Monthly Archives: July, 2021

ཁ་སང་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་ནས་གཞུང་འབྲེལ་གྱི་ཊྲི་ཊར་དྲྭ་གནས་ཐོག་༸གོང་ས་མཆོག་དགུང་གྲངས་ ༨༦ བདག་གིར་བཞེས་པའི་༸སྐུའི་འཁྲུངས་ལ་དགའ་བསུའི་འཚམས་འདྲི་ཞུས་པ་དང་འབྲེལ། མགོན་པོ་༸གང་ཉིད་མཆོག་གིས་ང་ཚོར་རང་གི་ཉིན་རེའི་མི་ཚེ་འདི་བག་ཡོད་དང་བྱམས་བརྩེ་ཅན། དེ་བཞིན་བསམ་ཤེས་ཐོག་ནས་སྐྱེལ་དགོས་པའི་སེམས་འགུལ་ཐེབས་ཡོད་པས་མགོན་པོ་༸གང་ཉིད་མཆོག་༸སྐུ་ཚེ་ཡུན་དུ་བརྟན་པའི་སྨོན་འདུན་ཞུས་འདུགདེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་ཀྱང་ཨ་རིའི་གྲོས་ཚོགས་འོག་མའི་ཚབ་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་ལ་འཁྲུངས་སྐར་གྱི་དམིགས་བསལ་འཚམས་འདྲི་ཞུས་པའི་བརྙན་ཐུང་ཞིག་འདོན་སྤེལ་གནང་འདུག་པ་དང་དེའི་ནང་ལྕམ་སྐུ་མཆོག་ནས་ད་ལན་བོད་མི་ཚོ་དང་དེ་མིན་བོད་ཀྱི་གྲོགས་པོ་ཧ་ཅང་མང་པོ་དང་མཉམ་དུ་༸སྐུའི་འཁྲུངས་སྐར་ཉིན་འཚམས་འདྲི་ཞུ་རྒྱུ་བྱུང་བ་འདི་ནི་དགའ་སྤོབས་ཀྱི་རང་བཞིན་ཞིག་ཡིན་པ་དང་འཁྲུངས་སྐར་དུས་ཆེན་ནི་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཡོངས་ལ་༸སྐུ་ཉིད་ཀྱི་ཐུགས་རེ་དང་ཆོས་ཕྱོགས་ཀྱི་བསླབ་བྱ་གནང་བ་ཁག་དྲན་གསོ་ཞུ་རྒྱུའི་གོ་སྐབས་དམིགས་བསལ་ཅན་ཞིག་ཡིན་ལ། དེ་བཞིན་ཞི་བདེ་ལ་དགའ་བའི་མི་ཚོས་རྒྱ་ནག་གཞུང་གི་ཐེ་གཏོགས་མེད་པའི་ཐོག་ནས་བོད་མི་རྣམས་ལ་རང་གི་ཆོས་དང་སྐད་ཡིག་དེ་བཞིན་རིག་གཞུང་བཅས་ལ་དམ་དྲག་མེད་པའི་ཐོག་ནས་གཅེས་སྲུང་བྱེད་ཐུབ་རྒྱུར་རྒྱབ་སྐྱོར་གྱི་ཆོད་སེམས་བརྟན་པོ་གཏོང་དགོས་པའི་ཉིན་མོ་ཞིག་ཀྱང་ཡིན་སྟབས། ཨ་རིའི་གྲོས་ཚོགས་གོང་འོག་གི་ཆབ་སྲིད་ཚོགས་པ་གཉིས་ཀའི་ངོས་ནས་རྒྱ་ནག་ལ་འགན་འཁྲི་འཛུབ་སྟོན་དང་བོད་མི་དམངས་ལ་རྒྱབ་སྐྱོར་མཚོན་ཆེད་ད་ཆ་ཨ་རིའི་རྒྱལ་ཁབ་ཀྱི་ལག་བསྟར་ཁྲིམས་ཡིག་ནང་འཁོད་བོད་དོན་རྒྱབ་སྐྱོར་གྱི་ཁྲིམས་ཡིག་གཏན་འབེབས་གནང་རྒྱུ་སོགས་ཀྱི་མཚོན་པའི་གདོང་ལེན་སྣ་མང་ཞིག་གནང་ཡོད་པ་མ་ཟད། ང་ཚོས་མུ་མཐུད་བོད་དོན་རྒྱབ་སྐྱོར་ཆེད་ནུས་པ་ལྡན་པའི་ལས་དོན་སྤེལ་རྒྱུ་ཡིན་ཞེས་གསུངས་འདུགད་དུང་ཁོང་གིས་དེ་རིང་གི་དམིགས་བསལ་ཉིན་མོ་དེར་དེ་སྔ་རྡ་རམ་ས་ལར་གྲོས་ཚོགས་ཀྱི་ཚོགས་མིའི་སྐུ་ཚབ་ཀྱི་འགོ་ཁྲིད་ཀྱི་ངོ་བོའི་ཐོག་ནས་བཅར་རྒྱུ་བྱུང་བ་དེ་སླར་ཡང་དྲན་བཞིན་ཡོད་ཅེས་དང་དེ་གར་ཁོང་རྣམ་པར་༸གོང་ས་མཆོག་ནས་སྣེ་ལེན་ཞུས་པའི་སྐལ་བཟང་གི་གོ་སྐབས་བྱུང་ཡོད་ལ་དེ་བཞིན་བོད་མིའི་མངོན་འདོད་ངོ་མ་ཇི་ཡིན་བོད་མི་སྤྱི་དང་སྒོས་བོད་ཕྲུག་ཚོའི་དམིགས་ལམ་ནས་ཐད་ཀར་ཤེས་རྟོགས་ཐུབ་པའི་གོ་སྐབས་ཀྱང་བྱུང་སྐོར་གསུངས་སོགས་གསུངས་ཏེ། ༸གོང་ས་མཆོག་གི་༸སྐུའི་འཁྲུངས་བརྒྱུད་བོད་མི་དང་འཛམ་གླིང་ཡོངས་ལ་བདེ་སྐྱིད་དང་བདེ་ཐང་། སྲུང་སྐྱོབ་བཅས་ཡོང་བའི་སྨོན་འདུན་ཞུས་པ་དང་ཆབས་ཅིག་ཐུགས་རྗེ་ཆེ་ཞུས་འདུགདེ་དེ་བཞིན་ཁ་སང་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་སྐུ་ཞབས་ Ned Price ལགས་ཀྱིས་ཉིན་རེའི་གཞུང་འབྲེལ་གསར་འགོད་ལྷན་ཚོགས་ཤིག་ཐོག་དེ་རིང་གི་གནས་ཚུལ་གལ་ཆེ་ཤོས་ནི་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུ་རྒྱུ་འདི་ཡིན་ཞེས་གསུངས་འདུག  སྐབས་དེར་སྐུ་ཞབས་ Ned Price ལགས་ཀྱིས་མགོན་པོ་༸གང་ཉིད་མཆོག་གི་གཟི་བྱིན་དང་བྱམས་བརྩེའི་རང་བཞིན་གྱིས་ང་ཚོ་ཚང་མར་སེམས་འགུལ་ཆེན་པོ་ཐེབས་ཡོད་ཅེས་དང་༸གོང་ས་མཆོག་གི་ཞི་བདེ་དང་བྱམས་བརྩེ་འདྲ་མཉམ་སོགས་རླབས་ཆེན་གྱི་དགོངས་པ་ཁག་མཉམ་སྤྱོད་གནང་མཁན་གོ་ལ་འདིའི་སྟེང་གི་བོད་མིའི་སྤྱི་ཚོགས་དང་གཞན་ཡང་འཛམ་གླིང་གི་ཡུལ་གྲུ་གཞན་དུ་གནས་པ་ཚང་མར་བསྔགས་བརྗོད་ཞུས་བ་དང་སྦྲགས། མགོན་པོ་༸གང་ཉིད་མཆོག་༧སྐུ་ཚེ་ཡུན་དུ་བརྟན་པར་རེ་སྨོན་ཞུ་མཁན་ཚོ་དང་ལྷན་དུ་ང་ཚོས་ཀྱང་དེ་དོན་ཞུ་བཞིན་ཡོད་པ་གསུངས་འདུགརྩ་བའི་ཁ་སང་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་དང་བསྟུན། ཐེ་ཝན་གྱི་སྲིད་འཛིན་ལྕམ་ Tsai Ing wen མཆོག་དང་རྒྱ་གར་གྱི་སྲིད་བློན་ Narendra Modi མཆོག་རྣམ་གཉིས་ཀྱི་དབུས་པའི་ཆེས་མཐོའི་བློན་ཆེན་ཁག་ཅིག་གིས་༸སྐུའི་འཁྲུངས་སྐར་ལ་འཚམས་འདྲི་ཞུས་ཡོད་པའི་ཁྲོད། ཁ་སང་ཁེ་ན་ཌའི་གྲོས་ཚོགས་འཐུས་མི་སྐུ་ཞབས་ Arif Virani ལགས་དང་གྲོས་ཚོགས་འཐུས་མི་སྐུ་ཞབས་ Garnett Genuis ལགས་རྣམ་གཉིས་ནས་རང་ཉིད་ཀྱི་ངོ་དེབ་ཐོག་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་ཏེ། སྐུ་ཞབས་ Genius ལགས་ཀྱིས་ཁོང་ནས་མུ་མཐུད་བོད་མིར་མིང་དོན་མཚུངས་པའི་རང་སྲིད་རང་སྐྱོང་གི་གནས་བབ་ཐོབ་རྒྱུ་དང་སྒོས་འཛམ་གླིང་ས་ཕྱོགས་གང་སར་འགྲོ་བ་མིའི་ཐོབ་ཐང་དང་ཆོས་དད་རང་དབང་གོང་འཕེལ་གཏོང་རྒྱུའི་ཆོས་སེམས་བརྟན་པོ་ཡོད་ཅེས་གསུངས་པ་མ་ཟད། ལྡི་ལིའི་སྤྱི་ཁྱབ་བློན་ཆེན་གཞོན་པ་སྐུ་ཞབས་ Manish Sisodia མཆོག་ནས་༸གོང་ས་མཆོག་གི་བཀའ་དགོངས་འོག་ལྡི་ལི་ཁུལ་གྱི་སློབ་གྲྭ་ཁག་ནང་བདེ་སྐྱིད་སྐྲུན་ཐབས་སམ་ Happiness Curriculum