Monthly Archives: April, 2021

ཁ་སང་། ཟླ་བ་ ༤ བའི་ཚེས་ ༢༦ ཉིན། བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་སྔར་ལོ་སྟེ། ཕྱི་ལོ་ ༢༠༢༠ ལོའི་བོད་ནང་གི་འགྲོ་བ་མིའི་ཐོབ་ཐང་གི་ལོ་འཁོར་སྙན་ཐོ་ཤོག་གྲངས་ ༧༡ ཅན་ཞིག་འདོན་སྤེལ་བྱས་པ་བརྒྱུད་ནས། རྒྱ་ནག་གི་གི་སྲིད་འཛིན་ཞི་ཅིན་ཕིང་གི་སྲིད་བྱུས་ཀྱི་འོག་ཏུ། སྔར་ལོ་བོད་ནང་དུ་བརྟན་ལྷིང་སྲུང་སྐྱོང་དང་མི་རིགས་མཐུན་སྒྲིལ། ནག་སེལ་གཤེད་བཅོམ་ལས་འགུལ་སོགས་དྲག་གནོན་སྲིད་ཇུས་རབ་དང་རིམ་པ་མང་པོ་ལག་བསྟར་གྱིས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་ཕྱིན་པ་ཡོད་པ་འགྲེལ་བརྗོད་གནང་བ་མ་ཟད། ཁྲིམས་འགལ་གྱི་དམར་གསོད་དང་མནར་གཅོད་ཇེ་མང་དང་། ཁྲིམས་འགལ་ལུགས་འགལ་གྱི་བསམ་སྦྱོར་དང་གང་བྱུང་བཀག་སྐྱིལ་ཁྱབ་ཆེར་བཏང་ཡོད་པར་འཁོད་འདུག

རྒྱ་གར་ནང་གི་ཏོག་ནད་ཀྱི་རླབས་རྒྱུན་གཉིས་པའི་ཁྲོད།  ཉིན་རེར་ཏོག་དབྱིབས་ནད་དུག་གསར་པ་ཕོག་མཁན་ཇེ་མང་དུ་འགྲོ་བཞིན་པ་མ་ཟད།  མངའ་སྡེ་དང་ས་གནས་སོ་སོ་ནས་གནས་སྟངས་ལ་གཞིགས་ཏེ་ཏོག་དབྱིབས་གཉན་རིམས་དང་འབྲེལ་ཐེམ་སྤང་གི་བཀའ་རྒྱ་གཙོས་པའི་ཤེས་ཡོན་ལྟེ་གནས་སོ་སོར་སློབ་ཞུགས་བྱེད་རྒྱུར་ཕྱིར་བཤོལ་སོགས་གནང་ཡོད།  དེའི་ཁྲོད་ཀང་ར་རྫོང་ཁོངས་སུ་ཁ་སང་གཉན་རིམས་དང་འབྲེལ་མཚན་གྱི་བཀའ་རྒྱ་དང་དེ་བཞིན་མངའ་སྡེ་གཞན་ནས་རྫོང་ནང་ཡོང་མཁན་ཚོར་དམིགས་ནས་སྒྲིག་གཞི་ཁག་ཅིག་བསྐྱར་དུ་ཡོངས་ཁྱབ་གསལ་བསྒྲགས་གནང་སོང་།དེ་ཡང་ཉེ་ལམ་རེས་གཟའ་ཉི་མའི་ཉིན་ཧི་མཱ་ཅལ་མངའ་སྡེ་གཞུང་ནས་ཀང་ར་དང་ཨུ་ནཱ།  སོ་ལན།  དེ་བཞིན་སིར་མཱོར་བཅས་རྫོང་བཞིའི་ནང་དེ་རིང་ཕྱི་ཚེས་ ༢༧ ནས་ཟླ་ ༥ པའི་ཚེས་ ༡༠ བར་མཚན་གྱི་བཀའ་རྒྱ་གཙོས་ཟུར་བཀག་དང་འབྲེལ་སྒྲིག་གཞི་ཁག་ཅིག་ཡོངས་ཁྱབ་གནང་ཡོད་པ་ལྟར།    ཁ་སང་ཀང་ར་རྫོང་དཔོན་སྐུ་ཞབས་ Rakesh Prajapati ལགས་ཀྱིས་གསར་འགོད་གསལ་བསྒྲགས་སྐོང་ཚོགས་ཐོག  ཀང་ར་རྫོང་ནང་དེ་རིང་རེས་གཟའ་མིག་དམར་ནས་བཟུང་ཕྱི་ཕྱོགས་ནས་ཕེབས་མཁན་ཚོར་ངེས་པར་དུ་ curfew pass འམ་བཀག་རྒྱའི་སྐབས་སུ་འགྲོ་སྐྱོད་ཆོག་པའི་ལམ་ཡིག་དགོས་པ་དང་།  དེའི་ཆེད་ཕྱི་ཕྱོགས་ནས་ཡོང་མཁན་ཚོས་ e-pass Portal ཞེས་པའི་ཐོག་ཐོ་འགོད་གནང་དགོས་པར་གསུངས་སོང་།  ལྷག་པར་རྫོང་ནང་ཕྱི་ནས་ཕེབས་མཁན་ཚོ་ RTPCR ཞེས་ཏོག་དབྱིབས་ནད་གཞི་ཕོག་ཡོད་མེད་ཀྱི་བརྟག་དཔྱད་གནང་མེད་ཚེ་དོ་བདག་རང་ཉིད་ཉིན་གྲངས་བཅུ་བཞི་རིང་རང་གནས་སུ་ཟུར་བཀག་འོག་བཞུགས་དགོས་ཀྱང་།  ཟུར་བཀག་གི་ཉིན་གྲངས་བདུན་རྗེས་ནས་བརྟག་དཔྱད་གནང་འདོད་ཡོད་ཚེ་དེ་ལྟར་གནང་ཆོག་པ་དང་།  སྐབས་དེ་དུས་ནད་གཞི་ཕོག་མེད་པའི་གྲུབ་འབྲས་ཐོན་ཚེ་ཟུར་བཀག་ལ་བཞུགས་མི་དགོས་པ་གསུངས་སོང་། མ་ཟད།  དོ་བདག་རང་ཉིད་ལ་ནད་གཞི་ཕོག་མེད་པའི་གྲུབ་འབྲས་ཡོད་ཚེ་ཟུར་བཀག་འོག་བཞུགས་མི་དགོས་པ་རེད་འདུག  ཕྱོགས་མཚུངས་ཀང་རར་གནས་བཞུགས་ས་གནས་ཀྱི་ཡུལ་མི་མངའ་སྡེ་གཞན་ནང་བསྐྱོད་པ་དང་ཆུ་ཚོད་ ༧༢ ནང་ཚུད་ལ་ཕྱིར་ལོག་ཐུབ་ཚེ་ཟུར་བཀག་འོག་བཞུགས་མི་དགོས་པ་དང་དེ་བཞིན།  