Monthly Archives: March, 2019

ཉན་པ།: Listen ཕབ་ལེན། Download བརྟན་བཞུགས་བསྟར་འབུལ་ཞུ་ཕྱོགས་དང་འབྲེལ་བའི་སྐོར། Sunday 03/03/2019 Art and Culture of Tibet: Interview with Yangteng Rinpoche on ‘Tenshug’ (Long Life) Ceremony

ཉན་པ།: Listen ཕབ་ལེན། Download ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་སར་བོད་ཀྱི་རྒྱལ་དར་སྒྲེང་འཛུགས་གནང་འཆར། ཡུལ་སྐོར་སྤྲོ་འཆམ་པ་ཞིག་གིས་བོད་ནང་ཕེབས་པའི་མྱོང་ཚོར་གྱི་རྩོམ་ཡིག་སྤེལ་བ། རྒྱ་ནག་གི་དངུལ་ཆུ་བཙོ་ཐལ་ཐོག་འཁྱོག་བརྗོད་རྩོམ་ཡིག་སྤེལ་བར་དགག་ལན། བོད་རིགས་མཐོ་རིམ་སློབ་མའི་ཚོགས་ཆེན་ཐོག་གྲོས་ཆོད་ ༡༠ གཏན་འབེབས། དམིགས་བསལ་ལས་རིམ། ༸གོང་ས་མཆོག་གིས་རྟེན་འབྲེལ་དང་སྟོང་ཉིད་སྐོར་བསྩལ་བའི་བཀའ་སློབ། Saturday 02/03/2019 Prague to once again fly Tibetan flag at City Hall Patients taking Tibetan precious pills scored better neurocognitive function: Research Our tourist vehicle had CCTV, a GPS tracker and a listening device: Tourist in Tibet 13th Tibetan College Students’ Conference concludes FEATURE: Dalai Lama's teaching on Interdependence and Emptiness

འདས་པའི་ལོ་མང་ནས་སྲོལ་རྒྱུན་གྱི་སྨན་སྦྱོར་དང་ལྷག་པར་བོད་ཀྱི་གསོ་བ་རིག་པའི་གཞུང་ལུགས་ནང་དངུལ་ཆུ་བཙོ་བཀྲུ་ཆེན་མོའི་ལག་ལེན་ཐོག་ཞིབ་འཇུག་གནང་མཁན་ Dr. Sarah Sallon ལགས་ཀྱིས་བོད་ཀྱི་སྨན་རྩིས་ཁང་གིས་འདོན་སྤེལ་གནང་བའི་བཙོ་ཐལ་ཡོད་པའི་བོད་སྨན་དང་རིན་ཆེན་རིལ་བུའི་ནང་དངུལ་ཆུའི་དུག་ཤས་ཅན་མེད་པ་མ་ཟད། བཙོ་ཐལ་ཡོད་པའི་རིན་ཆེན་རིལ་བུ་བཞེས་མཁན་ཚོར་ཟུར་ཕོག་གང་ཡང་མེད་པའི་ཁར་ཁོ་ཚོའི་དབང་ཤེས་ཀྱི་ནུས་པའང་གཞན་ལས་བཟང་བ་ཡོད་པ་འགྲེལ་བརྗོད་གནང་སོང་། དེའང་ཁ་སང་ཟླ་ ༣ ཚེས་ ༡ ཉིན་བཞུགས་སྒར་དྷ་རམ་ས་ལར་རྟེན་གཞི་བྱས་པའི་དབུས་བོད་ཀྱི་སྨན་རྩིས་ཁང་གི་སྤྱི་ཁྱབ་འགན་འཛིན་ཚེ་རིང་བཀྲིས་ལགས་དང་ཉམས་ཞིབ་སྨན་པ་བསྟན་འཛིན་ལྷུན་འགྲུབ་ལགས། དེ་བཞིན་ Sarah Salone ལགས་བཅས་དབུ་བཞུགས་ཐོག་གསར་འགོད་གསལ་སྒྲགས་ཤིག་བསྐྱངས་ཡོད་པ་རེད།སྐབས་དེར་ཉམས་ཞིབ་སྨན་པ་བསྟན་འཛིན་ལྷུན་འགྲུབ་ལགས་ནས་སྔ་ལོའི་ཕྱི་ཟླ་ ༨ པའི་ནང་ཨ་རིའི་ཚན་རིག་དང་ཁོར་ཡུག་གི་དུས་དེབ་ཐོག་རྒྱ་རིགས་ཚན་རིག་པ་ཞིག་གིས་བོད་ཀྱི་ཁོར་ཡུག་ཐོག་དངུལ་ཆུའི་དཀའ་ངལ་བྱུང་བ་དེ་བོད་ནང་གི་བོད་མི་ཚོས་བོད་སྨན་བསྟེན་པ་ཁོ་ན་ལས་བྱུང་བའི་ཞིབ་འཇུག་རྩོམ་ཡིག་ཅིག་སྤེལ་བ་དེར་ཞིབ་འཇུག་ནན་ཏན་གནང་བའི་གྲུབ་དོན་སྙན་སྒྲོན་དང་འབྲེལ། རྒྱ་རིགས་ཚན་རིག་པས་ཞིབ་འཇུག་གནང་ཡུལ་གྱི་བོད་སྨན་དེའི་འབྱུང་ཁུངས་དང་ཐབས་ལམ་བཅས་ཀྱི་ཐོག་དྲི་བ་བཏང་གནང་ཡོད། Israel ཡི་ Hadassah Medical Center སྨན་ཁང་ཆེན་མོའི་ཉམས་ཞིབ་པ་གཙོ་གྲས་ Dr. Sarah Sallon