparaíso ནང་རྟེན་གཞི་བྱས་པའི་ Chile གྲོས་ཚོགས་ཀྱི་ཚོགས་ཁང་དུ་ཡུལ་དེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ Vlado Mirosevic ལགས་ཀྱིས་གཙོས་པའི་ཚོགས་ཆུང་གི་ཚོགས་མི་དང་འབྲེལ་ཡོད་ལས་བྱེད་བཅས་ཁྱོན་གནད་ཡོད་མི་སྣ་ཉི་ཤུ་ལྷག་འདུ་འཛོམས་ཐོག་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་རང་ལུས་མེས་སྲེག་གི་གནད་དོན་སོགས་ཀྱི་ཐད་སྙན་གསེང་ཞུས་འདུགལྷག་པར་དུ་སྐུ་ཚབ་དོན་གཅོད་ཚེ་དབང་ཕུན་ཚོགས་ལགས་ནས་སྐབས་དེར་བཅར་བའི་གྲོས་ཚོགས་འཐུས་མི་དང་འབྲེལ་ཡོད་ལས་བྱེད་རྣམས་ལ་བོད་མིའི་ངོས་ནས་རྒྱ་ནག་དང་ཁ་བྲལ་རྩོད་ཀྱི་མེད་པ་མ་ཟད་བོད་རྒྱ་གཉིས་ཀྱི་གནད་དོན་ཞི་འགྲིག་ཡོང་ཐབས་སུ་བོད་མིས་རྒྱ་ནག་གཞུང་གི་རྩ་ཁྲིམས་དང་མ་འགལ་བར་གཉིས་ཕན་དབུ་མའི་ལམ་གྱི་སྲིད་བྱུས་ཐོག་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་རྩོད་བཞིན་ཡོད་པར་གསལ་བཤད་གནང་འདུག རྩ་བའི་ལྷོ་ཨ་མི་རི་ཀའི་སྐུ་ཚབ་དོན་གཅོད་ད་རེས་ Chile ནང་ཆེད་ཕེབས་ཀྱིས་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་ཐོག་བོད་དོན་སྙན་གསེང་ཞུ་བ་ཙམ་མ་ཡིན་པར་གཙོ་བོ་ཡུལ་དེའི་ Arika གྲོང་ཁྱེར་དང་རྒྱལ་ས་ Santiago བཅས་ཀྱི་ས་གནས་ཁག་ཅིག་ཏུ་ཤེས་ཡོན་སློབ་གསོ་དང་འབྲེལ་བའི་གནད་ཡོད་མི་སྣ་འདྲ་མིན་མཇལ་འཕྲད། དེ་བཞིན་གསུང་བཤད་དང་བགྲོ་གླེང་སོགས་ཀྱི་ལས་རིམ་མང་དག་ཞིག་གི་བརྒྱུད་༸གོང་ས་མཆོག་གི་དགོངས་གཞི་ལྟར་འགྲོ་བ་མིའི་བཟང་སྤྱོད་གོང་འཕེལ་གཏོང་ཐབས་དང་འབྲེལ་བའི་ཆོས་ལུགས་ལ་མ་བརྟེན་པའི་བཟང་སྤྱོད་འམ་ཚུལ་སྤྱོད་ཤེས་ཡོན་སློབ་གསོ་ཞེས་པའི་བསླབ་གཞི་གཏན་འབེབས་གནང་ཕྱོགས་ཀྱི་ལས་རིམ་མང་དག་གི་ཐོག་ལྷན་ཞུགས་གནང་འདུག ཆི་ལི་རྒྱལ་ཁབ་ནང་ཆོས་ལུགས་ལ་མ་བརྟེན་པའི་བཟང་སྤྱོད་འམ་ཚུལ་སྤྱོད་ཤེས་ཡོན་སློབ་གསོ་ཞེས་པ་དེ་ཐོག་མའི་འཆར་ Arica གྲོང་ཁྱེར་ནང་གི་གཞུང་འབྲེལ་གྱི་སློབ་གྲྭ་ཞིག་ཏུ་ལོ་གཉིས་ཙམ་གོང་ནས་ཚོད་ལྟ་དབུ་འཛུགས་གནང་ཡོད་པ་དང་། སྐུ་ཚབ་དོན་གཅོད་མཆོག་གིས་འགྲེལ་བརྗོད་གནང་དོན་ལྟར་ན་ད་ཆ་ Chile ནང་ལས་གཞི་དེར་དོ་སྣང་གནང་མཁན་ཇེ་མང་དུ་འགྲོ་བཞིན་ཡོད་པ་རེད་འདུག ཁོང་གིས་ད་དུང་སྤྱིར་ལྷོ་ཨ་མི་རི་ཀ་ལྟ་བུ་རྒྱ་ནག་གི་ཤུགས་རྐྱེན་ཆེན་པོ་ཡོད་པའི་རྒྱལ་ཁབ་ནང་བོད་དོན་ཐོག་ཆབ་སྲིད་རྐྱང་པའི་ལས་དོན་གྲུབ་རྒྱུ་དཀའ་ནའང་། ད་ཆ་རྒྱལ་ཁབ་དེའི་ནང་ཕྱིའི་དངོས་པོ་ཡར་རྒྱས་ལ་བརྟེན་ནས་ནང་སེམས་ཀྱི་དཀའ་ངལ་ཇེ་མང་འཕྲད་མུས་ཁྲོད་དཀའ་ངལ་དེ་དག་སེལ་ཐབས་སུ་ཡུལ་དེའི་གྲོས་ཚོགས་འཐུས་མིས་གཙོས་གཞུང་འབྲེལ་མི་སྣ་དང་དགེ་རྒན་ཚོས་༸གོང་ས་མཆོག་གི་དགོས་གཞི་གཞིར་བཅོས་ཐོག་ཚུལ་སྤྱོད་ཤེས་ཡོན་སློབ་གསོ་སྤེལ་རྒྱུའི་ལས་གཞི་ཐད་དམིགས་བསལ་གྱིས་དོ་སྣང་གནང་གི་ཡོད་སྟབས། ལྷོ་ཨ་མི་རི་ཀའི་མང་ཚོགས་ཀྱི་ངོས་ནས་དེའི་བརྒྱུད་བོད་ཀྱི་གནད་དོན་ཐོག་ལའང་ཐུགས་ཁུར་ཆེན་པོ་གནང་བཞིན་ཡོད་པར་འགྲེལ་བརྗོད་གནང་ཡོད།

ཉེ་ཆར་ཟླ་ ༨ ཚེས་ ༡༣ ཉིན་མངའ་རིས་སྤྱི་མཐུན་ཚོགས་པ་དབུ་བརྙེས་ནས་ལོ་ངོ་ ༢༥ འཁོར་བའི་དུས་དྲན་མཛད་སྒོ་དང་བསྟུན། ཚོགས་པའི་ངོས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ཕྱག་རྟགས་ཕུལ་རྒྱུ་དང་སྦྲགས་ནས་༸དཔལ་ལྡན་དགའ་ལྡན་ཕོ་བྲང་ཡིག་ཚང་བརྒྱུད་ཇི་ལྟར་གསོལ་འདེབས་ཞུས་དོན་བཞིན་ཁ་སང་ཟླ་ ༨ ཚེས་ ༢༢ ཉིན་སྔ་དྲོ་༸རྒྱལ་བའི་ཕོ་བྲང་དུ་མངའ་རིས་སྤྱི་མཐུན་ཚོགས་པའི་ཚོགས་གཙོ་སྦྲེལ་གཞོན་གྱིས་དབུས་པའི་ཚོགས་མི་ཡོངས་ནས་༸གོང་ས་མཆོག་ལ་བཀའ་དྲིན་རྗེས་དྲན་གྱི་ཕྱག་རྟགས་འབུལ་ལམ་ཞུས་པ་ཡོད་པ་དང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་བསྩལ་འདུག ༸དཔལ་ལྡན་དགའ་ལྡན་ཕོ་བྲང་ཡིག་ཚང་ནས་༸གོང་ས་༸སྐྱབས་མགོན་ཆེན་པོ་མཆོག་གིས་མངའ་རིས་སྤྱི་མཐུན་ཚོགས་པའི་ཚོགས་མི་རྣམས་ལ་བཀའ་སློབ་བསྩལ་བའི་བརྙན་ཐུང་ཞིག་ཡོངས་བསྒྲགས་འདོན་སྤེལ་གནང་བའི་ནང་མགོན་པོ་༸གང་ཉིད་མཆོག་གིས་དེ་སྔ་བོད་དེ་རང་བཙན་གཙང་མའི་རྒྱལ་ཁབ་གཅིག་ཡིན་པ་རྒྱ་ཡིག་ཐོག་རྒྱ་ནག་རང་གི་ལོ་རྒྱུས་ནང་གསལ་པོ་འཁོད་ཡོད་པ་དེ་ལྟར་ཡང་། ཕྱི་ལོ་ ༡༩༧༤ ལོ་ནས་བཟུང་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱ་གཉིས་ཀར་སྨན་པའི་དབུ་མའི་ལམ་གྱི་སྲིད་བྱུས་དེ་ཕྱག་བསྟར་དབུ་འཛུགས་གནང་སྐོར་བཀའ་བསྩལ་དང་ཆབས་ཅིག་ཏུ་བོད་རྒྱའི་དཀའ་རྙོག་སེལ་རྒྱུའི་ཐབས་ལམ་ཡག་ཤོས་དེ་གཉིས་སྨན་དབུ་མའི་ལམ་ཡིན་པར་བཀའ་བསྩལ་མཛད་འདུག རྩ་བའི་མངའ་རིས་སྤྱི་མཐུན་ཚོགས་པ་དེ་ཐོག་མར་ཕྱི་ལོ་ ༡༩༩༣ ཟླ་ ༨ ཚེས་ ༡༣ ཉིན་དབུ་འཛུགས་གནང་ནས་མི་ལོ་ ༢༥ ཧྲིལ་པོ་འཁོར་གྱི་ཡོད་པ་ལྟར། ཉེ་ཆར་རྒྱ་གར་ལྷོ་ཕྱོགས་མོན་གྷོ་འདོད་དགུ་གླིང་གཞིས་ཆགས་སུ་ཚོགས་པ་དབུ་བརྙེས་པའི་དངོས་གཞིའི་མཛད་སྒོ་དང། དེ་རྗེས་ཚོགས་པའི་འགན་འཛིན་ལྷན་ཚོགས་ཐེངས་ ༡༨ པ་དེ་ཚོགས་ཐོག་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཇི་གནང་ལྟར་བཀའ་གསུང་ཞུ་རྒྱུ་དང་གཉིས་སྨན་དབུ་མའི་ལམ་གྱི་སྲིད་བྱུས་ཐོག་ཤར་བསྐྱོད་གནང་རྒྱུ་སོགས་ཀྱི་གྲོས་ཆོད་ཁག་ཅིག་བཞག་པ་རྣམས་མཇལ་ཁའི་སྐབས་༸གོང་ས་མཆོག་ལ་སྤྱན་འབུལ་ཞུས་འདུག ཚོགས་པའི་ངོས་ནས་ཁ་སང་ཚོགས་པ་དབུ་བརྙེས་ནས་མི་ལོ་ ༢༥ ཧྲིལ་པོ་འཁོར་བའི་མཇུག་སྡོམ་མཛད་སྒོ་དང་བསྟུན། ཕྱི་དྲོ་གངས་སྐྱིད་སྤྱི་ཐབས་སུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་གནད་ཡོད་མི་སྣ་ཁག་ལ་གསོལ་སྟོན་རྒྱལ་པ་ཞིག་འདེགས་འབུལ་ཞུས་ཡོད་པ་རེད།

མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་བོད་མིའི་སྐད་ཡིག་ལས་འགུལ་བ་བཀྲིས་དབང་ཕྱུགས་ལགས་དང་ཁོང་གི་ཁྲིམས་རྩོད་པ་གཉིས་ཀྱི་ཞུ་གཏུག་ལ་ངོས་ལེན་མ་བྱས་པ་དང་ཆབས་ཅིག འདི་ལོའི་ཕྱི་ཟླ་ ༥ པའི་ནང་མཚོ་སྔོན་ཞིང་ཆེན་ཡུལ་ཤུལ་ཁུལ་འབྲིང་རིམ་མི་དམངས་ཁྲིམས་ཁང་གིས་ཁོང་ལ་ཁ་བྲལ་བརྒྱུད་སྐུལ་བྱས་པའི་ཉེས་མིང་འོག་ལོ་ལྔའི་ཁྲིམས་ཐག་བཅད་པ་དེ་རང་སོར་བཞག་འདུག བཀྲིས་དབང་ཕྱུག་ལགས་ཀྱི་ཁྲིམས་རྩོད་པ་སྐུ་ཞབས་ Liang Xiajun ལགས་ཀྱིས་རང་གི་Twitter དྲ་གནས་ཐོག་དེ་རིང་སྤེལ་བའི་གནས་ཚུལ་ནང་གསལ་ལྟར་ན། མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཟླབ་འདིའི་ཚེས་ ༡༣ ཉིན་བཀྲིས་དབང་ཕྱུག་ལགས་ཀྱི་གྱོད་དོན་ཁྲིམས་བཤེར་བྱས་ཡོད་་ཀྱང་། སྐུ་ཞབས་ཁོང་ལ་གྱོད་གཞི་དེ་དང་འབྲེལ་བའི་བཅད་ཁྲ་དེ་ཁ་སང་མ་གཏོགས་བཏང་འབྱོར་བྱུང་མེད་པ་མ་ཟད་ཁྲིམས་བཤེར་སྐབས་བཀྲིས་དབང་ཕྱུག་ལགས་ཀྱི་ནང་མི་གཅིག་ཀྱང་ཁྲིམས་ཁང་ནང་བཏང་མེད་པ་དང་ཁྲིམས་བཤེར་མཇུག་སྒྲིལ་རྗེས་ཐུག་འཕྲད་བྱེད་བཅུག་འདུག རྩ་བའི་ཡུལ་ཤུལ་ནང་རྒྱུན་དུ་ཚོང་ལས་གཉེར་མཁན་བོད་མི་བཀྲིས་དབང་ཕྱུག་ལགས་ནས་རང་ཉིད་ཀྱི་ཚ་མོས་གཙོས་པའི་བོད་ས་ཁྱོན་ཡོངས་ཀྱི་བོད་ཕྲུག་རྣམས་ལ་བོད་ཀྱི་སྐད་ཡིག་སློབ་གཉེར་གྱི་གོ་སྐབས་མེད་པ་གཟིགས་ཏེ། བོད་ཀྱི་སྐད་ཡིག་བདག་དབང་རྩོད་ལེན་སླད་ས་གནས་སྲིད་གཞུང་དང་། རྗེས་སུ་རྒྱ་ནག་གི་རྒྱལ་ས་པེ་ཅིང་དུ་ཕེབས་ནས་ཁྲིམས་ཁང་དང་དབུས་བརྙན་འཕྲིན་ལས་ཁང་བཅས་ལ་ཞུ་གཏུག་ལན་མང་གནང་བ་མ་ཟད་གནད་དོན་དེ་དང་འབྲེལ་ཨ་རིའི་ནིའུ་ཡོག་དུས་བབ་ཀྱི་དམིགས་བསལ་བཅར་དྲིའི་ལས་རིམ་ཞིག་གི་ཐོག་ལྷན་ཞུགས་གནང་རྗེས་རྒྱ་ནག་གཞུང་གིས་ ༢༠༡༦ ལོ་འགོར་ཁོང་འཛིན་བཟུང་གིས་ལོ་གཉིས་ཙམ་བཀག་ཉར་རྗེས་འདི་ལོའི་ཕྱི་ཟླ་དང་པོའི་ནང་ཁོང་གི་གྱོད་གཞིའི་ཐོག་ཞིབ་དཔྱོད་དང་ཕྱི་ཟླ་ ༥ པའི་ནང་ཁོང་ལ་རྒྱལ་ཁབ་ཁ་བྲལ་བརྒྱུད་སྐུལ་གྱི་ཉེས་མིང་འོག་ལོ་ལྔའི་བཙོན་འཇུག་ཁྲིམས་ཐག་བཅད་ཡོད་པ་རེད། བཀྲིས་དབང་ཕྱུག་ལགས་སུ་ཁྲིམས་ཐག་དེ་ལྟར་བཅད་པ་དེར་བོད་མི་དང་བོད་དོན་རྒྱབ་སྐྱོར་བ་ཙམ་མ་ཟད། རྒྱལ་སྤྱིའི་འགྲོ་བིའི་ཐོབ་ཐང་ཚོགས་པ་འདྲ་མིན་ཁག་དང་། ལྷག་པར་དུ་རྒྱལ་ཚོགས་ཀྱི་ཚན་པ་འདྲ་མིན་ཁག་གི་དམིགས་བསལ་སྐུ་ཚབ་རྣམས་ནས་ཐུགས་ཕམ་གྱི་རྣམ་པ་ཤུགས་ཆེ་བཏོན་པ་དང་འབྲེལ། རྒྱ་གཞུང་ལ་ཁོང་འཕྲལ་མ་ཉིད་དུ་གློད་བཀྲོལ་དགོས་པའི་ཞུ་སྐུལ་གནང་བ་མ་ཟད་སྐུ་ཞབས་ Liang Xiaojun ལགས་ནས་བཀྲིས་དབང་ཕྱུག་ལགས་ཀྱིས་རང་ཉིད་ལ་ནག་ཉེས་གཡོག་པ་དེར་ངོས་ལེན་གནང་མེད་པ་དང་འབྲེལ་སེམས་ཐག་ཆོད་པོའི་ངང་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་ལ་གྱོད་གཞི་དེའི་ཐོག་ཞུ་གཏུག་བྱས་ཡོད་སྐོར་གསུངས་ཡོད་པ་རེད།

ཉན་པ།: Listen ཕབ་ལེན། Download ལི་ཐོ་ནི་ཡའི་གྲོས་ཚོགས་འཐུས་མི་ཁག་ཅིག་བོད་དུ་འཚམས་གཟིགས་ཕེབས་པ་དེ་རྒྱ་ནག་གི་སྲིད་བྱུས་ལ་རྒྱབ་སྐྱོར་གནང་བ་ཞིག་རེད་ཅེས་གསུངས་འདུག ལྔ་དང་ལྔ་བཅུའི་གཞོན་སྐྱེས་ཚོགས་འདུ་སྐོར་གླེང་མོལ་ཞུས་པ། ཀེ་ར་ལ་ནང་ཆུའི་འཇིག་པའི་དབང་གིས་གོད་ཆག་ཕོག་པར་བོད་མི་ཚོང་པ་ཚོས་རོགས་སྐྱོར་གནང་བ། བཀའ་སློབ་ལས་རིམ། ༸གོང་ས་མཆོག་ནས་ལྔ་དང་ལྔ་བཅུའི་གཞོན་སྐྱེས་ཚོགས་འདུར་བཅར་བའི་ན་གཞོན་ཚོར་བསྩལ་བའི་བཀའ་སློབ། Wednesday 22/08/2018 Lithuanian NGOs say MPs’ Tibet visit will demonstrate acceptance of Beijing's policies Five Fifty Youth Forum concludes with 55 strategic action plans Tibetans in Kodaikanal expresses Solidarity with Kerala Flood victims FEATURE: Dalai Lama speech to Five Fifty Youth Forum participants