མངའ་སྡེ་གཞན་གྱི་མི་ཞིག་རྫོང་ནང་ཆུ་ཚོད་ ༧༢ ནང་ཚུད་ལ་ཕྱིར་ལོག་ཐུབ་ཚེ་དེའང་ཟུར་བཀག་འོག་བཞུགས་མི་དགོས་པ་རེད་འདུག གཞན་ཡང་སྐབས་དེར་རྫོང་དཔོན་གྱིས་དེ་སྔ་མཚན་གྱི་བཀག་རྒྱ་དེ་བཞིན་ཕྱག་ཚོད་ ༨ པ་ནས་སྔ་དྲོའི་ཕྱག་ཚོད་ ༦ བར་ཡིན་པ་དེར་འགྱུརབ་བཏང་ནས་ད་ཆ་མཚན་གྱི་ཕྱག་ཚོད་ ༡༠ པ་ནས་སྔ་དྲོ་ཕྱག་ཚོད་ ༥ བར་དང་དེ་བཞིན་རེས་གཟའ་སྤེན་པ་དང་ཉི་མར་སྔར་ལྟར་ཕྱིར་བསྐྱོད་མི་ཆོག་པའི་བཀའ་རྒྱ་བསྡམས་སྐོར་གསུངས་སོང་། གཞི་རྩའི་ཧི་མ་ཅལ་མངའ་སྡེ་ནང་ད་བར་ཏོག་དབྱིབས་ནད་གཞི་ཕོག་མཁན་མི་གྲངས་ ༨༧༥༠༡ དང་འདས་གྲོངས་སུ་གྱུར་མཁན་ ༡༣༣༦ བྱུང་བ་དང་ལྷག་པར་ཟླ་ ༤ པའི་ཚེས་ ༡༢ ནས་ ༢༥ བར་མངའ་སྡེ་ནང་ཏོག་དབྱིབས་ནད་གཞི་ཕོག་མཁན་གསར་པ་ ༡༧༨༡༥ དང་འདས་གྲོངས་སུ་གྱུར་མཁན་ ༢༢༡ བྱུང་བ་མ་ཟད།  དེའི་ཁྲོད་ཉེ་ལམ་རེས་གཟའ་སྤེན་པའི་ཉིན་ཀང་ར་རྫོང་ནང་མི་ ༨ འདས་གྲོངས་ཀྱིས་རྫོང་གཞན་ནང་ནས་འདས་གྲོངས་སུ་གྱུར་མཁན་གྱི་གྲངས་ཐོ་མང་ཤོས་ཆགས་ཀྱི་ཡོད་པ་རེད་འདུག སྤྱིར་ནད་རླབས་གཉིས་པའི་ཁྲོད་ཧི་མ་ཅལ་ནང་རྒྱ་གར་གྱི་ས་གནས་གཞན་བཞིན་ཏོག་དབྱིབས་ནད་གཞི་ཕོག་མཁན་ཇེ་མང་དུ་འགྲོ་བཞིན་པ་དང་།  མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་གིས་མངའ་སྡེའི་ནང་ད་ཆ་ཁ་རས་དང་དུག་སེལ་ཆུ་དེ་བཞིན་དགོས་ངེས་ཀྱི་སྨན། འཚོ་འཛིན་རླུང་སོགས་འདང་ངེས་ཡོད་པ་གསུངས་འདུག་པ་མ་ཟད།  མངའ་སྡེ་ནང་ནད་པའི་ཆེད་ཉལ་ཁྲི་གྲངས་ཚད་སྤར་བར་ཤུགས་སྣོན་གནང་བཞིན་པ་རེད་འདུག རྩ་བའི་འདས་པའི་དུས་ཡུན་ནང་བོད་མི་འདུས་སྡོད་ཁག་ཏུའང་གཉན་རིམས་ཕོག་མཁན་རིམ་བཞིན་མང་དུ་ཐོན་བཞིན་པ་དང་།  དེའི་ཁྲོད་ཕལ་མོ་ཆེར་དེ་ཙམ་གྱི་དམིགས་བསལ་དཀའ་ངལ་འཕྲད་མེད་ཀྱང་།  ཁག་ཅིག་གི་གནས་སྟངས་ཛ་དྲག་འོག་ཡོད་རྐྱེན་ད་ཆ་རྒྱ་གར་གྱི་སྨན་ཁང་ཆེ་ཁག་ནང་སྨན་བཅོས་གནང་མུས་ཀྱི་གནས་སྟངས་རེད་འདུག

ཉན་པ།: Listen ཕབ་ལེན། Download ༸པཎ་ཆེན་རིན་པོ་ཆེའི་གནས་སྟངས་གསལ་བཟོ་དང་གློད་བཀྲོལ་དགོས་པའི་ཞུ་སྐུལ། ཡོ་རོབ་གནས་སྡོད་བོད་མིས་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་སྲུང་བརྩི། ལྡི་ལི་ནས་བོད་མི་ནད་པ་ཛ་དྲག་ཅན་ཁག་ཅིག་ལྡེ་ར་ལྡུན་སྨན་ཁང་དུ་བསྟེན་གཏུག བོད་ཀྱི་དུས་སྟོན་ཐེངས་ ༡༣ པ་འཚོགས་བཞིན་པ། Monday 26/04/2021 Exile Tibetans celebrate Panchen Lama’s 32nd birthday, reiterates call for his release 13th Brisbane Festival of Tibet being held online, Dalai Lama sends message COVID-19: Cases increasing in Tibetans areas, critical cases taken to Dehradun from Delhi