ལགས་ཀྱིས་ཀྱང་སྐབས་དེར་རྒྱ་རིགས་ཚན་རིག་པས་ཞིབ་འཇུག་གི་གྲུབ་དོན་དང་ཁོང་གིས་ལོ་མང་ནས་རྡ་སར་རྟེན་གཞི་བྱས་པའི་བོད་ཀྱི་དབུས་སྨན་རྩིས་ཁང་གིས་འདོན་སྤེལ་གནང་བའི་བོད་སྨན་ལ་ཉམས་ཞིབ་གནང་བ་གཉིས་དབར་ཁྱད་པར་ཆེན་པོ་ཡོད་སྐོར་འགྲེལ་བརྗོད་དང་འབྲེལ། རྒྱ་རིགས་ཚན་རིག་པས་རང་ཉིད་ཀྱི་ཉམས་ཞིབ་ཁྲོད་བེད་སྤྱོད་བྱས་པའི་བོད་སྨན་གྱི་འབྱུང་ཁུངས་དང་བཟོ་སྐྲུན་བྱེད་མཁན་གྱི་བཟོ་གྲྭའི་མིང། དེ་བཞིན་བོད་སྨན་སྦྱོར་སྟངས་ཀྱི་ཐབས་ལམ་སོགས་བཀོད་མེད་པར་སྐྱོན་བརྗོད་གནང་སོང་།ཁོང་གིས་སྤྱིར་མིའི་ལུས་པོའི་ནང་དངུལ་ཆུ་དུག་ཤས་ཅན་ཡོད་མིན་ཞིབ་འཇུག་གནང་སྐབས་མིའི་སྐྲ་དང་ཁྲག་གཅིན་བཅས་ལ་ཞིབ་འཇུག་གནང་སྲོལ་ཡོད་པ་བཞིན། ཁོང་གིས་དབུ་ཁྲིད་པའི་ཞིབ་འཇུག་པ་རྣམས་ནས་བོད་ཀྱི་སྨན་རྩིས་ཁང་གི་རིན་ཆེན་རིལ་བུ་བཞེས་མཁན་ཁག་གཅིག་གི་ཁྲག་གཅིན་ལ་བརྟག་དཔྱད་གནང་སྐབས་ཁོ་ཚོའི་གཅིན་པའི་ནང་དངུལ་ཆུའི་ཚད་གཞི་ཕྲན་བུ་ཡོད་པ་མངོན་གསལ་བྱུང་ཡོད་པ་དེ་ལྟར་ཡང་། དེ་ནི་བོད་སྨན་མི་བཞེས་མཁན་ཚོའི་ཟུངས་ཁྲག་ནང་ནས་ཐོན་པའི་དངུལ་ཆུའི་ཚད་གཞི་དང་གཅིག་མཚུངས་ཡིན་པ་གསུངས་ཡོད། བོད་སྨན་བཞེས་མཁན་ཚོའི་དབང་ཤེས་ཀྱི་ནུས་པ་དང་ལུས་པོར་བརྟག་དཔྱད་གནང་ཚེ་བཙོ་ཐལ་ཡོད་པའི་སྨན་ཕོན་ཆེན་པོ་མཆོད་མཁན་ཚོའི་མཁལ་མ་དང་མཆིན་པ་བཅས་ལ་ཟུར་ཕོག་རིགས་རྩ་བ་ནས་མངོན་མེད་པ་མ་ཟད། ཁོ་ཚོའི་དབང་ཤེས་ཀྱི་ནུས་པ་ཡང་བོད་སྨན་མི་མཆོད་མཁན་ཚོ་ལས་གསལ་བ་ཡོད་པ་ར་སྤྲོད་བྱུང་སྐོར་གསུངས་ཡོད་པ་དང་ཆབས་ཅིག བོད་ཀྱི་གསོ་བ་རིག་པའི་གཞུང་ལུགས་ནང་དངུལ་ཆུ་བཙོ་བཀྲུ་ཆེན་མོའི་ལག་ལེན་ཐོག་ཞིབ་འཇུག་མུ་མཐུད་གནང་དགོས་གལ་ཆེ་བ་དང། ཁོང་ནས་དངུལ་ཆུ་བཙོ་ཐལ་གྱིས་ alzeimer སོགས་ཀྱི་དབང་རྩའི་ནུས་སྟོབས་ཞན་པའི་ནད་རིགས་ལ་ཕན་ནུས་ཇི་ཡོད་ཐོག་ཉམས་ཞིབ་གནང་འདོད་ཡོད་པ་སོགས་གསུངས་ཡོད། རླུང་འཕྲིན་ཁང་གིས་བོད་ཀྱི་དབུས་སྨན་རྩིས་ཁང་གི་ཉམས་ཞིབ་པ་སྨན་པ་བསྟན་འཛིན་ལྷུན་འགྲུབ་ལགས་སུ་ཉམས་ཞིབ་ཀྱི་གྲུབ་དོན་ཐོག་བཅར་འདྲི་ཞུས་པར་ཁོང་གིས་དཔྱད་རྩོམ་དེར་སྤྱི་ཡོངས་ཀྱི་ཞན་ཆ་ཡོད་པ་མ་ཟད། དམིགས་བསལ་དུ་ཉམས་ཞིབ་ཀྱི་ཞན་ཆ། དེ་བཞིན་དཔྱད་རྩོམ་གྱི་གྲུབ་དོན་དང་གླེང་གཞིའི་ནང་གི་ཞན་ཆ་སོགས་ཀྱི་ས་བཅད་གསུམ་གྱི་ཐོག་ནས་རྒྱ་ནག་གི་ཞིབ་འཇུག་པ་དེས་འཁྱོག་བཤད་བྱས་པ་ཞིག་རེད་ཅེས་གསུངས་ཡོད།

Czech སྤྱི་མཐུན་རྒྱལ་ཁབ་ཀྱི་རྒྱལ་ས་ Prague གྱི་ཚོགས་ཁང་གི་ཡང་སྟེང་དུ་སླར་ཡང་ཕྱི་ཟླ་ ༣ ཚེས་ ༨ ནས་ ༡༠ བར་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་རེད་འདུག ས་གནས་བརྒྱུད་ལམ་ཁག་གཅིག་གི་ཐོག་གནས་ཚུལ་ཐོན་གསལ་ Prague གྲོང་སྡེ་ལྷན་ཚོགས་ནས་ཕྱི་ལོ་ ༢༠༡༤ རྗེས་ད་རེས་ཐེངས་དང་པོ་བོད་ཀྱི་གསུམ་བཅུའི་སྒེར་ལངས་དང་བསྟུན་དེ་གའི་ཚོགས་ཁང་ཆེན་མོའི་ཐོག་བོད་ཀྱི་རྒྱལ་དར་སྒྲེང་འཛུགས་གནང་གི་ཡོད་པ་མ་ཟད། Czech སྤྱི་མཐུན་རྒྱལ་ཁབ་ཀྱི་རྒྱལ་ས་ཙམ་མ་ཡིན་པར་ས་གནས་ཀྱི་གྲོང་སྡེ་ ༧༠༠ ལྷག་ཏུ་བོད་ཀྱི་རྒྱལ་དར་སྒྲེང་འཛུགས་ཀྱིས་རྒྱ་ནག་གིས་བོད་ས་དབང་སྒྱུར་བྱས་ནས་མི་ལོ་ཧྲིལ་པོ་ ༦༠ འཁོར་བའི་གསུམ་བཅུའི་དུས་དྲན་སྲུང་བརྩིའི་རྣམ་འགྱུར་ཆེད་བཏོན་གནང་རྒྱུ་ཡིན་པ་བཀོད་འདུག རྩ་བའི་ཕྱིའི་རྒྱལ་ཁབ་ཁག་ཏུ་གསུམ་བཅུའི་དུས་དྲན་དང་བསྟུན་བོད་ཀྱི་རྒྱལ་དར་སྒྲེང་འཛུགས་ཀྱི་ལས་དོན་དེ་ནི་ཐོག་མར་ཕྱི་ལོ་ ༡༩༩༦  ལོར་འཇར་མ་ནི་རྒྱལ་ཁབ་ནས་དབུ་འཛུགས་གནང་ཡོད་པ་དང་། ཕྱིས་སུ་རྒྱལ་སྤྱི་རང་བཞིན་གྱིས་གང་སར་ཁྱབ་ནས་བོད་ཀྱི་རྒྱལ་དར་སྒྲེང་འཛུགས་ཀྱི་དྲིལ་བསྒྲགས་མུ་མཐུད་མཇུག་སྐྱོང་གནང་ཡོད་པ་རེད།   ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་ Prague ལ་ཆ་མཚོན་ན་སྟོང་ལོ་གསར་པའི་འགོ་སྟོད་ནས་བཟུང་ལོ་ངོ་བཅུ་ཕྲག་གཅིག་གི་རིང་དུ་གྲོང་ཁྱེར་དེའི་ངོས་ནས་གསུམ་བཅུའི་དུས་དྲན་ནམ་ཡིན་ལ་བོད་དོན་རྒྱབ་སྐྱོར་གྱི་བོད་ཀྱི་རྒྱལ་དར་སྒྲེང་འཛུགས་གནང་ཡོད་པ་རེད། འོན་ཀྱང་ཕྱི་ལོ་ ༢༠༡༤ ལོར་སྐབས་དེའི་གྲོང་ཁྱེར་སྤྱི་ཁྱབ་ Adriana Krnáčová  ནས་རྒྱལ་ཁབ་ཀྱི་ཕྱི་འབྲེལ་གྱི་གནད་དོན་སོགས་ཀྱི་དབང་གིས་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་མཚམས་བཞག་ཡོད་པ་རེད། Prague གྲོང་ཁྱེར་གྱི་ད་ལྟའི་སྤྱི་ཁྱབ་ Zdeněk Hřib ལགས་ཀྱིས་རེས་གཟའ་ཕུར་བུ་ཉིན་ཚོགས་པའི་གསར་འགོད་ལྷན་ཚོགས་ཤིག་གི་ཐོག་དེ་སྔའི་གྲོང་ཁྱེར་དབུ་ཁྲིད་ཚོས་ཚོང་གི་ཁེ་ཕན་དང་། རྒྱ་ནག་དང་ལྷན་ཆབ་སྲིད་ཀྱི་འབྲེལ་ལམ་དམ་ཟབ་གཏོང་རྒྱུའི་དམིགས་ཡུལ་འོག་བོད་མི་ཚོའི་རང་དབང་གི་འདུན་པ་དང། འགྲོ་བ་མིའི་ཐོབ་ཐང་བརྩི་མེད་རྡོག་རོལ་གྱི་གནད་དོན་བློས་གཏོང་བྱས་ཡོད་པར་སྐྱོན་བརྗོད་གནང་བ་དང་སྦྲགས། ད་ལོ་ནས་བཟུང་སླར་ཡང་སྔར་སྲོལ་ལྟར་བོད་དོན་རྒྱབ་སྐྱོར་མཚོན་པའི་རྒྱལ་དར་སྒྲེང་འཛུགས་གནང་རྒྱུ་དེ་མཇུག་སྐྱོང་གནང་ངེས་ཡིན་སྐོར་གསུངས་འདུག གཞི་རྩའི་བོད་ཀྱི་གསུམ་བཅུའི་སྒེར་ལངས་ཀྱི་དུས་དྲན་བསླེབ་ལ་རན་པ་དང་བསྟུན་གཟའ་འཁོར་སྔོན་མའི་ནང་ཨ་རིའི་California མངའ་སྡེའི་ Richmond གྲོང་སྡེ་ལྷན་ཚོགས་ནས་དམིགས་བསལ་བསྒྲགས་གཏམ་ཞིག་འདོན་སྤེལ་དང་འབྲེལ། གྲོང་ཁྱེར་དེས་ཕྱི་ཟླ་ ༣ ཚེས་ ༨ ཉིན་བོད་ཀྱི་རྒྱལ་དར་སྒྲེང་འཛུགས་གནང་རྒྱུ་མ་ཟད་གསུམ་བཅུའི་དུས་དྲན་ཉིན་འཁྱོངས་རིང་བོད་ཀྱི་ཉིན་མོ་ཞེས་སྲུང་བརྩི་ཞུ་གཏན་ཁེལ་ཡོད་པ་ཡོངས་བསྒྲགས་གནང་ཡོད་པ་རེད།

དེ་རིང་སོག་པོའི་དད་ལྡན་ཆོས་ཞུ་བ་སྟོང་ཕྲག་བརྒལ་བར་ཉིན་གཉིས་རིང་གི་བཀའ་ཆོས་མཇུག་སྒྲིལ་དང་འབྲེལ་ཏེ་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ཞུ་བར་སླད་མར་ཡང་དྲྭ་རྒྱའི་བརྒྱུད་བཀའ་ཆོས་སྩོལ་རྒྱུའི་གོ་སྐབས་འདི་ལྟར་བྱུང་བའི་ཐུགས་རེ་མཛད་་བཞིན་ཡོད་ཅེས་བཀའ་བསྩལ་སོང་།སོག་པོའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་ནས་དེ་རིང་བར་ཉིན་གཉིས་ཀྱི་རིང་བཞུགས་སྒར་༸རྒྱལ་བའི་ཕོ་བྲང་དུ་སོག་པོའི་དད་ལྡན་ཆོས་ཞུ་བ་ཁག་གཅིག་དང་དེ་བཞིན་སོག་ཡུལ་དུ་ཡོད་པའི་དད་ལྡན་མང་ཚོགས་སྟོང་ཕྲག་བརྒལ་བར་དྲྭ་རྒྱ་བརྒྱུད་ནས་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་སྟོད་པ་དང་ལམ་རིམ་ཉམས་མགུར་གྱི་བཀའ་ཆོས་བཀྲིན་བསྩལ་ཡོད་པ་ལྟར། དེ་རིང་ཆོས་འབྲེལ་གྲུབ་མཚམས་སུ་༸གོང་ས་༸སྐྱབས་མགོན་ཆེན་པོ་མཆོག་གིས་ད་རེས་དྲྭ་རྒྱ་བརྒྱུད་ནས་སོག་རིགས་དད་ལྡན་མང་ཚོགས་སྟོང་ཕྲག་བརྒལ་བར་བཀའ་ཆོས་བསྩལ་རྒྱུའི་གོ་སྐབས་འདི་ལྟར་བྱུང་བ་སྐལ་པ་བཟང་པོ་ཞིག་ཏུ་བཀའ་གནང་བ་དང་སྦྲགས། མགོན་པོ་༸གང་ཉིད་མཆོག་ལ་དྲྭ་རྒྱ་བརྒྱུད་བཀའ་ཆོས་སྩོལ་རྒྱུར་སྐུ་ལས་གང་ཡང་མེད་པ་མ་ཟད་ཆོས་ཞུ་བས་ཀྱང་འགྲོ་སོང་གང་ཡང་གཏོང་མི་དགོས་པ་ཡིན་སྟབས། མ་འོངས་པར་དུས་ནས་དུས་སུ་དྲྭ་རྒྱའི་ལས་རིམ་འདི་འདྲ་གོ་སྒྲིག་ཞུ་ཐུབ་ཚེ་དགེ་མཚན་ཅེས་བཀའ་བསྩལ་སོང་།དེ་རིང་༸གོས་ས་མཆོག་གིས་སོག་པོའི་དད་ལྡན་ཆོས་ཞུ་བ་རྣམས་ལ་ལམ་རིམ་ཉམས་མགུར་གྱི་བཀའ་ཆོས་བཀྲིན་སྩོལ་སྐབས་ཐོག་མར་སྐྱབས་འགྲོ་དང་ལས་འབྲས་དེ་དག་ཉམས་ལེན་གནང་བར་དལ་འབྱོར་རྙེད་དཀའ་བའི་མི་ལུས་རིན་པོ་ཆེ་འདི་ཧ་ཅང་གི་རྩ་ཆེན་ཞིག་ཡིན་པ་ཤེས་དགོས་པའི་ཐོག་དོན་གོ་ཆོད་པ་ཞིག་བྱེད་དགོས་ཞེས་བཀའ་བསྩལ་བ་མ་ཟད། ༸གང་ཉིད་མཆོག་ད་ལྟ་དགུང་ལོ་མཐོ་པོར་ཕེབས་ཡོད་ཀྱང་དུས་རྟག་ཏུ་ནང་པའི་གཞུང་ཆེན་དག་ལ་གསན་བསམ་སྒོམ་གསུམ་མཛད་བཞིན་ཡོད་པ་བཀའ་བསྩལ་བ་དང་སྦྲགས། སོག་པོ་མི་མང་ཚོས་དེ་བཞིན་བསླབ་པ་སློབ་གཉེར་གནང་དགོས་གལ་ཡིན་པར་ལམ་སྟོན་བསྩལ་ཡོད།  ༸གོང་ས་མཆོག་གི་བཀའ་ཆོས་བསྩལ་གྲུབ་མཚམས་༸གང་ཉིད་མཆོག་གིས་ཆོས་ཞུ་བའི་བཀའ་འདྲི་ཞུས་པ་ཁག་གཅིག་ལ་བཀའ་ལན་བསྩལ་བར་ཕྱི་དངོས་པོ་ཡར་རྒྱས་ཁོ་ན་དང་འབྲེལ་བའི་ཤེས་ཡོན་ཐོག་འབད་བརྩོན་བྱས་ནས་མ་བསྡད་པར་ནང་སེམས་རྒྱུད་འདུལ་ཐབས་ཀྱི་ཤེས་ཡོན་ཐད་བརྩོན་གནང་དགོས་གལ་ཡིན་པ་སོགས་ཀྱི་ལམ་སྟོན་རྒྱ་ཆེ་བསྩལ་ཡོད་པ་དང་ཆབས་ཅིག ཆོས་ཁས་བླངས་མིན་ལ་ལྟོས་མེད་སེར་སྐྱ་ཕོ་མོ་ཡོངས་ནས་སློབ་གཉེར་གནང་གལ་ཡིན་པར་ལམ་སྟོན་མཛད་སོང་།རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ད་རེས་སོག་རིགས་ཚོར་དྲྭ་རྒྱ་བརྒྱུད་བཀའ་ཆོས་བསྩལ་བ་དེ་ཆེས་ཐོག་མ་ཆགས་ཡོད་པ་དང་། དེ་རིང་ཆོས་འབྲེལ་ཉིན་གཉིས་པའི་ཐོག་བཞུགས་སྒར་རང་དུ་སོག་རིགས་ཁྱོན་ ༡༦༠ ལྷག་ཆེད་བཅར་ཞུས་ཡོད་པ་མ་ཟད། སོག་ཡུལ་རང་དུ་མཐོ་རིམ་སློབ་མ་ ༡༠༠༠ ལྷག་ལྷན་འཛོམས་བྱུང་ཡོད་པ་རེད།

ཕྱི་ཟླ་ ༢  ཚེས་ ༢༨ ནས་ ༣ ཚེས་ ༡ བར་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གོ་སྒྲིག་འོག་ཚོགས་པའི་ཕ་མའི་ཚོགས་ཆེན་ཐེངས་གཉིས་པ་དེ་རིང་མཇུག་སྒྲིལ་གནང་བ་དང་སྦྲགས། གྲོས་ཆོད་དོན་ཚན་ ༣༡ གཏན་འབེབས་གནང་སོང་།  