དེ་རིང་ཞོགས་པ་ཕྱག་ཚོད་ ༡༠ པའི་ཐོག་བཞུགས་སྒར་དུ་རྟེན་གཞི་བྱས་པའི་བོད་ཀྱི་དཔེ་མཛོད་ཁང་དུ་ ༡༨༩༥ ནས་ ༡༩༥༩ བར་ལོ་རྒྱུས་ལྡན་པའི་བོད་ཀྱི་དམག་དཔུང་གི་འདྲ་པར་འགྲེམས་སྟོན་དབུ་འཛུགས་གནང་སོང་།
དེ་ཡང་བོད་ཀྱི་དཔེ་མཛོད་ཁང་དང་། འབུམ་རམས་པ་ Alice Travers ཨེ་ལི་སེ་ཊ་ར་ཝེ་སི་ལགས་གཉིས་ཀྱི་གོ་སྒྲིག་འོག་དེ་གའི་དཔེ་མཛོད་ཁང་གི་སེ་སྒར་ཚན་རིག་ལྟེ་གནས་ཁང་གི་ཐོག་བརྩེགས་གསུམ་པར་འགྲེམས་སྟོན་དབུ་འཛུགས་གནང་ཡོད་པ་དང་། འགྲེམས་སྟོན་འདི་ཉིད་དངོས་སུ་དབུ་འཛུགས་མ་གནང་གོང་དུ། དེ་གའི་དཔེ་མཛོད་ཁང་གི་ཚོགས་ཁང་དུ་དེ་འབྲེལ་དབུ་འབྱེད་མཛད་སྒོའི་སྐབས། སྐུ་མགྲོན་གཙོ་བོ་དིང་རི་བོད་དམག་ཟུར་པ་སྐུ་ཞབས་ངག་དབང་ལགས་དང་། སྐུ་སྲུང་དམག་ཟུར་བཀྲ་ཤིས་ཚེ་རིང་ལགས་དང་ཐུབ་བསྟན་ལགས། གཞན་ཡང་སྐུ་མགྲོན་ཁག་ཅིག་དང་ཟུར་ཉན་པ་རྣམས་ལྷན་བཞུགས་གནང་ཡོད།
སྐབས་དེར་སྐུ་མགྲོན་གཙོ་བོ་དིང་རི་བོད་དམག་ཟུར་པ་ངག་དབང་ལགས་ཀྱིས་རང་ཉིད་ཀྱི་སྐྱེས་ཡུལ་ངོ་སྤྲོད་དང་འབྲེལ་ནས། དེ་སྔ་རང་ཉིད་དམག་མི་ཡིན་པའི་རྐྱེན་གྱི་རྒྱའི་བཙོན་ཁང་ནང་ལོ་ ༢༡ བཞུགས་མྱོང་བ་ངོ་སྤྲོད་དང་འབྲེལ། བོད་ཀྱི་ལོ་རྒྱུས་ནང་བོད་དམག་དང་བོད་དངུལ་ཀྱི་ཐད་ལ་རོབ་ཙམ་གླེང་སློང་གནང་བའི་བརྒྱུད་བོད་འདི་ཉིད་རང་བཙན་གཙང་མ་ཞིག་ཡིན་པ་འགྲེལ་བརྗོད་གནང་བྱུང་།
འདི་ག་རླུང་འཕྲིན་ཁང་ནས་འགྲེམས་སྟོན་དེའི་བཀོད་སྒྲིག་པ་འབུམ་རམས་པ་ Alice Travers ལགས་ལ་འགྲེམས་སྟོན་དེའི་གལ་གནད་ཐད་ལ་བཅར་འདྲི་ཞུས་སྐབས་ཁོང་གིས། བོད་དམག་ནི་བོད་ཀྱི་དཔལ་ཡོན་ནང་ནས་གླེང་སློང་ཆེས་ཉུང་བ་ཞིག་ཆགས་ཀྱི་ཡོད་པ་དང་འབྲེལ་དེའི་ལོ་རྒྱུས་ཐོག་ཉམས་ཞིབ་བྱ་དགོས་རྒྱུ་གལ་ཆེན་པོ་ཞིག་ཆགས་ཀྱི་ཡོད་སྐོར་དང་། བོད་དམག་ཐོག་ཉམས་ཞིབ་གནང་དགོས་པའི་དམིགས་ཡུལ་གཙོ་བོ་ནི་བོད་དམག་གི་ལོ་རྒྱུས་དེ་དག་སྲུང་སྐྱོབ་བྱ་རྒྱུ་ཙམ་མ་ཟད། སྐབས་འགར་བརྗེད་ཚར་བའི་ལོ་རྒྱུས་ཀྱི་བདེན་དཔང་དེ་དག་ཉར་འཚག་ཐུབ་རྒྱུའི་ཆེད་དུ་ཡིན་པ་འགྲེལ་བརྗོད་གནང་བྱུང་།
ཁོང་གིས་ད་དུང་འགྲེམས་སྟོན་དེའི་བརྒྱུད་ནས་བོད་དམག་དམག་ཆས་དེ་དག་གི་འགྱུར་བའི་ཁྲོད་ནས་སྐབས་དེ་དང་དེའི་དུས་ཀྱི་བོད་ཀྱི་ཆབ་སྲིད་ཀྱི་འགྱུར་གྲོས་མཚོན་ཐུབ་ཀྱི་ཡོད་སྐོར་གསུངས་བྱུང་།
རྩ་བའི་འབུམ་རམས་པ་ Alice Travers ལགས་ཀྱིས་ལྷ་སའི་སྐུ་དྲག་གི་སྐོར་ལ་ཉམས་ཞིབ་གནང་ཡོད་པ་དང་འབྲེལ། སྐུ་དྲག་རྣམས་དམག་དཔོན་དང་སྡེ་དཔོན་སོགས་ཀྱི་གོ་གནས་ཡོད་པའི་རྐྱེན་གྱིས་བོད་དམག་ཐོག་ཞིབ་འཇུག་ཀྱིས་དེ་འབྲེལ་དཔེ་དེབ་མི་ཉུང་བ་ཞིག་འདོན་སྤེལ་གནང་ཡོད་པ་རེད་འདུག
ཕྱོགས་མཚུངས། དེ་རིང་བོད་ཀྱི་དཔེ་མཛོད་ཁང་གི་སེ་སྒར་ཚན་རིག་ལྟེ་གནས་ཁང་དུ་བོད་མིའི་སྒྲིག་འཛུག་ཆོས་རིག་ལས་ཁུངས་ཀྱི་གོ་སྒྲིག་འོག་དགེ་འདུན་པའི་དེང་དུས་ཚན་རིག་ཟབ་སྦྱོང་ཐེངས་བདུན་པ་དེ་བཞིན་དེ་རིང་སྔ་དྲོ་ཕྱག་ཚོད་ ༡༠ ཐོག་དབུ་འཛུགས་ཀྱིས་ཟླ་ ༡༡ ཚེས་ ༥ བར་ཚོགས་ཀྱི་ཡོད་པ་རེད་འདུག