དེ་རིང་བྱེས་ཀྱི་གདན་ས་བཀྲིས་ལྷུན་པོར་༸ཀུན་གཟིགས་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་པ་དང་འབྲེལ། ༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དང་སྐུ་འཁོར། དེ་བཞིན་བྱ་བྲལ་རིན་པོ་ཆེ་བཅས་འཕྲལ་དུ་གློད་བཀྲོལ་དགོས་པ་མ་ཟད་ཁོང་རྣམ་པའི་གནས་སྟངས་ཇི་ཆགས་གསལ་པོ་བཟོ་དགོས་པའི་རེ་སྐུལ་བསྐྱར་ནན་གནང་སོང་།དེང་སྐབས་རྒྱ་ནག་གི་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་རྐྱེན་གྱིས་འཛམ་གླིང་ས་ཕྱོགས་གང་ས་དང་ལྷག་པར་དུ་རྒྱ་གར་ནང་དུ་གནས་སྟངས་ཆེས་ཛ་དྲག་ཆགས་པ་དང་འབྲེལ་ཏེ་མངའ་སྡེ་མང་པོ་ཞིག་ཏུ་རེས་གཟའ་སྤེན་པ་དང་ཉི་མ་ནམ་ཡིན་ལ་ཐེམ་སྤང་གི་བཀའ་རྒྱ་བསྡམ་ཡོད་པའི་གནས་སྟངས་ཁྲོད་དེ་རིང་བྱེས་ཀྱི་གདན་ས་བཀྲིས་ལྷུན་པོར་༸ཀུན་གཟིགས་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་སོང་།བྱེས་ཀྱི་གདན་ས་ཆེན་པོ་སེ་ར་བྱེས་སྨད་གཉིས་ཀྱི་མཁན་རིན་པོ་ཆེ་དང་། ལྷོ་སྤྱི་ཐུབ་བསྟན་ཚེ་རིང་ལགས། མཁན་ཟུར་རིན་པོ་ཆེ། སེ་ར་བླ་སྤྱི་དང་གྲྭ་ཚང་དང་རྣམ་གྲོལ་གླིང་དགོན་པའི་སྐུ་ཚབ་ཕྱག་མཛོད་རྣམ་པ། དེ་བཞིན་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་ལྷན་འཛོམས་ཀྱིས་༸ཀུན་གཟིགས་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་མཐོང་གྲོལ་རིན་པོ་ཆེ་འདུ་ཁང་དུ་གདན་འདྲེན་ཞུས་ཏེ་ཞབས་རིམ་གསོག་སྒྲུབ་དང་བསང་གསོལ། མཎྡྲལ་འདེགས་འབུལ། སྣང་གསལ་མར་མེ་ཞལ་འབྱེད། དེ་བཞིན་མངར་ཟས་ Cake བགོས་འགྲེམས་སོགས་བོད་ལུགས་དང་ཕྱི་ལུགས་གཉིས་ཀྱི་ཐོག་ནས་༸ཀུན་གཟིགས་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་རེད།གདན་ས་བཀྲིས་ལྷུན་པོའི་མཁན་རིན་པོ་ཆེ་གཟིག་རྒྱབ་སྤྲུལ་སྐུ་མཆོག་གིས་གདན་ས་བཀྲིས་ལྷན་པོའི་བླ་སྤྱི་ལྷན་ཁང་དང་༸པཎ་ཆེན་ཨེར་ཏེ་ནི་ཞབས་ཞུའི་ལས་དོན་བསྟི་གནས་ཁང་ཐུན་མོང་གིས་དེ་རིང་འཁྲུངས་སྐར་གྱི་ཉིན་མོར་སྤེལ་བའི་ཡོངས་ཁྱབ་གསལ་བསྒྲགས་སྒྲོག་སྦྱང་གནང་བར་༸ཀུན་གཟིགས་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་རིན་པོ་ཆེ་མཆོག་གང་དུ་བཞུགས་ཡོད་ཀྱང་༸སྐུའི་འཁྲུངས་སྐར་ཉིན་མོར་ཐུགས་མཉེས་པོ་ཡོང་བར་སྨོན་འདུན་ཞུས་པ་དང་སྦྲགས། ༸པཎ་ཆེན་སྐུ་ཕྲེང་ན་རིམ་དང་ལྷག་དོན་སྐུ་འཕྲེང་བཅུ་པ་ཆེན་པོས་བོད་མི་རིགས་དང་བསྟན་སྲིད་ཀྱི་ཆེད་དུ་༸སྐུ་སྲོག་བློས་བཏང་མཛད་པའི་མཛད་པ་ཁག་རྗེས་དྲན་ཞུས་པ་དང་ཆབས་ཅིག ཕྱི་ལོ་ ༡༩༩༥ ལོར་རྒྱ་ནག་གཞུང་གིས་དགུང་ལོ་ ༦ ལ་ཕེབས་པའི་ ༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དང་སྐུ་འཁོར། དེ་བཞིན་བྱ་བྲལ་རིན་པོ་ཆེ་བཅས་རྒྱ་གཞུང་གིས་བཙན་ཁྲིད་རྗེས་གར་སོང་ཆ་མེད་དུ་གྱུར་བ་དང་། ད་བར་བོད་མི་དང་བོད་དོན་རྒྱབ་སྐྱོར་བ། དེ་བཞིན་རྒྱལ་སྤྱིའི་གཞུང་ཚོགས་ཁག་གིས་རིན་པོ་ཆེ་མཆོག་གློད་བཀྲོལ་ཡོང་བའི་ལས་འགུལ་དང་འབོད་སྐུལ་རིམ་པ་གནང་ཁག་ལུང་འདྲེན་དང་འབྲེལ། ༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དང་སྐུ་འཁོར། དེ་བཞིན་བྱ་བྲལ་རིན་པོ་ཆེ་བཅས་འཕྲད་དུ་གློད་བཀྲོལ་དགོས་པ་མ་ཟད་ཁོང་རྣམ་པའི་གནས་སྟངས་ཇི་ཆགས་གསལ་པོ་བཟོ་དགོས་པའི་རེ་སྐུལ་བསྐྱར་ནན་གནང་སོང་།དེའི་བར་ན་ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བརྙན་ཐུང་བརྒྱུད་བོད་མི་ཡོངས་ཀྱི་ཚབ་ཞུས་ཏེ་༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་འཁྲུངས་སྐར་ལ་འཚམས་ཞུས་པ་དང་འབྲེལ། རྒྱ་ནག་གཞུང་གིས་༸པཎ་ཆེན་རིན་པོ་ཆེ་མཆོག་དང་སྐུ་ཁོར་ནང་མི་བཅས་པ་འཛིན་བཟུང་བྱས་པ་དེ་ནི་ཁོང་རྣམ་པའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་བ་མ་ཟད། ཁོང་ལ་དད་གུས་ལྷད་མེད་ཡོད་མཁན་བོད་མི་ཡོངས་ཀྱི་ཆོས་དད་རང་དབང་ལ་བརྩི་མེད་རྡོག་རོལ་བཏང་བའི་གནད་དོན་ཞིག་ཡིན་སྐོར་གསུངས་པ་དང་ཆབས་ཅིག