བཞུགས་སྒར་དྷ་རྨ་ས་ལའི་ཉེ་འདབས་སུ་རྟེན་གཞི་བྱས་པའི་ཨིམ་པིརེལ་ Imperial གསོལ་མགྲོན་ཁང་དུ་ཟླ་བ་འདིའི་ཚེས་ ༡༧ ནས་ ༢༠ བར་མ་འོངས་བོད་ཀྱི་མདུན་ལམ་ཞེས་པའི་བརྗོད་གཞིའི་ཐོག་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཚོགས་ཡོད་པ་ལྟར། ཐེངས་འདིའི་ཚོགས་འདུའི་ཐོག་ཚོགས་བཅར་བ་བོད་རིགས་ན་གཞོན་ ༡༠༠ ཙམ་ནས་མཉམ་ཞུགས་གནང་ཡོད་པ་ཚོས་དབུས་བོད་མིའི་སྒྲིག་འཛུགས་ཀྱི་ངོས་ནས་གང་གནང་དགོས་པའི་ཐོག་དགོངས་འཆར་ཁྱོན་ ༣༥ དང་གཞོན་སྐྱེས་དོ་བདག་ནས་གནང་ཐུབ་རྒྱུའི་དགོངས་འཆར་ཁྱོན་ ༢༠ བཅས་ལྔ་དང་ལྔ་བཅུའི་ཐབས་བྱུས་ལྡན་པའི་ལག་བསྟར་ལས་འཆར་མི་འདྲ་བ་ ༥༥ ཙམ་ཕུལ་འདུག ལྔ་དང་ལྔ་བཅུའི་གཞོན་སྐྱེས་ཚོགས་འདུ་སྤྱི་ཡོངས་ཐོག་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་སུ་བཅར་འདྲི་ཞུས་ཡོད།

ཡོ་རོབ་རྒྱལ་ཁབ་ལི་ཐོ་ནི་ཡའི་གྲོས་ཚོགས་འཐུས་མི་ལྔ་ནས་བོད་ནང་འཚམས་གཟིགས་སུ་ཕེབས་རྒྱུ་དང་ཁུལ་དེའི་ས་གནས་གཞུང་གི་སྐུ་ཚབ་དང་ཐུག་འཕྲད་གནང་རྒྱུ་འཆར་གཞི་ཡོད་སྟབས། ལི་ཐོ་ནི་ཡའི་གཞུང་འབྲེལ་མ་ཡིན་པའི་ཚོགས་པ་ཁག་ནས་གྲོས་ཚོགས་འཐུས་མི་བོད་དུ་འཚམས་གཟིགས་སུ་ཕེབས་རྒྱུ་དེ་ནི་རྒྱ་ནག་གི་བོད་ནང་དྲག་པོའི་བཀོལ་སྤྱོད་ཀྱི་སྲིད་བྱུས་དེར་ངོས་ལེན་དང་རྒྱབ་སྐྱོར་གནང་བ་ཞིག་མཚོན་གྱི་ཡོད་སྐོར་གསུངས་འདུག དེ་རིང་ The Baltic Times གསར་ཁང་གི་དྲ་གནས་ཐོག་གནས་ཚུལ་སྤེལ་བར་གཞིགས་ན། ལི་ཐོ་ནི་ཡའི་ཆབ་སྲིད་ཚོགས་པ་འདྲ་མིན་བཞི་ལས་གྲུབ་པའི་གྲོས་ཚོགས་འཐུས་མི་ལྔ་དེ་རིང་བོད་ལ་འཚམས་གཟིགས་ཆེད་ཕེབས་ཐོན་གནང་གི་ཡོད་པ་དང་།  ཁོང་རྣམ་པ་ཚང་མ་རྒྱ་ནག་སྤྱི་མཐུན་རྒྱལ་ཁབ་དང་འབྲེལ་མཐུད་གནང་མཁན་གྲོས་ཚོགས་ཚོགས་ཆུང་གི་འཐུས་མི་ཤ་སྟག་རེད་འདུག  སྐུ་ཚབ་ཚོགས་ཁག་དེའི་ངོས་ནས་བོད་ནང་གི་འཚམས་གཟིགས་ཁྲོད་ས་གནས་གཞུང་གི་སྐུ་ཚབ་དང་བོད་རང་སྐྱོང་ལྗོངས་ཀྱི་འཐུས་མི་ཚོགས་ཆེན་གྱི་རྒྱུན་ལས་ལྷན་ཚོགས་ཀྱི་ཚོགས་གཙོ་དང་ཐུག་འཕྲད་གནང་རྒྱུ་ཡིན་པ་ལྟར། གྲོས་ཚོགས་འཐུས་མི་སྐུ་ཞབས་ Algirdas Butkevicius