Monthly Archives: May, 2020

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲྭ་ལམ་ཐད་གཏོང་བརྒྱུད་ཕྱི་ལོ་ ༢༠༢༠ ཕྱི་ཟླ་ ༥ ཚེས་ ༡༦ དང་ ༡༧ ཉིན་གཉིས་ཀྱི་རིང་སྔ་དྲོར་རྒྱ་གར་གྱི་ཆུ་ཚོད་ ༨ ནས་ ༩༌༣༠ བར་བཀའ་ཆོས་ཞིག་བསྩལ་རྒྱུའི་བཀའ་བཞེས་བཟང་པོ་སྨིན་བསྩལ་ཐོབ་ཡོད་པ་ལྟར། ཆོས་ཞུ་བ་ཚོས་ས་གནས་སོ་སོར་བཅས་པའི་བཀའ་རྒྱ་ལས་ནམ་ཡང་མི་འདའ་བར་བཀའ་ཆོས་གསན་གཟིགས་གནང་དགོས་པའི་གཞེན་བསྐུལ་འདུགདེ་རིང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲྭ་གནས་ཐོག་བཀའ་ཆོས་དང་འབྲེལ་བའི་བཀའ་ཁྱབ་ཅིག་སྤེལ་བར་གཞིགས་ན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉིན་གཉིས་ཀྱི་རིང་ལ་༸དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་དང་པོ་དང་བཞི་པ་གཉིས་ཀྱི་བཀའ་འཁྲིད་དང་འབྲེལ་ཏེ་ད་ལྟའི་ཆར་དུས་ཀྱི་ཆེས་གཉན་འཕྲང་རྐྱེན་ངན་ལ་གདོང་ལེན་བྱེད་ཕྱོགས་ཀྱི་ལམ་སྟོན་བཀྲིན་བསྩལ་རྒྱུའི་མཛད་འཆར་ཐུགས་གཏན་འཁེལ་ཡོད་པ་ལྟར། སྤྱིར་ནད་ཡམས་གཏན་མེད་དུ་མ་ཞི་བར་དང་ལྷག་པར་བཀའ་ཆོས་ཉིན་གཉིས་ཀྱི་རིང་ཚོགས་པ་དང་དགོན་སྡེ་ཆེ་ཆུང་སོགས་ཅི་འདྲ་ཞིག་ཡིན་རུང་ཡོངས་གྲགས་ཀྱི་ནད་ཡམས་ཁྱབ་གདལ་སྔོན་འགོག་ལ་དམིགས་པའི་ལག་ལེན་སྤྱི་དང་སྒོས་སུ་ཆོས་ཞུ་བ་རྣམས་ནས་ཕན་ཚུན་བར་ཐག་བཅད་དེ་འགྲོ་འདུག་གི་སྤྱོད་ལམ་བསྟེན་ཕྱོགས་སོགས་ས་གནས་སོ་སོར་བཅས་པའི་བཀའ་རྒྱ་ལས་ནམ་ཡང་མི་འདའ་བ་གནང་དགོས་པ་མ་ཟད། ལས་ཀྱི་སྣེ་མོར་གཏོགས་པ་ཐམས་ཅད་ནས་བཀའ་ཆོས་ཀྱི་ཆེད་ཐོག་མར་ཡར་འཛོམས་པའི་སྐབས་དང་ཁྱད་པར་དངོས་གཞི་བཀའ་ཆོས་སྩོལ་སྐབས། དེ་བཞིན་མར་འགྲོལ་སྐབས་བཅས་ཀྱིས་གཙོས་བཀའ་ཆོས་ཀྱི་ཐོག་མཐའ་བར་གསུམ་དུ་དོ་གལ་ཆེན་པོས་བཏང་འཛིན་ཆེས་ཆེར་གནང་དགོས་པའི་གཞེན་བསྐུལ་གནང་འདུགདེ་བཞིན་ད་ལྟའི་ཆེས་གཉན་འཕྲང་ཅན་གྱི་དུས་སྐབས་འདིར་རང་གཞན་ཀུན་ནས་དོན་མེད་ཀྱི་གླེང་གཞི་མི་ཡོང་བ་དང་། ལྷག་དོན་གཉན་རིམས་སྔོན་འགོག་གི་ལག་ལེན་རྣམས་ལ་ལྷོད་ཡངས་མི་ཡོང་བའི་ཐུགས་འགན་ཆེ་བཞེས་གནང་དགོས་ཞེས་བསྐྱར་ནན་གནང་འདུག རྩ་བའི་གོ་ལའི་ཤར་ནུབ་ཀྱི་ཡུལ་གྲུ་གང་སར་གནས་འཁོད་དད་ལྡན་མང་ཚོགས་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྩེ་བའི་ཐོག་ནས་ཕྱི་ཚེས་ ༡༦ དང་ ༡༧ ཉིན་དྲྭ་ལམ་ཐད་གཏོང་བརྒྱུད་སྩལ་གཏན་འཁེལ་བའི་བཀའ་ཆོས་དེ་རྒྱ་སྐད་དང་ཧིན་སྐད། སོག་སྐད། དེ་བཞིན་ཝི་ཏི་ནམ་དང་ར་ཤཱི་ཡ། ཀོ་རི་ཡ། ཉི་ཧོང་། སི་པིན་། འཇར་མན། ཕོར་ཅི་གྷད། ཧྥ་རན། ཨི་ཏྲ་ལི་བཅས་ཀྱི་སྐད་ཐོག་གསུང་སྒྱུར་གནང་རྒྱུ་རེད་འདུག

༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གིས་བཙན་ཁྲིད་ཀྱིས་གསང་ཉར་བྱས་ཏེ་ལོ་ངོ་ ༢༥ འཁོར་བ་དང་བསྟུན་ཡོ་རོབ་ Lithuania རྒྱལ་ཁབ་ཀྱི་གྲོས་ཚོགས་འཐུས་མི་སྐུ་ཞབས་ Andrius Navickas ལགས་ཀྱིས་ཡུལ་དེའི་སྲིད་འཛིན་སྐུ་ཞབས་ Gitanas Nausėda མཆོག་དང་ཕྱི་སྲིད་བློན་ཆེན་སྐུ་ཞབས་ Linas Linkevičius ལགས་གཉིས་ནས་རྒྱ་ནག་གཞུང་ལ་༸པཎ་ཆེན་རིན་པོ་ཆེས་གཙོས་པའི་སྐུ་འཁོར་རྣམས་ཀྱི་གནས་སྟངས་གང་འདྲ་ཡོད་མེད་ཐོག་འདྲི་རྩད་གནང་དགོས་པའི་ཞུ་སྐུལ་གནང་འདུགསྐུ་ཞབས་ Andrius Navickas ལགས་ནས་འདས་པའི་ལོ་དུས་མང་པོའི་རིང་ནས་རྒྱལ་སྤྱིའི་གཞུང་དང་ཚོགས་སྐྱིད་ཁག་གིས་རྒྱ་ནག་གཞུང་ལ་༸ཀུན་གཟིགས་༸པཎ་ཆེན་རིན་པོ་ཆེ་དང་གང་ཉིད་མཆོག་གི་ནང་མིའི་གནས་སྟངས་སོགས་ཀྱི་ཐད་ཕྱི་གསལ་ནང་གསལ་གྱི་གསལ་བཤད་བྱེད་དགོས་པའི་ཞུ་སྐུལ་གནང་ཡོད་ཀྱང་། རྒྱ་གཞུང་ནས་རིན་པོ་ཆེའི་གནད་དོན་ཐོག་ད་བར་རྫུན་གཏམ་དང་འཁྱོག་བཤད་ཅན་གྱི་གསལ་བཤད་ཁོ་ན་བྱས་ཡོད་པ་དང་ལྷག་པར་དུ་ཕྱི་ལོ་ ༢༠༡༩ ལོར་རྒྱལ་ཚོགས་ཀྱི་གར་སོང་ཆ་མེད་དུ་གྱུར་བའི་ཆབ་སྲིད་བཙོན་པའི་གནད་དོན་གླེང་སློང་སྐབས་སུ་རྒྱ་ནག་གཞུང་གིས་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་སློབ་གཉེར་གང་ལེགས་གནང་བཞིན་ཡོད་སྐོར་ཙམ་བཤད་པ་ལས་རིན་པོ་ཆེ་མཆོག་གང་དུ་བཞུགས་ཡོད་མེད་སོགས་ཞིབ་ཕྲའི་གནས་ཚུལ་་གང་ཡང་གསལ་བཤད་བྱེད་ཀྱི་མེད་སྟབས། ད་ལྟའི་ཆར་བོད་མི་གཙོས་རྒྱལ་སྤྱིའི་མང་ཚོགས་ཀྱིས་རིན་པོ་ཆེ་མཆོག་གི་དངོས་ཡོད་གནས་སྟངས་གང་ཡིན་པ་གསལ་པོ་ཤེས་ཐུབ་ཀྱི་མེད་པ་རེད་ཅེས་ནན་བརྗོད་གནང་འདུགལྷག་པར་དུ་ཁོང་གིས་རིན་མིན་ཕྱི་ཚེས་ ༡༧ ཉིན་ཆུང་སྲིད་རིན་པོ་ཆེ་མཆོག་རྒྱ་གཞུང་གིས་བཙན་ཁྲིད་འོག་གར་སོང་ཆ་མེད་དུ་གྱུར་ནས་ལོ་ངོ་ ༢༥ འཁོར་སྐབས་སུ་བོད་མི་རྣམས་ནས་ཆུང་སྲིད་རིན་པོ་ཆེ་མཆོག་མགྱོགས་མྱུར་གློད་བཀྲོལ་ཡོང་སླད་སྒྲོན་མེ་མཆོད་འབུལ་སོགས་ཀྱི་ལས་འགུལ་སྤེལ་སྐབས་ལི་ཐོ་ནི་ཡའི་རྒྱལ་ཁབ་ཀྱིས་བོད་མིའི་འཐབ་རྩོད་ལ་རྒྱབ་སྐྱོར་དང་། ལྷག་པར་དུ་སྲིད་འཛིན་སྐུ་ཞབས་ Gitanas Nausėdam མཆོག་དང་ཕྱི་སྲིད་བློན་ཆེན་སྐུ་ཞབས་ Linas Linkevičius ལགས་རྣམ་གཉིས་ཀྱིས་དུས་སྐབས་འདི་དང་བསྟུན་རྒྱ་ནག་གཞུང་ལ་༸པཎ་ཆེན་རིན་པོ་ཆེས་གཙོས་པའི་སྐུ་འཁོར་རྣམས་ཀྱི་གནས་སྟངས་གང་འདྲ་ཡོད་མེད་ཐོག་འདྲི་རྩད་གནང་དགོས་པའི་ཞུ་སྐུལ་གནང་འདུག སྐུ་ཞབས་ Andrius Navickas ལགས་ཀྱིས་ཞུ་སྐུལ་དེའི་ནང་འདས་པའི་ལོ་དུས་མང་པོའི་རིང་ནས་རྒྱ་ནག་གཞུང་གིས་བོད་ནང་གི་དངོས་ཡོད་གནས་ཚུལ་ལ་འཁྱོག་བཤད་དང་། ཁྲིམས་མཐུན་མ་ཡིན་པའི་སྲིད་བྱུས་འདྲ་མིན་ལག་བསྟར་བྱས་ཏེ་བོད་མིའི་སྲོལ་རྒྱུན་གྱི་བྱེད་སྒོ་ཁག་ལ་དམ་དྲག་བྱས་པ་མ་ཟད། ཆོས་ཕྱོགས་དང་འབྲེལ་བའི་༸གོང་ས་མཆོག་གི་༸སྐུའི་ཡང་སྲིད་ཀྱི་གནད་དོན་ཐོག་ཐེ་བྱུས་བྱེད་བཞིན་པའི་རྒྱ་གཞུང་གི་བྱ་སྤྱོད་ཁག་ཅིག་ཐེར་འདོན་གནང་འདུག་པ་དང་། སྐུ་ཞབས་མཆོག་གི་ཞུ་སྐུལ་དེར་ཡུལ་དེའི་གྲོས་ཚོགས་ཀྱི་ཚོགས་གཙོ་ཟུར་པ་སྐུ་ཞབས་ Vytautas Landsbergis ལགས་དང་གྲོས་ཚོགས་འཐུས་མི་ ༡༤ དེ་བཞིན་ས་གནས་བོད་དོན་རྒྱབ་སྐྱོར་བ་སོགས་ཀྱིས་རྒྱབ་སྐྱོར་ཡོད་པའི་མཚན་རྟགས་བསྐྱོན་གནང་འདུགགཞི་རྩའི་༸ཀུན་གཟིགས་༸པཎ་ཆེན་རིན་པོ་ཆེ་མཆོག་ནི་ཕྱི་ལོ་ ༡༩༩༥ ལོར་རྒྱ་ནག་གཞུང་གིས་འཛིན་བཟུང་བཙན་ཁྲིད་བྱས་པ་ནས་བཟུང་ད་བར་རིན་པོ་ཆེ་མཆོག་གི་ད་ལྟའི་གནས་སྟངས་གང་ཡིན་ཤེས་རྟོགས་ཐུབ་ཀྱི་མེད་པ་དང་བདུན་ཕྲག་འདིའི་རེས་གཟའ་ཉི་མ་སྟེ་ཕྱི་ཚེས་ ༡༧ ཉིན་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་མགྱོགས་མྱུར་གློད་བཀྲོལ་ཡོང་བའི་ཞུ་གཏུག་དང་སྒྲོན་མེ་མཆོད་འབུལ་སོགས་ཀྱི་ལས་འགུལ་སྤེལ་གྱི་ཡོད་པ་རེད།

རྒྱ་ནག་ཝུ་ཧན་གྲོང་ཁྱེར་ནས་ཁྱབ་བརྡལ་བྱུང་བའི་ཏོག་དབྱིབས་རིམས་ནད་ཀྱི་ཛ་དྲག་གནས་སྟངས་ཁྲོད་ཟླ་བ་འདིའི་ཕྱི་ཚེས་ ༤ ཉིན་སླར་ཡང་རྒྱ་གར་དབུས་གཞུང་གིས་རིམས་ནད་སྔོན་འགོག་ལ་དམིགས་ཏེ་ཐེམ་སྤང་གི་བཀའ་རྒྱ་རིམ་པ་གསུམ་པ་དེ་བཏང་སྟེ་ཟླ་བ་འདིའི་ཕྱི་ཚེས་ ༡༧ བར་ཁྱོན་གཟའ་འཁོར་གཉིས་ཀྱི་རིང་ལ་མུ་མཐུད་ཕྱི་ལ་གང་བྱུང་མི་འགྲོ་བར་སོ་སོའི་ནང་དུ་སྡོད་དགོས་པའི་གནས་སྟངས་སོར་གནས་བྱུང་ཡོད་པ་རེད། ཧི་མཱ་མངའ་སྡེ་གཞུང་གིས་རྒྱ་གར་ནང་དུ་གནས་སྡོད་བྱེད་མཁན་གང་ཟག་གང་ཞིག་རང་ཉིད་གཏན་སྡོད་བྱེད་ཡུལ་ཧི་མཱ་ཅལ་མངའ་སྡེའི་ཕྱི་ཕྱོགས་མངའ་སྡེ་གཞན་ནང་དུ་ལྷག་མཁན་ཚོར་ཟླ་སྔོན་མའི་ཕྱི་ཚེས་ ༢༦ ཉིན་ནས་གནས་ཡུལ་མངའ་སྡེའི་ནང་དུ་ཡོང་ཆོག་པའི་བཀའ་རྒྱ་ཡོངས་གྲགས་གནང་དོན་ལྟར་མངའ་སྡེ་གཞན་ནང་ལུས་པའི་ཧི་མཱ་ཅལ་མངའ་སྡེ་ནང་དུ་གནས་སྡོད་བྱེད་མཁན་རྒྱ་གར་ཡུལ་མི་གཙོས་པའི་བོད་མི་མི་ཉུང་བ་ཞིག་གོང་ཚེས་ཉིན་ནས་བཟུང་སྟེ་ཉིན་རེ་བཞིན་ཡོང་མཁན་ཇེ་མང་དུ་འགྲོ་མུས་ཡིན་པ་རེད། འོན་ཀྱང་ཉེ་ཆར་མངའ་སྡེའི་ཕྱི་ཕྱོགས་མངའ་སྡེ་གཞན་ནང་དུ་ལྷག་མཁན་ཚོ་ས་མཚམས་རང་དུ་ཟུར་བཀག་དང་ཏོག་དབྱིབས་ནད་རྟགས་ཡོད་མེད་བརྟག་དཔྱད་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།ཧི་མཱ་ཅམ་མངའ་སྡེའི་ནང་གནས་བཞུགས་བོད་མི་དག་ལས་རྒྱལ་ས་ལྡི་ལི་ནས་ཆེས་ཐོག་མ་ཧི་མཱ་ཅལ་མངའ་སྡེར་ཕྱིར་ཡོང་བའི་བོད་མི་གཅིག་དང་། དེ་བཞིན་དྷརྨ་ས་ལར་གནས་བཞུགས་བོད་མི་གཉིས་བཅས་བོད་མི་གསུམ་དང་བླངས་ཐོག་ནས་རང་གཞན་ཀུན་གྱི་བདེ་འཇགས་ལ་དམིགས་ཏེ་ཏོག་དབྱིབས་ནད་རྟགས་ཡོད་མེད་བརྟག་དཔྱད་གནང་འདུག་པ་དང་། གཉན་རིམས་ཀྱི་ནད་རྟགས་ཡོད་མེད་བརྟག་འབྲས་སུ་ནད་རྟགས་དེ་ཐོན་མེད་པ་རེད་འདུག འདི་ག་རླུང་འཕྲིན་ཁང་གིས་བོད་མི་དེ་དག་གསུམ་པོ་ལས་རྒྱལ་ས་ལྡི་ལི་ནས་ཆེས་ཐོག་མ་ཧི་མཱ་ཅལ་མངའ་སྡེར་ཕྱིར་ཡོང་བའི་བོད་མི་གཅིག་ལ་ཁོང་གི་ངོས་ནས་དང་བླངས་ཀྱིས་གཉན་རིམས་དེ་ཡོད་མེད་བརྟག་དཔྱད་གནང་དོན་གང་ཡིན་སོགས་དང་འབྲེལ་བའི་བཅར་འདྲི་ཁག་གཅིག་ཞུས་ཡོད།གཞི་རྩའི་བོད་མིའི་སྒྲིག་འཛུགས་ཀྱི་ངོས་ནས་ཟླ་བ་འདིའི་ཕྱི་ཚེས་ ༨ ཉིན་ནས་བཞུགས་སྒར་མེག་གྷན་བོད་ཀྱི་གསོལ་མགྲོན་ཁང་དུ་མངའ་སྡེ་དང་རྫོང་གཞན་ནས་ཕྱིར་ཕེབས་པའི་བོད་མི་དག་ལ་བཞུགས་གནས་དང་ཞལ་ལག་བཅས་གོ་སྒྲིག་གནང་ཡོད་པ་དང་། ད་ལྟའི་ཆར་བོད་ཀྱི་གསོལ་མགྲོན་ཁང་དུ་རྫོང་གཞན་ནས་ཕྱིར་ཕེབས་པའི་བོད་མི་ཉུང་ཤས་ལས་བཞུགས་མཁན་མི་འདུག