བོད་ཀྱི་ཁོར་ཡུག་སྲུང་སྐྱོབ་དང་རིག་གཞུང་དོན་གཉེར་གནང་མཁན་ཚོང་པ་བསྟན་འཛིན་ཆོས་འཕེལ་ལགས་ཕྱི་ལོ་ ༢༠༡༨ ཕྱི་ཟླ་ ༣ པའི་ཟླ་མཇུག་ཏུ་རྒྱ་གཞུང་གིས་བཙན་ཁྲིད་འོག་ད་བར་གར་ཡོད་ཤེས་རྟོགས་མེད་པར་གྱུར་ཡོད་སྟབས། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་གཞུང་གིས་བསྟན་འཛིན་ཆོས་འཕེལ་ལགས་གར་ཡོད་ཅི་བྱས་དང་ཤི་གསོན་གྱི་དངོས་ཡོད་གནས་སྟངས་ངེས་པར་གསལ་བཤད་བྱེད་དགོས་པའི་ཛ་དྲག་གི་འབོད་སྐུལ་ཞུས་འདུག
རྩ་བའི་བསྟན་འཛིན་ཆོས་འཕེལ་ལགས་ཕྱི་ལོ་ ༢༠༡༨ ཕྱི་ཟླ་གསུམ་པའི་ཟླ་མཇུག་ཏུ་རྒྱ་ནག་ནས་ལྷ་སར་ལོག་པའི་ལམ་བར་དུ་ལྷོ་ཁ་གོང་དཀར་གནམ་ཐང་ནས་རྒྱ་གཞུང་གིས་གློང་བུར་དུ་འཇུ་བཟུང་བྱས་ནས་ཅ་དངོས་སྔོག་བཤེར་སྐབས་ཆབ་སྲིད་དང་འབྲེལ་བའི་རྩོམ་ཡིག་འགའ་ཞིག་དང་སྡོད་ཁྱིམ་དུ་སྔོག་བཤེར་སྐབས་༸གོང་ས་མཆོག་གི་༸སྐུ་པར་བཅས་ཐོན་པའི་གནས་ཚུལ་ཙམ་ལས་འཛིན་བཟུང་བྱེད་དོན་གང་ཡིན་ཤེས་རྟོགས་ཐུབ་མེད་པར་མ་ཟད། ད་ལྟའི་ཆར་ཁོང་བཀག་ཉར་བྱས་ནས་མི་ལོ་༢ དང་ཟླ་བ་གཉིས་ཙམ་འགྲོ་མུས་ཁྲོད་ཁོང་ས་གནས་གང་གང་ཞིག་ཏུ་ཡོད་མེད་སོགས་ཞིབ་ཕྲའི་གནས་ཚུལ་ཤེས་ཐབས་བྲལ་བ་རེད།
གནས་ཚུལ་དེ་དང་འབྲེལ་ནས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་བོད་གནས་ཉམས་ཞིབ་པ་པདྨ་རྒྱལ་ལགས་སུ་བཀའ་འདྲི་ཞུས་པར། ཁོང་གིས་འདི་ག་ལྟེ་གནས་ཁང་ལ་གནས་ཚུལ་ཤེས་རྟོགས་བྱུང་བའི་ནང་དུ་ད་ཆ་རྒྱ་གཞུང་གིས་ཡུལ་མི་ཚོས་ཚོང་པ་བསྟན་འཛིན་ཆོས་འཕེལ་སྐོར་གྱི་གནས་ཚུལ་གླེང་སློང་བྱས་མི་ཆོག་པ་དང་ཁོང་གི་འདྲ་པར་རིགས་ཁ་པར་དང་འཕྲིན་ཕྲན་སོགས་སྤྱི་ཚོགས་བརྒྱུད་ལམ་ཁག་ཏུ་སྤེལ་བའམ་བསྐུར་མི་ཆོག་པའི་བཙན་བཀའ་བཏང་ཡོད་པ་རེད་འདུག