སྲིད་སྐྱོང་མཆོག་གིས་མཉམ་འབྲེལ་རྒྱལ་ཚོགས་དང་འགྲོ་བ་མིིའི་ཐོབ་ཐང་གི་གནས་ཚུལ་སྙན་སྒྲོན་པ། འཛམ་གླིང་གི་གསར་འགོད་པ་བཅས་ལ་ཁྱེད་རྣམ་པ་བོད་དུ་ཕེབས་ནས་རྒྱ་གཞུང་ལ་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་མགྱོགས་མྱུར་གློད་བཀྲོལ་གཏོང་དགོས་པའི་འབོད་སྐུལ་གནང་དགོས་པ་དང་། དེ་བཞིན་རྒྱལ་སྤྱིའི་ཁྲོད་ཀྱི་གསར་འགོད་པ་ཡོངས་ལ་༸ཀུན་གཟིགས་༸པཎ་ཆེན་རིན་པོ་མཆོག་གི་སྐོར་གནས་ཚུལ་ཞིབ་ཕྲ་འགོད་དགོས་པའི་རེ་སྐུལ་བསྐྱར་ནན་ཞུས་འདུགཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ Ned Price ལགས་ཀྱིས་ཨ་རིའི་ངོས་ནས་བོད་མིའི་ཆོས་དད་རང་དབང་དང་བོད་མིའི་ཐུན་མོང་མ་ཡིན་པའི་ཆོས་དང་རིག་གཞུང་གི་ངོ་བོ། ༸གོང་ས་མཆོག་དང་༸ཎ་ཆེན་རིན་པོ་ཆེ་མཆོག་ལྟ་བུ་བོད་མི་ཚོའི་ངོས་ནས་ཐེ་བྱུས་གང་ཡང་མེད་པར་ཆོས་ཕྱོགས་ཀྱི་དབུ་ཁྲིད་འདེམས་རྒྱུ་དང་དད་གུས་ཞུ་རྒྱུ་བཅས་ཀྱི་རང་དབང་ལ་གུས་བརྩི་ཞུ་བཞིན་ཡོད་པ་དང་། ལྷག་དོན་རྒྱ་གཞུང་ལ་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཀྱི་གནས་སྟངས་ཁ་གསལ་བཟོ་དགོས་པ་དང་ཨ་རིའི་གཞུང་ལ་༸པཎ་ཆེན་རིན་པོ་ཆེ་མཆོག་དང་དངོས་སུ་མཇལ་འཕྲད་གནང་རྒྱུའི་གོ་སྐབས་བསྐྲུན་དགོས་པའི་འབོད་སྐུལ་གནང་འདུག ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དང་རྒྱ་རིགས་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ། དེ་བཞིན་ནང་སོག་འགྲོ་བ་མིའི་ཐོབ་ཐང་ཚོགས་པ་བཅས་ཀྱི་ཚོགས་གཙོ་འགན་འཛིན་རྣམ་པ། ཨ་རིར་རྟེན་གཞི་བྱས་པའི་ Beijing Spring དུས་དེབ་ཀྱི་རྩོམ་སྒྲིག་པ་བཅས་ཀྱིས་༸པཎ་ཆེན་རིན་པོ་ཆེ་མཆོག་གི་འཁྲུངས་སྐར་ལ་འཚམས་འདྲི་དང་མགྱོགས་མྱུར་གློད་བཀྲོལ་གཏོང་དགོས་པའི་འབོད་སྐུལ་གནང་འདུགཨ་རིའི་གྲོས་ཚོགས་འོས་མའི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་དང་ཡུན་རིང་ནས་བོད་དོན་རྒྱབ་སྐྱོར་གནང་མཁན་སྐུ་ཞབས་ Jim McGovern ལགས་ཀྱིས་ཀྱང་ད་བར་རྒྱ་ནག་གཞུང་གིས་༸པཎ་ཆེན་རིན་པོ་ཆེ་༸སྐུ་འཚོ་བཞུགས་ཡོད་སྐོར་བཤད་པ་དེ་དངོས་སུ་ལག་བསྟར་བྱས་ནས་གོ་ལའི་ཁྱོན་ལ་གསལ་པོ་བཟོ་དགོས་སོགས་གསུངས་འདུགཁ་སང་བཙན་བྱོལ་བོད་མིའི་གནས་སྡོད་གང་སར་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་རྣམ་པ་འདྲ་མིན་ཐོག་ནས་༸ཀུན་གཟིགས་༸པཎ་ཆེན་རིན་པོ་ཆེ་མཆོག་གི་༸སྐུའི་འཁྲུངས་སྐར་ སྲུང་བརྩི་ཞུས་ཡོད་པ་རེད།