འོན་ཀྱང་རིང་མིན་བོད་མི་དེ་དག་གངས་སྐྱིད་ཉེ་འདབས་སུ་ཡོད་པའི་ཤུག་གསེབ་ལས་ཤག་ཏུ་གནས་སྤོ་གནང་རྒྱུ་རེད་འདུག རྩ་བའི་ཐེངས་འདིའི་རྒྱ་གར་རྒྱལ་ཡོངས་ཐེམ་སྤང་གི་བཀའ་རྒྱ་རིམ་པ་གསུམ་པ་འདི་ཟླ་བ་འདིའི་ཕྱི་ཚེས་ ༡༧ བར་གནས་ཀྱི་ཡོད་པ་དང་། རྒྱ་གར་ནང་ལ་ད་ལྟའི་ཆ་ལ་ཏོག་དབྱིབས་རིམས་ནད་ཕོག་པ་མི་གྲངས་ ༧༠༧༥༦ ལྷག་དང་འདས་གྲོངས་སུ་ཕྱིན་པའི་མི་གྲངས་ ༢༢༩༣ ལྷག དེ་བཞིན་དྲག་སྐྱེད་བྱུང་བ་མི་གྲངས་ ༢༢༤༥༥ ཆགས་ཀྱི་ཡོད་པ་རེད། ཧི་མཱ་ཅལ་མངའ་སྡེ་ནང་ཏོག་དབྱིབས་རིམས་ནད་ཕོག་པ་མི་གྲངས་ ༥༩ དང་འདས་གྲོངས་སུ་ཕྱིན་པའི་མི་གྲངས་ ༢ དེ་བཞིན་དྲག་སྐྱེད་བྱུང་བ་མི་གྲངས་ ༣༩ ཆགས་ཀྱི་ཡོད་པ་རེད།

ཉན་པ།: Listen ཕབ་ལེན། Download རྒྱ་གཞུང་གིས་ཕྱི་ཕྱོགས་དང་འབྲེལ་བ་ཡོད་པའི་བོད་མིའི་ཁྱིམ་ཚང་ ༤༠༠༠ ལྷག་ལ་ཞིབ་བཤེར་བྱས་འདུག རྒྱ་ནག་གིས་མཚོ་སྔོན་ཁུལ་དུ་རྒྱལ་གཅེས་ཆོས་གཅེས་ཀྱི་ཉིན་དགུའི་འཛིན་གྲྭ་འཚོགས་བཞིན་འདུག བསྟན་འཛིན་ཆོས་འཕེལ་ལགས་བཙན་དབང་གིས་གར་སོང་ཆ་མེད་བཟོ་བཞིན་པ་མྱུར་དུ་མཚམས་འཇོག་དགོས། ཨིན་ཡུལ་གྲོས་ཚོགས་འཐུས་མིས་རྒྱ་ནག་གཞུང་ལ་པཎ་ཆེན་རིན་པོ་ཆེ་གློད་གྲོལ་དགོས་བའི་ཞུ་སྐུལ། བྱང་ཨ་རིའི་བོད་མི་རྣམས་ཀྱིས་ཨ་སྒོར་༣༥༠༠༠ ལྷག་གི་ཞལ་འདེབས་གནང་བ། རྒྱ་དཀར་ནག་གི་མཐའ་སྲུང་དམག་མིའི་བར་གདོང་ཐུག་བྱུང་བ། དམིགས་བསལ་ལེ་ཚན། འོད་སྲུངས་དང་ཡུམ་བརྟན་སྐབས་ཀྱི་བོད། Monday 11/05/2020 CCP Authorities investigate over 4,000 households in Tibet with ties outside the country China steps up political education program in Qinghai, Tibet TCHRD urges China to end enforced disappearance of Tibetan environmental and cultural advocate UK lawmaker calls on China to release and reveal the missing Panchen Lama US Tibetan Associations donate $35,131 to US NGO feeding the poor in fight against pandemic Army confirms heated Sino-Indian face off in North Sikkim HISTORY FEATURE: Sons of Lang Dharma, the last king of Tibet

རྒྱ་ནག་གཞུང་གིས་བོད་དིང་རི་དང་གཞིས་ཀ་རྩེ་ནང་དུ་ཡོད་པའི་བོད་མིའི་ཁྱིམ་ཚང་ཁྲོད་རྒྱ་གར་དང་བལ་ཡུལ། དེ་བཞིན་རྒྱལ་ཁབ་གཞན་གྱི་ནང་དུ་གཉེན་ཉེ་འབྲེལ་ཡོད་པའི་ཁྱིམ་ཚང་ ༤༠༠༠ ནས་ ༥༠༠༠ བར་ལ་ཞིབ་བཤེར་བྱས་འདུག དེ་ཡང་ཉེ་ཆར་བཞུགས་སྒར་དུ་རྟེན་གཞི་བྱས་པའི་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བར་གཞིགས་ན། རྒྱ་ནག་གཞུང་གིས་བོད་རང་སྐྱོང་ཟེར་བའི་ནང་གི་དིང་རི་དང་གཞིས་ཀ་རྩེ་ས་ཁུལ་གྱི་བོད་མིའི་ཁྱིམ་ཚང་ཁྲོད། ཕྱིའི་རྒྱལ་ཁབ་ནང་དུ་གཉེན་ཉེ་འབྲེལ་ཡོད་པའི་ཁྱིམ་ཚང་ ༤༠༠༠ བརྒལ་བར་ཞིབ་བཤེར་བྱས་པ་མ་ཟད། བོད་མི་དེ་དག་གི་ Wechat འམ་སྐད་འཕྲིན་ཐོག་རང་གི་མིང་ངོ་མ་དང་ལག་ཁྱེར་ཨང་གྲངས་སོགས་ངོ་མ་བཀོད་དགོས་པའི་བཙན་དཀའ་བཏང་འདུག