ཞེས་པའི་བསླབ་གཞི་དབུ་འབྱེད་གནང་ཐུབ་པ་འདི་གཟི་བརྗིད་དང་། ལྷག་དོན་མགོན་པོ་༸གང་ཉིད་མཆོག་གི་བྱམས་བརྩེ་དང་ཕན་སེམས། དེ་བཞིན་བག་ཡོད་རང་བཞིན་དག་ནི་འགྲོ་བ་མིའི་རིགས་ལ་སེམས་འགུལ་ཐེབས་གཞིར་ངོས་འཛིན་ཞུ་བཞིན་ཡོད་པ་གསུངས་འདུགགཞི་རྩའི་འདི་ལོའང་ཏོག་དབྱིབས་རིམས་ནད་རྐྱེན་གྱིས་བཙན་བྱོལ་རྒྱ་གར་ནང་མང་ཚོགས་ཕོན་ཆེ་འདུ་འཛོམས་ཀྱིས་དགའ་དད་སྤྲོ་གསུམ་ངང་༸སྐུའི་འཁྲུངས་སྐར་དུས་ཆེན་སྲུང་བརྩི་གནང་ཐབས་བྲལ་ནའང་། བོད་མིའི་སྒྲིག་འཛུགས་ཀྱི་ལམ་སྟོན་གཞིར་བཟུང་ས་གནས་སོ་སོའི་ནང་སྔ་ཐོག་བསང་གསོལ་དང་སྨོན་ལམ་གསུང་འདོན། དེ་བཞིན་དཀར་སྐྱོང་གནས་བབ་བརྒྱུད་དེ་ཉིན་གང་བོར་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་དེ་སྲུང་བརྩི་ཞུས་ཡོད་པ་མ་ཟད། དྲྭ་ཐོག་བརྒྱུད་༸སྐུའི་འཁྲུངས་སྐར་ལ་དགའ་བསུའི་འཚམས་འདྲིའི་བརྙན་པར་འདོན་སྤེལ་དང་དེ་བཞིན་བོད་མིའི་ཚོགས་སྒེར་ཁག་ནས་གཞིས་མི་ཉམ་ཐག་དང་ཉེ་འཁོར་གྱི་རྒྱ་གར་ཡུལ་མི་རྣམས་ལ་སྐམ་ཟས་བགོ་འགྲེམས་བརྒྱུད་ཉིན་མོ་དེ་སྲུང་བརྩི་གཟབ་རྒྱས་ཡོད་པ་རེད། དེའི་ཁྲོད་བཞུགས་སྒར་རྡ་རམ་ས་ལར་མཚོན་ན། ཁ་སང་སྔ་ཐོག་༸གོང་ས་མཆོག་གི་འཁྲུངས་སྐར་དང་བསྟུན་ ༸སྐྱབས་རྗེ་ཡོངས་འཛིན་མཆོག་སྤྲུལ་གླིང་རིན་པོ་ཆེ་མཆོག་གིས་བདེ་ལེགས་སྨན་ཁང་གི་བརྟག་དཔྱད་དང་ཛ་དྲག་སྨྱུར་སྐྱོབ་ཚན་པ་གཉིས་དབུ་འབྱེད་གནང་འདུག་པ་དང་། སྐབས་དེར་རིན་པོ་ཆེ་མཆོག་གིས་ཁོང་༸སྐུའི་འཁྲུངས་སྐར་ཉིན་མོ་སྟེ་དུས་ཚིགས་ཁྱད་པར་ཅན་ཞིག་ལ་བདེ་ལེགས་སྨན་ཁང་དུ་ཕེབས་རྒྱུའི་གོ་སྐབས་བྱུང་བར་ཐུགས་དགྱེས་ཚོར་ཆེན་པོ་བྱུང་སྐོར་དང་འབྲེལ། བཙན་བྱོལ་བོད་མི་རྣམས་ད་ཆ་རྒྱལ་ཁབ་ཡོད་པའི་མི་རིགས་དག་དང་དཔུང་པ་མཉམ་གཤིབ་ཀྱིས་མི་ཚོགས་ཁྲོད་དུ་འགྲེང་ཐུབ་པ་ནི་གཙོ་བོ་མགོན་པོ་༸གང་ཉིད་མཆོག་གི་བཀའ་དྲིན་ཉག་གཅིག་ཡིན་སྟབས་བོད་མི་ཚོས་མགོན་པོ་༸གང་ཉིད་མཆོག་གི་བཀའ་དྲིན་དྲན་པའི་ཐོག་ནས་ཁོང་གི་བཀའ་གསུང་བསྒྲུབ་རྒྱུ་ནི་བོད་མི་ཚང་མའི་འགན་འཁྲི་ཡིན་པ་མ་ཟད། བོད་ཀྱི་ཆེས་ཛ་དྲག་གཉན་འཕྲང་ཅན་གྱི་དུས་སྐབས་སུ་ཚང་མས་འགན་འཁུར་མཉམ་ལེན་བྱ་དགོས་ཞེས་གཞེན་སྐུལ་གནང་འདུག ཕྱོགས་མཚུངས་ཁ་སང་༸སྐུའི་འཁྲུངས་སྐར་གྱི་ཉིན་མོ་དང་བསྟུན་ནས་ཀིརྟིའི་བྱེས་པ་གྲྭ་ཚང་གི་ཨ་ལགས་རྗེ་སྤྲུལ་བློ་གྲོས་ཆོས་བཟང་ལགས་ཀྱིས་བརྩམས་པའི་ཨ་རི་བ་བླ་མ་དཀར་པོ་ཞེས་པའི་དཔེ་དེབ་ཅིག་དབུ་འབྱེད་གནང་ཡོད་པ་རེད། དེ་བཞིན་ཁ་སང་བོད་མི་ཚོང་པ་ཚོའི་ཅ་དངོས་ཉོ་སའི་ལྟེ་གནས་རྒྱ་གར་ Punjab མངའ་ཁོངས་ཀྱི་རྒྱལ་ས་ Ludhiana ནང་། རྒྱ་གར་ཚོང་པ་ཚོགས་པའི་འཐུས་མི་དང་ཚོང་པ་སོགས་ཁག་ཅིག་ནས་མངར་ཟས་བགོ་འགྲེམས་ཐོག་ནས་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཏེ་ ༸གང་ཉིད་མཆོག་༸སྐུ་ཚེ་ཡུན་དུ་བརྟན་པའི་སྨོན་འདུན་ཞུས་འདུག ཕྱོགས་མཚུངས་རྒྱ་གར་བྱང་ཤར་རྡོ་རྗེ་གླིང་གི་སོ་ན་ཌ་གྲོང་སྡེ་ནང་ཁ་སང་༸སྐུའི་འཁྲུངས་སྐར་སྲུང་བརྩི་དང་འབྲེལ་བཀྲ་ཤིས་ཕུན་ཚོགས་ཞེས་པའི་ཤར་པ་ཞིག་གིས་རྐང་འཁོར་སྐོར་བསྐྱོད་ཀྱི་ལས་འགུལ་ཞིག་སྤེལ་ཡོད་པ་རེད།

དེ་རིང་ཕྱི་ཟླ་ ༧ ཚེས་ ༧ ཉིན་གྱི་ཞོགས་པ་ཕྱག་ཚོད་ ༩ ཙམ་ལ་ Dr. Reddy's ཡི་དགེ་རྩ་ཚོགས་པས་ཇི་ལྟར་གསོལ་འདེབས་ཞུས་པ་བཞིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ཐོག་བརྒྱུད་ Dr. Reddy's  ཡི་ནད་རིགས་བརྟག་དཔྱད་ཁང་གི་ཟུང་འབྲེལ་གཙོ་སྐྱོང་དང་འཛིན་སྐྱོང་གཙོ་འཛིན་སྨན་པ་ G.V. Prasad ལགས་ཀྱིས་གཙོས་ཆེད་ལས་སྨན་པ་ཁག་ཅིག་དང་ལྷན་དུ་བྱམས་བརྩེ་དང་འཕྲོད་བསྟེན་ཞེས་པའི་བརྗོད་གཞིའི་ཐོག་གསུང་གླེང་མཛད་སོང་བ་མ་ཟད་སྐབས་དེར་འཕྲོད་བསྟེན་ཆེད་ལས་པ་ཁག་ཅིག་གི་དོགས་འདྲིར་ཐུགས་བརྩེ་ཆེན་པོས་བཀའ་ལན་བཀའ་དྲིན་ཆེ་བར་མཛད་སོང་།༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་གསུང་གླེང་ལས་རིམ་དངོས་སུ་དབུ་འཛུགས་མ་གནང་གོང་ཁ་སང་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ལ་འཛམ་གླིང་ཡུལ་གྲུ་གང་སར་སྲུང་བརྩི་ཞུས་པ་དང་། ལྷག་པར་དུ་མང་ཚོགས་དང་བྱེ་བྲག་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་  Nancy Pelosi མཆོག་གིས་གཙོས་རྒྱ་གར་གྱི་སྲིད་བློན་མོ་དྷི་མཆོག་དང་མངའ་སྡེ་ཁག་གི་བློན་ཆེན། གཞན་ཡང་དབུ་ཁྲིད་མི་སྣ་མང་དག་ཅིག་གིས་མགོན་པོ་མཆོག་ལ་དགའ་གུས་ཆེན་པོས་ཞལ་ཞེ་གཉིས་མེད་ཀྱིས་འཚམས་འདྲི་ཞུས་པ་མ་ཟད། ༸སྐུ་ཚེའི་མཛད་འཕྲིན་ཁག་ལ་ཡི་རངས་བསྔགས་བརྗོད་ཞུས་པར་ཐུགས་རྗེ་ཆེ་ཞེས་བཀའ་སྩལ་བ་དང་ཆབས་ཅིག ཁོང་རྣམ་པའི་ཡི་རངས་ཀྱི་ཚིག་བརྗོད་དེ་དག་གིས་མགོན་པོ་མཆོག་གི་གཟིམ་ལམ་དང་མཚན་མ་གཞན་ཁག་ཏུ་དགུང་གྲངས་ ༡༡༠ དང་ཡང་ན་དགུང་གྲངས་ ༡༡༣ བར་སྐུ་འཚོ་བཞུགས་མཛད་རྒྱུ་གསལ་དོན་ལྟར་དགུང་གྲངས་ ༡༡༠ བར་དུ་སྐུ་འཚོ་བཞུགས་མཛད་རྒྱུའི་ཐུགས་དགོངས་ཆེན་པོ་ཡོད་པར་བཀའ་སྩལ་སོང་།དེ་བཞིན་མགོན་པོ་༸གང་ཉིད་མཆོག་གིིས་སྐབས་དེར་མགོན་པོ་མཆོག་ནི་རྒྱ་གར་གྱི་སྐུ་མགྲོན་རྒྱུན་རིང་ཤོས་ཤིག་དང་རྒྱལ་ཁབ་ལ་དམིགས་བསལ་གྱི་ངལ་བ་གང་ཡང་བཟོས་གནང་མཛད་མེད་སྟབས་ག ནས་ཡུལ་རྒྱལ་ཁབ་ཏུ་རང་དབང་གི་སྒོ་ནས་རྒྱ་གར་གྱི་གནའ་བོའི་རིག་གནས་༸དཔལ་ཎ་ལེནྡཱའི་རིག་གནས་ལ་ཉམས་བཞེས་་མཛད་རྒྱུ་དང་ལྷག་པར་དུ་མགོན་པོ་མཆོག་གི་མཛའ་གྲོགས་རྒྱ་གར་ཉེན་རྟོག་པ་DSP