ཁ་སང་ཟླ་ ༤ ཚེས་ ༢༥ ཉིན་མོ་སྟེ་རྒྱ་གཞུང་གིས་བཙན་ཁྲིད་བྱས་པའི་༸པཎ་ཆེན་སྐུ་འཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་༸སྐུའི་འཁྲུངས་སྐར་དུས་ཆེན་དང་བསྟུན་རིན་པོ་ཆེ་མཆོག་དགུང་ལོ་ ༦ ནས་རྒྱ་ནག་གཞུང་གིས་འཛིན་བཟུང་བཙན་ཁྲིད་ཀྱིས་ད་བར་གར་ཡོད་ཤེས་རྟོགས་མེད་པར་གྱུར་ཡོད་ཀྱང། བཙན་བྱོལ་ནང་གི་བོད་མི་ཚོས་ལོ་ལྟར་ཉིན་དེར་རིན་པོ་ཆེ་མཆོག་༸སྐུ་འཚོ་བཞུགས་ཡོད་པ་ལྟར་ས་གནས་སོ་སོར་གནང་སྒོ་འདྲ་མིན་ཐོག་ནས་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་བཞིན་ཡོད་པ་རེད། ཉིན་འདིར་ཁ་སང་ཡོ་རོབ་རྒྱལ་ཁབ་ནང་ལ་ཆ་མཚོན་ན། ཕ་རན་སིར་ཕ་རན་བོད་རང་བཙན་སློབ་ཕྲུག་ཚོགས་པས་སྣེ་ཁྲིད་དེ་ཁུལ་དེའི་རྒྱལ་ས་པེ་རེས་ Republique ཐང་ཆེན་དུ་བོད་མི་ཚོས་མངར་ཟས་ Cake འགྲེམས་སྤེལ་དང་གཞས་སྣ་འཁྲབ་སྟོན། དེ་བཞིན་རྒྱ་ནག་དམར་པོའི་གཞུང་གིས་༸པཎ་ཆེན་དགེ་འདུན་ཀྱི་ཉི་མ་མཆོག་འཛིན་བཟུང་ བྱས་ནས་ད་བར་གར་སོར་ཆ་མེད་དུ་བཏང་བའི་བྱ་སྤྱོད་ལ་ངོ་རྒོལ་གྱི་སྐད་འབོད་ལས་འགུལ་སྤེལ་བ་དང། རིན་པོ་ཆེ་མཆོག་གང་མགྱོགས་གློད་གྲོལ་ཡོང་བའི་མཚན་རྟགས་བསྡུ་རུབ་བཅས་ཀྱི་གནང་སྒོ་འདྲ་མིན་སྤེལ་བ་བརྒྱུད་བོད་མི་ཚོས་ཉིན་འདིར་དགའ་སྐྱོ་ཟུང་འབྲེལ་གྱི་ཚོར་བའི་ཐོག་ནས་༸ཀུན་གཟིགས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་གྲངས་ ༣༢ ལ་ཕེབས་པའི་༸སྐུའི་འཁྲུངས་སྐར་སྲུང་བརྩི་ཞུས་འདུགདེ་བཞིན་ཉིན་འདིར་ཡོ་རོབ་རྒྱལ་ཁབ་ཨི་ཊ་ལི་ནང་དུའང་ཨི་ཊ་ལི་བོད་རིགས་ཚོགས་པ་དངས་གནས་བོད་ཀྱི་བེུད་ལྷན་ཚོགས། བོད་དོན་རྒྱབ་སྐྱོར་ཚོགས་པ་སོགས་ཐོུང་གིས་གོ་སྒྲིག་གནང་སྟེ་ཨི་ཊ་གྲོས་ཚོགས་འཐུས་མི་སྐུ་ཞབས་ Matteo Luigi Banchi ལགས་གཙོ་བཞུགས་ཐོག་ས་གནས་བོད་མི་དང་བོད་དོན་རྒྱབ་སྐྱོར་བ་རྣམས་ནས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་སྒྲིག་གཤོམ་གནང་ནས་མར་མེའི་སྨོན་ལམ་གསུང་དོན་དང་མངར་ཟས་ Cake འགྲེམས་སྤེལ། དེ་བཞིན་རྒྱ་གཞུང་གི་ངོས་ནས་༸པཎ་ཆེན་དགེ་འདུན་ཆོས་ཀྱི་ཉི་མ་གང་མགྱོགས་ཆ་རྐྱེན་གང་ཡང་མེད་པར་གློད་བཀྲོལ་དགོས་པའི་ཞི་བའི་སྐད་འབོད་སོགས་གནང་བ་བརྒྱུད་རིན་པོ་ཆེ་མཆོག་གི་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་རེད།གཞན་ཡང་ཁ་སང་སུད་སི་ནང་ལ་ཆ་མཚོན་ན། སུད་སི་ས་གནས་བོད་ཀྱི་བེུད་ལྷན་ཚོགས་ཀྱིས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུའི་འཁྲུངས་སྐར་ལ་འཚམས་འདྲི་དང་རིན་པོ་ཆེ་མཆོག་རྒྱ་གཞུང་གིས་གར་སོང་ཆ་མེད་དུ་བཏང་བའི་ལོ་རྒྱུས་སོགས་ཆེད་སྒྲིག་བརྙན་ཐུང་སྤྱི་ཚོགས་དྲ་ལམ་ཐོག་ཁྱབ་སྤེལ་གནང་བ་དང་། ས་གནས་བེུད་ལྷན་ཚོགས་ཀྱི་ཁྱབ་ཁོངས་ཚོགས་ཆུང་ཁག་ནས་སྨོན་ལམ་གསུང་འདོན་བཅས་ཆོས་ཕྱོགས་གནང་སྒོ་དང། དེ་བཞིན་ཚོགས་ཆུང་སོ་སོའི་ཁྱབ་ཁོངས་ས་གནས་མང་ཚོགས་ཁྲོད་༸པཎ་ཆེན་རིིན་པོ་ཆེའི་སྐོར་གྱི་ཡིག་ཆ་བགོས་འགྲེམས་ཀྱི་ལས་འགུལ་སྤེལ་འདུག་པ་མ་ཟད། དེ་བཞིན་ཉིན་འདིར་སུད་སི་ཨར་གྷའོ་ཚོགས་ཆུང་གིས་བོད་སློབ་དང་རིག་གཞུང་སྡེ་ཚན་གོ་སྒྲིག་འོག་དགེ་ལས་ཕ་མ་དང་སློབ་ཕྲུག་བཅས་འདུ་འཛོམས་ཀྱིས་༸པཎ་ཆེན་རིན་པོ་ཆེའི་༸སྐུའི་འཁྲུངས་སྐར་ཡང་སྲུང་བརྩིཞུས་འདུག