ཚོགས་ཆེན་གྱི་ཉིན་གཉིས་རིང་ཚོགས་བཅར་བ་རྣམས་ཚོགས་ཆུང་ལྔར་ཆ་བགོས་ཀྱིས་ཕ་མའི་ངོས་ནས་རང་ཉིད་ཀྱི་བུ་ཕྲུག་གི་ཤེས་ཡོན་ཡར་རྒྱས་དང་སློབ་གྲྭ་ཡར་རྒྱས་གཏོང་ཕྱོགས་ཐད་འགན་ཁུར་གནང་ཕྱོགས་དང་། གཏན་ཉིན་སློབ་གྲྭ་ཁག་གི་ནང་དགེ་རྒན་ཕ་མའི་ཚོགས་ཆུང་གི་རྩ་འཛིན་ལམ་སྟོན་ལག་བསྟར་ཚགས་ཚུད་གཏོང་ཕྱོགས་བཅས་གྲོས་གཞི་གཙོ་བོ་གཉིས་ཀྱི་ཐོག་བཀའ་བསྡུར་གནང་ཡོད་པ་རེད།ཕ་མ་ནས་ཕྲུ་གུ་གསོ་སྐྱོང་སླད་ཤེས་རིག་ལས་ཁུངས་ནས་ཟབ་སྦྱོང་དང་གོ་རྟོགས་ཀྱི་ལས་འགུལ་རྒྱ་ཆེ་སྤེལ་རྒྱུ་དང་། ཕ་མ་ཚོ་གལ་ཆེན་པོ་ཆགས་ཀྱི་ཡོད་པ་བཞིན་སློབ་གྲྭའི་ཕ་ཚབ་དང་མ་ཚབ་གཉིས་ཀྱི་གསོལ་ཕོགས་སྤར་རྒྱུ། ཕ་མའི་ཚོགས་ཆུང་གི་ཚོགས་མི་ཡུན་ཚད་ཀྱི་ལས་དོན་དང་འབྲེལ་ཕྱག་འཁྱེར་གཅིག་མཚུངས་གནང་རྒྱུ། དེ་བཞིན་དགེ་རྒན་རྒྱུན་གནས་ཐུབ་ཐབས་སུ་མཐུན་རྐྱེན་གང་ལེགས་སྦྱར་རྒྱུ། དགེ་རྒན་ཕ་མའི་ཚོགས་ཆུང་གི་ཚོགས་འདུར་མ་རྩའི་དངུལ་འབོར་གནང་སྐྱོང་ཡོང་བ་སོགས་གྲོས་གཞི་གཉིས་ཀྱི་དོན་ཚན་ ༢༦ དང་སྤྱི་སྨན་གྱི་དགོངས་འཆར་ ༥ བཅས་གྲོས་ཆོད་དོན་ཚན་ ༣༡ གཏན་འབེབས་གནང་ཡོད་པ་རེད། སྐབས་དེར་ཤེས་རིག་བཀའ་བློན་པདྨ་དབྱངས་ཅན་མཆོག་གིས་ཤེས་ཡོན་སྲིད་བྱུས་ཀྱི་དགོས་དམིགས་བཞི་རང་དབང་དང་།  གཞན་ཕན། རྒྱུན་འཛིན། གསར་གཏོད་བཅས་ཡིན་པ་ལྟར་ཕ་མ་ཚོའི་ངོས་ནས་ཕྲུ་གུའི་བསམ་སྤྱོད་དང་ཐག་གཅོད་ཀྱི་རང་དབང་སྤྲད་དགོས་པ་མ་ཟད། ཕྲུ་གུའི་ཤེས་ཚད་ཀྱི་ནུས་པ་དང་བསྟུན་ནས་ཕ་མའི་མཐུན་ཕྱོགས་ཀྱི་ལས་དོན་བསྒྲུབ་ན་ཕྲུ་གུའི་རང་བཞིན་གྱི་གསོ་སྐྱོང་ལ་ཕན་ཐོགས་བྱུང་གི་ཡོད་པ་དང་། དེ་བཞིན་ཕ་མ་ཚོས་ཕྲུ་གུར་མིག་དཔེ་བཟང་པོ་ཞིག་ཏུ་གྱུར་ཐབས་སུ་ལུས་ངག་ཡིད་གསུམ་གྱི་ཀུན་སྤྱོད་འཁྱེར་གསོ་ཐད་ཐུགས་སྣང་དང་། བོད་ཀྱི་སྐད་རིག་རྒྱུན་འཛིན་སླད་བོད་སྐད་གཙང་མ་སྤྱོད་དགོས་པར་ལམ་སྟོན་གནང་ཡོད།  ལྷག་དོན་བཀའ་བློན་མཆོག་གིས་ད་རེས་གྲོས་ཆོད་བཞག་པ་དེར་ཕ་མ་དང་དགེ་རྒན་བཅས་ནས་ཕྱར་གྲུ་མཉམ་འདེགས་ཐོག་ཕྱག་བསྟར་གནང་དགོས་གལ་ཡིན་པ་གསུངས་ཡོད།

དེ་རིང་ཟླ་ ༣ ཚེས་ ༡ ཉིན་ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Shri H.D Kumaraswamy མཆོག་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་སྔ་འགྱུར་རྙིང་མའི་མ་དགོན་རྣམ་གྲོལ་གླིང་དང་སེ་ར་ཐེག་ཆེན་གླིང་དུ་གནས་གཟིགས་གནང་ཡོད་པ་མ་ཟད། ལྷོ་ཕྱོགས་བོད་མིའི་གཞིས་ཆགས་ཁག་ལ་དཀའ་ངལ་གང་ཞིག་འཕྲད་ཀྱང་རོགས་རམ་གནང་རྒྱུ་ཡིན་པའི་ཞལ་བཞེས་གནང་ཡོད་པ་རེད།སྤྱི་ཁྱབ་བློན་ཆེན་མཆོག་དང་ལྷན་ཕྱག་སྦྲེལ་མངའ་སྡེའི་ཡུལ་སྐོར་བློན་ཆེན་དང་སོ་ནམ་བློན་ཆེན། ས་གནས་གྲོས་ཚོགས་ཀྱི་འཐུས་མི་སོགས་སྐུ་ཚབ་ཁག་ཅིག་ལྷན་བཅར་ཞུས་ཡོད་པ་རེད། བོད་མིའི་ངོས་ནས་ལྷོ་སྤྱི་ཆོས་འཕེལ་ཐུབ་བསྟན་ལགས་དང་སྦེལ་ཀོབ་ས་གནས་གཞིས་ཆགས་གཉིས་ཀྱི་འགོ་འཛིན་རྣམ་གཉིས་ཕེབས་ཡོད་པ་དང་། དེ་རིང་སྔ་ཐོག་ཕྱག་ཚོད་ ༡༠ པ་ཡོལ་ཙམ་ལ་དང་ཐོག་རྣམ་གྲོལ་གླིང་དགོན་པར་གནས་གཟིགས་གནང་བ་དང་དེ་གར་རྣམ་གྲོལ་གླིང་དགོན་པའི་དབུ་འཛིན་མཆོག་སྤྲུལ་གྱང་སྒང་རིན་པོ་ཆེ་མཆོག་དང་མཆོག་སྤྲུལ་རྨུགས་སངས་སྐུ་ཆེན་རིན་པོ་ཆེ། མཁན་ཆེན་ཚེ་དབང་རྣམ་རྒྱལ་མཆོག