ཞིག་གིས་༸དཔལ་ཎ་ལེནྡཱའི་རིག་བདག་ཆེན་པོ་ཞིག་ཡིན་པར་ཞུས་དོན་ལྟར་མགོན་པོ་མཆོག་བཙན་བྱོལ་ནང་གི་དགེ་འདུན་པ་དཀྱུས་མ་ཞིག་དང་༸དཔལ་ཎ་ལེནྡཱའི་སློབ་མ་ཞིག་ཡིན་པ་མ་ཟད། ཏོག་ཙམ་འུར་ཤོབ་ཀྱི་ཐོག་ནས་ཞུས་ན་༸དཔལ་ཎ་ལེནྡཱའི་རིག་བདག་ཆེན་མོའམ་མཁས་དབང་ཞེས་བརྗོད་ཆོག་ཅེས་བཀའ་སྩལ་ཡོད།༸གོང་ས་མཆོག་གི་ནང་སེམས་ཀྱི་ཞི་བདེ་བསྐྲུན་ཐབས་དང་འབྲེན་ནས་དེང་རབས་ཀྱི་ཚན་རིག་པ་ཚོས་ཀླད་པ་ལ་ཞིབ་འཇུག་གནང་རྒྱུ་ཙམ་ལས་སེམས་ལ་ཞིབ་འཇུག་གནང་རྒྱུའི་ཐབས་ལམ་ཧ་ལམ་མེད་སྟབས་ནང་པའི་གཞུང་ལས་གསུངས་པའི་སེམས་ཞི་བདེ་བསྐྲུན་ཐབས་དང་ཉོན་མོངས་པའི་བློ་ལ་གཉེན་པོ་བསྟེན་ཐབས་སོགས་ལ་ཚན་རིག་པ་ཚོས་དོ་སྣང་ཆེན་པོ་གནང་བཞིན་ཡོད་པ་རེད་ཅེས་བཀའ་སྩལ་བ་དང་འབྲེལ། དེང་གི་དུས་སུ་ཁོར་ཡུག་གི་དཀའ་ངལ་ལས་གཞན་པའི་དཀའ་ངལ་ཕལ་མོ་ཆེ་མིས་བཟོས་པ་འབའ་ཞིག་ཡིན་སྟབས་དེའི་རྒྱུ་རྐྱེན་ནི་བྱམས་སྙིང་རྗེའི་ཉམས་ལེན་མ་འདང་ནས་བྱུང་བ་ཞིག་རེད། དེས་ན་དཀའ་ངལ་དེ་དག་སེལ་ཕྱིར་རྒྱ་གར་གྱི་གནའ་བོའི་རིག་གནས་ལ་དོ་སྣང་གནང་དགོས་པ་བཀའ་སྩལ་ཡོད། ལྷག་དོན་ལོ་ངོ་སྟོང་ཕྲག་ནས་ཡོད་པའི་རྒྱ་གར་གྱི་གནའ་བོའི་རིག་གནས་དང་དེང་དུས་ཀྱི་ཤེས་ཡོན་གཉིས་ཟུང་འབྲེལ་གནང་གལ་དང་འབྲེལ་ནས་ནད་ཡམས་འདི་ཞི་རྗེས་རྒྱས་ས་ལྡི་ལིར་ཆིབས་བསྒྱུར་ཀྱིས་སྲིད་བློན་མོ་དྷི་མཆོག་གིས་དབུས་པའི་བློན་ཆེན་ཁག དེ་བཞིན་ཤེས་ཡོན་མི་སྣ་རྣམས་དང་མཇལ་མོལ་མཛད་དེ་གནད་དོན་དེའི་ཐད་བཀའ་བསྡུར་མཛད་རྒྱུའི་ཐུགས་དགོངས་ཡོད་པར་བཀའ་སྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནས་ལམ་སྟོན་བཀའ་སློབ་སྩལ་གྲུབ་མཚམས་སུ་སྨན་པ་ཁག་ནས་དོགས་འདྲི་ཞུ་རྒྱུའི་སྐལ་བཟང་གི་གོ་སྐབས་བཀའ་དྲིན་ཆེ་བར་སྩལ་བ་ལྟར། སྨན་པ་ཞིག་གིས་ནད་ཡམས་མཆེད་པའི་སྐབས་དུས་ཚོད་མ་འདང་བས་ནད་པར་རོགས་རམ་གནང་དཀའ་བར་གདོང་ལེན་གནང་ཐབས་ཐད་ལམ་སྟོན་ཞུས་པར་དངངས་སྐྲག་ཡོད་པའི་སྐབས་སུ་བྱམས་བརྩེའི་ཉམས་ལེན་ཡོད་ན་ཕན་ཐོགས་ཆེན་པོ་ཡོད་པ་དང་ལྷག་པར་དུ་སྨན་པ་དང་སྨན་ཞབས་པ་ཚོས་རང་ཉིད་ཀྱི་ལས་ཀ་དེ་རླབས་ཆེན་ལ་ངོས་འཛིན་གནང་རྒྱུ་དང་འགྲོ་བ་མིའི་འཕྲོད་བསྟེན་དང་འབྲེལ་ནས་སྨན་པ་དང་སྨན་པའི་རོགས་པ་ཚོས་སོ་སོའི་ལས་ཀ་དེ་ཆོས་ཀྱི་ངོ་བོར་ངོས་འཛིན་དགོས་པ་ལས་ཚོང་གྱི་ངོ་བོར་ངོས་འཛིན་རྒྱུ་མེད་པ་མ་ཟད་ནད་པའི་སེམས་ཀྱི་ཞི་བདེའི་སྐོར་ལ་འགན་འཁུར་བཞེས་དགོས་པར་ལམ་སྟོན་བཀྲིན་ཆེ་བ་མཛད་ཡོད།  

ཁ་སང་ཕྱི་ཚེས་ ༦ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཉིན་རྒྱ་གར་གྱི་སྲིད་བློན་སྐུ་ཞབས་ Narendra Modi མཆོག་ནས་རང་ཉིད་ཀྱི་ Tweeter དྲ་གནས་ཐོག་ཞལ་པར་བརྒྱུད་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་ལ་འཚམས་འདྲི་ཞུས་ཡོད་པ་ཡོངས་གྲགས་གནང་རྗེས་དཔྱད་ཞིབ་པ་དང་གནད་ཡོད་མི་སྣ་ཁག་ཅིག་གིས་ད་རེས་སྲིད་བློན་མོ་དྷི་མཆོག་གིས་༸སྐུའི་འཁྲུངས་སྐར་ལ་འཚམས་འདྲི་གནང་བ་དེ་སྐུ་ཞབས་མོ་དྷི་མཆོག་གིས་སྣེ་ཁྲིད་པའི་རྒྱ་གར་གཞུང་གི་བོད་ཐོག་འཛིན་པའི་སྲིད་བྱུས་ཀྱི་གོམ་སྟབས་གསར་པ་ཞིག་ཡིན་པ་མ་ཟད་རྒྱ་ནག་ལ་མཚོན་ན་བརྡ་ལན་ཆེན་པོ་ཞིག་ཡིན་སོགས་གསུང་བཞིན་འདུགསྐུ་ཞབས་ Modi མཆོག་གིས་ཕྱི་ལོ་ ༢༠༡༤ ལོར་རྒྱ་གར་གྱི་སྲིད་བློན་གྱི་ཐུགས་འགན་བཞེས་ཏེ་ལོ་ངོ་བརྒྱད་ཙམ་འགྲོ་བཞིན་པའི་མཚམས་འདིར་ཐེངས་དང་པོ་ཡོངས་གྲགས་ཀྱི་ཐོག་ནས་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་ལ་འཚམས་འདྲི་གནང་ཡོད་པ་དང་། གནད་དོན་དེ་དང་འབྲེལ་བོད་དོན་ཆེད་མཁས་པ་དང་རྩོམ་པ་པོ་སྐུ་ཞབས་ Claude Arpi ལགས་ནས་ད་ལྟའི་རྒྱ་དཀར་ནག་གཉིས་ཀྱི་མཐའ་མཚམས་ཀྱི་གནད་དོན་ལ་གཞིགས་སྐབས་སྲིད་བློན་མཆོག་གིས་༸སྐུའི་འཁྲུངས་སྐར་ལ་འཚམས་འདྲི་གནང་བ་དེ་རྒྱ་ནག་ལ་བརྡ་ལན་ཆེན་པོ་ཞིག་དང་། བོད་དང་རྒྱ་གར་གཉིས་ཀྱི་འབྲེལ་བའི་གནད་དོན་ལ་གཞིགས་ན། ད་རེས་ཀྱི་འཚམས་འདྲི་འདིས་རྒྱ་གར་གཞུང་དང་༸གོང་ས་མཆོག་དབར་གྱི་འབྲེལ་བ་ཙམ་མིན་པར་རྒྱ་གར་གཞུང་དང་བོད་མིའི་སྒྲིག་འཛུགས་དབར་གྱི་འབྲེལ་བ་ཟབ་ཏུ་བཏང་ཡོད་པར་གསུངས་འདུག ལྷག་པར་དུ་ཁོང་གིས་སྲིད་བློན་མོ་དྷི་མཆོག་ནས་ད་རེས་༸སྐུའི་འཁྲུངས་སྐར་གྱི་འཚམས་འདྲི་དང་འབྲེལ་བའི་གནད་དོན་དེ་ཡོངས་གྲངས་གནང་བ་དེས་རྒྱ་གར་གཞུང་ནས་༸སྐུའི་ཡང་སྲིད་ཀྱི་གནད་དོན་ཐོག་མ་འོངས་པར་༸གོང་ས་མཆོག་གིས་ཐུགས་ཐག་གང་མཛད་པ་དེར་རྒྱབ་སྐྱོར་ཡོད་པའི་མཚོན་རྟགས་ཤིག་ཀྱང་རེད་ཅེས་གསུངས་འདུག  རྒྱ་གར་དབུས་ནང་སྲིད་ལྷན་ཁང་ལ་བོད་དོན་ཀྱི་གནད་དོན་ཐོག་སློབ་སྟོན་གནང་མཁན་ཟུར་པ་སྐུ་ཞབས་ Amitabh Mathur ལགས་ཀྱིས་སྲིད་བློན་མཆོག་གི་འཚམས་འདྲི་བརྒྱུད་དེ་རིམ་པས་རྒྱ་གར་གཞུང་ནས་ད་བར་༸སྐུའི་ཡང་སྲིད་ཀྱི་གནད་དོན་ཐོག་བཞེངས་ཕྱོགས་གང་ཡིན་གསལ་པོ་གསུངས་མེད་པ་དེ་གསལ་པོ་ཆགས་རྒྱུ་དང་། དེ་ཡང་གཙོ་བོ་༸གོང་ས་མཆོག་གི་དགོངས་བཞེས་གང་ཡིན་པ་དེར་རྒྱ་གར་གཞུང་ནས་རྒྱབ་སྐྱོར་ཡོད་པའི་གོམ་སྟབས་བཟང་པོ་ཞིག་ཏུ་ངོས་འཛིན་ཞུ་བཞིན་ཡོད་པར་གསུངས་འདུག དེ་བཞིན་རྒྱ་གར་གྱི་བརྒྱུད་ཁག་ཏུ་དཔྱད་ཞིབ་པ་ཁག་ཅིག་གིས་འདས་པའི་ལོ་དུས་ནང་རྒྱ་གར་བྱང་ཕྱོགས་ལ་དྭགས་གཙོས་བོད་དང་ས་འབྲེལ་ཡོད་པའི་མཚམས་ཁག་ཏུ་རྒྱ་དཀར་ནག་གཉིས་ཀྱི་དམག་མིའི་དབར་གདོང་ཐུག་རབ་དང་རིམ་པ་བྱུང་བ་དང་། རྒྱ་གཞུང་ནས་རྒྱ་དང་གྲོས་བསྡུར་ཙམ་ཡང་མེད་པར་པ་ཀིས་ཐན་དང་ལྷན་དུ་ཚོང་འབྲེལ་གྱི་བརྒྱུད་ལམ་གསར་རྒྱག་བྱས་ཡོད་པའི་གནད་དོན་སོགས་དང་འབྲེལ་ཏེ། སྲིད་བློན་མོ་དྷི་མཆོག་ནས་བོད་ཀྱི་གནད་དོན་བེད་སྤྱོད་བྱས་ཏེ་༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་ལ་འཚམས་འདྲི་ཞུས་པ་དེ་ཡོངས་གྲགས་གནང་བ་རེད་ཅེས་གསུང་བཞིན་འདུག་ཀྱང་། བོད་མིའི་སྒྲིག་འཛུགས་ཀྱི་སྲིད་སྐྱོང་ཟུར་པ་བློ་བཟང་སེང་གེ་མཆོག་གིས་རྒྱ་གར་གྱི་ The Indian Express གསར་ཁང་ལ་༸སྐུའི་འཁྲུངས་སྐར་གྱི་འཚམས་འདྲི་གནང་བ་འདི་ཆབ་སྲིད་ཀྱི་གནད་དོན་ཞིག་ཏུ་འགྱུར་འདོད་མེད་ཀྱང་། ད་རེས་སྲིད་བློན་སྐུ་ཞབས་མོ་དྷི་མཆོག་གིས་དབུས་པའི་གནད་ཡོད་མི་སྣ་མང་པོས་ཡོངས་གྲགས་སུ་༸སྐུའི་འཁྲུངས་སྐར་ལ་འཚམས་འདྲི་གནང་བ་དེ་བཟང་ཕྱོགས་ཀྱི་རྣམ་པ་ཞིག་རེད་ཅེས་གསུངས་འདུག གཞི་རྩའི་སྲིད་བློན་ Modi མཆོག་དེ་སྔ་ Gujarat  མངའ་སྡེའི་སྤྱི་ཁྱབ་བློན་ཆེན་དང་གྲོས་ཚོགས་འཐུས་མི་གནང་སྐབས་སུ་༸གོང་ས་མཆོག་དང་དངོས་སུ་མཇལ་འཕྲད་དང་ཆེས་མཐོའི་མཛད་སྒོ་ཁག་ཏུ་ལྷན་ཞུགས་སོགས་གནང་མྱོང་ཡོད་པ་མ་ཟད། ཕྱི་ལོ་ ༢༠༡༤ ལོར་རྒྱ་གར་གྱི་སྲིད་བློན་དུ་འོས་འདེམས་གནང་སྟེ་ལས་འཁུར་དམ་འབུལ་གྱི་མཛད་སྒོའི་སྐབས་དེའི་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ལ་མགྲོན་བརྡ་ཕུལ་བའི་གནས་སྟངས་སོགས་བྱུང་ཡོད་ཀྱང་། སྲིད་བློན་མཆོག་གི་ལས་ཡུན་ལོ་བརྒྱད་ཙམ་འགྲོ་བཞིན་པའི་རིང་༸གོང་ས་མཆོག་དང་དངོས་སུ་མཇལ་འཕྲད་གནང་མེད་པ་མ་ཟད། ཕྱི་ལོ་ ༢༠༡༨ ལོར་རྒྱལ་ས་ལྡི་ལིར་འཚོགས་གཏན་འཁེལ་བའི་༸གོང་ས་མཆོག་རྒྱ་གར་དུ་༸ཞབས་སོར་འཁོད་དེ་ལོ་ངོ་ ༦༠ འཁོར་བའི་གཞུང་འབྲེལ་གྱི་མཛད་རིམ་དེ་བཞིན་རྒྱ་གར་དང་རྒྱ་ནག་དབར་གྱི་ཆབ་སྲིད་ཀྱི་གནད་དོན་དང་འབྲེལ་ཏེ་བཞུགས་སྒར་ཚོགས་དགོས་བྱུང་བ་དང་། སྐབས་དེའི་བོད་མིའི་སྒྲིག་འཛུགས་ཀྱི་མཛད་རིམ་ཁག་ཏུ་གཞུང་འབྲེལ་གྱི་མི་སྣ་མཉམ་ཞུགས་གནང་མི་ཆོག་པའི་བཀག་རྒྱ་གནང་བའི་གནས་སྟངས་སོགས་ བྱུང་ཡོད་པ་རེད། ད་རེས་སྲིད་བློན་མོ་དྷི་མཆོག་གིས་སྲིད་བློན་གྱི་ལས་ཡུན་ཁྲོད་ཐེངས་དང་པོ་༸གོང་ས་མཆོག་གི་༸སྐུའི་འཁྲུངས་སྐར་ལ་འཚམས་འདྲི་གནང་བ་ཡོངས་གྲགས་གནང་མ་ཐག་ཏུ་སྐུ་ཞབས་ Modi མཆོག་གིས་སྣེ་ཁྲིད་པའི་རྒྱ་གར་དབུས་གཞུང་གི་བློན་ཆེན་དང་། ཨ་རུ་ན་ཅལ། འབྲས་ལྗོངས། མཱདྷ་ཡ། གྷོ་ཝ། མེ་གྷ་ལ་ཡ།  དེ་བཞིན་ལྡི་ལི།  པན་ཇབ་སོགས་ཀྱི་མངའ་སྡེའི་སྤྱི་ཁྱབ་བློན་ཆེན་སོགས་ནས་ཡོངས་གྲགས་སུ་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་དུས་ཆེན་ལ་འཚམས་འདྲི་ཞུས་ཡོད་པ་རེད།ཁ་སང་༸གོང་ས་མཆོག་གིས་དབྱིན་སྐད་ཐོག་སྩལ་བའི་༸སྐུའི་འཁྲུངས་སྐར་གྱི་གསུང་འཕྲིན་ནང་མགོན་པོ་༸གང་ཉིད་མཆོག་རྒྱ་གར་དུ་བྲོས་བྱོལ་ལ་ཕེབས་ཀྱང་རྒྱ་གར་རང་དབང་ལུང་པའི་རང་དབང་རྣམས་ལོངས་སུ་སྤྱད་ནས་རྒྱ་གར་གྱི་གནའ་བོའི་རིག་གནས་དང་ཆོས་ལུགས་མཐུན་སྒྲིལ་སོགས་གོང་སྤེལ་མཛད་བཞིན་པ་འདི་༸སྐུའི་འཁྲུངས་སྐར་གྱི་ཕྱག་རྟགས་ཤིག་ཡིན་ཅེས་བཀའ་སྩལ་ཡོད་པ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་ནག་གཞུང་གིས་༸གོང་ས་མཆོག་ནི་བོད་རྒྱའི་དཀའ་རྙོག་སེལ་བའི་ལྡེ་མིག་གཅིག་པོ་དེ་ཡིན་པའི་དངོས་དོན་ངོ་མ་ངོས་འཛིན་ཞུས་ཏེ། ལོ་རྒྱུས་ཀྱི་གོ་སྐབས་ཆུད་ཟོས་སུ་མ་བཏང་བར་གཉིས་སྨན་དབུ་མའི་ལམ་གྱི་དགོངས་དོན་འོག སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་༸གོང་ས་མཆོག་རྒྱ་ནག་དང་བོད་ནང་གཟིགས་སྐོར་དུ་༸ཞབས་སོར་འཁོད་ཐབས་བསམ་ཞིབ་གང་མགྱོགས་ཡོང་བའི་འབོད་སྐུལ་ཞུས་ཡོད།

བོད་རང་སྐྱོང་ལྗོངས་ཟེར་བའི་ཁོངས་གཞིས་རྩེ་གྲོང་ཁྱེར་དིང་རི་རྫོང་རྒྱལ་ནོར་བྲག་ནག་གྲོང་ཚོའི་ནང་རྟེན་གཞི་བྱས་པའི་བཀྲ་ཤིས་སྟེང་འགྲོ་དགོན་པའི་དགེ་འདུན་པ་བཞི་ཁྲིམས་འགལ་གྱི་དོགས་གཞི་འོག་འཛིན་བཟུང་གིས་ལོ་ ༢༠ བར་གྱི་བཙོན་འཇུག་གི་ཁྲིམས་ཐག་བཅད་ཡོད་པའི་གནས་ཚུལ་ཐོན་འདུགཁ་སང་༸རྒྱལ་བའི་༸སྐུའི་འཁྲུངས་སྐར་ཉིན་མོ་དང་བསྟུན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་ཤོག་གྲངས་ ༦༡ ཅན་ཞིག་རྒྱ་ནག་གཞུང་གིས་སྟེང་འགྲོ་དགོན་པའི་ཐོག་ཆེས་དྲག་གནོན་དང་དམ་དྲག་བྱས་ཡོད་སྐོར་སྙན་ཐོ་ཞིག་འདོན་སྤེལ་གནང་འདུག་པ་དང་སྙན་ཐོ་དེའི་ནང་སྟེང་འགྲོ་དགོན་གྱི་དགེ་འདུན་པ་ཆོས་རྒྱལ་དབང་པོ་ཞེས་པ་ཞིག་གི་ལག་རྡོག་ཁ་པར་ལྷ་སའི་ཉེན་རྟོག་པར་རག་སོན་བྱུང་ནས་ཁ་པར་བརྒྱུད་ཆོས་རྒྱལ་དབང་པོ་ལགས་ཀྱིས་བལ་ཡུལ་དུ་གནས་བཞུགས་དགེ་འདུན་པ་ཞིག་ལ་འཕྲིན་སོགས་བསྐུར་བ་དང་ལྷག་པར་ ༢༠༡༥ ལོར་བལ་ཡུལ་གྱི་ས་འགུལ་དང་འབྲེལ་ཞལ་འདེབས་ཕུལ་བའི་གནས་ཚུལ་ཤེས་རྟོགས་བྱུང་སྟེ། ཕྱི་ལོ་ ༢༠༢༠ ལོར་ཁ་ཁུ་སིམ་པོའི་ཐོག་ཆོས་རྒྱལ་དབང་པོ་ལགས་དང་བློ་བཟང་སྦྱིན་པ། ནོར་བུ་དོན་གྲུབ། ངག་དབང་ཡེ་ཤེས་ལགས་བཅས་སུ་ལོ་ ༢༠ དང་ ༡༩། ༡༧། དེ་བཞིན་ལོ་ ༥ བཅས་ཀྱི་ཁྲིམས་ཐག་བཅད་ཡོད་འདུག ཁོང་རྣམས་གསང་བའི་ཁྲིམས་ཐག་མ་བཅད་གོང་ལོ་གཅིག་ལྷག་གི་རིང་གཞིས་ཀ་རྩེའི་ཉེ་འདབས་སུ་ཡོད་པའི་བཙོན་ཞིག་ཏུ་བཀག་སྐྱིལ་བྱས་ཡོད་པ་འཁོད་འདུག གཞི་རྩའི་ཆོས་རྒྱལ་དབང་པོ་ལགས་ཕྱི་ལོ་ ༢༠༡༩ ལོའི་ཟླ་ ༨ ཟླ་མཇུག་དང་ཟླ་ ༩ མགོ་སྟོད་དུ་ལྷ་སར་ཕེབས་པ་དང་སྐབས་དེར་ཁོང་གི་ཁ་པར་ཇ་ཁང་ཞིག་གི་ནང་ལུས་ནས་མཐར་ཉེན་རྟོག་པའི་ལག་པར་རག་འདུག ཉེན་རྟོག་པས་ཁོང་གི་ཁ་པར་བརྒྱུད་གནས་ཚུལ་དེ་དག་ཤེས་རྟོགས་རྗེས་ཆེད་མངགས་ལྷ་ས་ནས་བྲག་ནག་གྲོང་ཚོར་ཡོང་ནས་གྲོང་ཚོའི་ཁང་ཁྱིམ་དང་སྟེང་འགྲོ་དགོན་པ་བསྔོགས་བཤེར་བྱས་པ་མ་ཟད་ཆོས་རྒྱལ་དབང་པོ་ལགས་འཛིན་བཟུང་གིས་འདྲི་རྩད་དང་ཉེས་རྡུང་བཏང་ཡོད་པ་རེད་འདུག ད་དུང་བརྒྱུད་རིམ་དེའི་ཁྲོད་ཉེན་རྟོག་པས་དགེ་འདུན་པ་ ༢༠ ལྷག་འཛིན་བཟུང་གིས་ཁག་ཅིག་ཟླ་བ་འགའ་ཤས་རིང་བཀག་སྐྱིལ་འོག་བཞག་ནས་ཉེས་རྡུང་བཏང་བ་མ་ཟད་དེའི་ཁྲོད་དགེ་འདུན་པ་བློ་བཟང་བཟོད་པ་ཞེས་པ་ཞིག་གིས་རྒྱ་ནག་གི་བྱེད་ཕྱོགས་སྡུག་པོ་དེར་ངོ་རྒོལ་དང་སྦྲགས་རང་སྲོག་བཅད་པ་ཡང་བྱུང་སྐོར་འཁོད་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ Sophie Richardson ལགས་ཀྱིས་རྒྱ་གཞུང་གིས་ད་ལན་དགེ་འདུན་པ་བཞིར་ཁྲིམས་ཆད་བཀེལ་ལུགས་དེས་བོད་ནང་གི་བོད་མིའི་ཚོའི་ཐོག་ཏུ་སྤེལ་བའི་དམ་དྲག་གི་གནས་སྟངས་གསལ་བཏོན་བྱེད་ཀྱི་ཡོད་སྐོར་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་སྤྱིར་ཕྱི་ཕྱོགས་སུ་འཕྲིན་སོགས་བཏང་བ་དང་འགྲོ་བ་མིའི་བདེ་རྩའི་སླད་ཞལ་འདེབས་གནང་བ་ནི་རྒྱ་ནག་གི་ཁྲིམས་དང་འགལ་གྱི་མེད་པ་དང་ལྷག་པར་ད་རེས་དགེ་འདུན་པ་རྣམ་པར་བཙོན་འཇུག་གི་གནད་དོན་ནི་རྒྱ་གཞུང་གིས་ཁྲིམས་མེད་ལུགས་མེད་ཀྱིས་འཛིན་བཟུང་དང་བོད་ནང་བོད་མིའི་ཚོའི་དྲ་ཐོག་བརྒྱུད་བཀའ་མོལ་གནང་བར་དམ་དྲག་ཤུགས་ཆེ་བྱེད་ཀྱི་ཡོད་པ་མངོན་གསལ་ཆགས་ཡོད་ཅེས་གསུངས་འདུག འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་རྒྱ་གཞུང་ནས་དགེ་འདུན་པ་ཁོང་རྣམས་དེ་མ་ཐག་གློད་བཀྲོལ་དང་རྒྱལ་ཚོགས་དང་རྒྱལ་སྤྱིའི་ཁྲོད་རྒྱལ་ཁབ་རྣམ་པས་རྒྱ་གཞུང་ནས་བོད་མི་ཚོའི་འགྲོ་བ་མིའི་ཐོབ་ཐང་ལ་བརྩི་བཀུར་བྱེད་དགོས་པའི་གནོན་ཤུགས་སྤྲོད་དགོས་པའི་འབོད་སྐུལ་དང་ལྷག་པར་དུ་རྒྱལ་ཚོགས་ནས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་སླད་རང་དབང་ཅན་གྱི་ཚོགས་ཆུང་ཆེད་འཛུགས་དགོས་པ་མ་ཟད་ལོ་འཁོར་སྙན་ཐོ་འདོན་སྤེལ་དགོས་པའི་དགོས་འདུན་བཏོན་འདུག སྤྱིར་ཉེན་རྟོག་པས་ཆོས་རྒྱལ་དབང་པོ་ལགས་ཀྱིས་ཁ་པར་བསྔོགས་བཤེར་སྐབས་ཕྱི་ཕྱོགས་ཀྱི་ཁ་པར་ཨང་གྲངས་དང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་དང་། དེ་བཞིན་རྒྱ་གར་དང་བལ་ཡུལ་གཉིས་སུ་ཡོད་པའི་དིང་རི་ནས་ཡིན་པའི་བོད་མི་དང་འཕྲིན་སོགས་བརྗེ་རེས་གནང་བ་ཤེས་རྟོགས་བྱུང་འདུག

ཁ་སང་སྐུའི་འཁྲུངས་སྐར་ཉིན་ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གིས་དེ་གའི་ཊྲི་ཊར་དྲ་གནས་སུ་མགོན་པོ་གང་ཉིད་ལ་འཚམས་འདྲི་ཞུས་པ་དང་ལྷན་དུ། འགྲོ་བ་ཐམས་ཅད་མགོན་པོ་གང་གི་བྱམས་སྙིང་རྗེ་དང་འཚེ་མེད་ཞི་བ། དེ་བཞིན་ཁོར་ཡུག་ལ་བདག་གཅེས་སོགས་ཀྱི་དགོངས་གཞིས་སེམས་སྐུལ་ཐེབས་པའི་སྨོན་འདུན་དང་སྦྲགས་ནས། ཨ་རིའི་ངོས་ནས་བོད་མི་རྣམས་ཀྱི་ཞི་བདེ་དང་རང་དབང་འཚོལ་སྙེགས་དེ་ལེགས་འགྲུབ་ཡོང་བར་རོགས་འདེགས་བྱེད་རྒྱུ་ཡིན་པར་བསྒྲགས་འདུག དེ་བཞིན་ཚོགས་ཆུང་ངོས་ནས་སྐུའི་འཁྲུངས་སྐར་ཉིན་མོ་དང་བསྟུན་དེ་སྔ་རྒྱ་ནག་གིས་བོད་ནང་དུ་བོད་མི་རྣམས་ཀྱིས་སྐུའི་གྱ་སྟོན་གྱི་འཁྲུངས་སྐར་སྲུང་བརྩི་བྱས་པར་ཉེས་འདོགས་ཀྱིས་འཛིན་བཟུང་བཙོན་འཇུག་བྱས་པའི་བོད་མི་བོན་ཁོ་སྐྱིད་ལགས་དང་། ཚུལ་ཁྲིམས་ལགས། འབྲུག་སྒྲ་ལགས།  བློ་བཟང་དགེ་འཕེལ་ལགས། དེ་བཞིན་བློ་བཟང་མཁས་གྲུབ་དང་བློ་གྲོས་སོགས་ཀྱི་ཆབ་སྲིད་བཙོན་པ་དྲུག་པོ་གང་མགྱོགས་གློད་གྲོལ་གཏོང་དགོས་བའི་ཞུ་སྐུལ་གནང་འདུག རྩ་བའི་བོད་མི་དྲུག་པོ་དེ་དག་ཕྱི་ལོ་ ༢༠༡༥ ལོར་རྒྱ་ནག་གིས་མགོན་པོ་གང་གི་སྐུའི་གྱ་སྟོན་སྲུང་བརྩི་བྱས་པའི་ཉེས་མིང་འོག་འཛིན་བཟུང་གིས་ཝུན་ཁྲེན་བཙོན་ཁང་དུ་བཙོན་འཇུག་བྱས་པ་ཞིག་ཡིན་པ་དང་། འདི་གའི་གསར་ཁང་ལ་༢༠༡༦ ལོར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་གྲྭ་བློ་བཟང་ཡེ་ཤེས་ལགས་ཀྱིས་གནས་ཚུལ་མཁོ་སྤྲོད་གནང་བར་གཞིགས་ན། བཙོན་འཇུག་བྱས་པའི་བོད་མི་དེ་དག་ལས་རང་ལོ་ ༥༠ ཡིན་པའི་རྔ་བ་ཀིརྟི་དགོན་པའི་གྲྭ་འབྲུག་སྒྲ་ལགས་ལ་ལོ་ ༡༤ ཁྲིམས་ཐག་བཅད་འདུག་པ་དང་། རང་ལོ་ ༤༤ སོན་པའི་གྲྭ་བློ་བཟང་མཁས་གྲུབ་ལགས་ལ་ལོ་ ༡༣ ། རང་ལོ་ ༢༩ ཡིན་པའི་གྲྭ་བློ་བཟང་དགེ་འཕེལ་ལགས་ལ་ལོ་༡༢། རང་ལོ་ ༤༡ སོན་པའི་གྲྭ་བློ་གྲོས་ལགས་ལ་ལོ་ ༩ དང་རང་ལོ་ ༤༨ ཡིན་པའི་རྔ་བ་ཁུལ་གྱི་བེུད་བོན་ཁོ་སྐྱིད་ལགས་ལ་ལོ་ ༧ བཅས་ཀྱི་ཁྲིམས་ཐག་བཅད་ཡོད་པ་རེད།སྤྱིར་དེ་ལྟ་བུའི་དམ་དྲག་ལ་ལྟོས་མེད་བོད་ནང་གི་བོད་མི་རྣམས་ཀྱིས་༸གོང་ས་མཆོག་ལ་དད་གུས་གཡོལ་བ་མེད་པར་ལོ་ལྟར་སྐུའི་འཁྲུངས་སྐར་སྐབས་མངོན་གསལ་མ་ཡིན་པའི་སྒོ་ནས་རྣམ་པ་འདྲ་མིན་ཐོག་ཉིན་མོ་སྲུང་བརྩི་ཞུ་བཞིན་པ་ལྟར། ཁ་ས་སྤྱི་ཚོགས་དྲ་རྒྱ་ཁག་ཏུ་སྐུའི་འཁྲུངས་སྐར་དང་འབྲེལ་བའི་གནས་ཚུལ་ཁག་ཅིག་ཐོན་པའི་ཁོངས་སུ་གཞིས་ལུས་བོད་མི་རྣམས་ཀྱིས་རྒྱ་ནག་གི་དམ་དྲག་ལ་ལྟོས་མེད་ཀྱི་ཐོག་ནས་མགོན་པོ་གང་གི་ཞལ་རིས་ཡོངས་སུ་མི་མཐོང་བའི་སྐུ་པར་ཕྱེད་ཀའམ། ཡང་ན་སྐུ་མདུན་གྱི་ཞབས་སོགས་ཀྱི་པར་དང་། དེ་བཞིན་སྤྱར་རས་གཟིགས་སོགས་ཀྱི་སྐུ་པར་སྐད་འཕྲིན་གྱི་འཕྲིན་སྟེགས་སུ་སྤེལ་ཏེ་མགོན་པོ་གང་གིས་འཁྲུངས་སྐར་སྐབས་སུ་བསྩལ་བའི་བཀའ་སློབ་ཀྱི་དུམ་བུ་རེ་བཞག་ནས་སྐུའི་འཁྲུངས་སྐར་ལ་འཚམས་འདྲི་ཞུས་བ་སོགས་ཀྱི་རྣམ་པ་འདྲ་མིན་གྱི་སྒོ་ནས་སྐུའི་འཁྲུངས་སྐར་སྲུང་བརྩི་གནང་འདུགམ་ཟད་སྤྱི་ཚོགས་དྲ་ལམ་ཏུ་སྐུའི་འཁྲུངས་སྐར་སྲུང་བརྩིའི་རྣམ་པ་གཞན་ཞིག་ཐོན་པའི་བརྙན་པར་ཞིག་གི་ནང་དུ། ལྷ་སའི་སྐོར་ལམ་གྱི་ཁུལ་དུ་སྤོ་བོ་ཞིག་གིས་རང་གི་སྟོད་གོས་ཀྱི་རྒྱབ་ཏུ་ཨང་རྟགས་ ༨༦ འཁོད་དེ། དེའི་ཡང་སྟེང་དུ་བོད་མིའི་རིག་གཞུང་གིས་གཅེས་ནོར་ཏུ་བརྩི་བའི་ནོར་བུའི་མཚོན་རྟགས་ཅན་གྱི་སྟོད་གོས་ཤིག་མནབས་ནས་ཕྱག་གཡས་བར་འཁར་རྒྱུགས་ཐོགས་ཤིང་ཕྱག་གཡོན་པར་མ་ཎ་ནི་ཕྲེང་བ་ཐོགས་ནས་སྐོར་བར་ཕེབས་བཞིན་པའི་བརྙན་པར་ཞིག་ཁྱབ་སྤེལ་ཆེས་ཆེར་འགྲོ་བཞིན་འདུག