དེ་དང་ཕྱོགས་མཚུངས་ཁ་སང་ཉིན་མོ་འདིར་ཡོ་རོབ་རྒྱལ་ཁབ་གཞན་ནི་དྷར་ལེནཊནང་དུ་ཁུལ་དེའི་ས་གནས་བོད་རིགས་ཚོགས་པ་དང་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང། བོད་དོན་རྒྱབ་སྐྱོར་ཚོགས་པ་བཅས་ནས་ས་ཁུལ་དེའི་རྒྱ་ནག་གཞུང་ཚབ་ཁང་གི་མདུན་དུ་རིན་པོ་ཆེ་མཆོག་གློད་བཀྲོལ་དགོས་པའི་ཞི་བའི་སྐད་འབོད་ཀྱི་ལས་འགུལ་སྤེལ་བ་དང། དེ་བཞིན་དབྱིན་ཡུལ་བོད་རིགས་ཚོགས་པ་གཙོས་ས་གནས་ཚོགས་སྒེར་ཁག་ནས་ས་གནས་ཀྱི་གནས་བབ་ལ་གཞིགས་ཏེ་དྲྭ་ཐོག་ནས་༸པཎ་ཆེན་རིན་ཆེའི་༸སྐུའི་འཁྲུངས་སྐར་སྲུང་བརྩི་ཞུས་པའི་བརྙན་ཐུང་སྤེལ་ཡོད་ཅིང་། དེ་བཞིན་སྦེལ་ཇམ་ནང་གི་རྒྱ་ནག་གཞུང་ཚབ་ཁང་མདུན་དུའང་བོད་མི་དང་བོད་དོན་རྒྱབ་སྐྱོར་བ་ཚོས་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་༸སྐུ་པར་སྒྲིག་གཤོམ་ཐོག་མར་མེའི་སྨོན་ལམ་གསུང་འདོན་གནང་སྟེ་རིན་པོ་ཆེ་མཆོག་ལ་གདུང་སེམས་མཉམ་བསྐྱེད་ཀྱི་ལས་འགུལ་སྤེལ་འདུགགཞན་ཡང་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གིས་ཀྱང་ངོ་དེབ་བརྒྱུད་གར་སོང་ཆ་མེད་དུ་གྱུར་བའི་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་ཆེད་མར་མེའི་ལས་འགུལ་ཞིག་སྤེལ་ཡོད་པ་རེད།  

རྒྱ་གར་ནང་གི་བཙན་བྱོལ་བོད་མིའི་སྤྱི་ཚོགས་ནང་ཏོག་དབྱིབས་གཉན་རིམས་ཕོག་པའི་ནད་པ་ཇེ་མང་དུ་འགྲོ་བཞིན་པའི་ཁྲོད་འདིར་ལྡི་ལི་ནས་བོད་མི་ནད་མནར་ཛ་དྲག་ཅན་ཁག་ཅིག་ལྡེ་ར་ལྡུན་སྨན་ཁང་དུ་བསྟེན་གཏུག་སླད་ཁྲིད་འདུགད་ཆ་ཏོག་དབྱིབས་གཉན་རིམས་ཀྱི་ནད་གཞི་ཁྱབ་གདལ་ཆེས་ཆེར་འགྲོ་བཞིན་པའི་རྐྱེན་གྱིས་རྒྱ་གར་གྱི་རྒྱལ་ས་ལྡི་ལིར་མཚོན་ན། ད་བར་གཉན་རིམས་ཕོག་པའི་ནད་པ་གསར་པ་ས་ཡ་གཅིག་ལྷག་དང་འདས་གྲོངས་སུ་གྱུར་བ་ཆིག་ཁྲི་སུམ་སྟོང་ལྷག་བྱུང་འདུག་པ་མ་ཟད། ཁུལ་དེའི་གཞུང་སྒེར་གྱི་སྨན་ཁང་ཕལ་མོ་ཆེ་བའི་ནང་དུ་ཉལ་ཁྲི་དང་ Oxygen འམ་སྲོག་རླུང་འདང་ངེས་མེད་པའི་དཀའ་ངལ་ཆེན་པོ་འཕྲད་བཞིན་པའི་ཁྲོད། ཉེ་ལམ་སྤྱི་ཚོགས་དྲ་ལམ་ཐོག་ལྡི་ལིར་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པའི་འགན་འཛིན་ཚུལ་ཁྲིམས་རྡོ་རྗེ་ལགས་ཀྱིས་ལྡི་ལི་ནས་བོད་མི་ནད་མནར་ཛ་དྲག་ཅན་ཁག་ཅིག་ཁྲིད་ཡོད་ཀྱང་ཉལ་ཁྲི་དང་ནད་པར་ལྟ་རྟོག་གནང་དཀའ་བར་བརྟེན་ཁོང་གིས་བོད་མི་དེ་དག་ལྡི་ལི་ནས་ལྡེ་ར་ལྡུན་སྨན་ཁང་དུ་བསྟེན་གཏུག་སླད་ཁྲིད་འདུགདེའི་ཁྲོད་ལྡེ་ར་ལྡུན་མངའ་ཁུལ་བདེ་སྐྱིད་གླིང་བོད་མིའི་གཞིས་ཆགས་སུ་ཚེས་ ༡༤ ནས་ཉིན་རེར་བོད་མི་ནད་པ་བཅུ་གྲངས་རེ་ཐོན་ཏེ་དེ་རིང་བར་གཉན་རིམས་འགོས་པའི་ནད་པ་ཁྱོན་ ༡༦༤ ཙམ་བྱུང་བར་བརྟེན་དུས་ཚོད་ངེས་མེད་བར་དུ་གཞིས་མི་ཚོར་ཐེམ་སྤང་གི་བཀའ་རྒྱ་བསྡམས་འདུག དེའི་ཐད་བདེ་སྐྱིད་གླིང་ས་གནས་འགོ་འཛིན་ནོར་བུ་ལགས་སུ་བཀའ་འདྲི་ཞུས་པར་ཁོང་གིས་ད་ལྟའི་ཆར་བོད་མི་ ༡༦༤ ལ་ནད་གཞི་ཕོག་ཡོད་པ་དང་དེའི་ནང་ནས་ནད་པ་བརྒྱད་ལ་དབྱུགས་འབྱིན་རྔུབ་ཀྱི་ངལ་བ་དང་འབྲེལ་ནས་ས་གནས་ཀྱི་གཞིས་སྒར་སྨན་ཁང་དུ་བཞག་ཡོད་ཀྱང་།དེ་རིང་ཉིན་རྒྱབ་ནད་པ་གཅིག་ཆེས་ཛ་དྲག་གནས་སྟངས་འོག་ཁུལ་དེར་རྟེན་གཞི་བྱས་པའི་རྒྱ་གར་གྱི་ Indresh སྨན་ཁང་དུ་བསྟེན་གཏུག་གནང་བ་ལས་དེ་མིན་རྣམས་དམིགས་བསལ་ངལ་བ་མེད་སྐོར་གསུངས་ཡོད།དེའི་ཁྲོད་རྒྱ་གར་བྱང་ཤར་ཡུ་པི་མངའ་སྡེར་རྟེན་གཞི་བྱས་པའི་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་དེ་སྔོན་ནད་པ་ ༢༩ ཙམ་བྱུང་བའི་ཁྲོད་ལས་བྱེད་གསུམ་དགོངས་པ་རྫོགས་པའི་ཡིད་སྐྱོའི་གནས་ཚུལ་བྱུང་ཡོད་པ་ལྟར། ཉེ་ལམ་མཐོ་རིམ་སློབ་མ་ཡོངས་རྫོགས་དང་ལས་བྱེད་ཁག་ཅིག་ Rapid Test ཞེས་པའི་བརྟག་དཔྱད་གནང་འབྲས་སུ་སློབ་མ་བཅུ་ལ་ནད་རྟགས་ཐོན་ཡོད་སྟབས་ཁོང་རྣམས་ཟུར་བཀག་ཏུ་བཞག་འདུག ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་རིགས་བདག་པདྨ་ཤྲི་དགེ་བཤེས་ངག་དབང་བསམ་གཏན་ལགས་ཀྱིས་བརྙན་ཐུང་བརྒྱུད་མཐོ་སློབ་ནང་གཉན་རིམས་ཕོག་པའི་གནས་སྟངས་སྤྱི་དང་སྒོས་ནད་གཞི་ཁྱབ་གདལ་གྱི་ཛ་དྲག་གནས་སྟངས་འོག་མཐོ་སློབ་ཀྱི་ཡིག་རྒྱུགས་རྣམས་གནས་སྐབས་རིང་ཕྱིར་བཤོལ་གནང་སྟེ་སློབ་ཕྲུག་རྣམས་རང་ཁྱིམ་དུ་ཕྱིར་ཕེབས་འཐུས་ཆོག་པའི་ཡོངས་ཁྱབ་སྤེལ་བ་དང་སྦྲགས། དགེ་ལས་སློབ་གཉེར་བ་རྣམས་ལ་གཉན་རིམས་སྔོན་འགོག་གནང་ཕྱོགས་དང་འབྲེལ་བའི་ལམ་སྟོན་གནང་ཡོད་པ་རེད།གཞི་རྩའི་ད་བར་རྒྱ་བལ་གཉིས་ནང་ཁྱོན་བོད་མི་ ༢༡༧༥ ལ་གཉན་རིམས་ཕོག་ཡོད་པ་དང་དེའི་ཁོངས་དྲག་སྐྱེད་སོང་བ་ ༡༦༩༣ དང་འདས་གྲོངས་སོང་བ་ ༥༡ དེ་བཞིན་ནད་ཀྱིས་མནར་བཞིན་པ་ ༤༣༡ ཆགས་ཀྱི་ཡོད་པ་རེད།

ཨོ་སི་ཊོ་ལི་ཡའི་ནང་གནས་བཞུགས་བོད་པའི་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱིས་ལོ་ལྟར་གོ་སྒྲིག་གནང་བའི་ Festival of Tibet འམ་བོད་ཀྱི་དུས་སྟོན་དེ་ད་ལྟའི་ཆར་རྒྱ་ནག་ཝུ་ཧན་ནས་ཆེས་ཐོག་མར་མཆེད་པའི་ཏོག་དབྱིབས་ནད་ཡམས་ཀྱི་ཁྱབ་གདལ་ཆེས་ཆེར་འགྲོ་བཞིན་པའི་ཛ་དྲག་གི་གནས་སྟངས་རྐྱེན་གྱིས་ Brisbane གྲོང་ཁྱེར་ནང་ཚོགས་ཐུབ་མེད་ཀྱང་ད་ཆ་དུས་སྟོན་ཐེངས་ ༡༣ པ་དེ་དྲྭ་ལམ་བརྒྱུད་འཚོགས་བཞིན་འདུགཐེངས་འདིའི་བོད་ཀྱི་དུས་སྟོན་ཐེངས་ ༡༣ པ་དེ་ཁ་ཉིན་རེས་གཟའ་སྤེན་པ་སྟེ་ཚེས་ ༢༤ ནས་དབུ་འཛུགས་ཀྱིས་ཟླ་ ༥ ཚེས་ ༤ བར་འཚོགས་ཀྱི་ཡོད་པ་དང་དུས་སྟོན་ཐོག་བོད་པའི་གློག་བརྙན་གཟིགས་འབུལ་དང་བགྲོ་གླེང་། གླུ་གཞས། སྙན་ངག་གྱེར་འདོན། སྒྲུང་བཤད། ཟབ་སྦྱོང་། དེ་བཞིན་བོད་ཀྱི་གནམ་གཤིས་འགྱུར་ལྡོག་གི་ཤུགས་རྐྱེན་དང་ད་ལྟའི་བོད་ཀྱི་གནས་སྟངས་སོགས་ཀྱི་ལས་རིམ་མང་དག་ཅིག་གོ་སྒྲིག་གནང་འདུགསྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱི་ཐེངས་འདིའི་བོད་ཀྱི་དུས་སྟོན་དང་འབྲེལ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འཕྲིན་ཞིག་སྩལ་འདུག་པའི་ནང་། ཐེངས་འདིའི་ Prayers for Peace