རྒྱུན་ལས་རྣམ་པ་དང་དགེ་འདུན་འདུས་ཚོགས། དེ་བཞིན་ས་གནས་མང་ཚོགས་བཅས་ཀྱིས་ཕེབས་བསུའི་སྣེ་ལེན་ཞུས་ཡོད་པ་རེད།དེ་རྗེས་སེ་ར་ཐེག་ཆེན་གླིང་བླ་སྤྱིར་མཁན་རིན་པོ་ཆེ་རྣམ་པ་གཉིས་དང་བླ་སྤྲུལ། དགེ་འདུན་འདུས་མང་། གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་གནད་ཡོད་མི་སྣ། གཞིས་ཆགས་གྲོང་སྡེ་ཁག་གི་སྤྱི་མི་དང་མང་ཚོགས་བཅས་ཀྱིས་གཞུང་འབྲེལ་ཕེབས་བསུ་གཟབ་རྒྱས་ཞུས་ཡོད།མངའ་སྡེའི་བློན་ཆེན་མཆོག་སེ་ར་ཐེག་ཆེན་གླིང་བླ་སྤྱིར་གནས་གཟིགས་དང་ལྷ་སྲུང་ཁག་ལ་སྙལ་ཤལ་སྒྲོན་འབུལ། མཆོད་འབུལ་བཅས་གནང་གྲུབ་རྗེས་ལྷོ་སྤྱི་ལས་ཁུངས་དང་སྦེལ་ཀོབ་གཞིས་ཆགས་གཉིས་ཐོུང་ནས་ཀ་ན་ཊ་ཀ་མངའ་སྡེ་གཞུང་མང་ལ་ཐུགས་རྗེ་ཆེ་ཞུའི་མཛད་སྒོ་སྟབས་བདེ་ཞིག་ཚོགས་ཡོད་པ་ལྟར། སྐབས་དེར་སྤྱི་ཁྱབ་བློན་ཆེན་མཆོག་གིས་ཁོང་ད་རེས་བོད་པའི་དགོན་སྡེ་ཁག་ལ་གནས་གཟིགས་སུ་ཕེབས་དོན་ནི་ཀ་ན་ཊ་ཀ་མངའ་སྡེ་གཞུང་གི་ལས་དོན་ཁག་ལམ་ལྷོངས་ཡོང་ཕྱིར་ཡིན་པར་ངོ་སྤྲོད་གནང་སོང་བ་དང་ཆབས་ཅིག ལྷོ་ཕྱོགས་གཞིས་ཆགས་ཁག་གི་བོད་མི་རྣམས་ནི་ལས་ལ་བརྩོན་ཞིང་ཡ་རབས་བཟང་སྤྱོད་དང་ལྡན་པ་མ་ཟད་ད་བར་རང་གི་ཆོས་དང་རིག་གཞུང་རྣམས་ཀྱང་མི་ཉམས་རྒྱུན་འཛིན་ལེགས་པོ་གནང་ཡོད་པར་བསྔགས་བརྗོད་དང་སླད་མར་བོད་མིའི་གཞིས་སྒར་ལྔ་པོའི་བོད་མི་ཚོར་ངལ་བ་ནམ་འཕྲད་ལ་རོགས་རམ་གནང་རྒྱུ་དང་དཀའ་ངལ་ཞུ་བར་ཡོང་ཚེ་མངའ་སྡེ་གཞུང་གི་ལས་ཁུངས་ཁག་ནས་རོགས་རམ་གནང་རྒྱུར་གྲ་སྒྲིག་ཡོད་པ་གསུངས་ཡོད།དེ་བཞིན་ཁོང་གིས་སྔ་ལོ་ ༢༠༡༨ ལོར་ལྷོ་ཕྱོགས་གཞིས་ཆགས་ཁག་གིས་མངའ་སྡེ་གཞུང་མང་ལ་ཐུགས་རྗེ་ཆེ་ཞུའི་མཛད་སྒོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནད་ཞུས་ཀྱིས་མཇལ་འཕྲད་ཞུ་རྒྱུ་དང་བྱིན་རླབས་ཞུ་རྒྱུའི་སྐལ་བཟང་གོ་སྐབས་ཐོབ་པའི་མྱོང་ཚོར་གསུངས་པ་དང་འབྲེལ་ནས་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་བཀའ་སློབ་བསྩལ་བ་དེ་དག་ལ་ཁོང་རང་ཉིད་ཡིད་དབང་འཕྲོག་ཡོད་སྐོར་གསུངས་ཡོད་པ་རེད།མཐའ་དོན་མངའ་སྡེའི་གཞུང་མང་ལ་བཀའ་དྲིན་རྗེས་དྲན་མཚོན་སླད་སྤྱི་ཁྱབ་བློན་ཆེན་མཆོག་ལ་དཀར་གཙང་མཇལ་དར་དང་སྟོན་པའི་༸སྐུ་བརྙན། དེ་བཞིན་རིན་ཆེན་གཉིས་པ་དངུལ་ལས་གྲུབ་པའི་མཆོད་ཀོང་ཞིག་ཕུལ་བ་མ་ཟད། ཕྱག་སྦྲེལ་གྲོས་ཚོགས་འཐུས་མི་གཉིས་ལ་དཀར་གཙང་མཇལ་དར་དང་སྟོན་པའི་༸སྐུ་བརྙན་རེ་ཕུལ་ཡོད་པ་རེད།རྩ་བའི་མངའ་སྡེའི་བློན་ཆེན་མཆོག་རྣམ་གྲོལ་གླིང་དང་སེ་ར་ཐེག་ཆེན་གླིང་དུ་གཞུང་འབྲེལ་གནས་གཟིགས་གནང་ཞོར་སྦེལལ་ཀོབ་གཞིས་ཆགས་ནང་རྟེན་གཞི་བྱས་པའི་བཀའ་བརྒྱུད་ནཱ་ལེནྡཱ་དགོན་པ་ནས་གདན་འདྲེན་ཞུས་པ་ལྟར་ཕེབས་ཡོད་པ་རེད། དེ་རེས་མངའ་སྡེའི་བློན་ཆེན་མཆོག་སྦེལ་ཀོབ་བོད་མིའི་གཞིས་ཆགས་ལ་ཕེབས་པ་ཐེངས་དང་པོ་ཆགས་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་སླད་མར་དྲྭ་རྒྱ་བརྒྱུད་ནས་བཀའ་ཆོས་བསྩལ་རྒྱུར་ཐུགས་རེ་གནང་བཞིན་ཡོད་ཅེས་བཀའ་བསྩལ་བ། ཨ་རིའི་གྲོས་ཚོགས་གོང་མས་ཁུང་རྩི་སློབ་གླིང་ལ་སྐྱོན་བརྗོད་ཀྱི་སྙན་ཐོ་འདོན་སྤེལ། ཕ་མའི་ཚོགས་ཆེན་ཐེངས་གཉིས་པའི་ཐོག་གྲོས་ཆོད་དོན་ཚན་ ༣༡ གཏན་འབེབས་གནང་བ། ཀ་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་མཆོག་གིས་སྦེལ་ཀོབ་བོད་མིར་མཐུན་འགྱུར་གང་དགོས་གནང་རྒྱུ་ཞལ་བཞེས། འཆི་མེད་ལྷ་མོ་ལགས་ལ་སྡིགས་རའི་སྐྱོན་བརྗོད་བྱས་པའི་གནད་དོན་ཐོག་རྟོག་ཞིབ་གནང་རྒྱུ་དབུ་འཛུགས། Friday 01/03/2019 Dalai Lama concludes Mongolian teaching, hopes to continue teaching via webcast Tibetan Parents’ Associations urge grant, more training from CTA on children’s upbringing US Senate report slams Chinese learning centers operating at U.S. Universities Karnataka CM visits Tibetan monasteries in Bylakuppe Toronto police probe online abuse of Tibetan-Canadian student leader

ཨ་རིའི་གྲོས་ཚོགས་གོང་མས་ཡུལ་དེའི་ནང་རྟེན་གཞི་བྱས་པའི་རྒྱ་ནག་གི་ཁུང་ཙི་སློབ་གླིང་ཁག་གིས་ཨ་རིའི་ཤེས་ཡོན་ལྟེ་གནས་ཁང་དུ་བོད་དོན་གཙོས་པའི་རྒྱ་ནག་གི་ནང་དུ་དམ་དྲག་བྱས་པའི་བརྗོད་གཞི་འདྲ་མིན་ཁག་གཅིག་གླེང་སློང་བྱ་རྒྱུར་བཀག་འགོག་བྱས་པའི་ལས་དོན་ལ་མཐའ་གཅིག་ཏུ་སྐྱོན་བརྗོད་བྱས་འདུག དེའང་ཁ་ཉིན་ཚེས་ ༢༧ ཉིན་ཨ་རིའི་གྲོང་ཚོགས་གོང་མའི་ནང་སྲིད་ཀྱི་བདེ་འཇགས་དང་གཞུང་འབྲེལ་ལས་དོན་ཚོགས་ཆུང་ནས་སྙན་ཐོ་ཞིག་འདོན་སྤེལ་གནང་སྟེ་ཁུང་ཙི་སློབ་གླིང་གིས་རྒྱལ་ཁབ་ཕན་ཚུན་གྱི་བྱ་བ་སྒྲུབ་ཀྱི་མེད་པར་འགྲེལ་བརྗོད་དང་སྦྲགས། ཨ་རིའི་ངོས་ནས་ཁུང་ཙི་སློབ་གླིང་གི་ལས་དོན་བྱེད་ཕྱོགས་ལ་འགྱུར་བ་ཆེན་པོ་ཞིག་དགོས་པ་མ་གཏོགས་སློབ་གླིང་དེ་དག་ཆ་ཚང་སྒོ་རྒྱག་དགོས་པའི་འབོད་བརྡ་བཏང་འདུག ཤོག་གྲངས་ ༩༣ ཅན་གྱི་སྙན་ཐོའི་ནང་གསལ་བར་ད་ལྟའི་ཆར་ཨ་རིའི་ནང་རྒྱ་ནག་གི་ཁུང་ཙི་སློབ་གླིང་བརྒྱ་ལྷག་ཡོད་པ་དང་རྒྱ་ནག་གི་ངོས་ནས་སློབ་གླིང་དེ་དག་ནི་དེ་གའི་གཞུང་གིས་ཆེད་དུ་འགྲོ་གྲོན་ཐོག་ཨ་རིའི་མཐོ་སློབ་དང་ཤེས་ཡོན་ལྟེ་གནས་ཁག་ཏུ་རྒྱ་སྐད་དང་རྒྱ་ཡིག་སློབ་ཁྲིད་བྱེད་ཕྱིར་ཡིིན་པར་བརྗོད་བཞིན་ཡོད་ནའང་། རྒྱ་གཞུང་གིས་དོན་དངོས་སུ་སློབ་གླེང་དེ་དག་བརྒྱུད་ཨ་རིའི་ཤེས་ཡོན་སློབ་གསོའི་རང་དབང་ལ་ཐེ་གཏོགས་བྱེད་བཞིན་པ་མ་ཟད་སློབ་གླིང་དེ་དག་ནི་ཨ་རི་དང་རྒྱལ་སྤྱིའི་ཁྲོད་རྒྱ་ནག་ལ་ལྟ་ཕྱོགས་འགྱུར་བ་གཏོང་རྒྱུའི་སླད་ཆེད་འཛུགས་བྱས་པའི་འཁྱོག་བཤད་དྲིལ་བསྒྲགས་ཀྱི་བརྒྱུད་ལམ་ཞིག་ཡིན་པར་འགྲེལ་བརྗོད་གནང་འདུག སྙན་ཐོ་དེའི་ནང་ད་དུང་ཁུང་ཙི་སློབ་གླིང་བརྒྱུད་རྒྱ་ནག་གཞུང་ལས་ལོ་རེར་ཨ་སྒོར་ཉིས་འབུམ་ལྔ་ཁྲི་ཙམ་གྱི་རོགས་རམ་ལེན་མཁན་ཨ་རིའི་སློབ་གྲྭ་བརྒྱ་ཆ་ ༧༠ ལྷག་ཙམ་གྱིས་ཨ་རིའི་ཤེས་ཡོན་ལས་ཁང་ལ་གནད་དོན་དེ་སྦས་གསང་བྱེད་བཞིན་པར་སྐྱོན་བརྗོད་ཀྱང་གནང་འདུག ཨ་རིའི་དབུས་གསང་བའི་ལས་ཁུངས་ཀྱི་ལས་བྱེད་ Bill Priestap ལགས་ཀྱིས་རྒྱ་ནག་གི་ཁུང་ཙི་སློབ་གླིང་གིས་བོད་ཀྱི་གནད་དོན་གཙོ་བོར་བཟུང་བའི་སྨྲ་བརྗོད་རང་དབང་དམ་དྲག་བྱས་པའི་གནས་ཚུལ་འཛམ་གླིང་གང་སར་མངོན་གསལ་གནང་རྒྱུ་ཡོད་སྐོར་ལུང་འདྲེན་དང་འབྲེལ་ནས་ཨ་རིའི་ Government Accountability Office ཞེས་པའི་གཞུང་གི་ཚན་པ་ཤིག་གིས་ཉེ་ཆར་ཉམས་ཞིབ་གནང་བའི་ནང་ཨ་རིའི་ནང་དུ་རྒྱ་ནག་གི་ཁུང་ཙི་སློབ་གླིང་གི་ཡན་ལགས་ཡོད་རིགས་ཀྱིས་བོད་དོན་གཙོ་གྱུར་རྒྱ་ནག་སྲིད་གཞུང་གིས་ངོ་རྒོལ་བྱེད་བཞིན་པའི་བྱ་འགུལ་གང་ཡང་སྤེལ་རྒྱུར་འདོད་པ་བྱེད་ཀྱི་མེད་སྐོར་བཀོད་འདུག དེ་བཞིན་རྒྱ་ནག་གིས་ཨ་རིའི་ནང་ཁུང་ཙི་སློབ་གླིང་མང་པོ་བཙུགས་ཡོད་པ་ལྟར་ཨ་རིའི་སྲིད་གཞུང་གི་ངོས་ནས་ཀྱང་དེ་སྔ་མ་དངུལ་ཆེད་གཏོང་གིས་རྒྱ་ནག་ཏུ་ཨ་རིའི་རིག་གཞུང་ལྟེ་གནས་ཤིག་འཛུགས་ཐབས་བྱས་ཡོད་ནའང་།  རྒྱ་ནག་གིས་ལས་གཞི་དེ་ལག་བསྟར་བྱེད་བཅུག་མེད་པར་ཕྱི་ལོ་ ༢༠༡༨ ལོ་ལས་གཞི་དེ་དངོས་སུ་སྒོ་བརྒྱབས་ཡོད་པ་ཡང་མངོན་གསལ་གནང་བ་དང་ཆབས་ཅིག རྒྱ་ནག་གིས་ཇི་ལྟར་རྒྱལ་ཁབ་གཉིས་ཀྱི་བར་ལ་གཉིས་ཕན་གྱི་བྱ་གཞག་སྒྲུབ་ཀྱི་མེད་པ་ལུང་འདྲེན་གནང་འདུག ཨ་རིའི་རྒྱལ་ས་ Washington DC ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་ད་རེས་ཨ་རིའི་གྲོས་ཚོགས་གོང་མས་འདོན་སྤེལ་གནང་བའི་སྙན་ཐོ་དེར་རྒྱབ་སྐྱོར་ཞུས་པ་མ་ཟད། ལས་འགུལ་ཁང་དེའི་ཚོགས་གཙོ་ Matteo Mecacci ལགས་ཀྱིས་རྒྱ་ནག་གིས་ལོ་ངོ་དུ་མའི་རིང་འཇམ་པོའི་རྩལ་བེད་སྤྱོད་བྱས་ཏེ་མང་གཙོའི་རྒྱལ་ཁབ་ཁག་གི་ནང་རྒྱ་གཞུང་དང་ལྟ་སྤྱོད་མི་མཐུན་པའི་གནད་དོན་རིགས་ལ་ཐབས་ཤེས་རྒྱ་བསྐྱེད་ཀྱིས་དམ་དྲག་བྱས་ཡོད་སྐོར་བསྒྲགས་པ་དང་འབྲེལ། ཨ་རིའི་ངོས་ནས་བོད་དུ་རང་དབང་གིས་འགྲུལ་སྐྱོད་གནང་ཆོག་པའི་ཁྲིམས་གཞི་གཏན་འབེབས་གནང་བ་ལྟར་ད་ཆ་ང་ཚོས་ཤེས་ཡོན་རང་དབང་དང་སྤྱི་འབངས་ཀྱི་ཐོབ་ཐང་ཐད་ནས་ཀྱང་རྒྱ་ནག་གི་ཡ་ལན་གནང་གི་མེད་པ་དེར་སྐྱོན་བརྗོད་གནང་དགོས་པའི་དུས་ལ་བབ་ཡོད་པ་གསུངས་ཡོད། རྒྱལ་སྤྱིའི་བོད་དོན་ལས་འགུལ་ཁང་གིས་སྤྱིར་རྒྱ་གཞུང་ནས་ཁུང་ཙི་སློབ་གླིང་དེ་དག་རྒྱ་སྐད་དང་རྒྱ་ཡིག་སློབ་ཁྲིད་བྱེད་པའི་ཆེད་དུ་དམིགས་ཡོད་པར་བརྗོད་བཞིན་ཡོད་ཀྱང་དོན་དངོས་ཐོག་རྒྱ་ནག་གིས་ཁུང་ཙི་སློབ་གླིང་དེ་དག་སྤྱད་ ནས་བོད་ས་ཇི་ལྟར་དབང་བསྒྱུར་བྱས་པའི་བདེན་པ་དེ་གཡོལ་ཐབས་བྱས་ཡོད་པའི་དཔེ་མཚོན་མང་པོ་སྙན་ཐོདེའི་ནང་གསལ་བརྗོད་བྱས་ཡོད་པ་མ་ཟད། ད་ལྟའི་ཆར་བོད་ནི་རྒྱ་ནག་གི་དབང་བསྒྱུར་འོག་ཏུ་སཱི་རྱི་ཕུད་པའི་འགྲོ་བ་མིའི་ཐོབ་ཐང་རྡོག་རོལ་ཆེས་ཆེ་བའི་ས་ཁུལ་གཉིས་པ་དེ་ཡིན་པར་འགྲེལ་བརྗོད་བྱས་འདུག གཞི་རྩའི་འདས་པའི་ལོ་འདིའི་ནང་མ་མཐར་ཨ་རིའི་གཙུག་ལག་སློབ་གཉེར་ཁང་གསུམ་ནས་ཁུ་ཙི་སློབ་གླིང་དང་འབྲེལ་བ་ཡོངས་སུ་མཚམས་འཇོག་བྱས་ཡོད་པ་དང། བོད་རང་བཙན་སློབ་ཕྲུག་ཚོགས་པས་གཙོས་པའི་བོད་དོན་རྒྱབ་སྐྱོར་ཚོགས་པ་ཚོས་ཁུང་ཙི་སློབ་གླིང་གི་སྐོར་ལ་དྲིལ་བསྒྲགས་དང་གོ་རྟོགས་ཀྱི་ལས་འགུལ་མང་པོ་སྤེལ་ནས་ལྟེ་གནས་དེ་དག་འཕྲལ་དུ་སྒོ་རྒྱག་དགོས་པའི་ལས་འགུལ་སྤེལ་དང་སྤེལ་མུས་ཡིན་པ་རེད།