བོད་བཞུགས་རྩོམ་པ་ཚེ་རིང་འོད་ཟེར་ལགས་ཀྱིས་བརྙན་པར་དེ་ནི་ལྷ་སའི་ཇོ་ཁང་གི་མདུན་དུ་མིན་པར། ར་མོ་ཆེ་གཙུག་ལག་ཁང་གི་མདུན་ཐང་དུ་ཡིན་སྲིད་པ་ལས།  ལྷ་སའི་བར་སྐོར་ནི་ད་ཆ་རྒྱ་ནག་གི་ཡུལ་སྐོར་ལྟེ་གནས་ཤིག་ཏུ་ཆགས་ཡོད་པར་འགྲེལ་བརྗོད་གནང་འདུགའདི་བཞིན་འདི་གའི་གསར་འགོད་པས་བོད་ནང་དུ་འབྲེལ་བ་བྱས་སྐབས་འདི་ལོ་རྒྱ་ནག་དམར་ཤོག་སྲིད་གཞུང་བཙུགས་ནས་ལོ་བརྒྱ་འཁོར་བ་དང་བསྟུན་ནས་བོད་མཚོ་སྔོན་གྱི་ཁུལ་དུ་ཡང་སྔར་ལས་དམ་དྲག་ཇེ་ཆེར་ཕྱིན་ཡོད་པ་དང་འབྲེལ་ནས། བོད་མི་རྣམས་ཀྱིས་དུས་རྒྱུན་ནས་སྐུའི་འཁྲུངས་སྐར་ཉིན་རང་ཁྱིམ་ནས་མར་མེ་སྒྲོན་ཏེ་ཞལ་འདོན་གསོག་སྒྲུབ་སོགས་གནང་གི་ཡོད་པར་འགྲེལ་བརྗོད་གནང་སོང་།གཞི་རྩའི་འདི་ལོར་རྒྱ་ནག་གི་རིམས་ནད་དང་འབྲེལ་ནས་རང་བཞུང་བཀའ་དྲུང་ཡིག་ཚང་གིས་རྒྱ་གར་གྱི་ཡུལ་ཁྲིམས་གཞིར་བཟུང་གིས་བོད་མི་རྣམས་ཀྱིས་སྔར་སྲོལ་བཞིན་མང་ཚོགས་འདུ་འཛོམས་རང་བཞིན་གྱིས་འཁྲུངས་སྐར་སྲུང་བརྩི་མི་གནང་བར་རང་ཁྱིམ་ནས་དགའ་སྐྱིད་ལ་རོལ་རྒྱུའི་སྐུལ་མ་གནང་བ་ལྟར། མང་ཚོགས་ཀྱིས་ཀྱང་རང་ཁྱིམ་དང་ཡང་ན་ཤིང་ནགས་ཀྱི་ཁྲོད་དང་མགོན་པོ་གང་གི་སྐུ་པར་སྒྲིག་ཤོམ་གནང་སྟེ་སྐུའི་འཁྲུངས་སྐར་གྱི་སྤྲི་གོར་བགོ་འགྲེམས་བྱེད་པ།  དེ་བཞིན་སྤྱི་ཚོགས་དྲ་ལམ་སོགས་སུ་ཡང་མགོན་པོ་གང་ལ་ཆེད་བསྟོད་ཀྱི་གླུ་གཞས་ཕྱོགས་བསྒྲིགས་སོགས་ཀྱི་ལམ་ནས་སྐུའི་འཁྲུངས་སྐར་སྲུང་བརྩི་གནང་བའི་རྣམ་པ་ཅི་རིགས་མཐོང་རྒྱུ་འདུགཁ་སང་མགོན་པོ་གང་གིས་སྐུའི་འཁྲུངས་སྐར་དང་སྟབས་བསྟུན་གྱིས་བཀའ་སློབ་སྩལ་བའི་ནང་དུ། མགོན་པོ་གང་ཉིད་ཀྱིས་སྐུ་ཚེ་ཧྲིལ་པོར་འགྲོ་བ་སྤྱི་དང་ཁོར་ཡུག་སྲུང་སྐྱོབ་ཀྱི་སླད་ཞབས་ཞུ་མཛད་རྒྱུ་དང་། དེ་བཞིན་རྒྱ་གར་དུ་བྲོས་བྱོལ་ལ་ཕེབས་ཀྱང་རང་དབང་ལུང་པའི་རང་དབང་རྣམས་སྤྱད་ནས་རྒྱ་གར་གྱི་གནའ་བོའི་རིག་གནས་དང་ཆོས་ལུགས་མཐུན་སྒྲིལ་སོགས་གོང་སྤེལ་མཛད་བཞིན་པ་དེ་ནི་༸སྐུའི་འཁྲུངས་སྐར་གྱི་ཕྱག་རྟགས་ཤིག་ཡིན་ཞེས་བཀའ་སྩལ་བ་དང་ལྷན་དུ་མཛའ་གྲོགས་རྣམ་པ་གཙོས་རྗེས་འབྲང་བ་རྣམས་ཀྱིས་ཀྱང་འཚེ་མེད་ཞི་བ་དང་སྙིང་རྗེ་གཉིས་རང་ཉིད་ཀྱི་མི་ཚེའི་མཐའ་མཇུག་གི་བར་དུ་ཕྱག་བསྟར་གནང་རྒྱུའི་ཐུགས་རེ་ཡོད་ཅེས་བཀའ་སྩལ་ཡོད་པ་རེད།

དེ་རིང་ཕྱི་ཟླ་ ༧ ཚེས་ ༦ སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༦   ལ་ཕེབས་པའི་༸སྐུའི་འཁྲུངས་སྐར་གྱི་རྟེན་འབྲེལ་ཉིན་མོར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་སུ་རྟེན་གཞི་བྱས་པའི་རྫོང་དཀར་ཆོས་སྡེ་གྲྭ་ཚང་གིས་༸རྒྱལ་བའི་བཀའ་དགོངས་བསྒྲུབ་ཆེད་བོད་མི་ཉམ་ཐག་དང་ཉེ་འཁོར་དུ་བཞུགས་པའི་རྒྱ་གར་གྲོང་གསེབ་པ་ཁྱོན་མི་ཚང་ ༡༡༡༣ ལྷག་ལ་སྐམ་ཟས་བགོ་འགྲེམས་གནང་སྟེ་༸སྐུའི་འཁྲུངས་སྐར་སྲུང་བརྩི་ཞུས་སོང་།རྫོང་དཀར་ཆོས་སྡེ་གྲྭ་ཚང་དུ་སྐུ་མགྲོན་གཙོ་བོ་མངའ་སྡེའི་གྲོས་ཚོགས་འཐུས་མི་སྐུ་ཞབས་ HP Manjunath ལགས་ཀྱིས་གཙོས་ས་གནས་འགོ་འཛིན། དགོན་པའི་མཁན་རིན་པོ་ཆེ་རྣམ་པ་བཅས་དབུ་བཞུགས་ཐོག་དགོན་པའི་ངོས་ནས་མགོན་པོ་༸གང་ཉིད་མཆོག་གི་བཀའ་དྲིན་དང་རྒྱ་གར་གཞུང་དམངས་གཉིས་ལ་བཀའ་དྲིན་རྗེས་དྲན་ཞུ་ཆེད་དེང་སྐབས་འཚོ་རྟེན་ཐོག་ངལ་བ་འཕྲད་པའི་ས་གནས་ཀྱི་བོད་མི་དང་རྒྱ་གར་བའི་ཁྱིམ་ཚང་ ༡༡༡༣ ལ་སྐམ་ཟས་སྦྱིན་གཏོང་གནང་ཡོད་པ་རེད།རྫོང་དཀར་ཆོས་སྡེ་གྲྭ་ཚང་གི་མཁན་རེན་པོ་ཆེ་བྱམས་པ་བཟོད་པ་ལགས་ནས་རྒྱ་གར་ལྷོ་ཕྱོགས་མངའ་སྡེ་ཀ་ན་ཊ་ཀ་ནི་བོད་པའི་དགོན་པ་དང་བོད་མི་གནས་སྡོད་ཆེ་ཤོས་གནང་ཡུལ་ཞིག་ཡིན་སྟབས་ཁོང་རྣམས་ལ་བཀའ་དྲིན་རྗེས་དྲན་ཞུ་ཕྱིར་༸རྒྱལ་བའི་ཐུགས་དགོངས་བསྒྲུབ་སླད་ཉམ་ཐག་རྣམས་ལ་རོགས་སྐྱོར་གནང་སྐོར་གསུངས་སོང་།གཞི་རྩའི་འཛམ་གླིང་ཁྱོན་ལ་གནས་པའི་བོད་མི་ཡོངས་ནས་རྣམ་པ་འདྲ་མིན་ཐོག་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་སྲུང་བརྩི་གཟབ་རྒྱས་ངང་ཞུ་བཞིན་ཡོད་པ་ལྟར། ༸དཔལ་ལྡན་རྒྱུད་སྨད་སློབ་གཉེར་ཁང་གི་རིན་པོ་ཆེ་མཆོག་གིས་ཀྱང་རབ་རྒྱས་གླིང་གཞིས་མི་ཡོངས་ལ་སྐམ་ཟས་རིགས་དང་དུག་སེལ་སྨན་རྫས། ཁ་རས་ལ་སོགས་སྦྱིན་གཏོང་གནང་བ་མ་ཟད་དེ་བཞིན་ཤིང་སྣ་འདེབས་འཛུགས་གནང་སོང་། སེར་བྱེས་མཁས་སྙན་གྲྭ་ཚང་ནས་༸རྒྱལ་བའི་བཀའ་དྲིན་རྗེས་དྲན་དུ་ཤིང་འབྲས་སྣ་མིན་ ༡༣༡༡༥ འདེབས་འཛུགས་གནང་སྟེ་༸སྐུའི་འཁྲུངས་སྐར་སྲུང་བརྩི་ཞུས་ཡོད།

སྲིད་སྤྱི་གཉིས་ཀྱི་འོས་བསྡུ་གྲུབ་ཡོངས་གྲགས་གནང་སྟེ་ད་ཆ་ཟླ་བ་གཅིག་ལྷག་སོང་ཡོད་ཀྱང་། བཙན་བྱོལ་བོད་མིའི་སྒྲིག་འཛུགས་སུ་ཁྲིམས་བཟོ་ལྷན་ཚོགས་མེད་པར་ཟླ་བ་གཅིག་ལྷག་འགྲོ་ཡི་ཡོད་པ་དང་། མ་འོངས་པར་འགག་འགྱང་དེ་མུ་མཐུད་གནས་པ་ཡིན་ན། བཀའ་བློན་གསར་པ་འདེམས་བསྐོ་གནང་མ་ཐུབ་པ་མ་ཟད་དངུལ་རྩིས་བཀའ་འཁྲོལ་སོགས་ཀྱི་འཛིན་སྐྱོང་མདུན་སྐྱོད་གནང་དཀའ་བའི་ངལ་བ་འཕྲད་རྒྱུ་དེ་གསལ་པོར་ཆགས་ཡོད་པར་བརྟེན་ལྷག་བསམ་ཅན་གྱི་བོད་མི་མང་ཚོགས་དང་ལྷག་དོན་དེ་སྔ་བོད་མིའི་སྒྲིག་འཛུགས་ནང་དངོས་སུ་ཕྱག་ལས་གནང་མྱོང་མཁན་དང་། གནད་ཡོད་ཀྱིོ་མཛད་གཙོ་རྣམས་ལ་ཐུགས་བདེ་མེད་པར་དངངས་སྐྲག་དང་ངེས་མེད་ཀྱི་དུས་ཚོད་དེ་གང་མགྱོགས་ལྷིང་འཇགས་ཡོང་བའི་རེ་སྨོན་ཆེན་པོ་གནང་བཞིན་ཡོད་པ་ལྟར། ཁ་སང་འདི་ག་རྒྱལ་ས་ལྡི་ལིའི་བོད་སྒར་བསམ་ཡས་གླིང་གི་༸སྐུའི་འཁྲུངས་སྐར་གྱི་མཛད་སྒོར་སྐུ་མགྲོན་གྱི་གཙོ་བོ་བཀའ་ཟུར་རྒྱ་རི་སྒྲོལ་མ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་ཨཱཙཱརྱ་ཡེ་ཤེས་ཕུན་ཚོགས་མཆོག་རྣམ་པ་གཉིས་ཀྱིས་ད་ལྟའི་དཀའ་ངལ་དེའི་རྐྱེན་གྱིས་མང་ཚོགས་ནང་དྲ་རྒྱའི་བརྒྱུད་ལམ་ཐོག་ནས་ཆོལ་ཁ་ཕྱོགས་རིས་ཀྱི་གནས་ཚུལ་ཡོང་གཞིར་གྱུར་བར་བརྟེན་རྒྱུན་ལྡན་ནས་མང་ཚོགས་ཚོས་རང་ཚུགས་གཏན་པོ་གནང་དགོས་པ་དང་། ལྷག་དོན་བཀའ་ཟུར་རྒྱ་རི་སྒྲོལ་མ་མཆོག་གིས་སེམས་ཚོར་ཆེན་པོའི་ཐོག་ནས་སྤྱི་འཐུས་ཀྱི་ཚོགས་གཙོ་ཚོགས་གཞོན་འོས་འདེམས་གནང་ཐབས་ཀྱི་ནུས་པ་སུ་ལ་ཡོད་ཀྱང་བཏོན་ཐབས་གནང་དགོས་པའི་འབོད་སྐུལ་གནང་སོང་།  