ལགས་ཀྱིས་ད་རེས་བོད་ནང་གི་འཚམས་གཟིགས་བརྒྱུད་ས་གནས་གཞུང་གི་སྐུ་ཚབ་དང་ལྷན་ས་གནས་མི་མང་གི་གནས་སྟངས་སྐོར་གླེང་སློང་གནང་རྒྱུ་ཡིན་སྐོར་གསུངས་འདུག ཐེངས་འདིའི་འཚམས་གཟིགས་དེར་ལི་ཐོ་ནི་ཡའི་ནང་རྟེན་གཞི་བྱས་པའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་དང་བོད་དོན་རྒྱབ་སྐྱོར་ཚོགས་པ་བཅས་ནས་གྲོས་ཚོགས་འཐུས་མི་དེ་དག་ཁུལ་དེར་བསྐྱོད་པ་ཙམ་གྱིས་རྒྱ་ནག་གི་སྲིད་བྱུས་ལ་ངོས་ལེན་དང་རྒྱབ་སྐྱོར་གནང་བའི་རྣམ་པ་ཞིག་མངོན་སྐོར་གསུངས་འདུག འོན་ཀྱང་སྐུ་ཚབ་ཚོགས་ཁག་དེ་སྣེ་ཁྲིད་གནང་མཁན་གྲོས་ཚོགས་འཐུས་མི་སྐུ་ཞབས་ Butkevicius ལགས་ཀྱིས་འདི་ལོའི་ཟླ་བ་ ༦ པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལི་ཐོ་ནི་ཡའི་ནང་ཆིབས་བསྒྱུར་བསྐྱངས་པ་དང་འབྲེལ་ཏེ་ད་རེས་ཁོང་རྣམས་རྐང་བོད་ནང་ཆེད་ཕེབས་གནང་བ་དེའི་བརྒྱུད་བོད་ཀྱི་གནད་དོན་སྐོར་ཕྱོགས་ཡོངས་ཀྱི་གོ་རྟོགས་ཟབ་ཏུ་འགྲོ་རྒྱུ་དང་དངོས་ཡོད་གནས་ཚུལ་ལ་གཞིར་བཞག་ཐོག་ཐག་གཅོད་གང་དགོས་མིན་ཤེས་ཐུབ་རྒྱུ་ཡིན་པ་གསུངས་འདུག ཁོང་གིས་དེ་སྔ་ལི་ཐོ་ནི་ཡའི་རྒྱལ་ཁབ་ནང་༸གོང་ས་མཆོག་ཆིབས་བསྒྱུར་བསྐྱངས་སྐབས་གནད་དོན་འགའ་རས་ཐོག་དགོངས་བཞེས་གནང་བ་དང་སྦྲགས། ད་རེས་ཀྱི་འཚམས་གཟིགས་དེའི་ཁྲོད་དགོང་ཚིགས་ཀྱི་དུས་ཚིགས་ཤིག་དང་བསྟུན་ང་ཚོས་རྒྱ་ནག་གི་སྐུ་ཚབ་དང་ལྷན་བོད་ཀྱི་གནད་དོན་གླེང་རྒྱུ་ཡིན་ཞེས་གསུངས་འདུག ལི་ཐོ་ནི་ཡའི་བོད་དོན་རྒྱབ་སྐྱོར་ཚོགས་པའི་འགན་འཛིན་སྐུ་ཞབས་ Vytis Vidunas ལགས་ཀྱིས་གྲོས་ཚོགས་འཐུས་མི་ལྔ་པོ་དེ་དག་བོད་དུ་འཚམས་གཟིགས་སུ་ཕེབས་རྒྱུ་དེ་ནི་བསུན་གཙེར་ཅན་ཞིག་དང་ཡིད་མུག་སྐྱེ་བའི་གནད་དོན་ཞིག་ཡིན་པ་གསུངས་འདུག  ཁོང་གིས་ཁོང་ཚོ་བོད་དུ་འཚམས་གཟིགས་སུ་བསྐྱོད་པ་དང་གཞུང་གི་མི་སྣ་ཐུག་འཕྲད་དུ་བཅར་བ་དེ་རྒྱ་ནག་གཞུང་གིས་ཁུལ་དེར་འཛིན་པའི་སྲིད་བྱུས་ལ་རྒྱབ་སྐྱོར་དང་ངོས་ལེན་གྱི་རྣམ་པ་ཡིན་པ་མ་ཟད་སྒོས་སུ་ང་ཚོའི་སྲིད་དོན་པ་རྣམས་ཨུ་རུ་སུའི་དབང་སྒྱུར་འོག་ཡོད་པའི་ Crimea ལྟ་བུ་རྒྱལ་ཁབ་གཞན་གྱི་བཙན་འཛུལ་འོག་ཡོད་པའི་ལུང་པར་བསྐྱོད་ཀྱི་མེད་པ་གསུངས་འདུག ལི་ཐོ་ནི་ཡའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འཐུས་མི་ Monika Navickiene ལགས་ཀྱིས་གྲོས་ཚོགས་ཀྱི་འཐུས་མི་རྣམས་རྒྱ་ནག་དུ་འཚམས་གཟིགས་སྐབས་གོ་སྐབས་བཟུང་ཐོག་རྫ་དྲག་གི་གནད་དོན་རྣམས་གླེང་སློང་བྱེད་དགོས་པ་ཞུ་འབོད་དང་སྦྲགས། ཁོང་ཚོས་རྒྱ་ནག་ནང་ཕྱིན་ནས་ལེགས་པའི་ཆ་གཅིག་པུ་བཤད་ཚེ་ངའི་བསམ་པར་འཚམས་གཟིགས་དེ་ལས་ཁེ་ཕན་ཡོང་རྒྱུ་མིན་པ་གསུངས་འདུག རྩ་བའི་ད་རེས་ཀྱི་འཚམས་གཟིགས་དེར་ལི་ཐོ་ནི་ཡའི་གྲོས་ཚོགས་འཐུས་མི་ཙམ་མིན་པར་ Latvia དང་ Estonia འི་གྲོས་ཚོགས་འཐུས་མི་ཁག་ཅིག་ཀྱང་ཕེབས་རྒྱུ་རེད་འདུག

ཉན་པ།: Listen ཕབ་ལེན། Download ན་གཞོན་ཉམས་ཞིབ་པས་རྒྱ་ནག་དང་རྒྱལ་སྤྱིའི་སྡིངས་ཆར་ཁ་བལྟས་ནས་ཕྱག་ལས་གནང་གལ་ཡིན་པ་གསུངས། རྒྱ་གར་ལྷོ་ཕྱོགས་སུ་ཆུ་ལོག་གིས་གནོད་འཚེ་ཕོག་ཡུལ་ལ་དགོན་སྡེ་ཁག་ནས་རོགས་རམ། རྒྱ་ནག་བདེ་སྲུང་བློན་ཆེན་རྒྱ་གར་ལ་སླེབས་པ་ནི་འབྲེལ་ལམ་བཟང་དུ་འགྲོ་བའི་མཚོན་རྟགས་ཡིན་པ་བརྗོད་འདུག བོད་པའི་བེུད་གཅིག་གི་འབོད་སྒྲ་ཞེས་པའི་བརྙན་ཐུང་འདོན་སྤེལ། དམིགས་བསལ་ལེ་ཚན། གཞས་པ་བློ་བཟང་ཉི་མ་ལགས་ཀྱི་བླངས་པའི་གྲོང་ཁྱེར་ཞེས་པའི་གླུ་གཞས། Tuesday 21/08/2018 4th Young Tibetan Research Scholars’ Conference kicks off Tibetan monks reach out to flood victims in South India Chinese Defense Minister visits India to improve growing ties The Inner Voice of a Tibetan Girl: Stories of Tibetans launch new film MUSIC FEATURE: ‘City’ by Lobsang Nyima