གཞན་ཡང་ཁོང་གིས་རྒྱ་ནག་གཞུང་ནས་བཙན་དབང་གིས་བསྟན་འཛིན་ཆོས་འཕེལ་ལགས་གར་སོང་ཆ་མེད་བཟོས་པ་དེ་ནི་སོ་སོའི་རྩ་ཆེའི་རིག་གཞུང་དང་རང་བྱུང་ཁོར་ཡུག་སྲུང་སྐྱོབ་ཡོང་ཆེད་རྒྱ་གཞུང་གི་འཛུགས་སྐྲུན་ལས་གཞིའི་གཏོར་བཤིག་ལ་འགོག་རྒོལ་གནང་མཁན་ས་གནས་བོད་མི་ཚོར་འཕྲད་པའི་ཡ་ང་སྙིང་རྗེ་མེད་པའི་སྡུག་བསྔལ་མནར་གཅོད་ཀྱི་དཔེ་མཚོན་གཞན་ཞིག་ཡིན་པར་མ་ཟད། འདས་པའི་མི་ལོ་བཅུ་ཕྲག་རིང་རྒྱ་གཞུང་གི་མགོ་མཇུག་ལྡོག་པའི་འཛུགས་སྐྲུན་སྲིད་བྱུས་ལག་བསྟར་ཁྲོད་ཆུ་གློག་དང་ཐོན་ཁུངས་ལ་བཤུ་གཞོག་བཏང་བ་དེ་ས་གནས་བོད་མིའི་ཁོར་ཡུག་ཡུན་གནས་དང་འཚོ་རྟེན་རྒྱུན་གནས་ཀྱི་ཐོབ་ཐང་བཙན་འཕྲོག་བྱས་ཡོད་པར་སྐྱོན་བརྗོད་གནང་སོང་།
བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་ང་ཚོའི་ངོས་ནས་རྒྱ་གཞུང་གིས་བོད་མིའི་སྤྱི་ཚོགས་དང་མང་ཚོགས་ཀྱི་འཚོ་རྟེན་དོན་གཉེར་གནང་མཁན་བསྟན་འཛིན་ཆོས་འཕེལ་ལགས་གར་སོང་ཆ་མེད་བཟོས་བཞིན་པ་མྱུར་དུ་མཚམས་འཇོག་དགོས་པའི་འབོད་སྐུལ་དང་ཁོང་ཁྲིམས་འགལ་བཀག་སྐྱིལ་གྱིས་གར་སོང་ཆ་མེད་བཟོ་བཞིན་པ་དེས་རྒྱ་གཞུང་གིས་ས་གནས་བོད་མིའི་ཁེ་ཐོབ་སྲུང་སྐྱོབ་དང་ཡར་རྒྱས་ཀྱི་ལས་སུ་གཞོལ་མཁན་ཚོང་པ་ཁོང་གྲགས་འགུལ་མེད་པར་བཟོ་ཐབས་ཀྱི་དྲག་གནོན་དང་གདུག་རྩུབ་ཀྱི་བསམ་སྦྱོར་གསལ་བོར་མཚོན་ཡོད་ཅེས་ནན་བརྗོད་གནང་འདུག
ཆོས་འཕེལ་ལགས་ནི་རྒྱུན་དུ་རང་རིགས་ལ་ཞེན་པ་དཀར་ཞིང་བོད་ཀྱི་ཁོར་ཡུག་སྲུང་སྐྱོབ་དང་བོད་མི་ཉམ་ཐག་ལ་རོགས་སྐྱོར་དང་བོད་ཀྱི་ལོ་རྒྱུས་དང་རིག་གནས་སྲུང་སྐྱོབ་དང་འབྲེལ་བའི་ལས་གཞི་གང་ཞིག་ཡོད་ཀྱང་དེའི་ཐད་དཔལ་འབྱོར་གྱི་ཞལ་འདེབས་འབུལ་བ་དང་བོད་མི་ནང་ཁུལ་ལ་མཐུན་སྒྲིལ་སོགས་ཀྱི་ཆེད་དུ་ལྷག་བསམ་གཡོ་བ་མེད་པར་ཕྱག་ལས་གནང་མཁན་ཞིག་ཡིན་པ་དང་ལྷག་དོན་ལོ་ཤས་སྔོན་ནས་ནག་ཆུ་བྱི་ནགས་འཁོར་གསུམ་རྒྱུད་ཀྱི་གཏེར་ཆུ་དང་གཏེར་ཁང་སོགས་ལ་སྲུང་སྐྱོབ་ཆེད་དུ་རྫོང་དང་ལྗོངས་རིམ་པ་བརྒྱུད་ནས་གནས་རི་དང་གནས་ས་མང་པོ་ཞིག་རྒྱ་ནག་རྒྱལ་ཁབ་ཀྱི་མངོན་མིན་རིག་གནས་ཤུལ་བཞག་ཁོངས་སུ་ཡིག་ཆ་བཞག་པ་དང་ལོ་རྒྱུས་ཀྱི་རྡོ་རིང་སློང་བ་སོགས་ཀྱི་ལས་གཞིའི་ཐད་ལའང་དཔལ་འབྱོར་གྱི་འགྲོ་གྲོན་མང་དག་ཅིག་བཏང་མྱོང་འདུག