བཀའ་ཟུར་སྒྲོལ་མ་རྒྱ་རི་མཆོག་ནི་ལོ་ངོ་ ༣༠ ལྷག་བཙན་བྱོལ་སྒྲིག་འཛུགས་ནང་ཕྱག་ལས་གནང་མྱོང་མཁན་ཞིག་དང་དུས་ཡུན་དེའི་རིང་ཁོང་གིས་སྤྱི་འཐུས་ལྷན་ཚོགས་སུ་ཚོགས་གཞོན་གྱི་ཐུགས་འཁུར་བཞེས་མྱོང་ཡོད་པ་མ་ཟད་ལྷག་པར་དུ་ཁོང་ལ་མཐོ་སློབ་ནང་རྒྱལ་སྤྱིའི་ཁྲིམས་ཀྱི་སློབ་སྦྱོང་གནང་བའི་རྒྱབ་རྟེན་དང་རྩ་ཁྲིམས་ཟིན་བྲིས་ཚོགས་ཆུང་བཅས་ཀྱི་ནང་དུ་ཡང་ཕྱག་ལས་གནང་བའི་ཉམས་མྱོང་བཅས་ཡོད་མཁན་ཞིག་ཡིན་པ་ལྟར་ཁོང་གིས་ཁ་སང་གི་མཛད་སྒོའི་ཐོག་ད་དུང་བཅའ་ཁྲིམས་དང་སྒྲིག་གཞིའི་གལ་གནད་ནི་དེའི་དབང་སྒྱུར་འོག་འགྲོ་ཐུབ་པ་ཞིག་དང་། མང་མོས་ཀྱི་མངོན་འདོད་ཐོག་དྲང་བདེན་གྱི་མདུན་སྐྱོད་ཐུབ་པ། བོད་མིར་ཆ་མཚོན་པ་ཡིན་ན་སྒྲིག་འཛུགས་དེའི་ཐོག་ནས་བོད་མིའི་བདེན་དོན་འཐབ་རྩོད་གནང་ཐུབ་པ་ཞིག་ཡིན་པར་འགྲེལ་བརྗོད་གནང་སྟེ། འདེམས་ཐོན་འཐུས་མི་ཚོའི་ངོས་ནས་ཀྱང་གུ་ཡངས་ཀྱི་དགོངས་པ་བཞེས་དགོས་པའི་འབོད་སྐུལ་གནང་བ་དང་སྦྲགས་ཏེ། མཐུན་སྒྲིལ་གཏོར་བརླག་གིས་དཀྲུག་ཤིང་གནང་མཁན་ཚོར་འཐེར་འདོན་གནང་རྒྱུའི་ཉེན་བརྡ་ཡང་གནང་སོང་།  བོད་སྒར་བསམ་ཡས་གླིང་དུ་༸གོང་ས་མཆོག་གི་༸སྐུའི་འཁྲུངས་སྐར་གྱི་མཛད་སྒོའི་སྐུ་མགྲོན་གཙོ་བོ་བཀའ་ཟུར་རྒྱ་རི་སྒྲོལ་མ་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་ཨཱཙཱརྱ་ཡེ་ཤེས་ཕུན་ཚོགས་མཆོག་རྣམ་པ་གཉིས་ནི་རྒྱུན་ལྡན་ལྡི་ལིར་གནས་བཞུགས་གནང་མཁན་ཞིག་ཡིན་པ་དང་། རྒྱུན་དུ་རྒྱ་གར་གཞུང་གི་གནད་ཡོད་དཔོན་རིགས་ཁག་དང་འབྲེལ་བ་དམ་ཟབ་ཡོད་མཁན་གྱི་བོད་མིའི་དབུ་ཁྲིད་གྲས་ཤིག་ཡིན་པ་ལྟར། ཁོང་གཉིས་པོས་ཁ་སང་གི་མཛད་སྒོའི་ཐོག་མགྲིན་དབྱངས་གཅིག་གི་ཐོག་ནས་ས་གནས་རྒྱ་གར་གྱི་དཔོན་རིགས་ཚོས་ཀྱང་ད་ལྟའི་བོད་མིའི་སྒྲིག་འཛུགས་ཀྱི་འགོག་འགྱང་གནད་དོན་ཐོག་ཐུགས་འཚབ་གནང་བཞིན་ཡོད་སྐོར་གསུངས་ཡོད།

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་གྱ་དྲུག་བདག་གིར་བཞེས་པའི་༸སྐུའི་འཁྲུང་སྐར་དུས་ཆེན་དང་བསྟུན་༸གོང་ས་མཆོག་གིས་བོད་དབྱིན་གཉིས་ཀྱི་ཐོག་ནས་གསུང་འཕྲིན་སྩལ་འདུག ༸གོང་ས་མཆོག་གིས་བོད་སྐད་ཐོག་སྩལ་བའི་གསུང་འཕྲིན་ནང་མགོན་པོ་༸གང་ཉིད་མཆོག་བོད་གངས་ཅན་ལྗོངས་སུ་སྐུ་འཁྲུངས་པ་དང་སྒོས་མདོ་སྨད་དང་དེའི་ནང་ཚན་ཟི་ལིང་དུ་འཁྲུངས་པ་ཙམ་མ་ཟད། མགོན་པོ་མཆོག་གི་འཁྲུངས་ཡུལ་དུ་ཡོད་པའི་ཁ་ཆེའི་དམག་དཔོན་ཞིག་ནས་མགོན་པོ་༸གང་ཉིད་མཆོག་ལ་དགའ་མོས་ཆེན་པོ་གནང་གི་ཡོད་པ་དང་། དམག་དཔོན་དེས་རྒྱལ་ཡུམ་ཆེན་མོ་ལ་སྐུ་ཉིད་ཀྱི་ཕྲུ་གུ་འདི་ལ་མིག་མི་འདྲ་བ་ཞིག་དང་བྱེད་སྟངས་ཀྱང་མི་འདྲ་བ་ཞིག་འདུག་པ་མ་ཟད་བོད་གཞུང་ནས་༸རྒྱལ་བའི་ཡང་སྲིད་གསལ་བསྒྲགས་གནང་མེད་སྟབས། ངས་བལྟས་ན་བུ་འདི་ཏཱ་ལའི་བླ་མའི་ཡང་སྲིད་རེད་ཅེས་གསུངས་པ་བཞིན་མགོན་པོ་མཆོག་ནས་ཀྱང་ཁོང་ནི་ངོས་རང་ཏཱ་ལའི་བླ་མའི་ཡང་སྲིད་ལ་ངོས་འཛིན་གནང་མཁན་དང་པོ་དེ་ཡིན་པར་སྐུ་རྩེད་དང་སྦྲགས་ཏེ་བཀའ་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་ཕ་ཡུལ་ས་ཐག་རིང་ཡང་༸རྗེ་རིན་པོ་ཆེ་དང་ཕ་ཡུལ་གཅིག་པ་ཡིན་པར་བཀའ་སྩལ་བ་དང་འབྲེལ། མགོན་པོ་༸གང་ཉིད་མཆོག་༸རྗེ་རིན་པོ་ཆེའི་རྣམ་ཐར་ལ་སློབ་གཉེར་མཛད་རྒྱུ་དང་ཕྱག་བསྟར་མཛད་བཞིན་པ་ནི་བོད་རིགས་ཚོར་༸སྐུའི་འཁྲུངས་སྐར་གྱི་ཕྱག་རྟགས་ཤིག་ཡིན་ཅེས་བཀའ་སྩལ་འདུག་པ་དང་ཆབས་ཅིག མང་ཚོགས་རྣམ་པ་སྤྱིར་སངས་རྒྱས་ཀྱི་བསྟན་པ་དང་མཇལ་བ། སྒོས་འཇམ་མགོན་བླ་མའི་བསྟན་པ་དང་མཇལ་ཡོད་སྟབས། སངས་རྒྱས་ཀྱི་བསྟན་པ་མདོ་སྔགས་ལ་ཐོག་མར་ཐོས་བསམ་སློབ་གཉེར་བྱེད་དགོས་པ་དང་མཐར་ཐོས་དོན་རང་རྒྱུད་ལ་སྦྱར་ནས་དང་པོ་བསམ་བྱུང་གི་ངེས་པ་རྙེད་པ་ཞིག་དང་དེ་ནས་ཐོས་དོན་སྒྲུབ་ལ་གཞོལ་ཏེ་ཉམས་མྱོང་སྐྱེ་བ་ཞིག་བྱེད་དགོས་ཞེས་བཀའ་སྩལ་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་སྐད་ཀྱི་གསུང་འཕྲིན་ནང་མགོན་པོ་མཆོག་འགྲོ་བ་མི་ཞིག་ཡིན་པའི་ཆ་ནས་མང་ཚོགས་མང་པོས་དགའ་མོས་དང་བརྩེ་ཞེན་ཆེན་པོ་གནང་གི་ཡོད་པ་དང་ལྷག་པར་དུ་མགོན་པོ་མཆོག་གི་བཞད་གད་ལ་དགའ་མོས་ཆེན་པོ་གནང་བཞིན་ཡོད་པར་ཐུགས་རྗེ་ཆེ་ཞེས་བཀའ་སྩལ་བ་དང་ཆབས་ཅིག མགོན་པོ་མཆོག་གི་༸སྐུ་ཚེ་ཧྲིལ་པོ་འགྲོ་བ་སྤྱི་དང་ཁོར་ཡུག་སྲུང་སྐྱོབ་ཀྱི་སླད་ཞབས་ཞུ་མཛད་རྒྱུ་དང་། དེ་བཞིན་རྒྱ་གར་དུ་བྲོས་བྱོལ་ལ་ཕེབས་ཀྱང་རང་དབང་ལུང་པའི་རང་དབང་རྣམས་སྤྱད་ནས་རྒྱ་གར་གྱི་གནའ་བོའི་རིག་གནས་དང་ཆོས་ལུགས་མཐུན་སྒྲིལ་སོགས་གོང་སྤེལ་མཛད་བཞིན་པ་འདི་དེ་རིང་༸སྐུའི་འཁྲུངས་སྐར་གྱི་ཕྱག་རྟགས་ཤིག་ཡིན་ཅེས་བཀའ་སྩལ་བ་དང་ལྷན་དུ་མཛའ་གྲོགས་རྣམ་པ་གཙོས་རྗེས་འབྲང་པས་ཀྱང་འཚེ་མེད་ཞི་བ་དང་སྙིང་རྗེ་གཉིས་རང་ཉིད་ཀྱི་མི་ཚེའི་མཐའ་མཇུག་གི་བར་དུ་ཕྱག་བསྟར་གནང་རྒྱུའི་ཐུགས་རེ་ཡོད་ཅེས་བཀའ་སྩལ་འདུག