བོད་གནས་ལྟ་ཞིབ་ཁང་གི་ཉམས་ཞིབ་པ་ཞི་བདེ་ཟླ་བ་ལགས་ཀྱི་གསུངས་པར་གཞིགས་ན། རྒྱ་གཞུང་གིས་བོད་ནང་གི་དངོས་ཡོད་གནས་ཚུལ་ཕྱི་ལ་མི་གྱར་བའི་ཆེད་དུ་ལས་གཞི་དེ་སྤེལ་བཞིན་ཡོད་པ་དང་། དེའང་རྒྱ་གཞུང་གིས་ནག་སེད་གཤེད་བཅོམ་ཞེས་པའི་ལས་གཞིའི་འོག་ནས་ཕྱི་ཕྱོགས་དང་འབྲེལ་བ་ཡོད་པའི་བོད་མི་སྒེར་དང་ཚོགས་པ་སོགས་སྤྱི་ཚོགས་ཁྲོད་ཤུགས་རྐྱེན་ཡོད་མཁན་རྣམས་ཉེས་ཅན་པར་ངོས་འཛིན་གྱིས་བོད་མི་དེ་དག་དང་ཁོང་རྣམ་པའི་ནང་མི་རྣམས་ལ་དུས་རྟག་ཏུ་ལྟ་སྲུང་ནན་པོ་བྱེད་བཞིན་ཡོད་པ་དང་། འདི་ལོའི་ ༡ པོའི་ནང་བོད་ནང་གི་གཞུང་འབྲེལ་དྲ་ལམ་ཐོག་གནས་ཚུལ་སྤེལ་བའི་ནང་དུ། ད་བར་བོད་ནང་ནག་སེད་གཤེད་བཅོམ་ཞེས་པའི་ལས་གཞི་འདིའི་འོག་ནས་བོད་མི་ ༤༠༠ ཙམ་འཛིན་བཟུང་བྱས་ཟིན་ཡོད་པ་རེད་འདུག དེ་བཞིན་བོད་གནས་ཉམས་ཞིབ་ཁང་གི་ཉེ་ཆར་ཟླ་བ་འདིའི་འགོ་སྟོད་དུ་གནས་ཚུལ་སྤེལ་བའི་ནང་དུ། བོད་ནང་དུ་ཏོག་དབྱིབས་རིམས་ནད་ཀྱི་གནད་དོན་མང་ཤོས་བྱུང་སའི་དཀར་མཛེས་ཁུལ་གྱི་བོད་མི་ཞིང་འབྲོག་མང་ཚོགས་རྣམས་ལ་དམིགས་བསལ་གྱིས་མཚན་སྦྱོང་སློབ་གྲྭའི་ནང་དུ་མཉམ་ཞུགས་བྱད་དུ་བཅུག་སྟེ་ཁོང་རྣམས་ལ་ཆབ་སྲིད་སློབ་གསོ་སྤེལ་བ་དང། རྒྱལ་ཁབ་དང་དམར་ཤོག་ཚོགས་པར་དགའ་ཞེན་བྱེད་དགོས་པའི་སློབ་གསོ་སྤེལ་བཞིན་ཡོད་པ་མངོན་གསལ་གནང་འདུག

བོད་ཀྱི་ཁོར་ཡུག་སྲུང་སྐྱོབ་དང་རིག་གཞུང་དོན་གཉེར་གནང་མཁན་ཚོང་པ་བསྟན་འཛིན་ཆོས་འཕེལ་ལགས་ཕྱི་ལོ་ ༢༠༡༨ ཕྱི་ཟླ་ ༣ པའི་ཟླ་མཇུག་ཏུ་རྒྱ་གཞུང་གིས་བཙན་ཁྲིད་འོག་ད་བར་གར་ཡོད་ཤེས་རྟོགས་མེད་པར་གྱུར་ཡོད་སྟབས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་གཞུང་གིས་བསྟན་འཛིན་ཆོས་འཕེལ་ལགས་གར་ཡོད་ཅི་བྱས་དང་ཤི་གསོན་གྱི་དངོས་ཡོད་གནས་སྟངས་ངེས་པར་གསལ་བཤད་བྱེད་དགོས་པའི་ཛ་དྲག་གི་འབོད་སྐུལ་ཞུས་འདུག རྩ་བའི་བསྟན་འཛིན་ཆོས་འཕེལ་ལགས་ཕྱི་ལོ་ ༢༠༡༨ ཕྱི་ཟླ་གསུམ་པའི་ཟླ་མཇུག་ཏུ་རྒྱ་ནག་ནས་ལྷ་སར་ལོག་པའི་ལམ་བར་དུ་ལྷོ་ཁ་གོང་དཀར་གནམ་ཐང་ནས་རྒྱ་གཞུང་གིས་གློང་བུར་དུ་འཇུ་བཟུང་བྱས་ནས་ཅ་དངོས་སྔོག་བཤེར་སྐབས་ཆབ་སྲིད་དང་འབྲེལ་བའི་རྩོམ་ཡིག་འགའ་ཞིག་དང་སྡོད་ཁྱིམ་དུ་སྔོག་བཤེར་སྐབས་༸གོང་ས་མཆོག་གི་༸སྐུ་པར་བཅས་ཐོན་པའི་གནས་ཚུལ་ཙམ་ལས་འཛིན་བཟུང་བྱེད་དོན་གང་ཡིན་ཤེས་རྟོགས་ཐུབ་མེད་པར་མ་ཟད། ད་ལྟའི་ཆར་ཁོང་བཀག་ཉར་བྱས་ནས་མི་ལོ་༢ དང་ཟླ་བ་གཉིས་ཙམ་འགྲོ་མུས་ཁྲོད་ཁོང་ས་གནས་གང་གང་ཞིག་ཏུ་ཡོད་མེད་སོགས་ཞིབ་ཕྲའི་གནས་ཚུལ་ཤེས་ཐབས་བྲལ་བ་རེད། གནས་ཚུལ་དེ་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་བཀའ་འདྲི་ཞུས་པར། ཁོང་གིས་འདི་ག་ལྟེ་གནས་ཁང་ལ་གནས་ཚུལ་ཤེས་རྟོགས་བྱུང་བའི་ནང་དུ་ད་ཆ་རྒྱ་གཞུང་གིས་ཡུལ་མི་ཚོས་ཚོང་པ་བསྟན་འཛིན་ཆོས་འཕེལ་སྐོར་གྱི་གནས་ཚུལ་གླེང་སློང་བྱས་མི་ཆོག་པ་དང་ཁོང་གི་འདྲ་པར་རིགས་ཁ་པར་དང་འཕྲིན་ཕྲན་སོགས་སྤྱི་ཚོགས་བརྒྱུད་ལམ་ཁག་ཏུ་སྤེལ་བའམ་བསྐུར་མི་ཆོག་པའི་བཙན་བཀའ་བཏང་ཡོད་པ་རེད་འདུག