ཞེས་པའི་བརྗོད་གཞིའི་ཐོག་ནས་བོད་ཀྱི་དུས་སྟོན་གོ་སྒྲིག་ཞུས་པ་དེར་ཨོ་གླིང་ཁུལ་གྱི་སྒྱུ་རྩལ་བ་མང་པོ་ཞིག་ནས་མཉམ་ཞུགས་གནང་བར་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་བ་དང་འབྲེལ། རོལ་དབྱངས་ནི་མང་ཚོགས་ཀྱི་ཚོར་ཤེས་འདྲེན་ནུས་ལྡན་པ་དང་། དུས་སྟོན་འདིའི་ཐོག་ནས་རྒྱལ་སྤྱིའི་ཁྲོད་བོད་ནང་གི་དངོས་ཡོད་གནས་སྟངས་ཇི་ཆགས་ཀྱི་གོ་རྟོགས་སྤེལ་རྒྱུ་དང་། དེ་བཞིན་བོད་ཀྱི་ཐུན་མིན་ཆོས་རིག་དང་སྐད་ཡིག་སོགས་གསོན་པོ་གནས་པར་མཐུན་རྐྱེན་དུ་གྱུར་ཡོད་པར་བཀའ་སྩལ་འདུགདེ་བཞིན་༸གོང་ས་མཆོག་གིས་བོད་ཀྱི་ལེགས་བྱང་ནི་ཞི་བདེ་དང་བྱམས་བརྩེའི་བདག་ཉིད་ཆགས་ཡོད་སྟབས་དེ་སྲུང་སྐྱོབ་གནང་འོས་པ་དང་། མགོན་པོ་མཆོག་ནས་ནང་ཆོས་ཁྱབ་སྤེལ་མཛད་རྒྱུའི་དགོངས་པ་མེད་ཀྱང་། རང་གཞན་ཀུན་ལ་ཕན་པའི་ཚན་རིག་དང་མཐུན་པ་གང་ཞིག་རིགས་པས་དཔྱད་བཟོད་དུ་གྲུབ་པའི་ནང་ཆོས་ལས་གསུངས་པ་སེམས་ཀྱི་ཞི་བདེ་འཚོལ་ཐབས་སྐོར་བཀའ་སྩལ་མཛད་ཀྱི་ཡོད་སྐོར་བཀའ་སྩལ་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་སྐུ་ཞབས་ཆོས་རྒྱལ་ལགས་ཀྱིས་བོད་ཀྱི་དུས་སྟོན་དེ་ལྟ་བུ་གཉེར་ནས་བོད་དོན་ཐོག་སེམས་འཁུར་གྱི་རྣམ་པ་བསྟན་པར་བསྔགས་བརྗོད་མཛད་པ་དང་སྦྲགས། ཕན་ཚུན་ལྟོས་གྲུབ་བམ་རྟེན་འབྲེལ་གྱི་རྣམ་གཞག་དེ་ནི་ལྷན་སྐྱེས་དང་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གྱི་རྨང་གཞི་ཡིན་སྐོར་བཀའ་སྩལ་བ་མ་ཟད། ང་ཚོའི་ངོས་ནས་རང་ཉིད་ཀྱི་སྒེར་དང་ཁྱིམ་གཞིས། དེ་བཞིན་རྒྱལ་ཁབ་གཅིག་པོའི་དོན་དུ་མིན་པར་འགྲོ་བ་ཡོངས་ཀྱི་བདེ་ཐབས་ལ་སྨན་པའི་ཕྱག་ལས་གནང་གནད་ཡིན་པ་སོགས་ཀྱི་གནད་དོན་ཐོག་ལམ་སྟོན་བཀྲིན་ཆེ་བ་མཛད་འདུགམགོན་པོ་༸གང་ཉིད་མཆོག་གིས་མཇུག་ཏུ་ཐེངས་འདིའི་བོད་ཀྱི་དུས་སྟོན་ཐོག་མཉམ་ཞུགས་གནང་མཁན་ཡོངས་ལ་དགའ་བསུའི་འཚམས་འདྲི་སྩལ་བ་དང་ཆབས་ཅིག སླད་མར་དུས་སྟོན་དེ་མཛའ་གྲོགས་དང་མཐུན་སྒྲིལ་གོང་འཕེལ་དང་ལྷག་དོན་གོ་ལ་ཁྱོན་དུ་གནས་པའི་གཅེན་གཅུང་ཕོ་མོའི་དབར་བསམ་ཤེས་ཀྱི་གོ་རྟོགས་རྒྱ་གང་ཆེ་ཡོང་བར་ཐུགས་སྨོན་སྩལ་འདུགགཞི་རྩའི་ཆོས་རྒྱལ་ལགས་ཀྱིས་འདས་པའི་ལོ་ངོ་བཅུ་གསུམ་རིང་བོད་བརྒྱུད་ནང་བསྟན་དང་བོད་ཟས་རིགས། བོད་དོན་དང་འབྲེལ་གློག་བརྙན་གཟིགས་འབུལ། སྒྱུ་རྩལ་སོགས་ཀྱི་སྒོ་ནས་བོད་ཀྱི་ཐུན་མིན་རིག་གཞུང་དང་ཡུལ་སྲོལ་གོམས་གཤིས། དེ་བཞིན་བོད་དོན་དྲིལ་བསྒྲགས་སོགས་གནང་གི་ཡོད་པ་དང་། དུས་སྟོན་དེ་ཐོག་མར་ཁོང་གིས་ཕྱི་ལོ་ ༢༠༠༨ ལོར་བོད་ཀྱི་ས་ཕྱོགས་གང་སར་བོད་མི་རྣམས་ནས་རྒྱ་ནག་གི་དྲག་པོའི་སྲིད་བྱུས་ལ་ངོ་རྒོལ་གྱིས་གཞི་རྒྱ་ཆེ་བའི་ལས་འགུལ་སྤེལ་བ་དང་བསྟུན། རང་དབང་ཅན་གྱི་ཡུལ་ལུང་ནང་གནས་བཞུགས་བོད་མི་ཡོད་དོ་ཅོག་གི་སེམས་ནང་བརྗོད་པར་དཀའ་བའི་སེམས་ཚོར་དྲག་པོ་ཞིག་བསྐྲུན་ཕྱིར་གོ་སྒྲིག་གནང་བ་ཞིག་ཆགས་ཀྱི་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གི་ཆིབས་ཞབས་པ་ཞིག་གི་སྐུ་ཚེ་ལོ་རྒྱུས་སྙིང་བསྡུས། Sunday 25/04/2021 A short biography of HH Dalai Lama's escort to exile.

ཉན་པ།: Listen ཕབ་ལེན། Download ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་འཕོ་འགྱུར་བཏང་བའི་གནད་དོན་ལས་འཕྲོས་པའི་ངལ་བ་ཁག་སེལ་ཐབས་ཇི་ཡོད་སྐོར། Saturday 24/04/2021 Constitutional Crisis: Way forward