དེ་རིང་སྔ་ཐོག་བཞུགས་སྒར་དུ་ཚོགས་པའི་༸སྐུའི་འཁྲུངས་སྐར་གྱི་གཞུང་འབྲེལ་མཛད་སྒོའི་ཐོག་སྲིད་སྐྱོད་སྤེན་པ་ཚེ་རིང་མཆོག་གིས་དབུས་པའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཁོ་ན་ལྷན་འཛོམས་ཐོག་བོད་གཞུང་ཟློས་གར་ཚོགས་པས་དྲ་ལམ་བརྒྱུད་མ་ཎི་ཆོས་དབྱངས་དང་འཁྲུངས་སྐར་གྱི་གླུ་གསར་གསར་པ་གཅིག་བཅས་གཟིགས་འབུལ་ཞུས་པ་དང་། དེ་བཞིན་བོད་ཀྱི་ཆོས་བརྒྱུད་ཁག་གི་བླ་ཆེན་དབུ་ཁྲིད་དང་སྐུ་ཚབ་བཅས་ཀྱིས་༸གོང་ས་མཆོག་ལ་དྲྭ་ཐོག་བརྒྱུད་འཚམས་འདྲི་ཞུས་པའི་བརྙན་པར་ཁག་ཅིག ལྷག་དོན་མགོན་པོ་༸གང་ཉིད་མཆོག་གི་༸སྐུའི་འཁྲུངས་དང་འབྲེལ་བའི་གསུང་འཕྲིན་བརྙན་པར་བཅས་གཟིགས་འབུལ་ཞུས་ཏེ་མགོན་པོ་མཆོག་ཕྱི་ལུགས་ལྟར་དགུང་གྲངས་གྱ་དྲུག་བདག་གིར་བཞེས་པའི་༸སྐུའི་འཁྲུང་སྐར་དུས་ཆེན་སྲུང་བརྩི་གཟབ་རྒྱས་ཞུས་སོང་།མཛད་སྒོའི་ཐོག་མར་བོད་བརྒྱུད་ནང་བསྟན་གྱི་ཆོས་བརྒྱུད་ཁག་གི་བླ་ཆེན་བུ་ཁྲིད་དང་སྐུ་ཚབ་བཅས་ནས་༸གོང་ས་མཆོག་ལ་དྲྭ་ཐོག་བརྒྱུད་འཚམས་འདྲི་ཞུས་པའི་བརྙན་པར་ཁག་གཟིགས་འབུལ་ཞུས་ཏེ། མགོན་པོ་༸གང་ཉིད་མཆོག་ལ་སྒོ་གསུམ་གུས་པའི་ལྷ་ཕྱག་གྲངས་མེད་དང་བཅས་དགའ་དད་སྤྲོ་གསུམ་ངང་ནས་འཚམས་འདྲི་ཞུས་པ་མ་ཟད། ༸གོང་ས་མཆོག་༸སྐུ་ཚེ་༸ཞབས་པད་ཡུན་དུ་བརྟན་པ་དང་མཛད་འཕྲིན་ཆེས་ཆེར་རྒྱས་དགོས་པ་ནི་བོད་མིའི་འཕྲལ་ཕུགས་གཉིས་ཀའི་བདེ་སྐྱིད་ཀྱི་རྩ་བ་ཡིན་ཞེས་གསུངས་སོང་།གཞུང་འབྲེལ་མཛད་སྒོའི་ཐོག་སྩལ་བའི་བཀའ་ཤག་གི་ཡོངས་ཁྱབ་གསུང་བཤད་ནང་སྲིད་སྐྱོང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་ཆེད་ཐུགས་འགན་བཞེས་པ་ནས་བཟུང་ད་ཆ་དགུང་གྲངས་ ༨༦ ལ་མ་ཕེབས་ཀྱི་བར་དུ་བོད་གཞིས་བྱེས་གཉིས་ཀྱི་བོད་མི་ཡོངས་ལ་སོ་སོའི་ཕ་མ་ལྟ་བུའི་གཟིགས་སྐྱོང་གནང་བ་དང་སྒོས་སུ་འཛམ་བུ་གླིང་ཡོངས་ལ་ཞི་བདེ་དང་བྱམས་བརྩེ་གོང་འཕེལ་མཛད་ཁག་གི་མཛད་འཕྲིན་ཁག་དྲན་གསོ་དང་དེ་དག་ལ་འཛམ་གླིང་ཁྱོན་ཡོངས་ནས་བསྔགས་བརྗོད་དང་དགའ་བསུ་ཞུས་ནས་མགོན་པོ་༸གང་ཉིད་མཆོག་ལ་རིགས་ཚན་འདྲ་མིན་ཐོག་སློབ་དཔོན་ཆེན་མོའི་ཕྱག་འཁྱེར་སོགས་ཆེ་བསྟོད་དང་གཟེངས་རྟགས་ ༡༥༠ ལྷག་འབུལ་བཞེས་མཛད་ཡོད་སྐོར་ངོ་སྤྲོད་གནང་སྟེ་བོད་མི་རྣམས་ནས་ངེས་པར་དུ་མགོན་པོ་༸གང་ཉིད་མཆོག་གི་དགོངས་གཞི་རྟོགས་ནས་ཉམས་ལེན་ཞུ་རྒྱུ་གནད་ཀྱི་སྙིང་པོ་ཡིན་པས་བཀའ་དགོངས་བཞིན་སྤང་བླངས་མ་འཛོལ་བ་བྱ་རྒྱུ་གལ་ཆེན་པོ་ཡིན་པར་སྐུལ་མ་གནང་སོང་།དེ་བཞིན་སྲིད་སྐྱོང་མཆོག་ནས་ད་ཆ་ལས་ངན་སྨོན་ལམ་ལོག་པ་རེ་ཟུང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་དྲིན་ལན་ལོག་འཇལ་གྱིས་གཞི་མེད་སྒྲོ་སྐུར་མངོན་སུམ་འཛེམས་མེད་དུ་ཡོང་བཞིན་པ་དག་ལ་མཐལ་གཅིག་ཏུ་གདོང་ལེན་བྱ་རྒྱུ་ཡིན་ཞེས་གསུངས་པ་དང་སྦྲགས་ཏེ་༸གོང་ས་མཆོག་ནི་བོད་རྒྱའི་དཀའ་རྙོག་སེལ་བའི་ལྡེ་མིག་གཅིག་པོ་དེ་ཡིན་པའི་དངོས་དོན་ངོ་མ་ངོས་འཛིན་ཞུས་ནས་བོད་རྒྱ་མི་རིགས་གཉིས་བསྐལ་བའི་བར་དུ་ཞི་བདེ་མཛའ་མཐུན་ངང་མཉམ་གནས་མཉམ་འཚོ་ཐུབ་པའི་ལོ་རྒྱུས་ཀྱི་གོ་སྐབས་ཆུད་ཟོས་སུ་མ་བཏང་བར་གཉིས་སྨན་དབུ་མའི་ལམ་གྱི་དགོངས་དོན་འོག་སྔོན་འགྲོའི་ཆ་རྐྱེན་གང་ཡང་མེད་པར་༸གོང་ས་མཆོག་རྒྱ་ནག་དང་བོད་ནང་འཚམས་གཟིགས་སུ་༸ཞབས་སོར་འཁོད་ཐབས་བསམ་ཞིབ་གང་མགྱོགས་ཡོང་བའི་འབོད་སྐུལ་ཞུས་ཡོད། ལྷག་དོན་སྲིད་སྐྱོང་མཆོག་གིས་བཙན་བྱོལ་བོད་མིའི་བཅའ་ཁྲིམས་ནི་མང་གཙོའི་སྲོག་ཤིང་ཡིན་པས་སྲོག་ཤིང་དོར་བའི་མང་གཙོ་ནི་སྤྱི་ཚོགས་ཤིག་ནང་འཚོ་གནས་ཐུབ་པའི་གཞི་རྟེན་མེད་པས་ཚང་མས་དེ་དོན་དགོངས་འཇགས་ཡོང་བའི་འབོད་སྐུལ་ཞུས་པ་མ་ཟད་རྩ་དོན་འདིའི་འོག་བོད་མི་ཚང་མས་ཁ་གཏད་ངོ་བ་ངོས་ཟིན་པའི་ཐོག་ནས་རང་གཞན་རོགས་གསུམ་གྱི་མི་མཐུན་པའི་ཆ་རྣམས་གོ་བསྡུར་སྦྱངས་བཤད་ཀྱི་ལམ་ནས་མཐུན་པ་བཟོས་ཏེ་རྩ་དོན་དང་སྤྱི་པའི་བདེ་དོན་ཐོག་ཚང་མས་ནུས་པ་མཉམ་སྤུངས་གནང་རྒྱུ་ནི་ལོ་རྒྱུས་ཀྱིས་བཙན་བྱོལ་བོད་མི་ཚོར་བསྐུར་བའི་ལས་འགན་ལྡོག་ཏུ་མེད་པ་དེ་ཡིན་ཞེས་དྲན་སྐུལ་གནང་སོང་། ༸སྐུའི་འཁྲུངས་སྐར་གྱི་མཛད་སྒོ་དང་བསྟུན་བོད་མིའི་སྒྲིག་འཛུགས་ཀྱི་སྲི་ཞུ་བ་ལས་རྒྱུན་ཞབས་ལོ་ ༢༥ ཧྲིལ་པོ་ལོན་པའི་སྲི་ཞུ་བ་རྒན་གྲས་གྲངས་ ༦ ལ་ལས་བྱེད་འདེམས་ལྷན་ནས་ལེགས་གསོའི་གཟེངས་རྟགས་ཕྱག་འཁྱེར་གནང་བ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་ཞུ་བའི་ཁོངས་དམིགས་བསལ་ཧུར་བརྩོན་དང་གཟེངས་སུ་ཐོན་པའི་ཕྱག་ལས་གནང་མཁན་སྲི་ཞུ་བ་གཉིས་ལ་གཟེངས་རྟགས་སོགས་གནང་ཡོད། སྤྱིར་དེ་རིང་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་གནས་སྟངས་ལ་ལྟོས་མེད་འཛམ་གླིང་ཡུལ་གྲུ་གང་སར་ཡོད་པའི་བཙན་བྱོལ་བོད་མི་རྣམས་ནས་༸སྐུའི་འཁྲུངས་སྐར་ལ་དགའ་བསུའི་འཚམས་འདྲིའི་བརྙན་པར་འདོན་སྤེལ་དང་༸གོང་ས་མཆོག་ལ་དབྱངས་ཀྱི་བསྟོད་གླུ་ཕུལ་བ། དེ་བཞིན་རོལ་དབྱངས་འདུ་འཛོམས་ལ་སོགས་པའི་རྣམ་པ་འདྲ་མིན་བརྒྱུད་དེ་ཉིན་མོ་དེ་སྲུང་བརྩི་གཟབ་རྒྱས་ཞུས་པ་མ་ཟད། ཁ་རས་གྱོན་རྒྱུ་དང་ལག་པ་གཙང་ཉར་སོགས་ཡིད་ཟབ་གནང་ཐོག་བཙན་བྱོལ་བོད་མིའི་གནས་སྡོད་གང་སར་མངར་ཟས་བགོ་འགྲེམས་དང་། དབུལ་པོར་ཟས་སྦྱིན། ཤིང་སྣ་འདེབས་འཛུགས་ལ་སོགས་པའི་གནང་སྒོ་སྤེལ་ཏེ་༸སྐུའི་འཁྲུངས་སྐར་ཉིན་མོ་སྲུང་བརྩི་གཟབ་རྒྱས་ཞུས་ཡོད་པ་རེད།