གཞན་ཡང་ཁོང་གིས་རྒྱ་ནག་གཞུང་ནས་བཙན་དབང་གིས་བསྟན་འཛིན་ཆོས་འཕེལ་ལགས་གར་སོང་ཆ་མེད་བཟོས་པ་དེ་ནི་སོ་སོའི་རྩ་ཆེའི་རིག་གཞུང་དང་རང་བྱུང་ཁོར་ཡུག་སྲུང་སྐྱོབ་ཡོང་ཆེད་རྒྱ་གཞུང་གི་འཛུགས་སྐྲུན་ལས་གཞིའི་གཏོར་བཤིག་ལ་འགོག་རྒོལ་གནང་མཁན་ས་གནས་བོད་མི་ཚོར་འཕྲད་པའི་ཡ་ང་སྙིང་རྗེ་མེད་པའི་སྡུག་བསྔལ་མནར་གཅོད་ཀྱི་དཔེ་མཚོན་གཞན་ཞིག་ཡིན་པར་མ་ཟད། འདས་པའི་མི་ལོ་བཅུ་ཕྲག་རིང་རྒྱ་གཞུང་གི་མགོ་མཇུག་ལྡོག་པའི་འཛུགས་སྐྲུན་སྲིད་བྱུས་ལག་བསྟར་ཁྲོད་ཆུ་གློག་དང་ཐོན་ཁུངས་ལ་བཤུ་གཞོག་བཏང་བ་དེ་ས་གནས་བོད་མིའི་ཁོར་ཡུག་ཡུན་གནས་དང་འཚོ་རྟེན་རྒྱུན་གནས་ཀྱི་ཐོབ་ཐང་བཙན་འཕྲོག་བྱས་ཡོད་པར་སྐྱོན་བརྗོད་གནང་སོང་། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་ང་ཚོའི་ངོས་ནས་རྒྱ་གཞུང་གིས་བོད་མིའི་སྤྱི་ཚོགས་དང་མང་ཚོགས་ཀྱི་འཚོ་རྟེན་དོན་གཉེར་གནང་མཁན་བསྟན་འཛིན་ཆོས་འཕེལ་ལགས་གར་སོང་ཆ་མེད་བཟོས་བཞིན་པ་མྱུར་དུ་མཚམས་འཇོག་དགོས་པའི་འབོད་སྐུལ་དང་ཁོང་ཁྲིམས་འགལ་བཀག་སྐྱིལ་གྱིས་གར་སོང་ཆ་མེད་བཟོ་བཞིན་པ་དེས་རྒྱ་གཞུང་གིས་ས་གནས་བོད་མིའི་ཁེ་ཐོབ་སྲུང་སྐྱོབ་དང་ཡར་རྒྱས་ཀྱི་ལས་སུ་གཞོལ་མཁན་ཚོང་པ་ཁོང་གྲགས་འགུལ་མེད་པར་བཟོ་ཐབས་ཀྱི་དྲག་གནོན་དང་གདུག་རྩུབ་ཀྱི་བསམ་སྦྱོར་གསལ་བོར་མཚོན་ཡོད་ཅེས་ནན་བརྗོད་གནང་འདུག ཆོས་འཕེལ་ལགས་ནི་རྒྱུན་དུ་རང་རིགས་ལ་ཞེན་པ་དཀར་ཞིང་བོད་ཀྱི་ཁོར་ཡུག་སྲུང་སྐྱོབ་དང་བོད་མི་ཉམ་ཐག་ལ་རོགས་སྐྱོར་དང་བོད་ཀྱི་ལོ་རྒྱུས་དང་རིག་གནས་སྲུང་སྐྱོབ་དང་འབྲེལ་བའི་ལས་གཞི་གང་ཞིག་ཡོད་ཀྱང་དེའི་ཐད་དཔལ་འབྱོར་གྱི་ཞལ་འདེབས་འབུལ་བ་དང་བོད་མི་ནང་ཁུལ་ལ་མཐུན་སྒྲིལ་སོགས་ཀྱི་ཆེད་དུ་ལྷག་བསམ་གཡོ་བ་མེད་པར་ཕྱག་ལས་གནང་མཁན་ཞིག་ཡིན་པ་དང་ལྷག་དོན་ལོ་ཤས་སྔོན་ནས་ནག་ཆུ་བྱི་ནགས་འཁོར་གསུམ་རྒྱུད་ཀྱི་གཏེར་ཆུ་དང་གཏེར་ཁང་སོགས་ལ་སྲུང་སྐྱོབ་ཆེད་དུ་རྫོང་དང་ལྗོངས་རིམ་པ་བརྒྱུད་ནས་གནས་རི་དང་གནས་ས་མང་པོ་ཞིག་རྒྱ་ནག་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་ཁོངས་སུ་ཡིག་ཆ་བཞག་པ་དང་ལོ་རྒྱུས་ཀྱི་རྡོ་རིང་སློང་བ་སོགས་ཀྱི་ལས་གཞིའི་ཐད་ལའང་དཔལ་འབྱོར་གྱི་འགྲོ་གྲོན་མང་དག་ཅིག་བཏང་མྱོང་འདུག    

ཨིན་ཡུལ་ནང་གི་རྙིང་ཞེན་ཚོགས་པའི་གྲོས་ཚོགས་འཐུས་མི་དང་ཡུལ་དེའི་གྲོས་ཚོགས་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ Tim Loughton ལགས་ཀྱིས། ཀུན་གཟིགས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡིན་པ་དང་། རྒྱུན་ལྡན་གྱི་འཚོ་བ་རོལ་བཞིན་ཡོད་པ་སོགས་རྒྱ་ནག་གཞུང་གིས་བཤད་པ་ཙམ་ལས་འགྲིག་གི་མེད་པར། རིན་པོ་ཆེ་མཆོག་འཕྲལ་དུ་གློད་བཀྲོལ་བཏང་སྟེ་འཛམ་གླིང་ཁྱོན་ཡོངས་ལ་སྟོན་དགོས་པ་གསུངས་འདུག དེ་ཡང་དེ་རིང་བོད་མའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བར་གཞིགས་ན། རིང་མིན་ཟླ་བ་འདིའི་ཕྱི་ཚེས་ ༡༧ ཉིན་ཀུན་གཟིགས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གི་བཙོན་འཇུག་བྱས་ནས་གར་སོང་ཆ་མེད་དུ་གྱུར་ནས་མི་ལོ་ ༢༥ འཁོར་བའི་དུས་ཚིགས་དང་བསྟུན། ཨིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་ Tim Loughton ལགས་ཀྱིས། ཉེ་ཆར་བརྙན་པར་ཐོག་ནས་བསྒྲགས་གཏམ་ཞིག་འདོན་སྤེལ་གནང་བ་བརྒྱུད། རྒྱལ་སྤྱིའི་གཞུང་ཚོགས་ཁག་ནས་པཎ་ཆེན་རིན་པོ་ཆེའི་རང་དབང་ལ་རྒྱབ་སྐྱོར་གནང་དགོས་པ་དང་། རྒྱ་གཞུང་གིས་ཁོང་གི་སྐོར་ལ་བཤད་པ་ཙམ་ལ་ངོས་ལེན་མ་བྱེད་རྒྱུ་མིན་པར། རིན་པོ་ཆེ་ཁོང་གློད་གྲོལ་གྱིས་འཛམ་གླིང་ཡོངས་ལ་སྟོན་དགོས་བ་དང་། ཁོང་གཙོས་པའི་བོད་མི་ཡོངས་ཀྱི་རང་དབང་སྲུང་སྐྱོབ་བྱེད་དགོས་པ་གསུངས་འདུག སྐུ་ཞབས་ Tim Loughton ལགས་ཀྱིས་ད་དུང་། རྒྱ་ནག་གཞུང་གི་ངོས་ནས་བོད་མིའི་ཆོས་དང་རིག་གཞུང་རྩ་མེད་གཏོང་ཐབས་འོག   བོད་མི་ས་ཡ་མང་པོའི་ཚེ་སྲོག་འཕྲོག་པའི་དམ་དྲགས་ཀྱི་སྲིད་བྱུས་རྣམས་འགྱུར་བ་གཏོང་དགོས་པ་དང་། རྒྱ་ནག་གཞུང་གིས་བོད་མིའི་ཐོག་འཛིན་པའི་བྱེད་སྟངས་དེ་ནི་དྲང་བདེན་ལ་རྡོག་རོལ་བཏང་བའི་གནད་དོན་ཞིག་ཡིན་སྟབས། རྒྱལ་སྤྱི་ཁྱོན་ཡོངས་ནས་དེར་གདོང་ལེན་གནང་སྟེ། རིང་མིན་ཏོག་དབྱིབས་རིམས་ནད་ཀྱི་གནས་སྟངས་ཇེ་ལེགས་སུ་སོང་བའི་རྗེས་སུ། རྒྱ་ནག་གཞུང་གིས་རྒྱལ་སྤྱིའི་ཁྲིམས་ལ་རྩིས་མེད་རྡོག་རོལ་གྱིས་བོད་མིའི་འགྲོ་བ་མིའི་ཐོབ་ཐང་ཁག་རྩིས་མེད་གཏོང་བཞིན་པ་རྣམས་ཀྱི་ཐོག་ལ་དྲི་རྩད་ནན་པོ་བྱེད་དགོས་པ་དང་། རྒྱ་གཞུང་གི་ངོས་ནས་ཀྱང་རང་གི་ནོར་འཁྲུལ་ཡོ་བསྲང་བྱས་ཏེ་འཕྲལ་མར་པཎ་ཆེན་རིན་པོ་ཆེ་གློད་བཀྲོལ་བཏང་བ་དང་། བོད་མིའི་རང་དབང་སླར་གསོ་བྱེད་དགོས་པ་གསུངས་འདུག རྩ་བའི་སྐུ་ཞབས་ Tim Loughton ལགས་ནི་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་ཞིག་ཡིན་པ་དང་། དེ་སྔ་ ༢༠༡༨ ལོར་བཞུགས་སྒར་རྡ་རམ་ས་ལར་སྐུ་ཚབ་རུ་ཁག་གི་ཁོངས་སུ་ཆེད་ཕེབས་ཀྱང་གནང་སྟེ། ༸གོང་ས་སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་འགོ་ཁྲིད་རྣམས་དང་ལྷན་དུ་མཇལ་འཕྲད་གནང་མྱོང་ཡོད་པ་ཞིག་ཡིན་པ་རེད། མ་ཟད་ཁོང་ནས་སྔ་ལོ་ཨིན་ཡུལ་གྲོས་ཚོགས་ནང་དུ། བོད་ནང་འདྲ་མཉམ་འགྲུལ་སྐྱོད་ཀྱི་རང་དབང་དགོས་པའི་ཁྲིམས་ཆར་ངོ་སྤྲོད་གནང་བ་དང་། འདི་ལོའི་བོད་མིའི་གསུམ་བཅུའི་དུས་དྲན་གྱི་རང་དབང་སྒེར་ལངས་ཉིན་མོའི་མཛད་སྒོའི་ཐོག་ལ་ཡང་མཉམ་ཞུགས་གནང་ཡོད་པ་རེད།  

   

རྒྱ་ནག་གི་གསར་འགྱུར་དྲ་བས་གནས་ཚུལ་སྤེལ་བ་ལྟར་ན།  ཁེ་ཉིན་ཚེས་༨ གྱི་ཉིན། རྒྱ་ནག་གི་འཐབ་ཕྱོགས་གཅིག་གྱུར་ལས་ཁུངས་ཀྱི་གོ་སྒྲིག་གི་འོག  མཚོ་སྔོན་ཞིང་ཆེན་བོད་སྐད་ཡིག་ནང་བསྟན་སློབ་གླིང་དུ། མཚོ་སྔོན་ཞིང་ཆེན་བོད་བརྒྱུད་ནང་བསྟན་ལས་རིགས་ཀྱི་འཐུས་མིའི་ཆོས་ལུགས་སྲིད་ཇུས་སློབ་སྦྱོང་འཛིན་གྲྭ་ཞེས་ཉིན་ ༩་རིང་གི་ཟབ་ཁྲིད་ཀྱི་འཛིན་གྲྭ་ཞིག་སློབ་འགོ་ཚུགས་པ་དང་འབྲེལ་ཞིང་ཆེན་ཡོངས་ཀྱི་བོད་བརྒྱུད་ནང་བསྟན་དགོན་སྡེར་སློབ་སྦྱོང་དཔྱད་ཡིག་ཅེས་པ་ཞིག་གསར་དུ་བཀྲམས་ཡོད་པའི་གནས་ཚུལ་བཀོད་འདུག ཐེངས་འདིའི་རྒྱ་ནག་གི་ཉིན་དགུའི་རིང་རྒྱལ་གཅེས་ཆོས་གཅེས་ཀྱི་ཟབ་ཁྲིད་དེའི་ཁྲོད་དུ།   མཚོ་སྔོན་ཞིང་ཆེན་ནང་བསྟན་མཐུན་ཚོགས་ཀྱི་རྒྱུན་ལས་ལས་འཛིན་དང་བོད་བརྒྱུད་ནང་བསྟན་གྱི་དགོན་སྡེ་ཆེ་གྲས་ཁག་གི་སྤྲུལ་སྐུ་དང་། འཆད་ཁྲིད་དགེ་རྒན་དང་མཁན་པོ། དེ་བཞིན་དགོན་སྡེ་ཁག་གི་ལས་བྱེད་པ་བརྒྱ་ལྷག་ཙམ་འཛིན་གྲྭར་ཞུགས་ཏེ། ཆོས་ལུགས་སྲིད་ཇུས་དང་སྤྲུལ་སྐུའི་ཡང་སྲིད་ངོས་འཛིན་སོགས་ཀྱི་ཐད་ནས་རྒྱ་ནག་གི་ལམ་སྟོན་ལྟར་སློབ་སྦྱོང་བྱེད་བཞིན་ཡོད་པར་འཁོད་འདུག རྒྱལ་གཅེས་ཆོས་གཅེས་ཀྱི་ཟབ་ཁྲིད་སྐབས་སུ།   རྒྱ་ནག་གི་འཐབ་ཕྱོགས་གཅིག་གྱུར་ལས་ཁུངས་ཀྱི་ལས་བྱེད།  བོད་རིགས་མགོན་པོ་བཀྲ་ཤེས་ཟེར་བས་བོད་མི་རྣམས་ཀྱིས་སྤྲུལ་སྐུའི་ཡང་སྲིད་ངོས་འཛིན་བྱ་རྒྱུ་ནི་བོད་བརྒྱུད་ནང་བསྟན་གྱི་ལས་དོན་དོ་དམ་གྱི་ཕྱོགས་གལ་ཆེན་ཞིག་ཡིན་པས་ངེས་པར་དུ་ཆོས་ལུགས་ཀྱི་ཆོ་ག་དང་། ལོ་རྒྱུས་ཀྱི་གཏན་སྲོལ། རྒྱ་ནག་སྲིད་གཞུང་་གི་ཆོག་མཆན་བཅས་རྩ་དོན་ཆེན་པོ་གསུམ་ལ་བརྩི་སྲུང་བྱས་ནས་མེས་རྒྱལ་གཅིག་གྱུར་སྲུང་སྐྱོང་དང་། མི་རིགས་མཐུན་སྒྲིལ་སྲུང་སྐྱོབ་སོགས་ཀྱི་ཐད་ནས་ཚོགས་ཞུགས་ཀྱི་གྲྭ་བཙུན་ཚོར་གཏམ་བཤད་བྱས་ཏེ། ཕྱོགས་ཡོངས་ནས་རྒྱ་ནག་གི་རྒྱལ་གཅེས་ཆོས་གཅེས་ཀྱི་སློབ་གསོ་ལག་བསྟར་བྱེད་རྒྱུ་གལ་ཆེན་པོ་ཡིན་པར་བརྗོད་འདུག གོང་གི་གནས་ཚུལ་དེ་དང་འབྲེལ་ནས།  འདི་ག་རླུང་འཕྲིན་ཁང་གི་རྒྱ་ཡིག་སྡེ་ཚན་གྱི་གསར་འགོད་པས་ཐེ་ཝན་གྱི་དོན་གཅོད།  ཟླ་བ་ཚེ་རིང་ལགས་སུ་རྒྱ་ནག་གི་སློབ་སྦྱོང་འཛིན་གྲྭ་ཞེས་པའི་རྒྱལ་གཅེས་ཆོས་གཅེས་ཀྱི་ཟབ་ཁྲིད་དེའི་སྐོར་ལ་བཀའ་འདྲི་གནང་བར་ཁོང་གིས།   དགོན་སྡེར་བཅའ་སྡོད་ལས་བྱེད་པ་ནི་དོན་དངོས་ཐོག་ཆུ་ཚོད་ཉི་ཤུ་རྩ་བཞི་ཙམ་ལ་བོད་ཀྱི་དགེ་འདུན་པར་ལྟ་ཞིབ་བྱེད་མཁན་རྒྱ་ནག་གི་དཔོན་རིགས་ཤིག་ཡིན་པ་དང་། རྒྱ་ནག་གིས་དུས་རྒྱུན་ནས་བོད་ཀྱི་དགོན་སྡེ་དང་དགེ་འདུན་པ་ཚོས་དེང་རབས་ཅན་གྱི་ལྟ་ཞིབ་ཡོ་ཆས་སྤྱད་དེ་ལྟ་སྐུལ་ཚོད་འཛིན་བྱེད་པ་མ་ཟད། ད་དུང་དགོན་སྡེ་ཚང་མར་མངགས་གཏོང་ཁང་བཙུགས་ནས་ལྟ་ཞིབ་བྱེད་ཀྱི་ཡོད་པར་འགྲེལ་བརྗོད་་གནང་བ་དང་འབྲེལ།  རྒྱ་ནག་གི་སློབ་སྦྱོང་འཛིན་གྲྭ་ཟེར་བ་དེ་ནི་དོན་དངོས་ཐོག་བོད་བཙན་བཟུང་བྱས་པ་དང་འབྲེལ་བོད་ཀྱི་གྲྭ་བཙུན་གྱི་བྱ་སྤྱོད་རང་དབང་ལ་ལྟ་སྐུལ་ཚོད་འཛིན་ནན་པོ་བྱས་པ་དང་དུས་མཚུངས་བོད་ཀྱི་གྲྭ་བཙུན་གྱི་གཏམ་བརྗོད་དང་བསམ་བློ། ཡང་ན་དད་མོས་རང་དབང་བཅས་ལ་སྔར་བས་ཚོད་འཛིན་བྱེད་པའི་བྱ་སྤྱོད་ཅིག་ཡིན་པ་དང་།  དེའི་ནང་ཆོས་ཕྱོགས་ཀྱི་ཆོས་ཕྱོགས་ཀྱི་ཐ་སྙད་མང་པོར་ཁ་བསླུས་རྒྱག་པ། འཁྱོག་བཤད་བྱེད་པ་བཅས་ནི་རྒྱ་ནག་སྲིད་གཞུང་གི་གཡོ་སྒྱུའི་བྱ་ཐབས་ཤིག་རེད་ཅེས་ངོ་སྤྲོད་གནང་འདུག